ߓߌ߬ ߞߐ߬ߓߊ߬ߟߏ߲ ߢߌ߲߬ ߡߊ߬߸ ߂߀߂߆ ߞߏ߲ߓߌߕߌ߮ ߕߟߋ߬ ߅߸ ߞߊ߬ߙߊ߲ ߘߊߡߌ߬ߣߊ߬ ߘߊ߫ ߞߊ߲ߞߊ߲߫ ߞߊߙߊ߲߬ߓߏ߲߬ ߛߌߦߊߡߊ߲߫ ߞߣߐ߫، ߞߊ߬ߙߊ߲߬ߘߋ߲ ߠߎ߬߸ ߟߞߊ߬ߙߊ߲߬ߠߌ߲߬ߠߊ ߟߎ߬߸ߊ߬ ߣߌ߫ ߡߊ߬ߛߊ߲߬ߛߊ߲߬ߓߊ߮ ߟߎ߬߸ ߏ߬ ߝߊ߲߬ߓߊ ߓߍ߯ ߞߵߊ߬ߟߎ߫ ߞߎ߲߬ߛߌ߲߫ ߞߊ߬ߙߊ߲߬ߕߊ ߟߎ߬ ߟߊ߫ ߟߋ߬ ߥߊ߯ߕߌ߫ ߖߏߣߊ ߟߊ߫߸ ߝߊ߰ߡߊ ߟߎ߫ ߞߵߊ߬ߟߎ߫ ߕߏ߲߬ߘߊ ߟߐ߬ ߦߙߐ ߡߍ߲ ߠߎ߬ ߘߐ߫ ߞߊ߬ߣߌ߲߬، ߏ߬ ߟߎ߬ ߡߍ߲ ߠߎ߬ ߟߊ߫ ߗߋߦߊߟߌ ߕߘߍ߬ ߛߏ߯ߙߏߣߍ߲߫ ߟߊ߬ߞߟߏ߬ߞߟߏ߬ߟߌ ߝߊ߰ߡߊ ߟߎ߬ ߟߊ߫߸ ߞߎ߲߬ߠߊ߬ߛߌ߰ߟߊ߫ ߞߎߓߋߘߐ߸ ߊ߬ ߣߌ߫ ߞߊ߬ߝߏߙߋ߲ ߞߏߟߊߕߍ߯ ߛߊ߲ߘߐ ߖߍ߬ߘߍ.

ߕߊ߯ߡߊ ߣߌ߲߬ ߘߐ߫߸ ߊ߬ ߛߋ߫ ߘߴߊ߬ߟߎ߫ ߕߏ߲߬ߘߊ ߟߐ߬ ߟߊ߫ ߞߊ߬ߙߊ߲߬ ߦߙߐ߫ ߛߊ߬ߓߊ߫ ߟߋ߬ ߘߐ߫߸ ߞߎ߲߬ߠߊ߬ߛߌ߮ ߟߊ߫ ߞߊ߬ߙߊ߲߬ߕߊ߫ ߝߌ߬ߟߊ߬ ߣߌ߫ ߘߎ߲߬ߘߎ߬ߡߊ߬ ߞߊ߬ߙߊ߲߬ߕߊ߬ ߞߋߟߋ߲߫߸ ߓߊߖߎ߫ ߞߊߙߊ߲ߕߊ߫ ߞߋߟߋ߲߫ ߦߴߏ߬ ߘߐ߫، ߒ߬ߓߊ߬߸ ߕߌ߲߬ߞߎߘߎ߲ ߟߊ߬ߞߟߏ߬ߞߟߏ߬ߟߌ ߜߋ߬ߟߎ߲߬ߓߊ߮߸ ߡߎߛߊ߫ ߞߋߕߊ߬ ߛߍߥߊ߫ ߘߊ߫ ߟߋ߬ ߓߐߟߌ ߞߍߢߊ ߟߊ߫ ߖߊ߬ߡߊ ߓߟߏ߫ ߞߏߛߓߍ߫.

ߊ߬ ߞߵߊ߬ ߦߌ߬ߘߊ߬ ߞߏ߫: <<ߊ߲ ߛߍߥߊߣߍ߲߫ ߠߋ߬ ߟߏ߲߫ ߝߟߐ ߢߌ߲߬ ߘߐ߫، ߊ߲ ߛߋ߫ ߞߊ߬ߙߊ߲߬ ߦߙߐ߫ ߛߊ߬ߓߊ߫ ߟߋ߬ ߘߐ߫، ߊ߲ ߞߵߊ߬ ߦߋ߫ ߖߊ߬ߡߊ ߓߐߣߍ߲߫ ߠߋ߬ ߝߋߎ߫߸ ߞߊ߬ߙߊ߲߬ߡߐ߮ ߟߎ߫ ߓߊ߬߸ ߞߊ߬ߙߊ߲߬ߘߋ߲ ߠߎ߫ ߓߊ߬߸ ߡߊ߬ߞߟߐ߬ߦߊ߬ߟߊ ߟߎ߬߸ ߓߍ߯ ߟߋ߬ ߓߐ߫ ߘߊ߫.>> ߊ߬ ߞߵߏ߬ ߟߊߛߋ߫.

ߊ߬ ߞߊ߬ ߕߡߊ߬ߖߌ ߓߐ߫ ߘߋ߲ߓߊߕߌ߮ ߟߎ߬ ߘߐ߫ ߞߊ߬ߙߊ߲ ߘߟߊߞߊ ߢߌ߲߬ ߘߐ߫: <<ߝߎ߬ߙߎ߲߬ߞߎ߬ߟߌ߬ ߕߴߦߋ߲߬߸ ߡߊ߲߬ߞߊ߲߬ ߕߴߦߋ߲߬، ߞߊ߬ߙߊ߲ ߓߘߊ߫ ߘߊߡߌ߬ߣߴߊ߬ ߢߌ߬ߡߊ ߟߊ߫.>>

ߞߊ߲ߞߊ߲߫ ߡߙߊ߬ߘߊ߬ߓߊ ߟߊ߬ߞߟߏ߬ߞߟߏ߬ߟߌ ߗߋߕߌ߮ ߛߎ߬ߟߋ߬ߡߊߣ ߘߊ߬ߝߋ ߝߣߊ߫ ߞߵߊ߬ ߦߋ߫ ߏ߬ ߢߊ߫ ߞߋߟߋ߲߫ ߔߋ ߟߋ߬ ߡߊ߬.

<<ߒ ߞߊ߬ ߡߍ߲ ߝߟߐߝߟߐ ߟߊߞߙߐ߬ߛߌ߬߸ ߊ߬ ߝߐ ߞߏ߫ ߞߊ߬ ߞߊ߬ߙߊ߲ ߘߟߊߞߊ߬߸ ߏ߬ ߖߡߊ߬ߙߌ߬ ߞߊ߲߬ߠߊ ߡߊߓߏ߲߬ߧߊ߬ ߘߊ߫ ߟߋ߬ ߞߊ߲ߞߊ߲߫ ߞߣߐ߫ ߝߛߊߦߌ߫، ߣߴߌ ߞߵߊ߬ ߕߊ߬ ߞߊ߬ߙߊ߲߬ߘߊ߬ߓߊ߫ ߡߏ߬ߙߌ߬ߝߌ߲߬ߖߊ߲߫ ߖߓߊ߬ߕߍ߫ ߡߊ߬ ߛߌߛߍ߲߬߸ ߊ߲ ߞߵߊ߬ ߛߐ߬ߘߐ߲߬ ߖߊ߬ߡߊ ߓߘߊ߫ ߓߐ߫ ߦߋ߲߬ ߊ߬ ߢߊ ߖߍ߬ߘߍߖߍ߬ߘߍ ߡߊ߬߸ ߞߊ߬ߙߊ߲߬ߘߋ߲ ߠߎ߫ ߓߊ߬߸ ߟߞߊ߬ߙߊ߲߬ߠߌ߲߬ߠߊ ߟߎ߫ ߓߊ߬߸ ߞߵߏ߬ ߟߊ߫ ߡߊ߬ߞߟߐ߬ߦߊ߬ߟߊ ߟߎ߫ ߞߊ߲߬، ߓߍ߯ ߦߴߊ߬ ߟߊ߫ ߓߊ߯ߙߊ߫ ߞߊ߲߬߸ ߥߟߊ߬ߘߊ߬ ߘߌ ߓߘߊ߫ ߘߊߡߌ߬ߣߴߊ߬ ߢߌ߬ߡߊ ߟߊ߫.>> ߊ߬ ߞߵߏ߬ ߢߊߝߐ߫.

ߞߊ߬ߙߊ߲ ߘߟߊߞߊ߬ ߞߏ ߣߌ߲߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߡߎߛߊ߫ ߞߋߕߊ߬ ߞߵߊ߬ ߖߊ߬ ߦߙߐ߫ ߞߋߟߋ߲߫ ߞߊ߲߬߸ ߏ߬ ߟߋ ߞߘߐߓߐߟߌ ߓߟߏߘߐߓߍ߲ ߠߎ߬ ߘߌ߫.

<<ߝߟߍ߫ ߟߏ߲ ߕߍ߫ ߝߟߍ߫ ߥߟߎ ߡߊߞߊ߬ߙߊ߲߬ߧߊ߬ ߟߏ߲߫ ߘߌ߫، ߞߘߐߓߐߟߌ ߓߟߐߘߐߓߍ߲ ߦߋ߫ ߞߍ߫ ߟߊ߫ ߞߊ߬ߦߌ߯ ߘߊ ߟߊߞߊ߬ ߕߎߡߊ ߢߌ߲߬ ߠߋ߬ ߟߊ߫، ߛߍ߬ߓߍ ߟߋ߬ ߜߎ ߘߊߡߌ߬ߣߊ߬ߣߍ߲߫ ߣߌ߲߬.>> ߊ߬ ߞߵߏ߬ ߝߐ߫ ߞߊ߬ߙߊ߲߬ߘߋ߲ ߠߎ߬ ߦߋ߫.

ߕߊ߯ߡߊ߫ ߛߌߟߊ ߢߌ߲߬ ߠߊ߫߸ ߞߊ߲ߞߊ߲߫ ߞߊ߬ߝߏ߬ߙߋ߲߬ߕߌ߮ ߕߍ߬ߘߍ߫ ߦߋ߲߬߸ ߟߊ߬ߡߌߣ ߟߊߓߏ߫ ߞߙߎ߬ߡߊ߬߸ ߏ߬ ߝߣߊ߫ ߛߍߥߊ߫ ߘߊ߫ ߞߏ ߟߎ߬ ߞߍߢߊ ߟߊ߫ ߞߏߛߓߍ߫ ߖߡߊ߬ ߞߏ ߕߊ߫ ߝߊ߲߭ ߝߍ߬.

<<ߥߊ߯ߕߌ߫ ߕߊ߬ߡߌ߲߬ߣߍ߲߫ ߕߘߍ߬߸ ߊ߬ ߓߊ߯ ߝߐ߫ ߞߏ߫ ߞߐ߬ߓߊ߬ߟߏ߲ ߠߋ߬ ߞߊ߬ߙߊ߲ ߘߟߊߞߊ߬ ߟߏ߲ ߘߌ߫߸ ߌ ߕߍ߫ ߡߐ߱ ߟߎ߬ ߦߋ߫ ߝߏ߫ ߞߎ߲߬ߢߐ߲߯ ߝߌ߬ߟߊ߬، ߞߏ߬ߣߌ߲߬߸ ߊ߲ ߞߊ߬ ߡߍ߲ ߦߋ߫ ߓߌ߬߸ ߖߡߊ߬ ߞߏ ߘߊ߲߭ ߠߋ߬ ߕߘߍ߬، ߞߊ߬ߙߊ߲߬ߘߋ߲ ߠߎ߬ ߓߌߣߍ߲߫ ߠߋ߬ ߕߘߍ߬ ߝߋߝߋ߫.>> ߊ߬ ߞߵߏ߬ ߕߊ߲߬ߘߏ߬ߟߌ ߞߍ߫.

ߡߍ߲ ߟߐ߬ߣߍ߲߫ ߖߍ߰ߝߙߍ ߡߊ߬ߡߌ߬ߘߊ߬ߟߌ߬ߟߊ ߟߎ߫ ߡߊ߬߸ ߞߊ߬ߝߏ߬ߙߋ߲߬ߕߌ߮ ߟߎ߬ ߞߵߏ߬ ߦߟߌߓߌ߬ߟߊ߬߸ ߞߏ߫ <<ߓߊߘߎ߲ ߦߋ߫ ߘߐߓߍ߲߬ ߠߊ߫ ߥߊ߯ߕߌ ߢߌ߲߬ ߠߋ߬ ߟߊ߫.>> ߞߵߏ߬ ߞߍ߫ ߞߟߌߟߌ߫ ߘߌ߫ ߞߵߊ߬ ߟߊߛߋ߫ ߞߊ߬ߙߊ߲߬ߘߋ߲ ߠߎ߬ ߡߊ߬߸ ߞߏ߫ ߊ߬ߟߎ߬ ߞߊߣߵߊ߬ ߝߐ߫ ߞߏ߫ ߞߘߐߓߟߌ ߟߏ߲߸ ߊ߬ߟߎ߬ ߦߴߏ߬ ߞߍ߫ ߣߐ߬ߡߛߊ߬ߦߌ߲߬ ߟߏ߲ ߘߌ߫.