ߓߌ߬ ߂߀߂߆ ߕߎߟߊߝߌ߲ ߕߟߋ߬ ߁߀ ߠߋ߬ ߓߍ߲߬ ߠߊ߫ "ߒߞߏ ߟߐ߯ߝߍߓߊ" ߛߌ߲ߘߌ ߛߊ߲߬ ߟߏ߯ߟߎ ߡߊ߬߸ ߟߐ߯ߝߍߓߊ ߏ߬ ߡߍ߲ ߝߙߋ߬ߝߋ߲ ߡߎ߰ߡߍ ߞߐߞߊ߲ߠߊ ߡߊߛߓߍߣߍ߲߫ ߒߞߏ ߘߐ߫. ߊ߬ ߜߙߋ߬ߡߊߕߍ߰ߓߊ߮ ߟߊ߫ ߝߐߟߌ߫ ߘߐ߫ ߊ߲ ߧߋ߫߸ ߞߏ߫ ߣߌ߲߬ ߡߙߌߦߊ ߓߐߣߍ߲߫ ߞߙߊ߬ߡߐ߰ ߞߙߊߞߊ߬ߣߌ߲߬ ߟߊ߫ ߞߐ߲߰ߡߘߊ߬ ߟߝߊ߬ ߓߊ߰ߙߊ߬ ߦߌߟߊ ߟߋ߬، ߓߊߏ߬߸ ߊ߬ ߕߎ߲߬ ߛߓߍߣߍ߲߫ ߏ߬ ߟߊ߫ ߣߌߘߐ ߞߊ߲߬ ߠߋ߬ ߞߏ߫" ߊߟߊ߫ ߟߋ߬ ߞߊ߫ ߓߏ߲߬" ߓߊ߬ߙߌ߬߸ ߞߟߊߓߎߡߊ ߞߋߕߊ߬ ߞߵߏ߬ ߖߌ߰ ߊߙߊߓߎ߫ ߛߓߍߟߌ ߟߋ߬ ߘߌ߫ :

<< ߒ ߓߊ߯ ߊߙߊߓߎ ߞߊ߬ߙߊ߲߬ ߟߏ߲ ߡߍ߲߸ ߒ ߞߍߕߐ߫ ߊ߬ ߛߓߍ߫ ߟߊ߫ ߒ ߓߟߏߝߋ߲ ߠߎ߬ ߞߊ߲߬ ߠߋ߬ ߞߏ߫" ߡߊ߬ߘߌ߬ߣߊ߬ߞߊ " ߞߊ߬ ߒ ߝߊ߬ߛߏ ߕߐ߮ ߟߊߓߐ߫، ߌߞߏߡߌ߲߬ ߡߐ߰ ߛߌߦߊߡߊ߲߫ ߦߴߊ߬ ߞߍ߫ ߟߊ߫ ߢߊ ߡߍ߲ >>. ߊ߬ ߞߵߏ߬ ߦߌ߬ߘߊ߫.

ߓߊ߬ߙߌ߬߸ ߊ߬ ߦߌ߬ߘߊ߬ ߘߴߊ߬ ߟߊ߫ ߞߏ߫ ߛߓߍߟߌ ߡߍ߲ ߦߋ߫ ߣߌߘߐ ߞߊ߲߬ ߏ߬ߘߌ߫، ߞߵߏ߬ ߕߍ߫ ߊߙߊߓߎ߫ ߛߓߍߟߌ߫ ߘߌ߫߸ ߞߵߏ߬ ߦߋ߫ ߒߞߏ߫ ߛߓߍߟߌ ߟߋ߬ ߘߌ߫߸ ߡߍ߲ ߛߌ߲ߘߌߣߍ߲߫ ߝߘߊ߬ߝߌ߲߬ߞߊ߲ ߣߴߊ߬ ߟߐ߲ߠߌ߲ߦߊ ߠߎ߬ ߛߓߍ߫ ߞߊ߲ߡߊ߬، ߊ߬ ߝߣߊ߫ ߘߏ߲߬ ߢߊ ߟߋ߬ ߞߍ߫ ߘߴߏ߬ ߘߌ߫ ߒߞߏ߫ ߞߊߙߊ߲ ߘߐ߫߸ ߞߵߊ߬ ߢߌߣߌ߲ߞߏ ߣߴߊ߬ ߡߙߌߦߊ ߟߊߛߓߊ߬ߕߌ߬. ߌߞߏߡߌ߲߬ ߓߟߏߝߋ߲ ߡߊߛߓߍ߫ ߝߊ߲߬ߓߊ ߕߎ߲߬ ߦߋ߫ ߘߙߌ߬ߞߌ ߟߎ߬ ߣߌ߫ ߢߍߡߊ ߟߎ߬ ߣߌ߫ ߛߊ߲߬ߡߘߊ ߟߎ߬ ߘߌ߫ ߝߟߐ߫ ߞߊ߬ ߕߊ߯ ߖߊ߲߬ߖߏ߲߬ ߘߊߞߎ߲ ߠߎ߬ ߘߐ߫، ߊ߬ ߝߣߊ߫ ߞߵߊ߬ ߣߊ߬ߕߊ߫ ߏ߬ ߟߋ߬ ߞߏߛߐ߲߬ ߞߏ߫ ߞߊ߬ ߘߏ߫ ߝߊ߬ߙߊ߫ ߏ߬ ߟߎ߫ ߞߊ߲߬ :

<<ߣߴߌ ߞߵߊ߬ ߟߊߞߙߐ߬ߛߌ߬߸ ߌ ߘߴߊ߬ ߦߋ߫ ߞߏ߫ ߊ߬ ߘߎߡߊ߲߫ ߠߋ߬ ߒߞߏ߫ ߞߊߙߊ߲ߘߋ߲ ߓߍ߯ ߥߟߴߊ߬ ߝߊ߲߬ߓߊ ߦߋ߫߸ ߊ߬ߟߎ߬ ߓߟߏߝߋ߲ ߡߊߛߓߍߣߍ߲ ߦߋ߫ ߞߍ߫ ߒߞߏ ߛߓߍߟߌ ߟߊ߫߸ ߊ߬ ߞߍ߫ ߘߴߊ߬ߟߎ߬ ߕߐ߯ ߥߟߴߊ߬ߟߎ߬ ߛߏ ߕߐ߯ ߘߌ߫ ߓߊ߬، ߐ߲߸ ߡߊ߬ߛߓߍ߬ߟߌ߬ߝߋ߲ ߏ߬ ߓߎ߲ߓߎ߲ ߝߋ߲߫ ߛߊ߬ߓߊ߫ ߡߊ߬߸ ߏ߬ ߟߋ߬ ߞߏ߫ ߕߊ߲ߓߏ߲ߣߍ߲ ߘߌ߫، ߣߊߟߌ߬ߡߎ߲߫ ߝߎ߯ߟߊ ߣߌ߫ ߘߙߌ߬ߞߌ ߣߌ߫ ߛߊ߲߬ߡߘߊ ߘߌ߫߸ ߞߊ߬ ߓߊ߲߫ ߞߴߏ߬ ߞߍ߫ ߕߎ߬ߡߟߊ߬ߞߊ ߤߊߡߊ߲߫ ߖߊ߲߬ߖߏ߲߬ߠߊ߬ߞߊ ߘߌ߫߸ ߞߊ߬ߛߐ߬ߘߐ߲߬߸ ߊ߲ ߘߌ߫ ߛߴߊ߲ ߠߊ߫ ߝߙߋ߬ߝߋ߲ ߠߎ߬ ߓߍ߯ ߡߊߛߓߍ߫ ߟߊ߫ ߒߞߏ ߟߊ߫، ߓߊߏ߬߸ ߡߐ߱ ߟߎ߬ ߕߴߌ ߓߊ߲߬ ߠߊ߫ ߝߙߋ߬ߝߋ߲ ߛߊ߲߬ ߠߊ߫ ߘߋ߬ ߞߏ߫ ߛߓߍߟߌ ߛߌ߬ߣߊ߬ ߦߴߊ߬ ߞߊ߲߬߸ ߊ߬ ߦߋ߫ ߛߊ߲߬ ߠߴߊ߬ ߣߊ߬ߝߊ ߟߋ߬ ߟߋ߬ ߡߊ߬߸ ߡߐ߰ ߺ ߐ ߺ ߡߐ߰ ߘߏ߲߬ ߓߊ߯ ߝߙߋ߬ߝߋ߲ ߒߞߏߡߊ ߏ߬ ߛߊ߲߬، ߏ߬ ߓߘߊ߫ ߞߍ߫ ߒߞߏ ߛߘߊߟߊߓߊ߮ ߘߌ߫>>. ߊ߬ ߞߵߏ߬ ߝߐ߫.

ߒ߬ߓߊ߬߸ ߞߊ߬ ߓߍ߲߬ ߡߙߌߦߊ ߏ߬ ߟߊߛߓߊ߬ߕߌ ߡߊ߬߸ ߊ߬ ߞߊ߬ <<ߒߞߏ ߟߐ߯ߝߍߓߊ>> ߞߐߜߍ ߛߌ߲ߘߌ߫ ߘߍ߬ߞߙߏߝߏ ߟߎ߫ ߞߊ߲߬ ߂߀߂߁ ߕߎߟߊߝߌ߲ ߕߟߋ߬ ߁߀ ߡߊ߬، ߞߊ߬ ߦߋ߲߬ ߞߍ߫ ߊ߬ ߟߊ߫ ߝߙߋ߬ߕߊ ߟߎ߬ ߝߙߋ߬ ߦߙߐ ߘߌ߫߸ ߏ߬ ߡߍ߲ ߛߌ߲ߘߌ ߛߊ߲߬ ߟߏ߯ߟߎ ߘߝߊߣߍ߲߫ ߞߐ߲ߞߐ߲ ߦߋ߫ ߓߌ߬ ߂߀߂߆ ߕߎߟߊߝߌ߲ ߕߟߋ߬ ߁߀ ߘߌ߫، ߊ߬ ߛߋ߫ ߘߊ߫ ߞߊ߬ ߖߐ߯ߙߊ߲߫ ߛߌߦߊߡߊ߲߫ ߡߊߛߓߍ߫ ߒߞߏ ߟߊ߫ ߏ߬ ߡߍ߲ ߞߎ߲߬ߕߊ߮ ߞߘߐ߫، ߦߏ߫߸ ߢߍߡߊ߸ ߓߟߏߟߊߝߋ߲߸ ߕߎ߬ߡߊ߬ߟߊ߲߸ ߛߑߞߙߊߓߟ߸ ߛߏ߬ߝߘߊ߬ߓߋ߸ ߛߓߍߘߋ߲ߥߟߊ߸ ߢߌߣߊߣߍ߲߸ ߜߛߋߓߊߣߍ߲߸ ߊ߬ ߣߌ߫ ߛߌߦߊߡߊ߲߫ ߜߘߍ߫ ߟߎ߫.

ߡߊ߬ߛߓߍ߬ߟߌ ߟߊߜߟߍ߬ߦߊ ߣߴߊ߬ ߕߊ߫߸ ߒߞߏ ߟߐ߯ߝߍߓߊ ߢߌߣߌ߲ߞߏ ߦߴߊ߬ ߞߊ߲߬ ߞߊ߬ ߓߐ߫ ߢߣߊ߫ ߘߏ߯ߣߍ߲߫-ߘߏ߯ߣߍ߲߫. ߓߊߏ߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߣߴߌ ߦߴߊ߬ ߝߍ߬ ߞߵߌ ߟߊ߫ ߝߙߋ߬ߕߊ ߛߓߍߟߌ ߞߙߍߞߙߍ߫߸ ߥߊߟߌߘߊ ߡߍ߲ ߦߋ߫ ߟߊ߬ߘߊ߲߬ߠߌ߲ ߞߍ߫ ߟߊ߫، ߏ߬ ߟߎ߬ ߦߋ߫ ߘߏ߫ ߟߋ߬ ߝߙߊ߬ ߟߊ߫ߛߐ߲߬ߞߐ ߞߊ߲߬߸ ߡߍ߲ ߣߌ߫ ߛߐ߲߬ߞߐ߬ ߞߘߐ߫ ߕߍ߫ ߞߋߟߋ߲ߘߌ߫. ߓߊ߯ߙߊ ߘߏ߲߬ ߕߍ߫ ߛߋ߫ ߞߍ߫ ߟߊ߫ ߝߋߎ߫߸ ߝߐ߫ ߌ ߦߋ߫ ߛߋ߫ ߘߋ߲߫ ߦߙߌߞߊ ߘߏ߫ ߘߐ߫߸ ߏ߬ ߟߋ߬ ߖߍ߬ߘߍ ߦߋ߫ ߝߋ߲ ߠߎ߬ ߛߐ߲߬ߞߐ ߟߊߦߟߍ߬ ߛߊߓߎ ߘߌ߫.

ߞߟߊߓߎߡߊ ߞߋߕߊ߬ ߞߵߊ߬ ߟߊ߫ ߞߎߡߊ ߞߎ߲߭ߝߊ߰ ߝߊ߬ߡߊ ߟߎ߬ ߣߌ߫ ߥߊߘߌ߫ ߕߌ߮ ߡߊߞߟߌ ߟߋ߬ ߡߊ߬߸ ߊ߬ ߣߌ߫ ߞߊ߬ ߒߞߏ߫ ߞߊߙߊ߲ߘߋ߲ ߠߎ߬ ߘߐߛߎ߫ ߘߐ߬ߖߊ ߣߌ߫ ߕߍߛߘߌ ߡߊ߬، ߛߊ߫ ߝߊ߬ߛߏ߬ߞߊ߲ ߛߍ߬ߘߏ߲߬ߠߊ ߟߎ߬ ߢߌߣߌ߲ߞߏ ߘߌ߫ ߓߐ߫ ߢߟߊ߫: << ߒ ߧߋ߫ ߒߞߏ߫ ߞߊߙߊ߲ߘߋ߲ ߓߍ߯ ߘߐߛߎ߫ ߟߊ߫ ߘߐ߬ߖߊ ߟߋ߬ ߡߊ߬߸ ߛߊߓߎ߬ ߒߞߏ߫ ߞߊߙߊ߲ߘߋ߲߫ ߢߍߥߟߊߒߕߊ߲߫ ߕߴߦߋ߲߬، ߌ ߕߍ߫ ߒߞߏ߫ ߞߊߙߊ߲ߘߋ߲߫ ߠߊߓߐ߫߸ ߞߏ߫ ߢߍߥߟߊ߫ ߖߐ߲ߖߐ߲ ߘߏ߫ ߕߍ߫ ߡߍ߲ ߓߟߏ߫߸ ߡߌ߬ߙߌ߲߬ߘߌ ߥߟߊ߫ ߖߡߊ߬ߣߊ ߣߝߊ߬ ߢߍߥߟߊ ߘߏ߫ ߕߍ߫ ߡߍ߲ ߓߟߏ߫، ߏ߬ ߘߐ߫߸ ߓߍ߯ ߦߴߊ߬ ߕߊ߫ ߞߍߕߊ߫ ߞߍ߫߸ ߊ߲ ߞߊ߬ߙߊ߲߬ߡߐ߯ ߟߎ߬ ߦߴߏ߬ ߟߋ ߝߐ߫ ߟߊ߫، ߞߏ߫ ߣߌ߫ ߓߍ߯ ߞߵߊ߬ ߕߊ߫ ߞߍߕߊ߫ ߞߍ߫߸ ߝߏߦߌ߬ ߞߍߓߊߟߌ ߕߍ߫ ߕߏ߫ >>. ߊ߬ ߞߵߏ߬ ߘߐ߬ߛߎ߬ߟߌ ߞߍ߫.

ߞߟߊߓߎߡߊ ߟߊ߫ ߓߊ߯ߙߊ ߣߌ߲߬ ߦߌ߬ߘߊ߬ ߟߊ߫ ߟߋ߬߸ ߞߏ߫ ߛߘߊߟߊߟߌ ߘߌ߫ ߛߋ߫ ߞߍ߫ ߟߊ߫ ߤߊߟߌ߬ ߖߎ߬ߟߦߊ߬ ߘߊߞߎ߲ ߘߐ߫߸ ߞߵߏ߬ ߞߍ߫ ߞߎ߲߬ߠߊ߬ߦߋ߬ߙߋ߲ ߕߐ߰ߡߊ߬ߛߙߋ ߘߌ߫ ߝߊ߬ߛߏ߬ ߛߓߍߟߌ ߟߎ߬ ߢߍ߫.

ߊߓߎߓߞߊߙ ߖߐ߲߬ߡߊ߬ߛߌߣߌ߲ߟߐ߲߫ ߞߊ߬ߟߐ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.