ߊ߬ ߛߊ߲߬ ߟߏ߯ߟߎ ߘߝߊߣߍ߲߫ ߞߐߟߌߞߐߟߌ ߟߋ߬ ߕߋ߲߬߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߴߊ߬ ߟߊ߫ ߖߊ߬ߡߊ ߞߊ߬ ߝߊ߲߬ߞߊ ߕߊ߬ ߂߀߂߁ ߕߎߟߊߝߌ߲ ߕߟߋ߬ ߅ ߡߊ߬، ߒ߬ߓߊ߬߸ ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎ߬ߦߊ߬ ߡߍ߲ ߦߋ߫ ߞߊ߲ߞߊ߲߫ ߕߌ߲߬ߞߎߘߎ߲ ߓߌ߬ߟߊ߬ߢߐ߲߰ߡߊ ߣߌ߫ ߞߌ߬ߓߊ߬ߙߏ߬ߦߊ߬ ߗߋߕߌ߮ ߘߌ߫߸ ߏ߬ ߣߐ߬ ߟߊ߬ߛߋ߬ߟߌ߫ ߟߋ߬ ߞߍ߫ ߟߊ߫ ߝߐ߰ߓߍ߬ߦߊ߬ߟߊ ߟߎ߬ ߢߊߞߘߐ߫ ߂߀߂߆ ߕߎߟߊߝߌ߲ ߕߟߋ߬ ߢߌ߲߬ ߡߊ߬߸ ߞߊ߬ ߞߎߡߊ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߞߊ߲߬ ߜߍߞߊ߲ߠߊ ߘߐ߫ ߛߊ߲߬ ߟߏ߯ߟߎ ߢߌ߲߬ ߞߣߐ߫، ߊ߬ ߞߵߊ߬ ߟߊߛߋ߫ ߞߏ߫: <<ߞߵߊ߬ ߕߊ߬ ߏ߬ ߟߏ߲ ߡߊ߬ ߞߵߊ߬ ߛߌ߰ ߓߌ߬ ߟߊ߫߸ ߦߟߍ߬ߡߊ߲ ߓߘߊ߫ ߘߏ߲߬ ߘߊߞߎ߲߫ ߛߌߦߊߡߊ߲߫ ߠߋ߬ ߘߐ߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬ ߖߡߊ߬ߣߊ ߞߣߐ߫.>> ߊ߬ ߞߵߏ߬ ߝߐ߫ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߓߊ߯ߙߊ߫ ߛߌߦߊߡߊ߲߫ ߠߋ߬ ߞߍߣߍ߲߫ ߟߐ߬ߟߌ ߣߌ߫ ߛߌߟߊ߫ ߞߏ ߘߐ߫߸ ߞߍ߲ߘߍߦߊ ߘߐ߫߸ ߛߍ߬ߣߍ ߘߊߞߎ߲ ߘߐ߫߸ ߢߎߡߍߞߏ ߘߊߞߎ߲ ߘߐ߫߸ ߡߊ߬ߙߊ ߞߍߢߊ ߟߎ߬ ߘߐ߫.

ߝߐ߰ߓߍ߬ߦߊ߬ߟߊ ߟߎ߬ ߢߊߞߘߐ߫߸ ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎ߬ߦߊ߫ ߞߵߊ߬ ߞߙߊ ߟߊߡߊ߰ ߘߊߞߎ߲߫ ߛߌߦߊߡߊ߲߫ ߞߊ߲߬߸ ߞߵߏ߬ ߛߐ߰ߡߊ ߞߍ߫ ߞߎ߲߬ߠߊ߬ߛߌ߮ ߟߊ߫ ߘߐ߬ߦߊ߰ߟߊ߬ߟߌ ߘߌ߫ ߖߡߊ߬ߣߊ ߞߣߐߟߊ ߘߐ߫߸ ߞߊ߬ߦߌ߯ ߛߋߓߊ߯ߦߊ ߕߊ߬ ߕߎߡߊ ߟߊ߫، ߏ߬ ߡߍ߲ ߞߍ߫ ߘߊ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߞߎ߲߬ߠߊ߬ߛߌ߮ ߓߟߏ߫ ߞߵߊ߬ ߕߊ߬ ߂߀߂߂ ߘߓߊ߬ߕߊ ߕߋ߬ߟߋ߫ ߂߉ ߡߊ߬ ߞߵߊ߬ ߛߌ߰ ߥߊ߬ߛߌ߬ߥߙߊ ߕߋ߬ߟߋ߫ ߃ ߟߊ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߕߊ߯ߡߊ ߏ߬ ߕߐ߬ߣߐ ߥߙߊ߬ ߘߊ߫ ߖߡߊ߬ߣߊ߬ߘߋ߲ ߠߎ߬ ߞߎ߲߬ߞߏ ߟߐ߲ ߘߐ߫߸ ߞߵߊ߬ߟߎ߫ ߞߎ߲߬ߞߊ߲߬ ߝߙߋߞߋ ߟߎ߬ ߟߐ߲߫߸ ߞߵߊ߬ ߕߙߐ߫ ߞߏ ߟߎ߬ ߣߴߊ߬ߟߎ߫ ߣߊ߬ߕߊ ߟߎ߬ ߟߐ߲߫. <<ߊ߬ ߛߋ߲߬ߢߊ߬ ߝߟߐ ߟߋ߬ ߞߍ߫ ߘߴߏ߬ ߘߌ߫ ߝߘߏ߬ߓߊ߬ ߞߎ߲߬ߠߊ߬ߛߌ߰ߟߌ ߡߊ߬ߘߎ߮ ߘߐ߫߸ ߞߊ߬ ߓߐ߫ ߞߊ߬ ߘߏ߲߬ ߖߡߊ߬ߣߊ߬ߘߋ߲ ߠߎ߬ ߞߊ߲߬߸ ߞߵߊ߬ߟߎ߫ ߡߊ߬ߞߏ ߟߎ߬ ߟߐ߲߫߸ ߞߊ߬ ߓߊ߲߫ ߞߵߊ߬ߟߎ߫ ߖߋ߬ߓߌ߬ ߝߣߊ߫.>> ߞߊ߲ߛߊ߲߫ ߞߵߏ߬ ߦߌ߬ߘߊ߬ ߞߎߡߊ ߘߐ߫.

ߛߌߟߊ߫ ߞߏ ߡߊ߬ߘߎ߮ ߘߐ߫߸ ߞߊ߲ߛߊ߲߫ ߞߎߡߊ߫ ߘߊ߫ ߞߊ߲ߞߊ߲߫ ߣߌ߫ ߞߊߦߌߙߊߥߊ߯ߣߍ߲߫ ߕߍߟߊ ߛߌߟߊ ߓߊ߯ߙߊ ߞߏ ߞߊ߲߬߸ ߏ߬ ߡߍ߲ ߘߌ߫ ߞߎߘߍ߫ ߁߅ ߓߐ߫߸ ߊ߬ ߣߌ߫ ߞߊ߲ߞߊ߲߫ ߣߌ߫ ߡߊ߲߬ߖߊ߲߬ߠߊ߬ ߕߍ߸ ߞߵߏ߬ ߟߊ߫ ߛߊ߲ߞߊߙߊ߲ߣߌ߲߫ ߛߍ߲ߓߊ ߟߞߊߟߌߦߊ ߞߊ߲߬߸ ߊ߬ ߣߌ߫ ߞߙߎ߬ߛߊ߬ ߣߌ߫ ߘߊߓߏߟߊ ߕߍ߸ ߞߵߏ߬ ߟߊ߫ ߢߊ߲ߘߊ߲ ߛߍ߲ߓߊ߫ ߜߟߊ߬ߜߟߊ߫ ߁߂߀ ߞߊ߲߬ ߕߏ߭ߞߎ߬ߣߎ߲߫ ߝߊ߲߭ ߝߍ߬. ߞߊ߬ߕߎ߲߯߸ ߞߏ߲ߞߏ߫ ߞߣߐ߫ ߛߏ߫ ߛߌߦߊߡߊ߲߫ ߓߍ߫߸ ߡߍ߲ ߠߎ߬ ߓߘߊ߫ ߛߌߟߊ߫ ߡߌߛߍ߲ ߠߎ߬ ߛߐ߬ߘߐ߲߬.

ߗߋߕߌ߮߸ ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎ߬ߦߊ߫ ߞߵߊ߬ ߛߋߞߏ ߞߍ߫ ߞߍ߲ߘߍߦߊ ߡߊ߬ߘߎ߮ ߓߊ߯ߙߊ߫ ߞߍߣߍ߲ ߠߎ߬ ߝߣߊ߫ ߢߊߝߐ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߘߊ߲ߘߊߛߏ߫ ߛߌߦߊߡߊ߲߫ ߠߋ߬ ߓߘߊ߫ ߟߐ߬߸ ߞߵߏ߬ ߟߊ߫ ߛߊ߲ߡߊߘߊ߲ ߞߊ߲߬߸ ߊ߬ ߣߌ߫ ߜߋߙߋ߲ߜߋߙߋ߲ߧߊ߫ ߕߊ߲ߓߊ߲ ߠߎ߬ ߣߌ߫ ߞߎ߲߰ߛߎ߲߬ ߠߊ߬ߥߟߏ߬ ߘߌ߲ߞߌߙߊ ߟߎ߬ ߣߌ߫ ߖߋ߬ߣߌ߲߬ߠߌ߲߬ ߦߙߐ ߘߏ߫ ߟߎ߫، ߞߊ߬ߕߎ߲߯߸ ߘߊ߲ߘߊߛߏ ߦߋ߫ ߓߊ߯ߙߊ߫ ߡߎߙߊ߲ ߡߍ߲ ߠߎ߬ ߓߌ߬ߟߊ߬ ߟߊ߫ ߞߏ߫ ߕߣߐ߬ ߕߴߊ߬ߟߎ߬ ߟߊ߫߸ ߞߊ߬ ߛߴߏ߬ ߟߎ߫ ߖߋ߬ߣߌ߲߬ ߦߙߐ ߟߊߘߊ߲߫ ߠߊ߫ ߞߵߊ߬ߟߎ߫ ߕߣߐ߬ߓߐ߬ ߝߣߊ߫ ߞߊ߬ ߣߐ߯ߘߏ߲ߟߊ߲ ߓߐ߫ ߊ߬ ߘߐ߫، ߊ߬ ߞߵߊ߬ ߝߐ߫ ߊ߬ ߟߊ߫ ߛߙߊ߬ߣߎ߲߬ ߞߋߟߋ߲ ߢߌ߲߬ ߠߋ߬ ߘߐ߫߸ ߞߏ߫: <<ߘߊ߲ߘߊߟߌߟߊ߫ ߓߐߣߍ߲߫ ߢߐ߲߰ ߡߊ߫ ߇߂߂ ߖߊ߬ߕߋ߬ ߓߘߊ߫ ߕߊ߬ ߞߵߊ߬ ߟߊߛߊߙߌ߫ ߞߊ߲ߞߊ߲߫ ߕߌ߲߬ߞߎߘߎ߲ ߝߊ߲߭ ߠߎ߬ ߟߊ߫.>> ߊ߬ ߞߵߏ߬ ߦߌ߬ߘߊ߬.

ߛߍ߬ߣߍ ߘߊߞߎ߲ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߛߌߦߊߡߊ߲߫ ߓߘߊ߫ ߞߍ߫ ߞߊ߲ߞߊ߲߫ ߞߐߙߐ߲ߘߌ߫ ߞߏߟߊߘߍ ߟߊ߫ ߞߏ ߘߐ߫߸ ߞߵߊ߬ ߝߊ߲ߓߏ߲ ߟߊߢߊ߬߸ ߊ߬ ߓߊ߯ߙߊߞߍߟߊ ߟߎ߬ ߦߋ߫ ߛߙߊ߬ ߟߊ߫߸ ߛߣߍ߬ߞߍ߬ ߡߎߙߊ߲ ߠߎ߬ ߦߋ߫ ߦߋ߲߬߸ ߡߍ߲ ߘߴߊ߬ ߞߍ߫ ߞߐߙߐ߲ߘߌ ߓߋ߬ߝߘߍ߬ ߁߀߀߉ ߘߌ߫ ߛߋ߫ ߛߣߍ߬ ߟߊ߫.

ߡߊ߬ߡߊ߬ߘߌ߬ ߞߊ߲ߛߊ߲߫ ߘߎߎ߲߬ߓߎ߬ߦߊ߫ ߞߵߊ߬ ߦߌ߬ߘߊ߬ ߌߞߐ߫߸ ߞߏ߫ ߓߊ߯ߙߊ߫ ߛߌߦߊߡߊ߲߫ ߓߘߊ߫ ߞߍ߫ ߊ߬ߟߎ ߗߋߘߊߕߌ߮ ߟߎ߬ ߡߊߞߍ߫ ߦߙߐ߫ ߞߏ ߘߐ߫߸ ߞߊ߬ߙߊ߲߬ ߞߏ ߛߌߟߊ ߝߍ߬߸ ߟߐ߲ߠߌ߲ߦߊ ߛߌߟߊ ߝߍ߬، ߞߊ߬ߕߎ߲߯߸ ߞߊ߲ߞߊ߲߫ ߛߊ߲ߡߊߘߊ߲ ߓߘߊ߫ ߘߐߓߍ߲߬ ߖߊ߲߬ߞߊ߰ߣߊ߬، ߟߐ߲ߠߌ߲ߦߊ߫ ߗߍߓߏ߲ ߣߌ߫ ߟߐ߲ߠߌ߲ߦߊ߫ ߕߊ߲ߓߊ߲ ߞߓߊ߫ ߝߟߐ߫ ߛߌ߮ ߓߘߊ߫ ߞߍ߫ ߞߊ߲ߞߊ߲߫ ߛߏ ߞߣߐ߫߸ ߖߊ߯ߓߘߊ߫ ߟߐ ߦߴߌߘߐ߫.

ߞߊ߲ߛߊ߲߫ ߘߎ߲߬ߓߎ߬ߦߊ߬ ߣߌ߫ ߝߐ߰ߓߍ߬ߦߊ߬ߟߊ ߟߎ߬ ߢߊ ߟߊߓߐ ߡߍ߲ ߣߌ߫ ߜߍ߫ ߞߋߟߋ߲߫ ߘߐ߫߸ ߊ߬ ߞߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߟߊ߫ ߛߊ߲߬ ߟߏ߯ߟߎ ߓߊ߯ߙߊ߫ ߞߎ߲ߓߊ߫ ߞߍߣߍ߲ ߘߏ߫ ߟߎ߫ ߝߐ߫ ߛߌߦߊߡߊ߲ ߕߍߡߊ߬߸ ߞߵߊ߬ ߕߊ߬ ߂߀߂߁ ߕߎߟߊߝߌ߲ ߕߟߋ߬ ߅ ߡߊ߬ ߤߊ߲߯ ߕߋ߲߬߸ ߊ߬ ߛߋߣߍ߲߫ ߡߍ߲ ߠߎ߬ ߞߍ߫ ߟߊ߫ ߜߍߞߊ߲ߠߊ ߘߐ߫.