ߡߊ߲߬ߞߊ߲ ߡߍ߲ ߕߊ߬ߡߌ߲߬ ߘߊ߫ ߘߊߟߊ߲ߓߊ߫ ߛߏ ߞߣߐ߫ ߞߐ߬ߟߏ߲߫ ߕߊ߬ߡߌ߲߬ߣߍ߲߸ ߂߀߂߆ ߕߎߟߊߝߌ߲ ߕߋ߬ߟߋ߫ ߂߁ ߡߊ߬ ߘߊߟߊ߲ߓߊ߫ ߘߎ߱ ߞߣߐ߫߸ ߞߎߘߍ߫ ߃߅ ߖߊ߬ߕߋ߬ ߟߊ߫ ߛߌ߯ߙߌ߲߫ ߡߙߊ ߘߐ߫، ߒ߬ߓߊ߬߸ ߊ߲ ߓߘߊ߫ ߟߌ߬ߤߟߊ߬ ߞߎߘߊ߫ ߛߐ߬ߘߐ߲߫ ߏ߬ ߞߏ ߞߊ߲߬ ߌߞߐ߫߸ ߡߍ߲ ߞߍߕߐ߫ ߊ߲ ߠߊ߫ ߟߌ߬ߤߟߊ߫ ߕߊ߬ߡߌ߲߬ߣߍ߲ ߘߝߊ߫ ߟߊ߫، ߝߊ߲ߕߊ߬ ߞߡߊ߬ߙߊ߬߫ ߡߍ߲ ߝߟߐ߫ ߞߎߡߊ߫ ߘߊ߫߸ ߏ߬ ߞߵߊ߬ ߦߌ߬ߘߊ߫ ߟߋ߬ ߞߏ߫ ߊ߬ߟߋ߬ ߗߌ߲߫ ߘߴߊ߬ ߣߎ߲ ߠߋ߬ ߟߊ߫߸ ߞߵߊ߬ ߡߊߘߌߡߌ߲߫ ߞߏߖߎ߯ߦߊ ߞߍ߫، ߒ߬ߓߊ߬߸ ߡߍ߲ ߡߊߝߌ߲߬ߣߍ߲߬ ߗߌ߲ߠߌ߲߫ ߞߏ ߘߐ߫ ߡߎ߬ߕߎ߲߬ ߛߊ߫߸ ߏ߬ ߝߣߊ߫ ߓߘߊ߫ ߞߎߡߊ߫ ߞߵߊ߬ ߝߍ߬ߟߊ ߦߌ߬ߘߴߊ߲ ߠߊ߫.

ߊ߬ߟߋ ߟߊ߫ ߝߐߟߌ߫ ߘߐ߫߸ ߞߏ߫ ߝߊ߲ߕߊ߬ ߞߡߊ߬ߙߊ߬ ߣߴߊ߬ ߘߋ߲ߡߛߏ߫ ߟߋ߬ ߞߵߊ߬ߟߎ߬ ߞߍ߫ ߊ߬ߟߋ ߞߊ߲߬߸ ߊ߬ ߖߘߍ߬ߡߞߊ߬ߘߊ߲߬ߕߐ߬ߟߊ ߏ߬ ߟߋ ߣߐ߬ ߗߌ߲ߠߌ߲ ߞߍ߫ ߟߊ߫߸ ߤߊ߲߯ ߞߵߏ߬ ߡߊߘߌߡߌ߲߫ ߞߏߖߎ߯ߦߊ ߞߍ߫ ߊ߬ ߣߎ߲ ߠߊ߫.

ߊ߬ ߞߊ߲߫ ߞߏ߫ ߞߍ߬ߟߍ ߣߌ߲߬ ߛߓߊߓߎ ߞߍߣߍ߲߫ ߘߋ߲ ߠߎ߬ ߟߊ߫ ߞߏ ߟߋ߬ ߘߌ߫، ߓߊߏ߬߸ ߊ߬ߟߋ ߟߊ߫ ߝߐߟߌ߫ ߘߐ߫߸ ߞߏ߫ ߊ߬ ߘߋ߲ߞߍߠߣߍ߲ ߠߋ߬ ߞߵߊ߬ ߝߐ߫ ߊ߬ ߦߋ߫ ߞߏ߫ ߝߊ߲ߕߊ߬ ߞߡߊ߬ߙߊ߬ ߘߋ߲ߡߛߏ߫ ߦߴߊ߬ ߣߊ߬ߣߌ߲߬ ߠߊ߫ ߟߋ߬ ߛߐ߲߬ ߕߎ߬ߡߊ߬ ߛߌߦߊߡߊ߲߫.

ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫ <<ߒ ߘߋ߲ߞߍߣߍ߲ ߠߋ߬ ߣߕߊ߬ ߘߊ߫ ߒ ߛߐ߬ߘߐ߲߬ ߞߵߊ߬ ߝߐ߫ ߒ ߧߋ߫ ߖߊ߰ߞߊ ߦߋ߫ ߒ ߣߊ߬ߣߌ߲߬ ߠߊ߫ ߛߐ߲߬، ߒ ߝߣߊ߫ ߓߐ߫ ߘߊ߫ ߞߵߊ߬ ߝߐ߫ ߞߏ߫ ߣߴߊ߬ ߞߊ߬ ߒ ߣߊ߬ߣߌ߲߬߸ ߒ ߧߴߊ߬ ߟߊߛߊ߬ߦߌ߲߬ ߠߴߊ߬ ߣߊ߫ ߟߋ߬ ߡߊ߬.>> ߊ߬ ߞߵߏ߬ ߢߊߝߐ߫.

ߊ߬ ߟߊ߫ ߝߐߟߌ߫ ߘߐ߫߸ ߞߟߍ߬ ߞߎߘߊ ߡߍ߲ ߘߏ߲߬ߣߴߊ߬ߟߎ߬ ߕߍ߫ ߣߌ߲߬߸ ߏ߬ ߞߍߣߍ߲߫ ߊ߬ߟߋ߫ ߕߊ߬ߡߌ߲߬ߕߐ߬ߟߊ ߟߋ߬ ߝߍ߬߸ ߘߊߘߛߐߛߐߟߌ ߘߏ߲߬ ߘߴߊ߬ ߣߌ߫ ߝߊ߲ߕߊ߬ ߞߡߊ߬ߙߊ ߕߍ߫߸ ߞߵߏ߬ ߟߊߓߊ߲߫ ߞߍ߬ߟߍ ߡߊ߬. ߞߊ߬ߕߎ߲߯߸ ߞߏ߫ ߊ߬ߟߎ߫ ߞߵߊ߬ ߦߌ߬ߘߊ߬ ߛߌߞߊߒߡߊߓߊ߯ߕߐ ߟߊ߫ ߟߋ߬߸ ߞߏ߫ ߊ߬ߟߎ߬ ߕߴߊ߬ߟߎ߬ ߓߟߏߓߐ߫ ߟߴߊ߬ ߘߐ߫߸ߝߏ߫ ߣߌ߫ ߞߏ߫ ߓߐ߫ ߘߴߊ߬ ߘߐ߫.

ߘߋ߲ߡߛߏ ߣߌ߲߬ ߞߊ߲߫ ߞߏ߫ ߊ߬ߟߋ ߕߊ߯ߕߐߟߊ ߕߍ߬ߘߍ߫ ߊ߬ ߗߍ߬ ߟߊ߫ ߞߟߌߟߌ ߟߋ߬ ߖߋ߬ߓߌ߬ ߞߊ߲ߡߊ߬ ߘߊߘߛߐߛߐߟߌ ߕߎ߬ߡߊ ߏ߬ ߟߊ߫߸ ߝߊ߲ߕߊ߬ ߞߡߊ߬ߙߊ ߞߊ߬ ߛߌߟߊ ߕߍ߰ ߊ߬ ߦߋ߫، ߏ߬ ߘߋ߲ߡߛߏ߫ ߝߣߊ߫ ߣߊ߬ ߘߴߊ߬ ߛߋ߲߭ߓߌ߬ߟߊ߫ ߞߍ߬ߟߍ ߘߐ߫߸ ߞߵߊ߬ߟߋ ߞߎ߲߬ߛߌ ߛߊ߬ߡߊ߲߬߸ ߞߵߊ߬ ߞߍ߫ ߘߍ߬ߡߊ߬ ߞߟߍ ߘߌ߫.

ߊ߬ ߞߊ߲߫ ߞߏ߫ ߊ߬ ߞߊߣߌ߲ߛߌߣߊߡߛߏ ߞߵߊ߬ ߛߊ߬ߡߊ߲߫ ߊ߬ ߘߙߌ߬ߞߌ ߞߊ߲ ߡߊ߬ <<ߞߊ߬ ߒ ߞߊ߲ ߘߐߖߊ߬، ߊ߬ ߘߋ߲ߡߛߏߣߍ߲ ߝߣߊ߫ ߓߐ߫ ߘߊ߫ ߒ ߞߐߝߍ߬ ߞߊ߬ ߣߊ߬ ߒ ߡߌ߬ߣߊ߬ ߒ ߞߐߝߍ߬߸ ߞߊ߬ ߣߊ߬ ߒ ߡߌ߬ߣߊ߬ ߒ ߞߐߝߍ߬.>>

ߒ߬ߓߊ߬ ߘߋ߲ߡߛߏ ߟߊ߫ ߝߐߟߌ߫ ߘߐ߫ߑ ߞߍ߬ߟߍ ߏ߬ ߟߋ ߛߋ߲߭ߝߍ߬ ߡߎ߬ߕߎ߲߬ ߛߊ߫߸ ߊ߬ ߢߌ߲ ߣߊ߬ ߘߊ߫ ߝߊ߲ߕߊ߬ ߞߡߊ߬ߙߊ߬ ߣߎ߲ ߕߍ߰ ߊ߬ ߟߊ߫ ߡߟߊߥߟߌߒߡߊ߫ ߓߟߏ ߡߊ߬߸ ߞߵߏ߬ ߡߊߘߌߡߌ߲߫.

<<ߒ ߞߊ߲ ߠߊߖߌ߰ߕߐ߬ߟߊ ߟߋ߬߸ ߒ ߢߌ߲ ߥߊ߫ ߘߊ߫ ߓߍ߲߬ ߊ߬ ߣߎ߲ ߡߊ߬߸ ߞߵߊ߬ ߕߍ߰ ߊ߬ ߟߊ߫.>> ߘߋ߲ߡߛߏ ߟߋ߬ ߞߊ߲߫ ߕߋ߲߬.

ߕߌߢߍߟߌ ߏ߬ ߟߋ ߞߐߝߍ߬߸ ߞߏ ߕߊ߬ߡߌ߲߬ ߘߊ߫ ߥߙߊ߬ ߟߊ߫ ߞߏߞߎߘߊ߫، ߞߊ߬ߕߎ߲߯߸ ߛߌߞߊ߫ ߞߍߣߍ߲ ߘߋ߲ߡߛߏ ߡߍ߲ ߡߊ߬ ߡߊ߬ߘߌ߬ߡߌ߲߬ߠߌ߲߬ ߞߏ ߘߐ߫ ߣߌ߲߬߸ ߊ߬ ߞߊ߲߫ ߞߏ߫ ߝߊ߲ߕߊ߬ ߞߡߊ߬ߙߊ ߞߵߊ߬ߟߋ ߓߏ߲߫ ߠߋ߬ ߞߓߊ ߟߊ߫߸ ߏ߬ ߛߋ߫ ߘߴߊ߬ ߞߌߣߌ߲ߝߍ߫ ߢߊ ߡߊ߬.

<<ߊ߬ ߘߋ߲ߡߛߏߣߍ߲ ߣߐ߬ ߊ߬ ߦߋ߫ ߟߊ߸ ߊ߬ ߣߊ߫ ߣߎ߲ ߓߘߊ߫ ߕߍ߰ ߊ߬ ߟߊ߫، ߊ߬ ߞߊ߲߫ ߞߏ߫ ߊ߬ ߕߍ߫ ߒ ߕߏ߫ ߦߋ߲߬߸ ߞߏ߫ ߝߏ߫ ߊ߬ ߓߊ߯ ߊ߬ ߣߊ߫ ߕߊ ߛߊ߬ߙߊ߫ ߟߋ߬، ߊ߬ ߞߍߢߊ ߟߵߏ߬ ߘߌ߫ ߞߊ߬ ߞߓߊ ߕߊ߬ ߞߊ߬ ߒ ߓߏ߲߫ ߒ ߢߊ ߞߊ߲߬.>> ߊ߬ ߞߵߏ߬ ߟߊߛߙߋߦߊ߫.

ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߕߊ߬ ߘߊ߫ ߏ߬ ߟߋ ߘߐ߫ ߞߊ߬ ߥߴߊ߬ ߘߌ߫ ߘߊ߲ߘߊߛߏ ߟߊ߫߸ ߞߏ߬ߣߌ߲߬ ߤߊ߲߯ ߕߋ߲߬ ߞߏ߫ ߊ߬ ߕߍ߫ ߦߋߟߌ߫ ߞߍ߫ ߟߴߊ߬ ߢߊ ߏ߬ ߟߊ߫.

ߞߎߡߊ߫ ߝߟߐ ߡߍ߲ ߠߊߛߋ߫ ߘߴߊ߲ ߡߊ߬ ߞߏߢߌߣߌ߲ ߠߎ߬ ߞߣߐ߫߸ ߝߊ߲ߕߊ߬ ߞߡߊ߬ߙߊ߬ ߡߍ߲ ߣߎ ߝߊ߲߬ ߞߋߟߋ߲ ߕߍ߰ߣߴߊ߬ ߟߊ߫ ߏ߬ ߘߌ߫߸ ߏ߬ ߦߋ߫ ߛߊ߲߬ ߓߌߛߊ߬ߓߊ߫ ߖߊ߬ߕߋ߫ ߟߋ߬ ߘߐ߫، ߏ߬ ߟߋ ߞߵߊ߬ ߦߌ߬ߘߊ߬ ߞߏ߫ ߊ߬ ߞߊߣߌ߲ߛߌߣߊߡߛߏ ߟߋ߬ ߣߐ߬ ߊ߬ ߗߌ߲߫ ߠߊ߫ ߞߵߊ߬ ߣߎ߲ ߕߍ߰ ߊ߬ ߟߊ߫، ߏ߬ ߟߋ ߖߍ߬ߘߍ ߞߍ߫ ߘߊ߫ ߛߊߓߎ߫ ߘߌ߫ ߞߵߏ߬ ߟߊߟߊ߫ ߛߌ߯ߙߌ߲߫ ߘߊ߲ߘߊߛߏ ߟߊ߫.

ߡߐ߰ ߛߌ߰ ߝߌ߬ߟߊ ߢߌ߲߬ ߠߎ߫ ߞߏ߬ߣߌ߲ ߝߏߦߌ߬ ߟߊ߫ ߛߙߊ߬ߣߎ߲ ߠߎ߬ ߕߍ߫ ߛߎ߯ ߞߋߟߋ߲߫ ߘߌ߫ ߞߏ ߞߍߢߊ߫ ߖߐ߲ߖߐ߲ ߘߐ߫، ߏ߬ ߘߐ߫߸ ߛߊ߬ߙߌ߬ߦߊ߫ ߟߋ߬ ߘߐߙߐ߲߫ ߘߌ߫ ߛߴߊ߬ ߞߏ ߟߊߜߍ߫ ߟߊ߫߸ ߏ߬ ߟߎ߬ ߡߍ߲ ߠ߬ߎ ߣߴߊ߬ ߢߊߓߐ ߦߊ߫ ߞߊ߲߫.