ߡߊ߬ߟߌ ߖߡߊߣߊ ߞߣߐ߫߸ ߓߊ߰ߓߊ߰ߟߌ߬ ߥߊߟߋ߫ ߘߏ߫ ߟߋ߬ ߢߍߛߌ߲߫ ߘߊ߫ ߣߊ߲߬ߕߌ߮ ߟߎ߫ ߡߊ߬ ߝߊ߲߬ ߛߌߦߊߡߊ߲߫ ߘߐ߫، ߦߏ߫ ߛߊ߲ߘߊߙߋ߫߸ ߛߊߤߍߟ߸ ߊ߬ ߣߌ߫ ߞߊߦߋߛ߸ ߘߌߓߏߟߌ߫… ߓߋ߬ߒ߬ߞߊ߲߬ߠߌ߲ ߣߌ߲߬ ߟߐ߬ ߘߊ߫ ߕߌ߲߬ߞߎߘߎ߲߫ ߛߊ߬ߓߊ߫ ߟߋ߬ ߡߊ߬߸ ߞߊߦߋߛ߸ ߛߊߤߍߟ߸ ߊ߬ ߣߌ߫ ߛߋߞߎ߫ ߡߊ߬ߙߊ ߘߐ߫، ߡߍ߲ ߓߍ߲߬ߕߐ߫ ߞߊߦߋߛ ߕߊ ߡߊ߬߸ ߛߙߋ߫ ߘߎ߯ߘߋ߲ ߘߏ߫ ߟߊ߫ ߝߐߟߌ߫ ߘߐ߫، ߞߏ߫ ߓߊ߰ߓߊ߰ߟߌ߬ߟߊ ߡߍ߲߬ ߠߎ߫ ߣߊ߬ ߘߊ߫ ߛߐ߰ߡߘߊ߬ ߖߏߣߊ ߟߋ߬ ߟߊ߫߸ ߘߏ߫ ߟߎ߫ ߝߣߊ߫ ߟߊ߫ ߝߐߟߌ߫ ߘߐ߫߸ ߞߏ߫ ߊ߬ߟߎ߬ ߖߍ߬ߘߍ ߞߊ߬ ߡߊ߬ߙߌ߬ߝߊ߬ ߡߊ߲ߞߊ߲ ߠߎ߬ ߡߍ߲߫ ߠߋ߬ ߆ ߕߎߡߊ ߟߊ߫، ߛߙߋ߫ ߞߋߟߋ߲߫ ߣߌ߲߬ ߠߊ߫ ߝߐߟߌ߫ ߘߐ߫߸ ߞߏ߫ ߊ߬ߟߎ߫ ߣߊ߬ ߘߊ߫ ߜߋ߬ߕߋߜߋ߭ ߟߋ߬ ߞߣߐ߫߸ ߞߊ߬ ߥߊ߫ ߖߌ߰ ߣߊ߲߬ߕߌ߮ ߟߎ߬ ߟߊ߫ ߘߊ߮ ߞߊ߲߬.
ߏ߬ ߞߐ߫ ߞߊ߬ ߥߊ߫ ߓߋ߬ ߕߐ߲߫ ߓߟߏߡߊ߫ ߝߌ߬ߟߊ߫ ߞߊ߲߬، ߏ߬ ߥߊ߯ߕߌ߫ ߞߋߟߋ߲߫ ߠߊ߫ ߝߣߊ߫ ߓߊ߰ߓߊ߰ߟߌ߬ ߞߙߎ߫ ߜߘߍ߫ ߓߋ߬ ߘߊ߫ ߞߊߦߋߛ ߞߊ߲߬ ߞߊ߬ ߞߏߕߌ߯ ߢߍߡߐ߮ ߟߊ߫ ߓߏ߲ ߖߋ߬ߣߌ߲߬߸ ߓߊ߰ߓߊ߰ߟߌ߬ߟߊ ߡߍ߲߬ ߠߎ߬ ߡߊ߫ ߘߊ߲߬ ߏ߬ ߘߐߙߐ߲߫ ߡߊ߬ ߘߋ߬߸ ߊ߬ߟߎ߫ ߕߊ߯ ߘߊ߫ ߟߋ߬ ߕߊ߯ߡߊ߫ ߞߍߟߊ߫ ߟߎ߬ ߟߊ߫ ߘߐ߬ߛߏ߰ߙߏ߬ߟߌ߬ ߦߙߐ ߘߏ߫ ߘߐ߫߸ ߘߌߓߏߟߌ߫ ߞߊߦߋߛ ߡߊ߬ߙߊ ߘߐ߫، ߏ߬ ߦߙߐ ߡߍ߲ ߦߋ߫ ߛߣߍ߬ߜ߭ߊ߬ߟߌ߬ ߓߐߕߏ߲ ߠߊ߫߸ ߝߘߏ߬ߓߊ ߓߊ߯ߙߊ߫ ߞߍߟߊ ߟߎ߬ ߓߘߴߊ߬ ߟߊߛߋ߫ ߞߏ߫ ߊ߬ߟߎ߬ ߟߊ߫߫ ߓߊ߯ߙߊ߫ ߞߍߟߊ ߟߎ߬ ߓߘߴߊ߬ ߟߊߢߌߣߌ߲߫ ߊ߬ߟߎ߫ ߝߍ߬ ߛߐ߱ ߣߌ߲߬ ߡߊ߬߸ ߞߏ߫ ߊ߬ߟߎ߬ ߞߊߣߊ߬ ߥߊ߫ ߓߊ߯ߙߊ߫ ߦߙߐ ߓߌ߬.
ߞߊ߬ ߓߍ߲߬ ߛߊߤߍߟ ߡߊ߬ߙߊ ߡߊ߬߸ ߛߙߋ ߟߎ߬ ߟߊ߫ ߝߐߟߌ߫ ߘߐ߫ ߦߋ߲߬، ߓߊ߰ߓߊ߰ߟߌ߬ߟߊ ߟߎ߬ ߞߵߊ߬ߟߎ߬ ߟߊ߫ ߓߊ߯ߙߊ ߖߎ߮ ߘߊߡߌ߬ߣߊ߬ ߦߋ߲߬ ߛߐ߰ߡߊ߬ߘߊ ߅ ߕߎ߬ߡߊ ߟߋ߬ ߟߊ߫߸ ߊ߬ߟߎ߬ ߟߊ߫ ߓߋ߬ߒ߬ߞߊ߲߬ߠߌ߲߬ ߝߟߐ ߞߍ߫ ߘߊ߫ ߜ߭ߏߜ߭ߌ߫ ߘߎ߱ ߟߋ߬ ߟߊ߫߸ ߏ߬ ߡߍ߲ ߦߋ߫ ߡߏߙߌߕߊߣߌ߫ ߓߐߕߏ߲ ߠߊ߫، ߝߣߊ߫ ߕߐ߲߫ ߓߟߏߡߊ ߟߎ߬ ߞߊ߬ ߓߊ߰ߓߊ߰ߟߌ߬ߟߊ ߡߍ߲߬ ߠߎ߬ ߛߌߦߊߡߊ߲߫ ߠߋ߬ ߝߊ߰߸ ߊ߬ ߣߌ߫ ߞߵߊ߬ߟߎ߬ ߟߊ߫ ߞߟߍ߬ ߝߋ߲߬ ߛߌߦߊߡߊ߲߫ ߕߌߢߍ߫، ߞߎ߲߬ߠߊ߬ߝߎߟߋ߲߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߡߊ߬ߙߊ ߣߌ߲߬ ߓߘߊ߫ ߟߊߡߌߣߌ߲߫ ߣߊ߲߬ߕߌ߮ ߟߎ߬ ߓߟߏ߫، ߊ߲ ߠߊ߫ ߞߎ߲ߠߊ߬ߝߎߟߋ߲߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߞߍ߬ߟߍ ߟߎ߬ ߞߏ߬ߣߌ߲ ߜߊ߬ߣߍ߲߫ ߠߋ߬ ߕߋ߲߬߸ ߣߊ߲߬ߕߌ߮ ߟߎ߬ ߣߌ߫ ߓߊ߰ߓߊ߰ߟߌ߬ߟߊ ߡߍ߲߬ ߠߎ߬ ߕߍ߫ ߡߟߏߘߏ߫ ߘߎ߱ ߟߊ߫، ߛߙߋ߫ ߜߘߍ߫ ߟߊ߫ ߝߐߟߌ߫ ߘߐ߫߸ ߣߊ߲߬ߕߌ߮ ߟߎ߬ ߓߘߊ߫ ߞߍ߫ ߞߊ߬ ߡߊ߬ߙߊ ߣߌ߲߬ ߘߏ߲߬ ߘߊ߫ ߡߊߟߐ߲ߣߍ߲ ߓߍ߯ ߡߌ߬ߘߊ߬، ߟߐ߯ߘߎ߫ ߞߐ߲ߛߏ ߟߎ߬ ߓߍ߯ ߓߐ ߟߐߕߐ߲ߣߍ߲߫ ߠߋ߬ ߣߌߦߣߏ߫ ߞߣߐ߫ ߓߌ߬.
