ߞߊ߲ߞߊ߲߫ ߞߣߐ߫ ߕߋ߲߬߸ ߣߴߊ߬ ߖߊ߬ߕߋ߬ߣߍ߲߫ ߕߘߍ߬ ߞߏ߫ ߕߥߊߦߌ߲ ߠߋ߬ ߞߍߕߐ߫ ߡߐ߱ ߟߎ߬ ߟߊߝߙߍ߫ ߟߊ߫ ߞߋ߬ߡߎ߲߬ ߞߏ ߘߐ߫߸ ߏ߬ ߞߏ ߓߘߊ߫ ߛߴߊ߬ ߞߣߐ߬ߘߐ߬ߝߟߌ߬ ߦߙߐ ߘߐ߫، ߓߊߏ߬߸ ߕߥߊߦߌ߲ ߛߐ߲߬ߞߐ ߓߘߊ߫ ߦߟߍ߬߸ ߞߵߊ߬ ߞߋߟߋ߲ ߞߍ߫ ߊ߬ ߢߐ߲߰ ߝߌ߬ߟߊ߫ ߛߐ߲߬ߞߐ ߘߌ߫߸ ߣߌ߫ ߟߊ߬ߟߐ߲߬ߠߌ߲߬ߠߌ߲߬ ߕߍ߫، ߏ߬ ߟߊߣߍ߲߫ ߡߍ߲ ߞߊ߲߬ ߟߊ߬ߞߙߐ߬ߛߌ߬ߟߌ ߓߟߏ ߡߊ߬ ߞߣߍ ߞߊ߲߬߸ ߌ ߓߊ߯ ߥߊ߫ ߥߊߦߌ߲߫ ߞߏ ߘߐ߫߸ ߝߏ߫ ߌ ߦߋ߫ ߡߊ߬ߞߐ߬ߣߐ߲߬ߠߌ߲ ߠߋ߬ ߞߍ߫߸ ߘߏ߫ ߟߎ߫ ߞߎ߲߬ߢߐ߲߯ ߝߌ߬ߟߊ߬ ߤߊ߲߯ ߛߊ߬ߓߊ ߟߋ߬ ߏ߬ ߡߊ߬ߞߐ߬ߣߐ߲߬ߠߌ߲ ߘߊߞߘߐ߫ ߣߌ߲߬، ߊ߲ ߛߋ߫ ߘߊ߫ ߝߊߔߑߜ߭ߊߖ߭ ߡߊߞߍ߫ ߦߌߟߊ ߘߐ߫ ߞߊ߲ߞߊ߲߫ ߛߊ߲ߡߊߘߊ߲߫ ߞߘߐ ߟߊ߫߸ ߏ߬ ߟߎ߬ ߡߍ߲ ߠߎ߬ ߘߐ߱ߘߏ߲߬ߣߍ߲߫ ߡߐ߱ ߟߎ߬ ߡߊߛߐ ߟߊ߫ ߥߊߦߌ߲ ߠߊ߫ ߛߏ ߞߣߐ߫߸ ߞߊ߲ߞߊ߲߫ ߣߴߊ߬ ߟߊߡߌߣߌ߲ ߘߐ߫، ߊ߲ ߞߵߊ߬ ߛߐ߬ߘߐ߲߬ ߡߐ߱ ߟߎ߬ ߡߐߣߍߣߍ߲߫߸ ߊ߬ߟߎ߬ ߤߊߡߌ߲ߣߍ߲߲߫ ߞߊ߬ ߓߍ߲߬ ߥߊߦߌ߲ ߛߐ߬ߘߐ߲߬ߓߊߟߌߦߊ ߣߴߊ߬ ߛߐ߲߬ߞߐ ߜߟߍ߬ߦߊ߬ ߞߏ ߡߊ߬.
ߤߊߖߊ߬ ߒߓߊ߯ߟߎ߬ ߞߊ߬ߓߊ ߦߋ߫ ߖߎ߬ߟߊ ߟߋ߬ ߘߌ߫߸ ߊ߲ ߞߴߏ߬ ߛߐ߬ߘߐ߲߬ ߝߊ߲ߓߊ ߟߊ߫ ߦߋ߲߬߸ ߊ߬ ߥߊߣߍ߲߫ ߕߍ߬ߘߍ߫ ߊ߬ ߟߊ߫ ߥߊߦߌ߲߫ ߘߎ߲ ߠߋ߬ ߕߊ߬ ߞߊ߲ߡߊ߬، ߏ߬ ߞߵߊ߬ ߟߊ߫ ߣߌߛߐߜߏߦߊ ߦߌ߬ߘߊ߬߸ ߊ߬ ߣߌ߫ ߜߟߍ߬ߦߊ ߡߍ߲ ߦߴߊ߬ߟߎ߫ ߞߊ߲߬ ߥߊߦߌ߲߫ ߞߏ ߢߌ߲߬ ߘߐ߫ ߓߌ߬، <<ߒߠߋ ߣߊ߬ ߘߊ߫ ߒ ߠߊ߫ ߥߊߦߌ߲߫ ߘߎ߲ ߠߋ߬ ߘߌ߫ ߦߊ߲߬߸ ߏ߬ ߞߍ ߞߎ߲߬ߢߐ߲߯ ߝߌ߬ߟߊ ߟߋ߬ ߕߋ߲߬، ߊ߬ߟߎ߫ ߞߵߊ߬ ߝߐ߫ ߒ ߧߋ߫ ߊ߬ ߣߊ߬ ߟߏ߲߸ ߞߏ߫ ߥߊߦߌ߲߫ ߕߴߦߋ߲߬߸ ߞߏ߫ ߒ ߧߋ߫ ߣߊ߬ ߥߊ߯ߕߌ߫ ߜߘߍ߫، ߒ ߣߊ߬ߣߍ߲߫ ߏ߬ ߟߋ ߘߐ߫ ߓߌ߬߸ ߊ߬ߟߎ߬ ߞߊ߲߫ ߝߣߊ߫ ߞߏ߫ ߝߋ߲߫ ߕߴߦߋ߲߬، ߥߊߦߌ߲ ߘߏ߲߬ ߦߋ߫ ߒ ߘߍ߬ߡߍ߲߬ ߠߊ߫ ߞߏߛߓߍ߫، ߦߴߊ߬ ߟߐ߲߫߸ ߒߛߎߥߊߕߣߌ߫ ߊ ߦߋ߫ ߖߎ߬ߟߊ ߟߋ߬ ߘߌ߫߸ ߛߐ߱ߡߊ߬ ߒ ߧߋ߫ ߒ ߠߊ߫ ߕߓߌߟߌ ߞߍ߫ ߟߴߊ߬ߟߋ ߟߋ߬ ߟߊ߫ ߞߊߟߌߦߊ߫ ߓߟߏ ߡߊ߬߸ ߞߊ߬ ߥߊ߫ ߒ ߠߊ߫ ߝߙߋ߬ ߞߍ߬ ߦߌߟߊ، ߊ߬ߟߋ ߟߞߊߟߌߡߊ߲߫ ߞߋ߬ߡߎ߲ ߘߌ߫، ߒ ߞߊ߬ ߥߊߦߌ߲߫ ߓߘߊ߫߫ ߝߌ߬ߟߊ߫ ߟߋ߬ ߕߏ߫ ߦߊ߲߬߸ ߊ߬ߟߎ߬ ߟߝߊ߫ ߞߊ߲ߡߊ߬߸ ߏ߬ ߡߍ߲ ߦߋ߫ ߓߍ߲߬ ߠߊ߫ ߁߂߀ ߀߀߀ ߡߊ߬، ߞߏ߬ߣߌ߲߬ ߒ ߣߊ߭ ߡߍ߲ ߞߍߣߍ߲߫ ߣߌ߲߬߸ ߡߎ߲߬ ߝߐ߫ ߘߊ߫ ߒ ߧߋ߫߸ ߞߏ߫ ߞߋߟߋ߲ ߓߘߊ߫ ߞߍ߫ ߁߂߀ ߀߀߀ ߘߌ߫، ߛߐ߲߬ߞߐ ߏ߬ ߞߊ ߛߌߦߊ߫ ߞߏߖߎ߯ߦߊ߫.>> ߞߓߊ߬ ߡߛߏ ߞߵߏ߬ ߦߌ߬ߘߊ߬.
ߞߊ߬ߕߎ߲߯߸ ߊ߲ ߠߊ߫ ߢߊߢߌߣߌ߲ߠߌ߲ ߘߐ߫߸ ߞߌߘߊ߫ ߥߐ߯ߙߐ߫ ߓߘߊ ߟߋ߬ ߕߘߍ߬ ߆߀ ߀߀߀ ߘߌ߫߸ ߊ߬ ߝߐ߫ ߞߊ߲߫ ߣߌ߲߬ ߞߏ߫ ߏ߬ ߟߋ ߓߘߊ߫ ߞߍ߫ ߁߂߀ ߀߀߀ ߘߌ߫.
ߡߏ߬ߛߏ ߣߌ߲߬ ߞߊ߲߫ ߞߏ߫ ߥߊߦߌ߲߫ ߞߏ ߟߊ߫ ߜߟߍ߬ߦߊ ߘߏ߲߬ ߕߙߐߦߊ ߦߋ߫ ߛߋ߫ ߟߊ߫ ߟߋ߬ ߟߊ߬ߡߌߣߌ߲ ߡߊ߬߸ ߊ߬ ߣߌ߫ ߤߊߟߌ߬ ߞߍ߲ߘߍߦߊ.
<<ߥߊߦߌ߲ ߦߋ߫ ߘߏ߫ ߓߐ߫ ߟߊ߫ ߟߋ߬ ߞߋ߬ߡߎ߲߬ ߖߋ߬ߣߌ߲߬ߠߊ ߟߎ߬ ߟߊ߫ ߟߐ߯ ߕߍ߯ ߓߊ߲ߓߊߟߌ ߟߊ߫߸ ߞߊ߬ ߘߏ߫ ߓߐ߫ ߓߊ߲ߘߊ߫ ߘߐߞߟߊߦߊ ߟߊ߫߸ ߏ߬ ߡߍ߲ ߦߋ߫ ߣߊ߬ ߟߊ߫ ߖߊ߲߬ߞߊߙߏ ߘߌ߫߸ ߖߊ߲߬ߞߊߙߏ ߏ߬ ߘߏ߲߬ ߝߊ߲߬ߓߊ ߦߋ߫ ߟߊ߫ ߟߴߊ߲ ߘߊ߲ ߠߎ߬ ߟߋ߬ ߞߊ߲߬߸ ߓߊߏ߬ ߘߋ߲ ߘߏ߫ ߟߎ߫ ߓߍ߫߸ ߏ߬ ߟߎ߬ ߕߍ߫ ߞߟߊߦߊ ߝߍ߬، ߊ߲ ߧߴߊ߬ ߢߌߣߌ߲߫ ߠߵߊ߲ ߠߊ߫ ߝߊ߰ߡߊ ߟߎ߫ ߝߍ߬߸ ߊ߬ߟߎ߬ ߦߴߊ߲ ߘߍ߬ߡߍ߲߬ ߥߊߦߌ߲ ߦߋ߫ ߕߏ߫ ߆߀ ߀߀߀ ߘߐ߫، ߌ ߖߍ߬ߘߍ ߓߊ߯ ߒ ߛߊ߬ߥߏߘߏ߲߬߸ ߊ߬ߟߎ߬ ߦߴߊ߬ ߞߍ߫ ߃߀ ߀߀߀، ߣߴߏ߬ ߕߍ߫ ߘߏ ߡߍ߲ ߝߐߣߍ߲߫ ߣߌ߲߬߸ ߏ߬ ߓߘߊ߫ ߒߠߋ ߣߌ ߕߙߐ߫ ߟߋ߬ ߝߋߝߋ߫.>> ߊ߬ ߞߵߏ߬ ߦߌ߬ߘߊ߬.
ߊߓߘߎߙߊߤߑߡߊߣߌ߲߬ ߞߊ߬ߓߊ ߝߣߊ߫ ߞߵߊ߬ ߞߏ ߦߋ߫ ߣߌ߲߬ ߢߊ߫ ߞߋߟߋ߲ ߠߋ߬ ߡߊ߬، ߊ߲ ߣߵߏ߬ ߝߣߊ߫ ߞߊ߬ ߢߐ߲߮ ߦߋ߫ ߘߊ ߟߊ߫ ߦߋ߲߬ ߠߋ߬߸ ߞߵߊ߬ ߛߐ߬ߘߐ߲߬ ߊ߬ ߣߊ߬ߣߍ߲߫ ߊ߬ ߟߊ߫ ߥߊߦߌ߲߫ ߓߘߊ ߕߊ߬ ߞߊ߲ߡߊ߬.
<<ߒ ߣߊ߬ ߘߊ߫ ߒ ߠߊ߫ ߥߊߦߌ߲߫ ߓߘߊ ߘߌ߫ ߦߊ߲߬ ߟߏ߲ ߡߍ߲߸ ߊ߬ ߝߐ߫ ߘߊ߫ ߒ ߧߋ߫ ߞߏ߫ ߒ ߧߋ߫ ߣߊ߬ ߞߎ߲߬ߢߐ߲߯ ߝߌ߬ߟߊ߬، ߏ߬ ߟߋ ߓߘߊ߫ ߕߊ߬ߡߌ߲߫ ߕߋ߲߬߸ ߒ ߡߴߊ߬ ߡߊߛߐ߬ߘߐ߲߬߸ ߊ߬ߟߎ߬ ߞߊ߲߫ ߞߏ߫ ߊ߬ߟߎ߬ ߕߍ߫ ߓߊ߯ߙߊ߫ ߟߊ߫ ߕߋ߲߬، ߒߠߋ ߞߏ߬ߣߌ߲ ߞߊ߬ ߡߍ߲ ߟߐ߲߫߸ ߤߊߟߌ߬ ߣߴߊ߬ߟߎ߫ ߞߊ߬ ߘߏ߫ ߟߊ߫ ߛߐ߲߬ߞߐ ߞߊ߲߬߸ ߊ߬ߟߎ߬ ߦߴߊ߬ߟߎ߬ ߞߊߘߊ߲߫߸ ߌ ߓߊ߯ ߣߊ߬ ߌ ߟߊ߫ ߝߋ߲ ߞߐ߫ ߟߏ߲ ߡߍ߲߸ ߌ ߦߴߊ߬ ߡߊߛߐ߬ߘߐ߲߫ ߏ߬ ߟߏ߲. ߒ ߧߴߊ߬ ߢߌߣߌ߲߫ ߠߊ߫ ߝߊ߰ߡߊ ߟߎ߫ ߝߍ߬߸ ߊ߬ߟߎ߬ ߦߋ߫ ߘߏ߫ ߓߐ߫ ߊ߬ ߘߊ ߟߊ߫߸ ߊ߬ߟߎ߬ ߦߋ߫ ߝߙߍ߬ ߞߍ߫ ߝߣߊ߫߸ ߡߐ߱ ߟߎ߬ ߦߋ߫ ߛߋ߫ ߊ߬ ߡߊߛߐ߬ߘߐ߲߬ ߠߴߊ߬ ߥߊ߯ߕߌ ߟߊ߫.>>
ߞߊ߲ߞߊ߲߫ ߥߊߦߌ߲߫ ߠߊߓߊ߯ߙߟߊ ߟߎ߬ ߢߌߣߌ߲ߣߍ߲߫ ߡߍ߲ ߡߊ߬ ߕߋ߲߬߸ ߏ߬ ߟߋ ߘߏ߫ ߓߐ ߘߌ߫ ߊ߬ ߛߐ߲߬ߞߐ ߟߊ߫߸ ߥߟߊ߫ ߞߵߊ߬ ߕߏ߫ ߊ߬ ߢߊ߫ ߞߘߐ ߡߊ߬߸ ߊ߬ ߣߴߊ߬ ߦߋ߫ ߛߋ߫ ߡߊߛߐ߬ߘߐ߲߬ ߠߊ߫ ߖߏߣߦߊ߫ ߓߟߏ ߡߊ߬ ߢߊ ߡߍ߲ ߡߊ߬.
ߊ߲ ߞߊ߬ ߞߊߘߊ߲ ߓߍ߯ ߞߍ߫߸ ߛߴߊ߲ ߘߌ߫ ߝߊߔߑߜ߭ߊߖ߭ ߗߋߕߌ߯ߘߊ ߡߊߛߐ߬ߘߐ߲߬߸ ߊ߲ ߡߊ߫ ߛߴߊ߬ߟߎ߬ ߡߊߛߐ߬ߘߐ߲߬ ߠߊ߫، ߊ߲ ߞߏ߬ߣߌ߲ ߡߊ߬ߞߏ ߦߋ߫ ߢߊߝߐߟߌ߫ ߘߐߞߣߍߣߍ߲߫ ߠߊ߫ ߣߌ߲߬ ߞߏ ߞߊ߲߬، ߓߊߏ߬߸ ߥߊߦߌ߲ ߕߍ߫ ߛߐ߬ߘߐ߲߬ ߠߊ߫ ߕߋ߲߬ ߡߎߣߎ߲߬߸ ߊ߬ ߛߐ߲߬ߞߐ ߟߊ߫ ߦߟߍ߬ ߞߏ ߦߋ߫ ߡߐ߱ ߟߎ߬ ߘߊ߫، ߦߊ߯ߟߊ߫߸ ߊ߬ ߓߊ߯ ߣߊ߬ ߟߏ߲ ߡߍ߲߸ ߏ߬ ߘߌ߫ ߕߏ߫ ߊ߬ ߡߊ߬ ߓߊ߬؟ ߊ߬ ߛߎߡߦߊ ߡߍ߲ ߣߌ߲߬ ߝߣߊ߫߸ ߥߟߴߊ߬ ߘߛߍ ߡߍ߲ ߣߌ߲߬߸ ߏ߬ ߞߎ߲߭ ߦߋ߫ ߡߎ߲߬ ߘߌ߫؟ ߏ߬ ߟߎ߫ ߖߋ߬ߓߌ ߟߐ߲ ߠߋ߬ ߘߌ߫ ߛߋ߫ ߖߡߊ߬ߣߊ߬ߘߋ߲ ߠߎ߬ ߞߎ߲߬ߠߊ߬ߝߎߟߋ߲߫ ߠߊ߫.
