ߞߎ߬ߟߌ߬ߓߊ߬ߟߌ߬ߘߎ߯-ߖߟߊߞߘߐ߫: ߞߊ߬ ߓߍ߲߬ ߖߟߊߞߘߐ߫ ߞߍ ߡߊ߬ ߡߙߊ߬ߘߊ߬ߓߊ ߘߌ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߟߏ߫߸ ߖߟߊߞߘߐߞߊ ߟߎ߬ ߓߘߊ߫ ߛߍߥߊ߫ ߞߊ߬ ߛߘߊߞߊ ߓߐ߫

ߛߏ߫ ߛߊߣߌ߲ߧߊ ߣߌ߫ ߣߌ߬ߛߌ߫ ߗߡߍ߬ ߦߙߌߞߊ ߞߊ߲ߠߊߕߍ߱ ߞߐߝߍ߬ ߖߟߊߞߘߐߞߊ ߟߎ߬ ߓߟߏ߫߸ ߥߎ߬ߘߊ߲ ߣߌ߫ ߟߊ߬ߡߊ߮ ߟߋ߬ ߕߘߍ߬ ߛߏ ߞߣߐ߫ ߞߎߣߎ߲߬ ߞߐ߬ߓߊ߬ߟߏ߲ ߝߣߊ߫ ߡߊ߬߸ ߂߀߂߆ ߘߓߊ߬ߓߌߟߊ ߕߟߋ߬ ߃߁߸ ߞߊ߬ ߛߏߘߐߦߊ߯ߟߊ߫ ߢߐ߲߰ߦߋ߬ߓߊߟߌ ߞߍ߫. ߘߐ߲߭ ߣߌ߫ ߘߐ߲߬ߞߟߌ ߞߊߘߌ߫ ߘߴߊ߬ ߡߵߊ߬ߟߎ߬ ߓߟߏ߫ ߕߊ߯ߡߊ ߏ߬ ߡߍ߲ ߘߐ߫߸ ߞߊ߬ ߛߏߏ ߞߌ߲߬ߘߊ߬ ߛߌߦߊߡߊ߲߫ ߓߌ߬ߟߴߊ߬ߟߎ߫ ߛߋ߲߬ߞߘߐ߫߸ ߞߣߊ߬ߕߏ߫ ߊ߬ߟߎ߫ ߞߎ߲߬ߛߌ߲߬ ߠߊ߫ ߖߟߊߞߘߐ߫ ߕߏ߬ߟߊ߲߬ߕߊ߲߬ ߓߙߊߓߊ ߟߊ߫߸ ߞߊ߬ ߖߊ߲߬ߖߏ߲߬ ߓߟߋߓߟߋ ߞߎ߲߬ߝߊ߰ ߖߊ߲ߖߏ߲ ߞߍ߫ ߦߋ߲߬.

ߖߊ߲߬ߖߏ߲߬ ߘߊߞߎ߲ ߣߌ߲߬ ߘߐ߫߸ ߡߊ߲߬ߖߊ߲߬ߠߊ߫ ߡߙߊ߬ߓߊ߮߸ ߊߓߎߓߞߊߙ ߛߘߌߞߌ߬ ߕߙߊߥߟߋ߫ ߞߊ߬ ߘߏ߫ ߝߐ߫ ߖߟߊߞߘߐ߫ ߟߊ߫ ߡߊ߬ߡߙߊ߬ߟߌ߬ ߞߏ ߘߐ߬ߝߐ ߘߐ߫߸ ߊ߬ ߣߴߊ߬ ߞߏ ߕߊ߬ߡߌ߲߬ ߘߊ߫ ߢߊ ߡߍ߲ ߛߊ߲߬ ߘߊ߲ߘߐ ߣߌ߲߬ ߞߣߐ߫.

<<ߊߟߎ߫ ߢߊ߫ ߦߋ߫ ߖߟߊߞߘߐ߫ ߡߍ߲ ߠߊ߫ ߣߌ߲߬ ߓߌ߬߸ ߊ߬ ߞߍ߫ ߘߊ߫ ߛߌ߯ߙߌ߲߫ ߕߌ߲ߕߊ߲ ߘߌ߫ ߞߊ߬ߦߌ߯ ߁߉߆߄ ߠߋ߬ ߟߊ߫ (ߣߴߊ߬ ߘߌ߫ ߝߐ߫ ߊ߬ ߡߊ߬ ߝߐߞߎߘߊ ߘߐ߫ ߞߏ߫ ߡߙߊ߬ߘߊ߬ߙߋ߲)، ߏ߬ ߟߋ ߞߐߝߍ߬ ߛߊ߲߬ ߕߊ߲߫߸ ߡߊ߲߬ߖߊ߲߬ߠߊ߫ ߞߍߍ߫ ߘߊ߫ ߡߙߊ߬ߘߊ߬ߓߊ ߘߌ߫ ߁߉߇߅ ߟߊ߫߸ ߖߟߊߞߘߐ߫ ߓߐ߫ ߘߊ߫ ߛߌ߯ߙߌ߲߫ ߞߊ߲߬ ߏ߬ ߘߐ߫ ߞߵߊ߬ ߟߊ߫ ߡߊ߲߬ߖߊ߲߬ߠߊ߫ ߞߊ߲߬.
ߒ߬ߓߊ߬߸ ߖߟߊߞߘߐ߫ ߣߐ߬ ߛߊ߲߬ ߅߂ ߟߋ߬ ߞߍ߫ ߟߊ߫ ߣߌ߲߬߸ ߊ߬ ߦߋ߫ ߡߙߊ߬ߘߊ߬ߙߋ߲ ߘߌ߫، ߊ߲ ߝߟߍ߫ ߣߌ߲߬ ߓߌ߬ ߏ߬ ߘߐ߫ ߛߊ߫߸ ߞߊ߲ߕߌ߮ ߓߘߴߊߟߎ߫ ߟߊ߫ ߖߘߍ߬ߕߌ߰ߦߊ ߘߴߊߟߎ߫ ߡߊ߬߸ ߞߵߊߟߎ߫ ߝߣߊ߫ ߞߍ߫ ߡߙߊ߬ߘߊ߬ߓߊ ߘߌ߫، ߊߟߴߊߟߎ߫ ߥߟߌ߬߸ ߊߟߎ߫ ߦߋ߫ ߓߊ߯ߙߊ߫߸ ߊߟߴߊߟߎ߫ ߓߟߏ ߘߌ߫ ߢߐ߲߮ ߡߊ߬߸ ߞߊ߬ ߝߊ߰ߡߊ߬ ߞߎߘߊ߫ ߣߊ߬ߕߐ ߟߎ߬ ߡߊߘߍ߬ߡߍ߲߬.
ߖߟߊߞߘߐ߫ ߕߍ߬ߘߍ߫ ߡߙߊ߬ߘߊ߬ߙߋ߲߬ ߓߟߋߓߟߋ ߟߋ߬ ߘߌ߫߸ ߡߍ߲ ߣߐ߬ߘߎ߮ ߦߙߌߞߊ ߕߘߍ߬ ߃߂ ߘߌ߫߸ ߊ߬ ߣߌ߫ ߞߎ߲߬ߘߊ߬ ߄߄߸ ߡߍ߲ ߠߎ߬ ߓߍ߯ ߝߊߣߍ߲߫ ߖߊ߬ߡߊ ߟߊ߫.>> ߡߊ߲߬ߖߊ߲߬ߠߊ߫ ߡߙߊ߬ߓߊ߮ ߞߵߏ߬ ߦߌ߬ߘߊ߬.

ߞߎߡߊ ߕߊ߬ ߘߊ߫ ߡߎߛߊ߫ ߄߲ ߞߎ߬ߟߌߓߊ߬ߟߌ߬ ߓߟߏ߫ ߖߊ߬ߡߊ߫ ߘߍ߬ߜߍ ߣߌ߲߬ ߢߊߞߘߐ߫߸ ߊ߬ߟߋ ߡߍ߲ ߦߋ߫ ߖߟߊߞߘߐ߫ ߞߊ߬ߝߏ߬ߙߋ߲߬ߕߌ߮ ߘߌ߫، ߊ߬ ߞߵߊ߬ ߞߊ߲ߠߊߘߌ߫ ߖߟߊߞߘߐߞߊ ߟߎ߫ ߟߋ߬ ߡߊ߬߸ ߞߏ߫ ߊ߬ߟߎ߬ ߡߊߦߍ߬ߟߍ ߡߊ߬ߙߊ ߛߊ߲ߝߍ߬ ߣߌ߲߬ ߢߊ߸ ߏ߬ ߞߍߣߍ߲߫ ߛߏ ߡߎߎ߰ߡߍ ߟߊ߫ ߘߐ߬ߖߊ ߟߋ߬ ߞߏߛߐ߲߬، ߒ߬ߓߊ߬߸ ߞߏ߫ ߊ߬ߟߎ߬ ߦߋ߫ ߥߊ߫ ߛߌߟߊ߫ ߞߋߟߋ߲ ߏ߬ ߝߣߊ߫ ߞߊ߲߬߸ ߛߊ߫ ߖߟߊߞߘߐ߫ ߡߙߊ߬ߘߓߊ߬ ߞߎߘߊ ߘߌ߫ ߞߍ߫ ߡߙߊ߬ߘߓߊ߬ ߘߌ߫߸ ߓߍ߯ ߘߴߊ߬ ߢߡߊߟߊ߫ ߡߍ߲ ߡߊ߬.

ߊ߬ ߟߊ߫ ߛߙߊ߬ߣߎ߲ ߢߌ߲߬ ߘߐ߫߸ ߊ߬ ߞߎߡߊ߫ ߘߊ߫ ߞߏߛߓߍ߫߸ ߊ߬ ߞߊ߲߫ ߞߏ߫: 

<<ߒ ߓߊߘߋ߲߫ ߖߟߊߞߘߐߞߊ ߟߎ߬߸ ߕߎ߬ߢߊ ߟߋ߬ ߝߛߊߦߌ߫߸ ߊ߲ ߓߘߊ ߓߘߊ߫ ߞߍ߫ ߡߙߊ߬ߘߊ߬ߓߊ ߘߌ߫، ߞߏ߬ߣߌ߲߬߸ ߏ߬ ߕߍ߫ ߦߟߍ߬ߡߊ߲ ߞߍߣߍ߲ ߘߌ߫ ߡߊ߬ߡߙߊ߬ߟߌ߬ ߘߊߞߎ߲ ߘߐߙߐ߲߫ ߘߐ߫ ߘߋ߬، ߊ߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߞߏ߫ ߝߏ߫ ߊ߲ ߝߣߊ߫ ߓߘߊ ߦߋ߫ ߞߍ߫ ߦߙߐ߫ ߟߋ߬ ߘߌ߫ ߡߎ߬ߕߎ߲߬߸ ߡߍ߲ ߘߌ߫ ߓߌ߬ߟߴߊ߬ ߞߣߐ߫ ߘߋ߲ ߠߎ߬ ߛߊ߬ߥߏ ߘߐ߫߸ ߞߊ߬ ߛߋ߫ ߥߙߎߞߌ ߣߌ߫ ߢߝߍߕߊ߮ ߟߊߘߏ߲߬ ߠߊ߫ ߦߙߐ߫ ߓߐߣߍ߲߫ ߢߐ߲߰ ߡߊ ߟߎ߬ ߘߐ߫ ߖߟߊߞߘߐ߫ ߡߙߊ ߡߎ߰ߡߍ ߘߐ߫.
ߡߙߊ߬ߘߓߊ߬ ߞߎߘߊ ߣߌ߲߬ ߞߊ߫ ߞߊ߲߫ ߞߊ߬ ߞߍ߫ ߢߝߍߕߊ߮ ߟߋ߬ ߘߌ߫ ߡߎ߬ߕߎ߲߬߸ ߞߊ߬ ߡߐ߱ ߟߎ߬ ߓߟߏ ߟߊ߫ ߢߐ߲߮ ߞߊ߲߬߸ ߞߊ߬ ߝߊ߲߬ߞߊ߬ ߘߌ߫ ߞߊ߬ߙߊ߲ ߡߊ߬߸ ߞߍ߲ߘߍߦߊ ߡߊ߬߸ ߛߣߍ߬ߞߍ ߡߊ߬߸ ߓߌߦߊ߲߫ ߡߙߊ ߡߊ߬߸ ߖߎ߬ߟߊ߬ߦߊ ߡߊ߬߸ ߊ߬ ߣߌ߫ ߘߋ߲ߡߌߛߍ߲ ߠߎ߬ ߟߊ߫ ߖߘߍ߬ߞߊ߬ߣߌ߲߬ ߓߊ߯ߙߊ ߡߊ߬߸ ߣߴߊ߲ ߘߴߊ߬ ߝߐ߫ ߊ߬ ߡߊ߬ ߞߏ߫ ߥߊߟߌߝߦߊ.
ߏ߬ ߘߐ߫߸ ߒ ߧߋ߫ ߒ ߞߊ߲ߠߊߘߌ߫ ߟߴߊߟߎ߫ ߡߊ߬߸ ߊߟߎ߫ ߦߴߊ߬ ߖߊ߬ߕߋ߫ ߟߋ߬߸ ߞߏ߫ ߊ߲ ߞߍ߫ ߡߙߊ߬ߘߊ߬ߓߊ ߘߌ߫߸ ߏ߬ ߣߐ߬ ߘߏ߬ߣߌ߲߬ ߜߘߍ߫ ߟߋ߬ ߛߌ߰ ߟߊ߫ ߖߊ߬ߡߊ ߓߍ߯ ߟߊߘߍ߬ߣߍ߲ ߞߎ߲߬، ߒ ߧߋ߫ ߞߟߌߟߌ߫ ߞߋߟߋ߲ ߏ߬ ߟߊߛߋ߫ ߟߊ߫ ߦߊ߲߬ ߝߊ߰ߡߊ ߟߎ߫ ߡߊ߬߸ ߊ߬ߟߎ߬ ߦߋ߫ ߘߏ߫ ߟߊ߫ ߘߐ߬ߖߊ ߞߊ߲߬߸ ߞߊ߬ ߘߏ߫ ߟߊ߫ ߟߊ߬ߛߐ߲ ߞߊ߲߬߸ ߞߵߊ߬ߟߎ߫ ߓߌ߬ߟߊ߬ ߖߊ߬ߡߊ ߛߊ߬ߥߏ߬ ߘߐ߫߸ ߞߊ߬ ߓߊ߯ߙߊ ߟߋ߬ ߜߎ ߞߍ߫ ߤߊߡߌߣߊ߲ߞߏ ߘߌ߫، ߒ ߘߌ߫ ߡߍ߲ ߝߐ߫ ߦߊ߲߬ߞߊ ߟߎ߬ ߦߋ߫߸ ߊ߲ ߧߋ߫ ߓߍ߲߭ ߞߍ߫ ߛߘߊߞߊ ߘߌ߫߸ ߞߵߊ߲ ߓߟߏ ߘߌ߫ ߢߐ߲߮ ߡߊ߬߸ ߞߊ߬ ߢߐ߲߯ ߘߍ߬ߡߍ߲߬߸ ߞߊ߬ ߞߏ ߟߎ߬ ߞߍ߫ ߢߐ߲߮ ߝߍ߬ ߕߡߍߢߍ߬.
ߖߟߊߞߘߐ߫ ߘߋ߲ߡߌߛߍ߲ ߠߎ߬߸ ߒ ߕߴߊߟߎ ߕߊ ߞߎߡߊ ߟߊߖߊ߲߰ߧߊ߬ ߟߊ߫߸ ߊߟߎ߫ ߦߴߊ߬ ߟߐ߲߫ ߞߏ߫ ߊ߲ ߠߊߦߍ߬ߟߍ ߣߌ߲߬ ߦߋ߫ ߓߍ߲߬ߒ߬ߛߋ߲߬ߡߊ߬ ߞߎߘߊ߫ ߟߋ߬ ߘߌ߫߸ ߞߊ߬ ߓߊ߯ߙߊ ߡߌ߬ߣߴߊ߲ ߓߟߏ߫ ߝߌ߬ߟߊ ߟߊ߫߸ ߞߊ߬ ߤߊ߲ߞߟߌ߫ ߡߞߊߝߏ ߟߎ߬ ߞߍ߫߸ ߞߵߊ߲ ߟߐ߬ ߊ߲ ߟߐ߬ ߦߙߐ ߘߐ߫.
ߡߏ߬ߛߏ ߟߎ߬ ߦߋ߫ ߛߏ ߟߊ߫ ߥߙߎߞߌ ߘߐ߫ ߕߏ߬ ߕߍ߬ߡߊ߬ ߕߏ ߟߋ߬ ߘߌ߫، ߏ߬ ߟߋ ߘߐ߫߸ ߒ ߘߌ߫ ߒ ߥߊ߬ߣߌ߲߬ߞߋ ߦߌ߬ߘߊ߬ ߌߞߐ߫߸ ߞߊ߬ ߝߐ߫ ߞߏ߫ ߞߊ߬ ߡߏ߬ߛߏ ߟߎ߬ ߡߊߘߍ߬ߡߍ߲߬߸ ߊ߬ߟߎ߬ ߦߋ߫ ߛߋ߫ ߘߏߏ߫ ߞߍ߫ ߟߴߊ߬ߟߎ߫ ߖߘߍ߬ ߦߋ߫߸ ߞߵߊ߬ߟߎ߬ ߟߊߛߐ߬ߘߐ߲߫ ߘߏ߫ ߛߐߘߐ߲ ߘߐ߫߸ ߊ߬ ߣߌ߫ ߊߘߡߊߦߊ ߞߏ߫ ߕߐ߬ߡߊ ߟߎ߬.
ߒ߬ߓߊ߬߸ ߏ߬ ߟߋ ߘߴߊ߲ ߘߍ߬ߡߍ߲߬߸ ߞߊ߬ ߛߋ߫ ߖߟߊߞߘߐ߫ ߟߊ߫ ߡߙߊ߬ߘߓߊ߬ߦߊ ߞߍ߫ ߟߊ߫ ߟߊ߬ߘߍ߲߰ߕߊ ߘߌ߫߸ ߖߛߎ߬ߛߎߡߊ ߦߋ߫ ߡߙߊ߬ߘߊ߬ߓߊ ߡߍ߲ ߞߣߐ߫߸ ߕߋߟߋ߲ ߦߋ߫ ߡߍ߲ ߞߣߐ߫߸ ߢߐ߲߯ߘߍߡߍ߲ ߣߌ߫ ߝߊ߰ߡߊ߬ ߓߏ߲ߧߊ ߕߊ߬ߣߍ߲ ߞߵߊ߬ ߟߊ߫ ߖߊ߬ߡߊ ߟߊ߫ ߝߘߏ߬ߓߊ߬ ߣߝߊ ߡߞߊߘߊ߲ ߞߊ߲߬߸ ߏ߬ ߛߓߊ߬ߕߌ߬ߣߍ߲߬ ߛߏ ߡߍ߲ ߞߣߐ߫.>> ߞߊ߬ߝߏ߬ߙߋ߲߬ߕߌ߮ ߟߋ߬ ߞߊ߲߫ ߕߋ߲߬.

ߊ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߬ ߌߞߐ߫߸ ߞߏ߫ ߖߟߊߞߘߐ߫ ߞߍ ߡߙߊ߬ߘߊ߬ߓߊ ߘߌ߫߸ ߝߋ߲ ߺ ߋ ߺ ߝߋ߲߫ ߞߵߊ߬ ߛߋߞߏ߫ ߞߍ߫ ߏ߬ ߞߏ ߛߍ߬ߘߏ߲ ߘߐ߫߸ ߊ߬ ߦߴߏ߬ ߓߍ߯ ߝߏ߬ ߟߊ߫߸ ߊ߬ ߕߌ߯ߕߌ߯ ߖߟߊߞߘߐ߫ ߟߊߡߌߣߌ߲߫ ߛߏ ߟߎ߬߸ ߊ߬ ߣߌ߫ ߖߟߊߞߘߐߞߊߘߋ߲ ߡߍ߲ ߠߎ߬ ߦߋ߫ ߘߟߊ߫ ߖߡߊ߬ߣߊ ߛߊ߲ߝߍ߬.

ߊ߬ ߞߵߊ߬ ߝߐ߫ ߞߎߡߊ ߞߎ߲߬ߝߊ߮ ߘߐ߫ ߏ߬ ߟߋ ߘߐ߫߸ ߞߏ߫:

 <<ߒ ߕߴߛߋ߫ ߒ ߠߊ߫ ߛߙߊ߬ߣߎ߲ ߞߎ߲߭ߝߊ߰ ߟߊ߫߸ ߣߌ߫ ߒ ߡߊ߫ ߝߏ߬ߟߌ߬ ߞߙߍߞߙߍߣߍ߲ ߠߊߛߋ߫ ߞߊ߲ߓߍ߲ ߞߊ߲ߕߌ߯ ߡߊ߬ߓߏ߲߬ߧߊ߬ߕߊ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊ߬߸ ߡߙߌߦߊ߫ ߓߘߍ ߣߌ߲߬ ߕߊ߭ ߞߏߛߐ߲߬ ߊ߬ ߓߟߏ߫.>> ߊ߬ ߞߵߏ߬ ߟߋ ߞߍ߫ ߞߎ߲߬ߝߊ߮ ߘߌ߫.

ߖߟߊߞߘߐ߫ ߘߏ߲߬ߛߏ ߟߎ߬ ߝߣߊ߫ ߡߊ߫ ߕߏ߫ ߞߐ߫ ߖߊ߲߬ߖߏ߲ ߣߌ߲߬ ߘߐ߫߸ ߊ߬ߟߎ߬ ߝߣߊ߫ ߛߐ߬ߘߐ߲߬ ߘߊ߫ ߟߋ߬ ߛߏ߫ ߘߐߦߊ߯ߟߊ ߘߐ߫߸ ߞߊ߬ ߛߐ߬ߘߐ߲߬ ߓߙߊ߫ ߘߐߦߊ߯ߟߊ ߝߣߊ߫ ߘߐ߫.

ߏ߬ ߓߍ߲߬ߒ߬ߛߋ߲߬ߡߊ ߟߋ߬ ߞߏߛߐ߲߬߸ ߘߏ߲߬ߛߏ ߟߎ߬ ߟߊ߫ ߞߎ߲߬ߕߌ߮ ߣߊߡߏ߬ߙߌ߫ ߞߎ߬ߟߌߓߊ߬ߟߌ߬߸ ߊ߬ ߣߌ߫ ߡߎߛߊ߫ ߞߊ߲ߕߍ߫߸ ߏ߬ ߟߎ߫ ߞߵߊ߬ߟߎ߬ ߟߊ߫ ߛߍߥߊ ߦߌ߬ߘߊ߬ ߞߊ߬ ߓߍ߲߬ ߖߟߊߞߘߐ߫ ߞߍ ߡߊ߬ ߡߙߊ߬ߘߊ߬ߓߊ ߘߌ߫߸ ߞߊ߬ ߟߊ߬ߤߘߌ ߕߊ߬ ߞߏ߫ ߊ߬ߟߎ߬ ߘߴߊ߬ߟߎ߬ ߛߋߞߏ ߞߍ߫ ߟߊ߬ߞߊ߲߬ߘߊ߬ߟߌ ߛߌߟߊ ߝߍ߬.

<<ߊ߲ ߛߍߥߊߣߍ߲߫ ߠߋ߬ ߓߌ߬ ߞߊ߬ ߝߐ߬ ߞߏ߫ ߊ߲ ߓߘߊ ߓߘߊ߫ ߞߍ߫ ߡߙߊ߬ߘߊ߬ߓߊ ߘߌ߫، ߊ߲ ߧߋ߫ ߘߎ߬ߥߊ߬ߥߎ ߞߍ߫ ߟߊ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߦߊ߫ ߦߋ߫߸ ߊ߬ ߣߴߊ߬ ߟߊ߫ ߘߋ߲ߓߦߊ ߦߋ߫، ߊ߲ ߧߴߊ߲ ߘߡߊߞߊ߬ߛߌ߬ ߟߴߊ߬ ߦߋ߫߸ ߊ߬ ߦߴߊ߲ ߘߍ߬ߡߍ߲߬ ߊ߲ ߧߴߊ߲ ߓߘߊ ߞߟߍ߬ߡߎߙߊ߲ ߠߎ߫ ߛߐ߬ߘߐ߲߬.
ߘߏ߲߬ߛߏ ߟߎ߬ ߦߋ߫ ߞߏߓߊ߫ ߟߋ߬ ߞߍ߫ ߟߊ߫ ߖߡߊ߬ߣߊ ߟߊߞߊ߲ߘߊ ߘߐ߫، ߊ߲ ߘߏ߲߬ ߦߋ߫ ߖߟߊߞߘߐ߫ ߝߊ߰ߡߊ߬ ߞߎߘߊ߫ ߣߊ߬ߕߐ ߟߎ߫ ߛߊ߬ߥߏ߬ ߘߐ߫߸ ߞߵߊ߬ߟߎ߬ ߡߊߘߍ߬ߡߍ߲߬.>> ߊ߬ ߞߵߏ߬ ߕߍ߰ߒ߬ߞߊ߲ ߘߌ߫.

ߕߋ߬ߟߋ ߡߎ߰ߡߍ ߓߊ߲߫ ߘߊ߫ ߟߋ߬ ߖߟߊߞߘߐ߫ ߞߣߐ߫߸ ߡߏ߬ߛߏ ߟߎ߬ ߣߌ߫ ߘߋ߲ߡߌߛߍ߲ ߠߎ߬߸ ߖߐ߬ߟߋ߲ ߦߴߊ߬ߟߎ߬ ߓߍ߯ ߞߊ߲ߠߊ߫߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߖߌ߬ߦߊ ߦߋ߫ ߡߍ߲ ߠߎ߬ ߞߊ߲߬߸ ߞߊ߬ ߖߟߊߞߘߐ߫ ߞߌ߲߬ߘߊ߬ ߓߐߣߍ߲߫ ߢߐ߲߰ ߡߊ ߟߎ߬ ߟߊߡߊ߰.

ߖߡߊ߬ ߟߊ߬ߓߐ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߛߏ߫ ߞߣߐ߫ ߡߐ߮ ߟߎ߬ ߛߍߥߊߣߍ߲߫ ߊ߬ߟߎ߬ ߟߊ߫ ߡߊ߬ߙߊ ߝߊ߬ߘߌ߬ ߞߎߘߊ ߢߌ߲߬ ߠߊ߫߸ ߊ߬ ߣߴߊ߬ߟߎ߬ ߓߌߣߍ߲߫ ߞߊ߬ ߛߐ߬ߘߐ߲߬ ߥߙߎߞߌ ߓߊ߯ߙߊ ߟߎ߬ ߘߐ߫.