ߞߐߣߊߞߙߌ߫: ߘߏߕߎ ߟߊ߫ ߟߊ߬ߞߐ߰߰ߟߌ߫ ߛߊ߲߬ߠߊ߬ߞߊ ߞߍߞߏ߫ ߛߓߊߣߊ߲ ߓߘߊ߫ ߞߎ߲߭ߝߊ߰ ߖߌ߲ߘߊ߲߫ ߓߟߋߓߟߋ߫ ߘߐ߫

ߘߏߕߎ ߟߊ߫ ߟߊ߬ߞߐ߰ߟߌ߫ ߛߊ߲߬ߠߊ߬ߞߊ ߞߍߞߏ߫ ߛߓߊߣߊ߲ ߓߘߊ߫ ߞߍ߫߸ ߊ߬ߟߋ ߡߍ߲ ߦߋ߫ ߘߍ߬ߞߙߎ߬ ߘߌ߫߸ ߝߘߊ߬ߝߌ߲߬ ߘߊ߲ߘߊߟߌ ߓߟߏߦߊߓߊ߯ ߛߌߦߊߡߊ߲߫ ߦߋ߫ ߡߍ߲ ߛߌ߲߬ߝߏ߲ ߘߌ߫ ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߖߡߊߣߊ ߛߌߦߊߡߊ߲߫ ߘߐ߫، ߒ߬ߓߊ߬߸ ߏ߬ ߟߊ߬ߞߐ߰ߟߌ ߟߋ߬ ߞߍ߫ ߘߊ߫ ߞߐߣߊߞߙߌ߫ ߕߏ߲ߓߏߟߌߦߊ߫ ߂߀߂߆ ߘߓߊ߬ߓߌߟߊ ߕߋ߬ߟߋ߫ ߂߉߸ ߞߵߊ߬ ߛߌ߰ ߃߁ ߠߊ߫، ߕߋ߬ߟߋ߫ ߛߊ߬ߓߊ ߏ߬ ߞߣߐ߫߸ ߘߊ߲ߘߊߟߌߟߊ ߟߎ߫ ߞߵߊ߬ߟߎ߬ ߤߊ߲ߞߟߌ߫ ߝߙߊ߬ ߢߐ߲߮ ߞߊ߲߬ ߞߍ߲ߘߍߦߊ ߝߙߋߞߋ߫ ߛߌߦߊߡߊ߲߫ ߞߊ߲߬߸ ߖߊ߲߬ߞߊߙߏ ߡߍ߲ ߠߎ߬ ߦߋ߫ ߝߘߊ߬ߝߌ߲߬ߠߊ߫ ߞߊ߲߬߸ ߡߍ߲ ߓߎ߲ߓߎ߲߫ ߘߊ߫ ߘߋ߲ߓߊߟߋ߲ ߟߐ߲߫ ߢߊ ߣߴߊ߬ ߘߊ߲ߘߊ߫ ߢߊ ߞߊ߲߬߸ ߊ߬ ߣߌ߫ ߗߍ߭ ߣߌ߫ ߡߏ߬ߛߏ ߟߊ߫ ߢߊ߬ߡߊ߲ ߛߎ߯ߦߊ ߟߎ߫ ߞߊ߲߬.

ߟߊ߬ߞߐ߰ߟߌ ߘߊߦߟߍߟߌ ߘߐ߫߸ ߞߐߣߊߞߙߌ߫ ߒߞߏ ߘߏ߲߬ߞߏ ߟߎ߬ ߓߐ߫ ߘߊ߫ ߟߋ߬ ߞߊߕߌ߫߸ ߞߊ߬ ߕߊ߯ ߘߊߦߟߍߟߌ ߖߊ߲߬ߖߏ߲ ߞߍ߫ ߖߡߊ߬ ߞߏ ߘߌ߫، ߒߞߏ ߟߍߙߘߊ߫ ߓߍ߲߬ߞߊߘߌ߫ ߗߋߕߌ߯ ߛߍ߬ߓߍ߫ ߡߊ߰ߙߊ߫ ߕߘߍ߬ ߞߣߍ ߞߊ߲߬߸ ߞߎߡߊߕߍ߫ ߡߊ߲߬ߘߋ߲߫ ߘߋ߬ߙߌ߬ߘߊ ߛߌ߲ߘߌߓߊ߮ ߘߝߖ ߤߦߊ߫ ߡߊ߯ߘߌ߫ ߛߌ߬ߟߊ߫ ߡߊ߬߸ ߟߞߝ ߞߊ߲ߕߌ߯ ߟߏ߲ߞߊߛߌߦߊ߫ ߞߎ߬ߟߌߓߊ߬ߟߌ߬߸ ߞߵߏ߬ ߟߊ߫ ߞߐߣߊߞߙߌ߫ ߒߞߏ߫ ߕߐ߲߫ ߜߘߍ߫ ߟߎ߫ ߣߌ߫ ߓߊ߯ߙߊ߫ ߘߊߞߎ߲߫ ߛߌߦߊߡߊ߲߫ ߞߏߟߊߕߍ߮ ߟߎ߫ ߞߊ߲߬، ߓߊߏ߬߸ ߓߍ߯ ߟߋ߬ ߓߐ߫ ߘߊ߫، ߝߊ߰ߡߊ ߟߎ߫ ߘߏ߲߬ ߝߣߊ߫ ߡߊ߫ ߕߏ߫ ߞߐ߫ ߞߍ߲ߘߍߦߊ ߡߊ߬ߘߎ߮ ߘߐ߫.

ߟߊ߬ߞߐ߰ߟߌ ߣߌ߲߬ ߛߋ߫ ߘߴߊ߬ ߕߘߍ߬ߒ߬ߘߐ߬ߓߊ߮ ߟߎ߬ ߟߊ߫ ߟߐ߲ߠߌ߲ ߡߊߞߊ߬ߝߏ߬ ߟߊ߫߸ ߞߵߊ߬ߟߎ߬ ߟߊ߫ ߟߐ߲ߠߌ߲ ߠߎ߬ ߞߍ߫ ߓߍ߯ ߘߍ߭ ߘߌ߫߸ ߞߊ߬ ߕߊ߬ߡߌ߲߬ ߢߊ߫ ߞߎߘߊ߫ ߣߌ߫ ߝߙߍ߬ ߞߎߘߊ߫ ߟߎ߫ ߛߐ߬ߘߐ߲߬ ߠߊ߫ ߞߣߐ߬ߘߐ߬ߝߟߌ߬ ߞߏ ߛߌߦߊߡߊ߲߫ ߡߊ߬ ߝߘߊ߬ߝߌ߲߬ ߘߊ߲ߘߊߟߌ ߞߊߡߊ߲ ߞߣߐ߫.

ߞߍߞߏ߫ ߛߓߊߣߊ߲ ߢߌ߲߬ ߘߐ߫߸ ߛߌ߲߬ߝߏ߲߬ߧߊ߬ߟߌ߬ߟߊ ߟߎ߬ ߞߊ߬ ߘߏ߫ ߝߐ߫ ߗߍ߭ ߣߌ߫ ߡߏ߬ߛߏ ߓߍ߯ ߟߋ߬ ߟߊ߫ ߖߊ߲߬ߞߊߙߏ ߟߎ߫ ߞߊ߲߬߸ ߓߊ߬ߙߵߊ߬ߟߎ߫ ߞߵߊ߬ߟߎ߬ ߘߐߝߎߟߋ߲߫ ߗߍ߭ ߟߎ߬ ߕߊ ߟߋ߬ ߞߊ߲߬ ߢߌ߬ߣߊ߲߬.

ߞߏ߲߬ߓߏ ߞߏߕߍߓߊ߲߫ ߞߡߊ߬ߙߊ߬ ߡߍ߲ ߦߋ߫ ߟߊ߬ߞߐ߰ߟߌ߬ߟߊ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߥߟߊ߬ߘߊ ߟߎ߬ ߓߎ߲ߓߎ߲߫ ߘߊ߫ ߞߎߡߘߊ߫ ߟߎ߫ ߟߋ߬ ߡߊ߬߸ ߡߍ߲ ߠߎ߬ ߦߋ߫ ߘߊ߲ߘߊߟߌߟߊ߫ ߛߌߦߊߡߊ߲߫ ߛߍ߰ ߟߊ߫ ߛߐ߲߬.

<<ߊ߲ ߞߊ߬ ߖߊ߲߬ߞߊߙߏ߫ ߝߌ߬ߟߊ߫ ߟߋ߬ ߕߊ߬ ߡߏ߬ߛߎ ߟߎ߫ ߝߍ߬߸ ߞߊ߬ ߖߊ߲߬ߞߊ߬ߙߏ߬ ߣߊ߯ߣߌ߲߫ ߕߊ߬ ߗߍ߭ ߟߎ߫ ߝߍ߬߸ ߡߍ߲ ߠߎ߬ ߢߊߝߐ߫ ߘߴߊ߲ ߓߟߏ߫ ߟߊ߬ߞߐ߬ߟߌ߬ߓߊ ߢߌ߲߬ ߘߐ߫.>> ߊ߬ ߞߵߏ߬ ߦߌ߬ߘߊ߬.

ߗߍ߭ ߟߎ߬ ߣߌ߫ ߡߏ߬ߛߏ ߟߎ߬ ߕߊ ߏ߬ ߞߐߝߍ߬߸ ߟߊ߬ߞߐ߬ߟߌ ߣߌ߲߬ ߞߍ߫ ߘߊ߫ ߖߊ߲߬ߞߊ߬ߙߏ߬ ߓߎ߯ߣߍ߲߫ ߜߘߍ߫ ߞߊ߲߬߸ ߣߊߟߌ߬ߡߎ߲߫ ߘߋ߲ߓߊߟߋ߲ ߘߌ߫߸ ߏ߬ ߡߍ߲ ߦߋ߫ ߖߊ߲߬ߞߊ߬ߙߏ߬ ߟߊߝߛߊ߬ߣߍ߲߬ ߘߌ߫ ߝߊ߲߬ ߞߣߐ ߢߌ߲߬ ߠߎ߬ ߘߐ߫ ߦߊ߲߬ ߞߏߛߓߍ߫.

ߟߊ߬ߞߐ߰ߟߌ ߢߌ߲߬ ߕߘߍ߬ߒ߬ߘߐ߬ߓߊ߮ ߟߎ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߞߍ߫ ߘߊ߫ ߞߏ߫ ߟߎ߫ ߞߊ߬ߟߊߡߊ߬ ߢߌ߬ߣߊ߲߬ ߕߊ ߢߌ߲߬ ߘߐ߫߸ ߊ߬ߟߎ߫ ߕߎ߲߬ ߕߍ߫ ߡߍ߲ ߠߎ߬ ߞߊ߬ߟߊߡߊ߬ ߝߟߐ߫ ߣߌ߫ ߓߌ߬ ߘߐ߫߸ ߊ߬ߟߎ߬ ߟߊ߫ ߟߐ߲ߠߌ߲ ߡߊߞߊ߬ߝߏ߬ ߘߊ߫ ߟߋ߬ ߞߏߛߓߍ߫.

ߘߊߦߟߍߟߌ ߖߊ߲߬ߖߏ߲ ߘߐ߫߸ ߞߍ߲ߘߍߦߊ ߞߏߟߊߕߍ߯ ߛߌߦߊߡߊ߲߫ ߕߘߍ߬ ߞߣߍ ߞߊ߲߬، ߞߏ߲߬ߓߏ ߝߊߕߎߡߊߕߊ߬ ߞߡߊ߬ߙߊ߫ ߞߵߊ߬ ߦߌ߬ߘߊ߬ ߞߏ߫ ߟߊ߬ߞߐ߰ߟߌ ߢߌ߲߬ ߦߋ߫ ߓߍ߲߬ߒ߬ߛߋ߲߬ߡߊ߫ ߟߋ߬ ߘߌ߫߸ ߞߍ߲ߘߍߦߊ ߓߊ߯ߙߟߊ߫ ߓߐߣߍ߲߫ ߢߐ߲߰ ߡߊ ߟߎ߬ ߟߊ߫ ߓߊ߯ߙߊߢߐ߲߯ߦߊ ߝߊ߲߬ߞߊߘߏ߲߬.

<<ߓߌ߬ ߢߐ߲߰ ߟߏ߫߸ ߒߠߋ ߛߍߥߊߣߍ߲߫ ߠߋ߬ ߞߊߕߌ߫߸ ߞߵߏ߬ ߞߎ߲߭ ߞߍ߫ ߒ ߛߐ߬ߘߐ߲ ߘߌ߫ ߝߘߊ߬ߝߌ߲߬ ߘߊ߲ߘߊߟߌߟߊ ߟߎ߬ ߟߊ߫ ߟߊ߬ߞߐ߰ߟߌ ߢߌ߲߬ ߘߐ߫، ߊߟߎ߫ ߦߴߊ߬ ߟߐ߲߫ ߞߏ߫ ߟߊ߬ߢߌ߬ߣߌ߲߬ ߞߋߟߋ߲߫ ߠߋ߬ ߒ߬ ߓߍ߯ ߟߊ߫، ߊ߬ ߞߍ߫ ߘߊ߫ ߕߎ߬ߓߊ߬ߓߎ߬ ߘߊ߲ߘߊߟߌ߫ ߘߌ߫ ߓߊ߬ ߥߟߊ߫ ߝߘߊ߬ߝߌ߲߬ ߘߊ߲ߘߊߟߌ߫߸ ߓߍ߯ ߟߊߘߍ߬ߣߍ߲ ߦߋ߫ ߞߏ߫ ߞߋߟߋ߲߫ ߠߋ߬ ߛߍ߬ߘߏ߲ ߠߊ߫߸ ߣߴߏ߬ ߦߋ߫ ߖߊ߬ߡߊ ߟߊ߫ ߞߍ߲ߘߍߦߊ ߘߌ߫.>> ߓߐ߬ߟߐ߲߬ߞߊ ߣߌ߲߬ ߞߵߏ߬ ߟߊߛߋ߫.

ߏ߬ ߟߵߊ߬ ߦߌ߬ߘߊ߬ ߟߊ߫ ߞߏ߫ ߓߊߛߌߦߟߊ ߟߎ߬ ߘߊߞߎ߲ ߓߐ߫ ߘߊ߫ ߢߐ߲߮ ߡߊ߫ ߛߌ߫ ߡߊ߬߸ ߊ߬ ߓߍ߯ ߟߊ߫ ߟߊ߬ߢߌߣߌ߲ ߦߋ߫ ߞߋߟߋ߲߫ ߠߋ߬ ߘߌ߫، ߊ߬ ߘߏ߲߬ ߜߎ߸ ߖߊ߲߬ߞߊ߬ߙߏ߬ߕߐ߬ ߛߌߦߊߡߊ߲߫ ߠߋ߬ ߝߣߊ߫ ߦߴߊ߬ ߞߎ߲߬ߛߌ߲߬ ߠߊ߫ ߝߘߊ߬ߝߌ߲߬ߠߊ߫ ߘߊ߲ߘߊߟߌߟߊ ߟߎ߬ ߟߊ߫.

ߟߊ߬ߞߐ߰ߟߌ߬ ߞߋߟߋ߲ ߣߌ߲߬ ߘߐ߫߸ ߞߏ߲߬ߓߏ ߡߊߞߏ߬ߣߌ߫ ߘߏ߲߬ߖ߭ߏ߫ ߕߘߍ߬ ߞߣߍ ߞߊ߲߬߸ ߊ߬ߟߋ ߡߍ߲ ߦߋ߫ ߦߋߢߐ߲߯ߠߊ ߘߊ߲ߘߊߟߌ ߗߋߕߌ߯ ߝߊ߬ߛߏ߬ߟߊ߬ߞߊ ߘߌ߫߸ ߏ߬ ߝߣߊ߫ ߞߊ߬ ߟߊ߬ߞߐ߰ߟߌ߬ ߕߏ߲ߜߏ ߣߌ߲߬ ߞߍߟߌ ߕߊ߲߬ߘߏ߬.

ߊ߬ ߟߊ߫ ߝߐߟߌ߫ ߘߐ߫߸ ߘߊ߲ߘߊߟߌߟߊ ߟߎ߬ ߛߋߞߏߦߊ ߡߊߞߊ߬ߝߏ ߘߌ߫ ߛߋ߫ ߞߍ߫ ߟߊ߫ ߕߙߎ߬ ߘߌ߫ ߞߊ߬ ߝߘߊ߬ߝߌ߲߬ ߘߊ߲ߘߊߟߌ ߝߊ߲߬ߞߊߘߏ߲߬ ߞߵߊ߬ ߟߛߊߠߌ߲ߧߊ߫ ߖߌ߬ߣߍ߬ ߞߣߐ߫ ߓߘߍߞߍ߭.

<<ߊ߬ ߦߋ߫ ߕߊ߬ߡߌ߲߬ ߠߴߊ߲ ߘߏ߬ߣߌ߲ ߠߋ߬ ߝߍߦߊ߫ ߟߊ߫߸ ߞߵߊ߲ ߠߊ߫ ߓߊ߯ߙߊ ߣߐ߰ߦߴߊ߲ ߓߟߏ߫، ߓߊߏ߬߸ ߊ߲ ߓߍ߯ ߟߊ߬ߢߌߣߌ߲ ߠߋ߬߸ ߛߊ߫ ߘߊ߲ߘߊߟߌ ߞߍߢߊ߫ ߛߎ߮ ߢߌ߲߬ ߘߌ߫ ߝߊ߲߬ߞߊ߫ ߛߐ߬ߘߐ߲߬߸ ߣߴߊ߬ ߡߊ߫ ߢߊ߬ ߞߏ߫ ߊ߬ߟߋ ߟߋ߬ ߛߎ߬ߘߎ߲߬ߡߊ߲߬ ߊ߲ ߠߊ߫ ߡߐ߱ ߟߎ߬ ߟߊ߫߸ ߊ߬ ߣߴߊ߬ߟߋ ߟߋ߬ ߦߋ߫ ߟߊߓߊ߯ߙߊ߫ ߟߴߊ߲ ߓߟߏ، ߣߌ߫ ߢߊ ߛߋ߫ ߘߊ߫ ߟߐ߬ ߟߊ߫ ߝߘߊ߬ߝߌ߲߬ ߘߊ߲ߘߊߟߌ ߘߐ߫߸ ߊ߬ ߕߊ߬ߡߌ߲߬ߕߐ߫ ߖߌ߬ߣߍ߬ߞߊ ߟߎ߬ ߟߊ߫ ߞߍ߲ߘߍߦߊ ߟߋ߬ ߝߊ߲߬ߞߊߘߏ߲߬ ߠߊ߫߸ ߓߊߏ߬ ߢߌ߬ߣߊ߬ ߡߊ߲߫ ߞߊ߲߫ ߞߊ߬ ߞߍ߫ ߘߊ߲ߘߊߟߌ ߝߊ߬ߓߏ߲߬ ߛߌ߫ ߞߐ߫.>> ߊ߬ ߞߵߏ߬ ߦߌ߬ߘߊ߬.

ߕߋ߬ߟߋ߫ ߛߊ߬ߓߊ ߣߌ߲߬ ߞߣߐ߫߸ ߟߊ߬ߞߐ߰ߟߌ߫ ߢߐ߲߰ߦߋ߬ߓߊߟߌ ߟߋ߬ ߞߍ߫ ߘߊ߫ ߞߐߣߊߞߙߌ߫߸ ߟߊ߬ߞߐ߰ߟߌ߬ߟߊ ߓߊ߬߸ ߘߏߕߎ ߞߏߟߊߕߍ߮ ߟߎ߬ ߓߊ߬߸ ߊ߬ߟߎ߬ ߓߍ߯ ߟߋ߬ ߞߵߊ߬ߟߎ߬ ߤߊ߲ߞߟߌ ߟߎ߫ ߝߙߊ߬ ߢߐ߲߮ ߞߊ߲߬߸ ߞߊ߬ ߛߋ߫ ߕߐ߬ߣߐ߫ ߛߐ߬ߘߐ߲߬ ߠߊ߫ ߕߟߋ߬ ߛߓߊ߬ ߟߊߞߐ߯ߟߌ ߢߌ߲߬ ߘߐ߫߸ ߖߡߊ߬ߣߊ߫ ߣߊ߬ߣߍ߲ ߠߎ߬ ߡߊ߫ ߣߡߌߛߊ߫ ߡߍ߲ ߘߐ߫.

ߟߊ߬ߞߐ߬ߟߌ ߞߍߞߏ߫ ߛߓߊߣߊ߲ ߣߌ߲߬ ߓߘߊ߫ ߞߍ߫ ߕߙߎ߬ ߘߌ߫߸ ߘߏߕߎ ߓߘߊ߫ ߡߐ߬ߟߐ߲߬ ߞߎߘߊ߫ ߘߌ߫ ߝߘߊ߬ߝߌ߲߬ ߘߊ߲ߘߊߟߌ ߡߊ߬߸ ߞߊ߬ ߡߐ߬ߟߐ߲߬ ߞߎߘߊ߫ ߘߌ߫ ߒߞߏ ߟߐ߲ߠߌ߲ ߡߊ߬߸ ߞߵߊ߬ ߟߐ߲߫ ߞߏ߫ ߝߘߊ߬ߝߌ߲߬ ߘߊ߲ߘߊߟߌ ߝߣߊ߫ ߓߘߊ߫ ߝߟߐ߫ ߊ߬ ߛߊ߲ߞߊ߫ ߟߊ߫ ߘߎߢߊ߫ ߞߊ߬ߞߎߘߊ ߘߊ߲ߘߊߟߌ ߡߊ߬߸ ߊ߬ ߖߍ߬ߘߍ ߦߴߊ߬ߟߎ߬ ߢߍ߫ ߘߊߞߎ߲ ߘߏ߫ ߟߎ߫ ߘߐ߫߸ ߣߌ߫ ߘߛߍ ߕߍ߫.

ߒ߬ߓߊ߬߸ ߟߊ߬ߤߘߌ ߓߘߊ߫ ߘߌ߫ ߢߐ߲߮ ߡߊ߬ ߞߊ߬ ߢߐ߲߯ߓߍ߲߬ ߘߌ߬ߞߌ߬ߙߊ߬ ߜߘߍ߫ ߘߐ߫ ߛߊ߲߭ ߣߊ߬ߕߐ߸ ߞߍߞߏ߫ ߣߊ߯ߣߌ߲ߣߊ߲ ߘߐ߫߸ ߡߍ߲ ߦߙߐ߫ ߞߋߟߋ߲ ߓߍߣߊ߬ ߟߊߕߍ߰، ߢߌ߬ߣߊ߲߬ ߕߊ ߣߌ߲߬ ߞߏ߬ߣߌ߲ ߞߍ߫ ߘߊ߫ ߖߌ߬ߣߍ߬ ߞߊ߲ߓߍ߲ ߞߎߓߋߘߊ ߟߋ߬ ߤߊ߬ߙߌ߬ߖߍ߮ ߘߌ߫.