ߟߊ߬ߞߙߐ߬ߛߌߟߌ ߕߎ߲߬ ߓߘߴߊ߬ ߦߋ߫ ߞߏ߫ ߖߌ߫ ߛߐ߲ߞߐ ߕߎ߲߬ ߓߍ߫ ߢߌߣߌ߲߫ ߞߊ߬ ߞߍ߫ ߛߏ߬ ߛߐ߲ߞߐ ߘߌ߫ ߖߡߊ߬ߣߊ ߞߣߐ߫، ߏ߬ ߛߌߟߊ ߟߋ߬ ߝߍ߬߸ ߞߎ߲߬ߠߊ߬ߛߌ߮ ߓߘߴߊ߬ ߟߊ߫ ߞߍ߬ߙߍ߲߬ߘߍ ߕߍ߰߸ ߡߐ߰ ߛߌ߫ ߡߊ߲߫ ߞߊ߲߫ ߞߊ߬ ߞߍ߬ߙߍ߲߬ߘߍ ߡߍ߲ ߞߐߛߊ߬ߥߏ߬، ߒ߬ߓߊ߬߸ ߞߵߊ߬ ߘߊߡߌ߬ߣߊ߫ ߓߌ߬ ߞߎߣߎ߲ߟߏ߲ ߣߌ߲߬ ߡߊ߬ ߂߀߂߆ ߞߏ߲ߓߌߕߌ߮ ߕߟߋ߬ ߇߸ ߞߎ߲߬ߠߊ߬ߛߌ߮ ߓߘߊ߫ ߖߌ ߟߎ߫ ߛߐ߲߬ߞߐ ߘߊ߲߭ ߠߊߕߍ߰߸ ߊ߬ ߡߊ߲߫ ߞߊ߲߫ ߞߊ߬ ߕߊ߬ߡߌ߲߬ ߡߍ߲ ߠߊ߫ ߞߊ߬ߣߌ߲߬.

ߡߍ߲ ߠߎ߬ ߦߋ߫ ߖߌ߫ ߓߊ߯ߙߊ ߞߍ߫ ߟߊ߫߸ ߊ߬ ߣߌ߫ ߞߏߕߌ߯ߘߊ ߛߋߒߞߏߟߊ ߟߎ߬߸ ߏ߬ ߟߎ߫ ߞߊ߬ ߞߏߟߊߒߞߘߐߢߐ߲߯ߦߊ߫ ߟߊߘߍ߫ ߟߋ߬ ߞߍ߫ ߞߏ߲ߓߌߕߌ߮ ߕߟߋ߬ ߅ ߕߊ߬ߡߌ߲߬ߣߍ߲ ߡߊ߬، ߘߊߘߐߖߊߥߏ ߟߎ߬ ߞߐߝߍ߬߸ ߊ߬ߟߎ߫ ߞߊ߬ ߡߌ߬ߣߊ߬ ߢߊ߫ ߛߐ߬ߘߐ߲߫ ߛߐ߲߬ߞߐ߬ ߞߏ ߣߌ߫ ߝߋ߬ߙߋ ߞߍߢߊ ߟߎ߫ ߡߊ߬.

ߊ߬ ߝߐߣߍ߲߫ ߏ߬ ߟߋ ߞߐ ߘߐ߫ ߣߌ߲߬߸ ߞߏ߫ ߖߌ߫ ߡߣߊߘߎ߲ ߡߍ߲ ߠߎ߬ ߦߋ߫ ߕߏ߲ߜߊߗߡߍߘߋ߲߫ ߃߃ ߤߊ߲߯ ߃߅ ߘߌ߫߸ ߣߌ߫ ߘߋ߲߫ ߁߅ ߦߴߊ߬ߟߎ߬ ߝߎߝߎ߫ ߞߋߟߋ߲ ߞߣߐ߫߸ ߏ߬ ߟߎ߫ ߛߐ߲߬ߞߐ ߟߋ߬ ߖߕ߂߀ ߀߀߀ ߘߌ߫ ߝߊ߲ߓߏ߲ ߠߊ߫߸ߞߵߊ߬ ߥߊߝߎ߫ ߘߊ ߞߍ߫ ߖߕ߂߂ ߀߀߀ ߘߌ߫߸ ߊ߬ ߕߐ߬ߝߍ߬ߦߊ߬ ߘߊ ߦߋ߫ ߂߅ ߀߀߀ ߘߌ߫ ߖߌ߬ߣߍ߬ ߕߊߡߊ߲ ߘߐ߫. ߛߊ߬ߙߌ߬ߦߊ߬ ߞߋߟߋ߲ ߏ߬ ߟߋ ߝߣߊ߫ ߟߊߓߏ߬ߙߌ߬ ߘߊ߫ ߖߌ߫ ߡߣߊߘߎ߲ ߞߊߓߋ߫ ߝߌߟߊߣߊ߲ ߞߊ߲߬߸ ߡߍ߲ ߦߋ߫ ߕߏ߲ߜߊߗߡߍߘߋ߲߫ ߅߀ ߤߊ߲߯ ߅߅ ߘߌ߫߸ ߏ߬ ߟߎ߬ ߡߍ߲ ߠߎ߬ ߘߋ߲߫ ߁߂ ߦߋ߫ ߝߎߝߎ߫ ߞߋߟߋ߲ ߞߣߐ߫ ߞߊ߬ߣߌ߲߬، ߊ߬ ߣߌ߫ ߕߏ߲ߜߊ߫ ߞߋߟߋ߲߫ ߣߌ߫ ߕߟߊߕߊ ߡߍ߲ ߦߋ߫ ߞߟߌ߫ ߟߊ߫ ߓߍ߯ ߓߟߏ߫ ߞߏ߫ ߞߐ߰ߦߊ߬ ߓߌ߬ߘߏ߲߬ߣߍ߲߸ ߏ߬ ߝߣߊ߫ ߘߋ߲߫ ߥߐ߯ߙߐ߫ ߟߋ߬ ߝߎߝߎ߫ ߞߋߟߋ߲ ߘߐ߫߸ ߏ߬ ߛߐ߲߬ߞߐ ߝߣߊ߫ ߦߋ߫ ߕߋ߲߬ ߠߋ߬߸ ߊ߬ ߘߌ߫ ߕߊ߬ ߝߊ߲ߓߏ߲ ߠߊ߫ ߂߀ ߀߀߀߸ ߞߵߊ߬ ߥߊߝߎ߫ ߂߂ ߀߀߀߸ ߞߵߊ߬ ߕߐ߬ߝߍ߬ߦߊ߫ ߂߅ ߀߀߀ ߟߊ߫.

ߊ߬ߟߎ߬ ߓߊ߲߫ ߘߊ߫ ߞߵߊ߬ ߝߐ߫ ߝߣߊ߫߸ ߞߏ߫ ߊ߬ ߦߋ߫ ߘߌߦߊߜߏߦߊ ߟߋ߬ ߘߌ߫ ߖߎ߬ߟߊ ߟߎ߫ ߞߊ߲߬߸ ߞߵߊ߬ߟߎ߬ ߟߊ߫ ߛߐ߲߬ߞߐ ߟߎ߬ ߦߌ߬ߘߊ߬ ߜߍ ߘߐ߫߸ ߊ߬ ߕߍ߫ ߘߏ߲߰ ߠߊ߫، ߡߍ߲ ߠߎ߬ ߦߴߊ߬ ߥߊߝߎ߫ ߟߊ߫߸ ߝߏ߫ ߝߙߋ߬ߛߓߍ ߟߋ߬ ߟߊ߫ ߏ߬ ߟߎ߫ ߞߊ߲߬ ߕߘߋ߫߸ ߝߋ߲ ߡߍ߲ ߛߊ߬ߣߍ߲߫ ߞߵߏ ߛߎ߮ ߝߐ߫ ߞߵߊ߬ ߟߊߕߍ߰߸ ߞߵߊ߬ ߟߌ߬ߤߟߊ ߝߐ߫.

ߞߏߕߌ߯ߘߊ ߞߊ߬ ߡߎ߲߬ ߞߍ߫ ߞߵߊ߬ ߟߊ߫ ߣߌ߲߬ ߞߊ߲߸ ߞߏ߫ ߊ߬ߟߎ߫ ߣߐ߬ ߛߐ߲߬ߞߐ ߡߍ߲ ߝߐ߫ ߟߊ߫ ߣߌ߲߬߸ ߊ߬ ߕߍ߫ ߞߎ߲߫ ߡߐ߰ ߛߌ߫ ߘߐ߫ ߞߵߌ ߓߊ߲߬ ߛߐ߲߬ߞߐ ߏ߬ ߡߊ߬، ߡߍ߲ ߠߎ߬ ߦߋ߫ ߖߌ ߛߊ߲߬ ߠߊ߫ ߞߵߊ߬ ߡߌ߲߬߸ ߊ߬ߟߎ߫ ߞߊ߬ ߝߙߍߕߍ ߘߏ߫ ߓߌ߬ߟߊ߫ ߏ߬ ߟߎ߫ ߛߊ߬ߥߏ߬ ߘߐ߫߸ ߞߏ߫ ߡߐ߰ ߛߌ߫ ߓߊ߯ ߘߊ߲߬ߠߊ߬ߕߊߡߌ߲ ߞߍ߫߸ ߊ߬ߟߎ߬ ߦߋ߫ ߁߄߂ ߞߟߌ߫߸ ߏ߬ ߦߋ߫ ߝߙߍߕߍ߫ ߝߙߌߛߌ ߟߋ߬ ߘߌ߫ ߞߊ߬ ߝߘߊ߫ ߞߏߕߌ߯ߘߊ ߟߊ߫߸ ߞߵߊ߬ ߦߌ߬ߘߴߊ߬ߟߎ߬ ߟߊ߫ ߞߏ߫ ߘߊ߲߬ߠߕߊ߬ߡߌ߲߬ ߛߐ߲ߞߐ ߦߋ߫ ߦߙߐ߫ ߛߌ߬ߣߊ ߢߌ߲߬ ߘߐ߫.

ߣߌ߲߬ ߞߏ ߞߍߣߍ߲߫ ߡߎ߲߬ ߞߏߛߐ߲߬߸ ߞߊ߬ߦߌ߯ ߖߌ߫ ߡߣߊߣߍ߲߫ ߞߏ ߟߊߕߐ߲߫ ߘߊ߫߸ ߖߌ߫ ߞߏ ߓߘߊ߫ ߜߟߍ߬ߦߊ߬߸ ߞߵߊ߬ ߛߐ߲߬ߞߐ ߦߟߍ߬ ߢߊ ߓߍ߯ ߡߊ߬.