ߞߊ߬ߟߌ߲߬ߞߐ߬ߞߊ ߟߎ߬ ߞߎ߲߬ߠߊ߬ߦߋ߬ߙߋ߲߬ ߞߏ߬ߓߊ߫ ߟߋ߬ ߕߊ߬ߡߌ߲߬ߘߊ߫ ߛߊߟߌ ߞߐ ߣߌ߲߬ ߘߐ߫߸ ߞߐ߬ߓߊ߬ߟߏ߲ ߂߀߂߅ ߥߊ߬ߛߌ߬ߥߙߊ ߕߋ߬ߟߋ߫ ߀߉ ߡߊ߬، ߊ߬ ߖߊ߲߬ߖߏ߲ ߕߍ߫ ߓߐ߫ ߊ߬ߟߎ߬ ߛߌ߫ ߦߟߌ߫ ߟߊ߫ ߡߎ߬ߕߎ߲߬߸ ߞߵߏ߬ ߞߎ߲߭ ߞߍ߫ ߊ߬ ߕߐ߬ߣߐ ߥߊ߬ߙߊ ߘߌ߫، ߘߏ߫ ߜߘߍ߫ ߕߴߏ߬ ߘߌ߫߸ ߞߊ߬ߟߌ߲߬ߞߐ߫ ߕߐ߮ ߓߘߊ߫ ߓߌ߬ߟߊ߬ ߘߎߢߊ߫ ߕߐ߯ ߕߎߣߎ߲ߓߊߟߌ ߟߎ߬ ߟߊ߫ ߘߐ߬ߛߙߋ ߘߐ߫߸ ߣߊߟߌ߬ߡߎ߲߫ ߘߐ߬ߝߐ ߞߝߊ߬ߓߊ ߘߌ߫، ߏ߬ ߞߘߐ ߕߍ߫ ߘߏ߫ ߜߘߍ߫ ߘߌ߫߸ ߞߝߊ߬ ߞߟߊߒߞߋ߫ ߟߋ߬ ߛߓߍߣߍ߲߫ ߞߊ߬ߟߌ߲߬ߞߐ߫ ߞߊ߲߬߸ ߖߘߍ߬ߞߏ߬ߟߊ߲߬ߘߌ߫ ߕߎ߲߬ߞߙߊ߫ ߓߟߏ߫߸ ߞߊ߬ߝߊ ߏ߬ ߡߍ߲ ߕߐ߯ ߞߏ߫: <<ߞߊ߬ߟߌ߲߬ߞߐ߫ ߘߐ߬ߝߐ ߓߊߕߐߡߐ߲>>߸ ߏ߬ ߟߋ ߞߎ߲߬ߠߊ߬ߓߐ ߓߘߊ߫ ߞߍ߫.

A group of people seated indoors, including a woman in a yellow dress holding a baby, a man in a blue outfit holding the baby, and another man in yellow attire. The environment is casual and features light pink walls.
ߞߊ߬ߙߊ߲߬ߝߊ ߡߎߛߊ߫ ߞߐ߲ߘߍ߫ ߣߌ߫ ߕߘߍ߬ߒ߬ߘߐ߬ߓߊ߮ ߘߏ߫ ߟߎ߫

ߞߝߊ߬ ߞߎ߲߬ߠߊ߬ߓߐ ߣߌ߲߬ ߞߍ߫ ߘߊ߫ ߞߎ߲߬ߠߊ߬ߦߋߙߋ߲ ߘߝߊߣߍ߲ ߠߋ߬ ߞߣߐ߫߸ ߞߊ߬ߟߌ߲߬ߞߐ߫ ߡߙߊ߬ߓߊ߰ߘߎ߯ߟߊ ߖߍ߬ߘߍ ߕߘߍ߬ ߡߍ߲ ߞߣߍ ߞߊ߲߬߸ ߘߊ߯ߕߌ߯ ߝߊ߬ߙߊ߲߬ߛߎߥߊ߫ ߤߓߊ߬، ߏ߬ ߡߍ߲ ߞߊ߬ ߖߊ߲߬ߖߏ߲ ߞߎ߲߬ߠߊߛߌ߰߸ ߞߵߊ߬ ߘߊߦߟߍ߬، ߊ߬ ߟߊ߫ ߛߙߊ߬ߣߎ߲ ߞߍ߫ ߘߊ߫ ߞߏߢߌߡߊߟߐ߲߫ ߞߊ߲߫ ߜߊ߲߰ߛߊ߲߫ ߠߋ߬ ߘߌ߫߸ ߞߊ߬ ߞߊ߬ߝߊ ߣߌ߲߬ ߛߓߍߦߟߊ ߝߏ߬ ߞߵߊ߬ ߞߎߟߎ߲ߖߋ߫߸ ߞߊ߬ ߓߊ߲߫ ߞߊ߬ ߘߋ߲ߡߌߛߍ߲ ߠߎ߬ ߞߟߌ߫ ߣߌ߲߬ ߣߴߊ߬ ߢߐ߲߰ ߘߐ ߟߎ߬ ߟߊߘߍ߲߱ ߡߊ߬ ߛߏ ߟߊߛߓߊ߬ߕߌ ߘߐ߫.

ߞߊ߬ߝߊ ߛߓߍߦߟߊ ߟߊ߫ ߓߋߟߋ߲ߠߊ ߝߣߊ߫ ߞߍ߫ ߘߊ߫ ߓߋߟߋ߲ߠߊ߫ ߟߋ߬ ߘߌ߫ߟ ߡߍ߲ ߞߊ߬ ߖߊ߬ߡߊ ߢߊߞߘߐߛߋ߫، ߞߊ߬ߕߎ߲߯߸ ߞߊ߬ߟߌ߲߬ߞߐ߫ ߡߐ߰ߓߊ ߟߎ߬ ߢߣߊ߫߸ ߞߊ߬ߟߌ߲߬ߞߐ߫ ߛߏߕߌ߮ ߣߴߊ߬ ߞߐ ߢߣߊ߫߸ ߛߏ ߞߏߟߊߕߍ߮ ߟߎ߬ ߢߊߞߘߐ߫߸ ߖߘߍ߬ߞߏ߬ߟߊ߲߬ߘߌ߫ ߕߎ߲߬ߞߙߊ߫ ߞߊ߬ ߞߊ߬ߝߊ ߣߌ߲߬ ߛߓߍ߫ ߞߎ߲ ߠߎ߬ ߢߊߝߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ ߞߵߊ߬ ߟߊߥߌ߬ߟߌ߫ ߞߊ߬ߟߌ߲߬ߞߐ߫ ߛߌ߲ߞߐ߲ ߠߊߘߊ߬ߙߏ ߟߋ߬ ߡߊ߬߸ ߞߊ߬ ߓߍ߯ ߓߐߛߎ߲߫ ߦߌ߬ߘߊ߬߸ ߞߊ߬ ߡߐ߰ߓߊ ߟߎ߬ ߟߊ߫ ߛߌߟߊ ߟߊߞߎߘߦߊ߫߸ ߞߊ߬ ߟߊ߲߬ߓߋ ߟߎ߬ ߟߊߕߏ߫، ߓߊߏ߬߸ ߊ߬ ߞߵߊ߬ ߝߐ߫ ߊ߬ ߟߊ߫ ߞߎߡߊ ߘߐ߫ ߞߏ߫: <<ߘߐ߬ߝߐ ߛߓߍߓߊߟߌ ߦߋ߫ ߘߐ߬ߝߐ߫ ߟߋ߬ ߘߌ߫߸ ߡߍ߲ ߖߊ߲ߞߌߣߍ߲߫ ߕߎߣߎ߲ ߖߊ߲߬ߞߌ߬ߟߌ ߟߊ߫.>> ߖߘߍ߬ߞߏ߬ߟߊ߲߬ߘߌ ߟߋ߬ ߞߊ߲߫ ߕߋ߲߬.

A group of people sitting at a table in a room with a light pink wall, engaged in discussion. Some individuals are looking at documents or books on the table.

ߊ߬ ߞߵߊ߬ ߟߊ߫ ߞߊ߬ߝߊ ߣߌ߲߬ ߛߓߍ߫ ߢߊ ߟߎ߬ ߢߊߝߐ߫߸ ߊ߬ ߛߋ߫ ߘߊ߫ ߞߊ߬ߟߌ߲߬ߞߐ߫ ߡߐ߰ߓߊ߬ ߕߊ߲ ߣߌ߫ ߟߏ߯ߟߎ߫ ߞߎߡߊߢߐ߲߯ߦߊ߫ ߟߊ߫ ߢߊ ߡߍ߲ ߡߊ߬߸ ߡߍ߲ ߠߎ߬ ߞߵߊ߬ ߡߊߘߍ߬ߡߍ߲߫ ߞߊ߬ߝߊ ߣߌ߲߬ ߛߓߍ߫ ߟߊ߫߸ ߊ߬ ߞߵߏ߬ ߢߊߝߐ߫، ߞߵߊ߬ ߕߊ߬ ߞߊ߬ߟߌ߲߬ߞߐ߫ ߡߐ߰ߓߊ ߟߎ߬ ߓߐ ߡߊ߬ ߡߍ߭ߡߊ߬߸ ߞߊ߬ ߣߊ߬ ߡߊ߲߬ߘߋ߲߬߸ ߤߊ߲߯ ߝߏߘߋ߫ ߟߊߡߌߣߌ߲ߓߊ߫ ߕߎ߲߬ߞߙߊ߫ ߞߊ߬ ߞߊ߬ߟߌ߲߬ߞߐ߫ ߜߍ߲߭ߕߍ߰ ߁߈߆߄ ߣߌ߫ ߁߈߇߀ ߕߍߟߊ ߘߐ߫ ߢߊ ߡߍ߲߸ ߊ߬ ߞߵߏ߬ ߡߎ߰ߡߍ ߝߊߙߊ߲ߝߊ߯ߛߌ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߓߍ߯ ߦߴߊ߬ ߟߊ߫ ߞߊ߬ߝߊ ߣߌ߲߬ ߞߣߐ߫. ߊ߬ ߟߊ߫ ߞߎߡߊ ߞߋ߬ߟߋ߲߬ߞߋ߬ߟߋ߲߬ߠߊ ߓߍ߯ ߞߍ߫ ߘߊ߫ ߥߟߊ߬ߘߊ߫ ߟߋ߬ ߘߌ߫ ߢߣߊߓߊ߮ ߟߎ߬ ߦߋ߫߸ ߊ߬ ߝߊ߬ߛߏ ߞߣߐ߫ ߞߊ߬ߟߌ߲߬ߞߐ߫.

ߟߊ߬ߛߙߋ߬ߦߊ߬ߟߌ߬ ߛߌߦߊߡߊ߲߫ ߠߋ߬ ߞߍ߫ ߘߊ߫ ߣߌ߲߬ ߟߏ߲، ߞߊ߬ߙߊ߲߬ߝߊ ߡߎߛߊ߫ ߞߐ߲ߘߍ߫ ߡߍ߲ ߦߋ߫ ߞߊ߬ߝߊ ߣߌ߲߬ ߞߏ ߞߐߡߊߓߌ߲ߓߌ߲ߓߊ߯ ߥߣߊ ߘߏ߫ ߘߌ߫߸ ߏ߬ ߞߊ߬ ߟߊ߬ߛߙߋ߬ߦߊ߬ߟߌ߬ ߜߌߟߌ߲ ߠߎ߬ ߞߍ߫ ߛߓߍߦߟߊ ߞߊ߲߬߸ ߊ߬ ߣߌ߫ ߞߊ߬ߝߊ ߖߍ߬ߘߍ ߞߊ߲߬߸ ߞߏߟߐ߲ ߣߌ߫ ߟߐ߲ߠߌ߲ ߠߊ߫، ߎߛߑߡߊߣߌ߲߬ ߓߏ߲߬ߓߊ߫ ߖߊ߰ߣߍ ߡߍ߲ ߞߍ߫ ߘߊ߫ ߡߊ߬ߘߍ߬ߡߍ߲߬ߠߌ߲߬ߠߊ߫ ߘߌ߫ ߞߊ߬ ߞߊ߬ߝߊ ߣߌ߲߬ ߦߟߍ߬ߡߊ߲߫ ߝߊ߬ߙߊ߲߬ߛߌ ߘߐ߫߸ ߏ߬ ߞߊ߬ ߦߙߐ߫ ߛߌߦߊߡߊ߲߫ ߘߐߞߣߍ߫ ߞߊ߬ߟߌ߲߬ߞߐ߫ ߞߊ߲߬߸ ߊ߬ ߣߌ߫ ߛߓߍߦߟߊ ߖߍ߬ߘߍ ߞߊ߲߬، ߡߐ߰ߓߊ ߡߍ߲ ߞߎߡߊ߫ ߘߊ߫ ߞߊ߬ߟߌ߲߬ߞߐ߫ ߘߌ߯ߣߊ߫ ߢߍߡߐ߮ ߟߎ߬ ߕߐ߯ ߘߐ߫߸ ߏ߬ ߟߋ ߟߊ߱ߖߌ߬ ߓߎߙߊߡߊ߬ ߕߎ߲߬ߞߙߊ ߘߌ߫߸ ߏ߬ ߞߵߊ߬ ߟߊ߫ ߣߌߘߐߘߌߦߊ ߦߌ߬ߘߊ߫ ߞߊ߬ߝߊ ߣߌ߲߬ ߠߊ߫ ߞߏ ߘߐ߫.

ߞߝߊ߬ ߞߎ߲߬ߠߊ߬ߓߐ߬ ߘߊߞߎ߲ ߣߌ߲߬ ߘߐ߫߸ ߞߊ߬ߟߌ߲߬ߞߐ߫ ߡߐ߰ߓߊ ߘߏ߫߸ ߟߊ߱ߖߌ߬ ߣߊߦߌߣߌ߲߫ ߕߎ߲߬ߞߙߊ߫ ߞߊ߬ ߛߙߊ߬ߣߎ߲ ߕߊ߬ ߞߵߊ߬ ߦߌ߬ߘߊ߬ ߞߏ߫ ߡߊ߬ߡߊ߬ߘߌ߫ ߖߘߍ߬ߞߏ߬ߟߊ߲߬ߘߌ߫ ߕߎ߲߬ߞߙߊ߫ ߦߋ߫ ߡߐ߰ ߟߋ߬ ߘߌ߫߸ ߡߍ߲ ߞߊ߫ ߞߊ߲߫ ߞߊ߬ ߡߊߛߊ߲߬ߛߊ߲߬߸ ߓߊߏ߬ ߊ߬ ߦߋ߫ ߞߊ߬ߟߌ߲߬ߞߐ߫ ߞߎ߲߬ߠߊ߬ߦߋߙߋ߲ ߠߋ߬ ߘߌ߫، ߡߐ߱ ߟߎ߬ ߞߵߊ߬ߟߎ߬ ߕߍ߯ߜߊ߬ߛߌ߫ ߊ߬ߟߋ ߟߊ߫ ߞߎߡߊ ߟߎ߬ ߘߐ߫ ߞߏߛߓߍ߫.

ߥߊ߬ߛߌ߬ߥߙߊ ߕߋ߬ߟߋ߫ ߀߉ ߞߍ߫ ߘߊ߫ ߟߏ߲߫ ߘߝߐ߬ߡߊ߬ߓߊ߫ ߟߋ߬ ߘߌ߫ ߞߊ߬ߟߌ߲߬ߞߐ߬ ߞߣߐ߫߸ ߡߍ߲ ߕߍ߫ ߕߎߣߎ߲߫ ߠߊ߫ ߏ߬ ߞߐ߫، ߞߊ߬ߝߊ ߞߎ߲߬ߠߊ߬ߓߐ ߞߍ ߘߐߙߐ߲߫߸ ߏ߬ ߕߍ߫ ߘߋ߬، ߓߊ߬ߙߌ߬ ߊ߬ ߞߍߣߍ߲߫ ߛߊߓߎ߫ ߟߋ߬ ߘߌ߫߸ ߞߊ߬ ߞߊ߬ߟߌ߲߬ߞߐ߫ ߦߌ߬ߘߊ߫ ߞߊ߬ߟߌ߲߬ߞߐ߬ߞߊ ߟߎ߬ ߟߊ߫߸ ߞߵߊ߬ ߦߌ߬ߘߊ߬ ߘߎߢߊ߫ ߕߐ߭ ߟߊ߫߸ ߞߊ߬ ߡߐ߬ߓߊ ߟߎ߬ ߟߊ߫ ߛߌߟߊ߫ ߛߊߣߍ߲ ߠߎ߬ ߥߊ߭ ߟߊߞߊ߬، ߖߘߍ߬ߞߏ߬ߟߊ߲߬ߘߌ߫ ߕߎ߲߬ߞߙߊ߫ ߓߘߊ߫ ߞߍ߫ ߞߊ߬ߟߌ߲߬ߞߐ߫ ߞߎ߲߬ߠߊ߬ߦߋߙߋ߲ ߘߏ߫ ߘߌ߫߸ ߡߐ߰ߓߊ ߟߎ߬ ߛߍߥߊߣߍ߲߫ ߡߍ߲ ߠߊ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫

ߒߞߏ ߝߐ߰ߓߍ߬ߦߊ߬ߟߊ ߞߊ߲ߞߊ߲߫