ߖߊ߬ߕߋ߬ߘߐ߬ߛߌ߰ ߟߊߓߊ߲ ߡߍ߲ ߠߎ߬ ߓߐ߫ ߘߊ߫ ߞߎߣߎ߲߬߸ ߔߊߟߍߛߑߕߌ߲߫ ߞߐߡߊߓߌ߲ߓߌ߲ߓߊ߮ ߟߎ߬ ߞߵߊ߬ ߦߌ߬ߘߊ߬ ߞߏ߫ ߡߐ߰ ߅߁ ߠߋ߬ ߓߣߐ߬ ߘߴߊ߬ߟߎ߬ ߣߌ ߘߐ߫ ߞߐ߬ߓߊ߬ߟߏ߲ ߕߊ߬ߡߌ߲߬ߣߍ߲ ߡߊ߬، ߝߣߊ߫ ߌߛߌ߬ߙߊ߬ߌߟߊ߫ ߟߊ߫ ߥߊ߬ߟߏ߲߬ߠߌ߲ ߘߏ߫ ߛߋ߫ ߘߊ߫ ߟߋ߬ ߞߊߝߋ߫߫ ߦߙߐ ߘߏ߫ ߞߊ߲߬߸ ߜ߭ߊߖ߭ߊ߬ ߞߐߘߐ߲߫ ߝߊ߲߭ߝߍ߬߸ ߞߊ߬ ߡߐ߰ ߂߁ ߓߐ߬ߣߐ߫ ߊ߬ ߣߌ ߘߐ߫ ߦߋ߲߬، ߡߐ߰ ߛߌߦߊߡߊ߲߫ ߠߋ߬ ߞߏ߬ߣߌ߲ ߓߘߴߊ߬ߟߎ߬ ߞߊ߲ߓߐ߫ ߞߊ߬ ߞߍ߬ߟߍ ߣߌ߲߬ ߞߐ߲߫߸ ߊ߬ ߣߌ߫ ߞߊ߬ ߞߎߡߊߢߐ߲߯ߦߊ ߟߎ߬ ߟߊߢߌߣߌ߲߫ ߘߊߡߌ߬ߣߊ߬ ߞߏ߫ ߞߎߘߊ߫، ߞߟߍ߬ ߟߊߢߐ߲ߢߐ߲ ߞߏ߬ߣߌ߲ ߦߋ߫ ߛߋ߲߬ߠߊ߫߸ ߌߛߌ߬ߙߊ߬ߌߟߊ߫ ߝߣߊ߫߬ ߦߴߊ߬ ߟߊ߫ ߛߍ߬ߘߏ߲ ߞߊ߲߬ ߤߊߟߌ߬ ߛߊ߫.
ߌߛߌ߬ߙߊ߬ߌߟߊ߫ ߟߊ߫ ߞߎߣߎ߲߬ ߥߊ߬ߟߏ߲ߠߌ߲ ߢߍߛߌ߲ߣߍ߲߫ ߕߘߍ߬ ߦߋ߫ ߜ߭ߊߖ߭ߊ߬ ߕߟߋ߬ߓߋ ߟߋ߬ ߞߊ߲߬، ߔߊߟߍߛߑߕߌ߲߫ ߡߌ߬ߙߌ߲߬ߘߌ ߡߊ߬ߞߊ߲߬ߞߊ߲߬ߠߌ߲߬ ߞߙߎ ߟߊ߫ ߝߐߟߌ߫ ߘߐ߫، ߡߎ߮ ߟߊߥߟߌ ߟߎ߬ ߝߊ߲߬ߞߊ ߓߏ߲߬ߧߊ߬ ߘߊ߫ ߟߋ߬ ߦߋ߲߬ ߥߊ߯ߕߌ߫ ߟߊߓߊ߲ ߢߌ߲߬ ߠߎ߬ ߟߊ߫ ߞߏߛߓߍ، ߥߊ߬ߟߏ߲߬ߠߌ߲ ߡߍ߲߬ ߠߎ߬ ߓߘߊ߫ ߞߍ߫ ߛߊߓߎ߫ ߘߌ߫ ߜ߭ߊߖ߭ߊ߬ ߞߊ߲߬߸ ߝߏ߫ ߞߊ߬ ߓߘߍ߬ߓߘߍ߬ߟߌ߬ ߡߐ߮ ߘߏ߫ ߟߎ߫ ߟߐ߬ ߞߎߡߊ߫ ߟߊ߫ ߌߛߌ߬ߙߊ߬ߌߟߊ߫ ߞߣߐ߫، ߟߐ߯ߞߎ߲߫ ߟߊߓߊ߲߫ ߣߌ߲߬ ߠߊ߫ ߌߛߌ߬ߙߊ߬ߌߟߊ߫ ߞߏߟߊߕߍ߮ ߞߙߎ ߢߍߡߐ߮ ߞߘߐ߸ ߣߊߝߑߕߊߟߌ߫ ߓߣߋߕ ߟߋ߬ ߞߊ߬ ߥߊ߬ߟߏ߲߬ߠߌ߲ ߠߎ߬ ߟߊߢߌߣߌ߲߫ ߊ߬ ߣߌ߫ ߞߊ߬ ߡߐ߰ ߘߌߦߊߜߏߦߊߣߍ߲߫ ߡߌ߬ߣߊ߬ߣߍ߲ ߠߎ߬ ߟߊߓߌ߬ߟߊ߬ߞߏ ߟߊߢߌߣߌ߲߫.
ߦߊߦߌߙ ߟߊߔߌߘ ߞߎ߲߬ߠߊ߬ߛߌ߰ߟߌ߫ ߞߙߎ ߢߍߡߐ߮ ߞߵߊ߬ ߦߌ߬ߘߊ߫ ߟߋ߬ ߞߎߣߎ߲߬߸ ߞߏ߫ ߣߝߊ߬ ߝߏߛߌ߬ ߟߋ߬ ߕߍ߫ ߞߍ߬ߟߍ ߟߎ߬ ߥߊ߫ ߟߊ߫ ߢߍߝߍ߬ ߓߎ߬ߕߎ߲߬، ߊ߬ ߟߊ߫ ߞߎߡߊ߫ ߘߐ߫߸ ߊ߬ ߞߵߊ߬ ߛߌ߲ߛߌ߲߫ ߣߊ߲߬ߕߌ߰ ߢߍߡߐ߮ ߟߊ߫ ߡߙߌߦߊ ߟߎ߬ ߟߋ߬ ߞߊ߲߬߸ ߞߏ߫ ߓߊ߲ߘߋ߫ ߜ߭ߊߖ߭ߊ߬ ߖߡߊ߬ߣߊ ߛߌߟߊ ߦߋ߫ ߖߐ ߛߌߟߊ ߟߋ߬ ߘߌ߫߸ ߞߏ߫ ߞߍ߬ߟߍ ߟߎ߬ ߕߍ߫ ߓߍ߲߬ ߊ߬ ߞߣߐ߫، ߌߛߌ߬ߙߊ߬ߌߟߊ߫ ߢߍߡߐ߮ ߟߎ߬ ߟߊ߫ ߝߐߟߌ߫ ߘߐ߫߸ ߞߏ߫ ߞߟߍ߬ ߟߊ߬ߟߐ ߣߌ߲߬ ߕߍߣߊ߬ ߛߌߟߊ߫ ߛߐ߬ߘߐ߲߬ ߠߊ߫߸ ߞߏ߫ ߊ߬ߟߎ߬ ߖߎ߮ ߟߋ߬ ߦߋ߫ ߦߊ߲߬߸ ߏ߬ ߟߎ߬ ߦߋ߫ ߞߎߡߊ߫ ߟߊ߫ ߔߊߟߍߛߑߕߌ߲߫ ߠߋ߬ ߞߊ߲߬، ߌߛߌ߬ߙߊ߬ߌߟߊ߫ ߞߐߞߊ߲߫ ߞߏߕߌ߮ ߖ߭ߌߘߋߦߐ߲߫ ߛߊߙ ߟߊ߫ ߞߎߡߊ߫ ߘߐ߫.
ߌߛߌ߬ߙߊ߬ߌߟߊ߫ ߛߐ߲߬ߣߍ߲߫ ߊߡߙߌߞߌ߬ ߗߋߘߋ߲ ߛߑߕߌߝ߭ ߥߌߕߑߞߐߝ ߟߊ߫ ߡߙߌߦߊ ߟߎ߬ ߡߊ߬߸ ߓߊ߬ߙߌ߬߸ ߤߡߊߛߌ߬ ߡߊ߫ ߛߐ߲߬ ߏ߬ ߡߊ߬ ߤߊߟߌ߬ ߓߌ߬، ߞߕߊߙ ߡߍ߲ ߦߋ߫ ߞߍ߬ߟߍ ߣߌ߲߬ ߕߍߓߊ߯ߦߟߊ ߘߌ߫߸ ߏ߬ ߓߘߴߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߝߙߍ߬ ߟߎ߫ ߛߐ߬ߘߐ߲߬، ߡߍ߲ ߘߌ߫ ߛߋ߫ ߛߌ߰ߞߊ߬ߝߐ ߟߊߣߐ߰ߦߊ߬ ߟߊ߫.
