ߗߍ߬ ߡߙߊ߬ߒ߬ߡߊ߬ߝߋ߲߬ߕߌ߮ ߘߏ߫ ߝߊ߰ ߘߊ߫ ߞߍ߲ߘߍߟߏ߲ ߛߎ ߘߐ߫߸ ߥߊ߲ߛ߭ߌ߲ߕߐ߲߫ ߓߏ߲ߜߍ ߘߊߝߍ߬، ߞߊ߬ߕߎ߲߯߸ ߜߋ߬ߟߎ߲߬ߠߌ߲߬ ߘߌ߲ߞߌߙߊ ߡߍ߲ ߦߋ߫ ߓߏ߲ߜߍ ߡߊߜߍ߲ ߘߐ߫߸ ߊ߬ߟߋ߫ ߞߊ߬ ߡߊ߬ߙߌ߬ߝߊ ߟߋ߬ ߕߋ߬ ߦߋ߲߬، ߏ߬ ߟߋ ߞߏߛߐ߲߬߸ ߕߐ߲ߓߟߏߡߊ ߡߍ߲ ߠߎ߬ ߝߣߊ߫ ߕߍ߬ߘߍ߫ ߦߋ߲߬߸ ߏ߬ ߟߎ߬ ߡߴߊ߬ ߣߌ߫ ߝߌ߬ߟߊ߬ ߟߊߘߍ߬߸ ߊ߬ߟߎ߫ ߞߵߊ߬ ߛߌ߰ ߊ߬ ߞߊ߲߬ ߞߵߊ߬ ߝߊ߰߸ ߏ߬ ߝߐ߫ ߘߴߊߡߙߌߞߌ߬ ߝߊ߰ߡߊ ߟߎ߫ ߟߋ߬ ߓߟߏ߫.

ߟߌ߬ߤߟߊ߬ ߝߟߐ ߟߎ߬ ߟߊ߫ ߦߌ߬ߘߊ߬ߟߌ߬ ߘߐ߫߸ ߛߎߡߊߒߘߐߓߊ߯ߕߐ ߣߌ߲߬ ߝߊ߰ ߘߊ߫ ߟߋ߬ ߖߏߣߊߖߏߣߊ߫߸ ߊߡߙߌߞߌ߬ ߞߊ߬ߝߏ߫ ߘߍ߬ߣߍ߲ ߜߎ߲߬ߘߎ߬ ߗߋߢߊߘߋ߲ ߠߎ߬ ߓߟߏ߫߸ ߡߍ߲ ߠߎ߬ ߦߋ߫ ߞߊ߲ߕߌ߯ߘߊ ߟߊߡߌߣߌ߲ ߘߐ߫، ߊ߬ ߟߊ߫ ߡߊ߬ߙߌ߬ߝߊ߬ߕߋ ߕߎ߬ߡߊ ߟߊ߫߸ ߕߊ߬ߡߌ߲߬ߓߊ߰ߕߐ߬ ߞߋߟߋ߲߫ ߕߍ߬ߘߍ߫ ߦߋ߲߬߸ ߏ߬ ߖߐߞߌ߫ ߘߊ߫ ߟߋ߬߸ ߞߵߊ߬ ߛߐ߬ߘߐ߲߬ ߞߏ߫ ߡߊ߫ ߞߍ߫ ߊ߬ ߣߌ ߟߊ߫.

ߞߏߢߊ ߣߌ߲߬ ߞߍ߫ ߕߎߡߊ ߟߊ߫߸ ߊߡߙߌߞߌ߬ ߞߊ߲ߕߌ߮ ߘߏߣߊߟ ߕߑߙߐ߲ߔ ߕߘߍ߬ ߊ߬ ߡߊߞߍ߫ ߦߌߟߊ ߞߣߐ߫ ߓߏ߲ߜߍ ߟߊ߫ ߦߋ߲߬، ߞߊ߲ߕߌ߯ߘߊ ߞߏ߬ߣߌ߲ ߞߵߊ߬ ߦߌ߬ߘߊ߬߸ ߞߏ߫ ߝߏߦߌ߬ ߡߊ߫ ߛߋ߫ ߕߑߙߐ߲ߔ ߡߊ߬ ߣߌ߲߬ ߞߏ ߘߐ߫.

ߟߊ߬ߛߋ߬ߟߌ ߡߍ߲ ߞߍ߫ ߘߊ߫ ߜߎ߲߬ߘߎ߬ ߗߋߢߊߘߋ߲ ߠߎ߬ ߟߊ߫ ߓߋߟߋ߲ߕߌ߮ ߓߟߏ߫߸ ߊ߬ߟߋ ߡߍ߲ ߕߐ߯ ߞߏ߫ ߊ߲ߕߏߣߌ ߜ߭ߎߜ߭ߟߌߦߍߟߑߡߌ߫߸ ߏ߬ ߞߊ߬ ߟߊ߬ߞߊ߲߬ߘߊ߬ߟߌ ߝߊ߲߬ߞߊ ߘߏ߲߬ߞߏ ߟߎ߬ ߝߏ߬ ߊ߬ߟߎ߬ <<ߞߎ߲߬ߞߊߟߌߦߊ ߣߴߊ߬ߟߎ߬ ߟߊ߫ ߞߎ߬ߛߊ߲߬ߧߊ߬ ߓߊ߯ߙߊ>> ߟߊ߫߸ ߞߵߊ߬ ߦߌ߬ߘߊ߬ ߞߏ߫ ߡߍ߲ ߠߎ߬ ߕߘߍ߬ ߞߣߍ ߞߊ߲߬ ߦߋ߲߬߸ ߊ߬ߟߎ߫ ߞߊ߬ ߘߐ߬ߖߊ ߖߍ߬ߘߍ ߟߋ߬ ߞߍ߫.

ߘߏߣߊߟ ߕߑߙߐ߲ߔ ߟߊ߫ ߘߍ߬ߞߙߏߝߏ ߞߊ߲߬߸ ߊ߬ ߞߵߊ߬ ߟߊ߫ ߥߊߟߢߌߡߊߟߐ߲ ߝߏ߬ߟߌ ߟߊߛߋ߫ ߥߛߊ߬ߘߊ߬ߕߌ߯ ߟߎ߫ ߡߊ߬߸ ߡߍ߲ ߠߎ߬ ߕߘߍ߬ ߜߍ ߘߐ߫ ߦߋ߲߬، ߊ߬ ߞߵߊ߬ ߦߌ߬ߘߊ߬ ߞߏ߫ ߕߌߢߍߟߌߟߊ ߡߍ߲ ߦߋ߫ ߕߋ߲߬߸ ߊ߬ ߕߎ߲߬ ߓߘߊ߫ <<ߦߋ߫ ߕߌߢߍߟߌ߫ ߘߊߞߎ߲߫ ߜߘߍ߫ ߟߎ߫ ߘߐ߫>> ߞߘߐ߬ߡߊ߲߬߸ ߡߙߌߦߊ߫ ߢߌߡߊ߫ ߘߏ߲߬ ߕߎ߲߬ ߕߴߊ߬ ߟߊ߫ ߞߵߊ߬ ߟߐ߬ ߓߏ߲ߜߍ ߡߊ߬.

ߊߡߙߌߞߌ߬ ߞߌ߬ߓߊ߬ߙߏ߬ߘߊ߬ ߛߌߦߊߡߊ߲߫ ߠߊ߫ ߝߐߟߌ߫ ߘߐ߫߸ ߡߊ߬ߙߌ߬ߝߊ߬ߕߋ߬ߟߊ ߣߌ߲߬ ߕߐ߯ ߟߋ߬ ߞߏ߫ ߣߛߊߦߌߙ ߓߍߛߕ߸ ߞߊ߲ߡߋߙߋ߲߫ ߛߊ߲߭ ߂߁ ߘߏ߫ ߟߋ߬߸ ߡߍ߲ ߦߋ߫ ߓߐ߫ ߟߊ߫ ߡߍߙߑߌߟߍ߲߳ߘ، ߓߐߛߎ߲ ߘߏ߫ ߟߎ߫ ߦߴߊ߬ ߦߌ߬ߘߊ߬ ߟߊ߫߸ ߞߏ߫ ߊ߬ ߤߊ߲ߞߟߌ߫ ߞߏ ߜߍߣߍ߲ߓߊ߫ ߕߎ߲߬ ߕߍ߫، ߝߣߊ߫߸ ߞߊ߲ߕߌ߯ߘߊ ߟߊߡߌߣߌ߲ ߕߐ߲ߓߟߏߡߊ ߟߎ߫ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߎ߫ ߕߎ߲߬ ߓߘߴߊ߬ ߡߊߜߊ߬ߛߌ߫ ߦߋ߲߬ ߛߋ߲߬ߢߊ߬ ߛߌߦߊߡߊ߲߫߸ ߞߵߊ߬ ߛߐ߬ߘߐ߲߬ ߊ߬ ߣߌ ߦߴߊ߬ ߞߊ߲߬ ߞߊ߬ ߘߏ߲߬ ߓߏ߲ߜߍ ߟߊ߫.

ߣߌ߲߬ ߞߏ߬ߣߌ߲ ߓߘߊ߫ ߣߊ߬ ߞߣߐ߬ߘߐ߬ߝߟߌ ߘߌ߫ ߡߐ߱ ߟߎ߬ ߟߊ߫߸ ߞߊ߬ ߓߍ߲߬ ߕߑߙߐ߲ߔ ߟߊ߫ ߟߊ߬ߞߊ߲߬ߘߊ߬ߟߌ ߡߊ߬، ߓߊߏ߬߸ ߊ߬ ߛߋ߲߬ߢߊ߬ ߦߙߌߞߊ ߟߋ߬ ߕߋ߲߬߸ ߕߑߙߐ߲ߔ ߣߌ߫ ߡߊ߬ߙߌ߬ߝߊ߬ ߡߊ߲ߞߊ߲ ߕߍ߫ ߝߘߊ߫ ߟߊ߫.