ߓߏߞߏ߫ ߤߙߊߡߎ߬ ߓߊ߰ߓߊ߰ߟߌ߬ߟߊ߬ ߢߍߡߐ߮ ߘߏ߫ ߟߋ߬ ߝߊ߰ ߘߊ߫ ߖߋ߬ߟߌ߬ߓߊ߬ߘߎ߯ ߣߊ߲߬ߕߌ߮ ߟߎ߬ ߓߟߏ߫߸ ߣߊ߲߬ߕߌ߮ ߟߎ߬ ߟߊ߫ ߝߐߟߌ߫ ߘߐ߫، ߊ߬ߟߎ߫ ߞߊ߬ ߢߍߡߐ߮ ߣߌ߲߬ ߝߊ߰ ߟߐ߯ߞߎ߲߫ ߕߊ߬ߡߌ߲߬ߣߍ߲ ߠߋ߬ ߡߊ߬߸ ߟߊߞ ߗߊߘߌ߬ ߡߊ߬ߙߊ ߞߣߐ߫، ߏ߬ ߡߍ߲ ߦߋ߫ ߖߋ߬ߟߌ߬ߓߊ߬ߘߎ߯ ߣߌ߫ ߖߋ߬ߟߌ߬ߓߊ߬ߟߊ߫ ߣߌ߫ ߞߊߡߋߙߎ߲ߣߌ߲߬ ߊ߬ ߣߌ߫ ߗߊߘߌ߬ ߓߐߕߏ߲ ߠߊ߫؛ ߣߊ߲߬ߕߌ߮ ߡߍ߲߬ ߠߎ߬ ߟߊ߫ ߝߐߟߌ߫ ߘߐ߫߸ ߊ߬ߟߎ߫ ߞߊ߬ ߓߊߞߎߙߊ߫ ߝߊ߰ ߊ߬ߟߎ߬ ߟߊ߫ ߞߟߍ߬ ߝߊ߲ߝߘߊ߫ ߛߌ߰ߣߍ߲ ߘߏ߫ ߟߋ߬ ߟߊ߫، ߏ߬ ߝߊ߲߬ߝߘߊ ߡߍ߲ ߛߌ߰ ߘߊ߫ ߘߓߊ߬ߓߌߟߊ ߕߟߋ߬ ߁߆ ߕߊ߬ߡߌ߲߬ߣߍ߲ ߡߊ߬.
ߛߙߋߦߊ ߘߏ߫ ߦߴߊ߬ ߦߌ߬ߘߊ߬ ߟߊ߫߸ ߞߟߍ߬ ߝߊ߲ߝߘߊ ߣߌ߲߬ ߛߌ߰ߣߍ߲߫ ߛߐ߰ߡߘߊ߬ ߖߏߣߊ ߟߋ߬ ߟߊ߫߸ ߞߏ߫ ߣߊ߲߬ߕߌ߮ ߟߎ߬ ߟߊ߫ ߞߎߟߎ߲ߞߎߟߎ߲ ߘߏ߫ ߟߋ߬ ߞߊ߬ ߗߍ߭ ߣߌ߬ ߛߌ߰ ߘߌ߲ߞߌߙߊ ߜߊ߬ߛߌ߬ ߛߋ߲߬ߧߊ߫ ߛߊ߬ߓߊ߫، ߓߊߞߎߙߊ߫ ߦߋ߫ ߗߍ߭ ߣߌ߲߬ ߞߟߍ߬ߞߍ߬ ߕߐ߮ ߟߋ߬ ߘߌ߫߸ ߊ߬ ߕߐ߯ ߖߍ߬ߘߍ ߟߋ߬ ߦߋ߫ ߌߓߙߊߤߌߡ ߡߤߊߡߊߘߎ߬ ߘߌ߫، ߖߋ߬ߟߌ߬ߓߊ߬ߘߎ߯ ߣߊ߲߬ߕߌ߮ ߟߎ߬߬ ߟߊ߫ ߝߐߟߌ߫ ߘߐ߫߸ ߞߏ߫ ߓߊߞߎߙߊ߫ ߕߘߍ߬ ߓߘߊ߫ ߞߍ߫ ߓߊ߰ߓߊ߰ߟߌ߬ ߢߍߡߐ߮ ߘߌ߫، ߞߊ߬ߦߌ߯ ߂߀߂߁ ߘߓߊ߬ߕߊ ߟߋ߬ ߟߊ߫߸ ߊ߬ ߘߏ߲߬ ߞߏ߫ ߗߍ߭ ߣߌ߲߬ ߛߋ߲߬ ߦߋ߫ ߓߋ߬ߒ߬ߞߊ߲߬ߠߌ߲߬ ߛߌߦߊߡߊ߲߫ ߠߋ߬ ߘߐ߫.
ߡߍ߲ ߠߎ߬ ߟߐ߬ ߘߊ߫ ߖߋ߬ߟߌ߬ߓߊ߬ߘߎ߯ ߣߊ߲߬ߕߌ߮ ߟߎ߬ ߖߍ߬ߘߍ ߣߌ߫ ߖߋ߬ߟߌ߬ߓߊ߬ߟߊ߫ ߣߌ߫ ߞߊߡߋߙߎ߲߬ߣߌ߲߬ ߡߊ߬߸ ߛߋ߬ߌ߬ߘߌߞ ߊߓߘߊ߫ ߟߋ߬ ߞߏ߫ ߕߋ߲߬߸ ߊ߬ߟߋ ߦߋ߫ ߓߘߍ߬ߓߘߍ߬ߟߌ ߟߊ߬ߞߊ߲߬ߘߊ߬ߟߌ߬ ߞߏ ߟߐ߲ߠߊ߫ ߥߣߊ ߟߋ߬ ߘߌ߫ ߖߋ߬ߟߌ߬ߓߊ߬ߘߎ߯ ߣߊ߲߬ߕߌ߮ ߟߎ߬ ߝߍ߬߸ ߊ߬ߟߋ ߟߋ߬ ߞߊ߬ ߞߟߍ߬ ߝߊ߲ߝߘߊ ߣߌ߲߬ ߛߌ߰ ߛߋ߲߬ ߠߊ߫߸ ߞߊ߬ ߓߊ߲߫ ߞߊ߬ ߛߋߓߊ߯ߦߊ ߛߐ߬ߘߐ߲߬، ߣߊ߲߬ߕߌ߮ ߟߎ߬ ߓߊ߲ ߞߐ ߛߋߓߊ߯ߦߊ ߛߐ߬ߘߐ߲߬ ߠߊ߫߸ ߊ߬ߟߎ߬ ߓߍߣߵߊ߬ߟߎ߬ ߢߊ߫ ߕߏ߫ ߟߋ߬ ߞߙߎ ߣߌ߲߬ ߝߍ߬߸ ߞߵߊ߬ ߟߐ߲߫ ߢߍߡߐ߯ ߜߘߍ߫ ߡߍ߲ ߣߊ߬ߕߐ߬ ߟߊߛߌ߰ ߟߊ߫.
ߛߋ߬ߌ߬ߘߌߞ ߊߓߘߊ߫ ߟߊ߫ ߝߐߟߌ߫ ߘߐ߫߸ ߊ߬ ߛߋ߲߬ߧߊ߬ ߝߟߐ߫ ߕߍ߫ ߣߌ߲߬ ߘߌ߫ ߓߏߞߏ߫ ߤߙߊߡߎ߲߬ ߓߊ߰ߓߊ߰ߟߌ߬ ߢߍߡߐ߮ ߘߏ߫ ߦߋ߫ ߝߊ߰߸ ߊ߬ ߘߏ߲߬ ߞߏ߫ ߓߊߞߎߙߊ߫ ߟߊ߫ ߝߊ߰ߟߌ ߣߌ߲߬ ߕߍ߫ ߣߊ߬ ߦߟߍ߬ߡߊ߲߬ ߛߌ߫ ߟߋ߬ ߟߊߘߏ߲߬ ߠߊ߫ ߓߏߞߏ߫ ߤߙߊߡߎ߲߬ ߠߊ߫ ߓߊ߰ߓߊ߰ߟߌ߬ ߓߊ߯ߙߊ ߟߎ߬ ߘߐ߫߸ ߛߐ߲߰ߣߊ߬ߝߙߍ߫߹ ߞߊ߬ ߓߋ߲߬ߒ߬ߞߊ߲߬ߠߌ߲߬ ߞߙߎ ߣߌ߲߬ ߝߊ߲߬ߞߊ ߘߐ߯ߦߊ߫߸ ߟߊ߬ߞߊ߲߬ߘߊ߬ߟߌ߬ ߥߣߊ ߣߌ߲߬ ߠߊ߫ ߝߐߟߌ߫ ߘߐ߫߸ ߞߏ߫ ߖߋ߬ߟߌ߬ߓߊ߬ߘߎ߯ ߣߊ߲߬ߕߌ߮ ߟߎ߬ ߞߊ߫ ߞߊ߲߫ ߠߋ߬ ߞߊ߬ ߝߊ߰ߟߌ ߣߌ߲߬ ߕߣߐ߬ߓߐ߫߸ ߞߊ߬ ߟߊ߬ߞߊ߲߬ߘߊ߬ߟߌ ߟߎ߬ ߝߊ߲߬ߞߊ߫ ߘߏ߲߬ ߞߏߛߓߍ߫.
