ߘߊ߬ߡߊ߲ ߦߋ߫ ߤߊ߬ߙߌ߬ߖߍ߯ ߟߋ߬ ߘߌ߫߸ ߡߍ߲ ߝߘߊߣߍ߲߫ ߛߎ߲ߞߎ߲ ߠߊ߫߸ ߞߵߊ߬ ߓߍ߲߬ ߘߎ߰ߞߟߏ ߟߎ߫ ߤߊ߬ߙߌ߬ߖߍ߮ ߟߊ߫ ߓߐ߫ ߢߐ߲߰ ߡߊ ߡߊ߬، ߓߊߏ߬߸ ߘߊ߬ߡߊ߲ ߘߏ߫ ߟߎ߫ ߘߐߞߍߣߍ߲߫ ߣߍ߱ ߟߊ߫߸ ߘߏ߫ ߟߎ߫ ߘߐߞߍߣߍ߲߫ ߝߎߥߊ߲ߞߓߊ ߟߊ߫߸ ߊ߬ ߣߌ߫ ߣߐ߬ߓߊߟߌ، ߒ߬ߓߊ߬߸ ߣߴߌ ߞߊ߬ ߞߎ߲ߖߊ߲߫ ߛߊ߬ߞߐ߬ߘߎ߯ ߕߊ߬߸ ߏ߬ ߟߎ߫ ߤߊ߬ߙߌ߬ߖߍ߰ ߘߊ߫ ߛߊߣߌ߲߫ ߘߊߡߊ߲ ߠߋ߬ ߟߊ߫.
ߡߐ߱ ߟߎ߬ ߦߋ߫ ߓߐ߫ ߟߊ߫ ߝߊ߲߬ ߛߌߦߊߡߊ߲߫ ߠߋ߬ ߘߐ߫߸ ߞߊ߬ ߦߌ߬ߙߌ߲߬ߘߌ߫ ߘߊ߬ߡߊ߲߬ߘߊ߬ ߓߏߟߏ߲ ߠߎ߬ ߞߊ߲߬߸ ߊ߬ߟߎ߫ ߤߊ߬ߙߌ߬ߖߍ߮ ߡߊߝߟߍ߫ ߞߊ߲ߡߊ߬، ߖߐ߲߰ߛߊ߫ ߘߋ߲ߓߦߊ ߟߊ߫ ߞߏ ߟߎ߬ ߘߌ߫ ߣߐ߰ߦߴߊ߬ߟߎ߫ ߡߊ߬ ߢߊ ߡߍ߲߸ ߊ߬ ߣߌ߫ ߛߴߊ߬ߟߎ߬ ߘߌ߫ ߛߋ߫ ߝߋ߲ߣߍ߲߫ ߛߐ߬ߘߐ߲߬ ߠߊ߫ ߞߵߊ߬ߟߎ߫ ߞߎ߲߬ߛߌ߲߬ ߛߏ߫ ߟߊ߫.
ߘߏ߫ ߟߎ߫ ߘߏ߲߬ ߦߋ߫ ߥߊ߫ ߟߊ߫ ߟߋ߬ ߘߊ߬ߡߊ߲߬ߘߊ ߟߊ߫߸ ߞߊ߬ ߛߊ߲߬ ߦߙߌߞߊ߫ ߞߍ߫߸ ߝߋ߲߫ ߕߍ߫ ߛߐ߬ߘߐ߲߬ ߠߊ߫߸ ߞߐߛߊߦߌ߲߫ ߢߊ߫ ߕߍ߫ ߛߏ߫ ߞߊ߬ ߥߊ߫ ߛߍ߬ߣߍ ߞߍ߫ ߦߋ߲߬.
ߖߎ߬ߡߍ߬ ߞߐ߲ߘߍ߫ ߦߋ߫ ߘߊ߬ߡߊ߲߬ ߓߊ߰ߙߊ߬ߟߊ ߟߋ߬ ߘߌ߫ ߞߎ߲ߖߊ߲߫ ߞߣߐ߫߸ ߊ߬ ߛߋ߫ ߘߴߊ߬ ߝߐ߫ ߟߴߊ߲ ߧߋ߫߸ ߊ߬ߟߋ ߦߴߊ߬ ߟߊ߫ ߛߊߣߌ߲߫ ߥߊߘߌ ߟߎ߬ ߞߍ߫ ߟߊ߫ ߢߊ ߡߍ߲ ߡߊ߬:
<<ߦߊ߲߬ ߛߊߣߌ߲߫ ߦߋ ߡߊ߲߫ ߛߌߦߊߡߊ߲߫، ߓߊ߬ߙߌ߬ ߏ߬ ߣߴߊ߬ ߕߊ߫߸ ߝߏ߫ ߌ ߦߴߏ߬ ߟߋ ߓߊ߯ߙߊ߫، ߓߊߏ߬߸ ߦߊ߲߬ ߥߊߘߌ߫ ߛߐߘߐ߲߫ ߞߏ ߞߊ߫ ߜߍ߬ߟߍ߲߬ ߓߊߟߋ߬، ߣߌ߫ ߒ ߞߊ߬ ߡߍ߲ ߛߐ߬ߘߐ߲߬߸ ߞߵߏ߬ ߞߍ߫ ߘߋ߲ߓߦߊ ߓߊߟߏ ߘߌ߫، ߊ߬ ߣߌ߫ ߝߣߊ߫߸ ߣߴߊߟߊ߫ ߞߵߊ߬ ߘߌߦߊ߫ ߒ ߠߊ߫߸ ߞߊ߬ ߓߏ߲ ߟߐ߬ ߊ߬ ߘߐ߫ ߞߊ߬ ߘߋ߲ߓߦߊ ߟߊߘߏ߲߬ ߏ߬ ߟߊ߫.>>
ߣߴߌ ߞߊ߬ ߘߊ߬ߡߊ߲߬ ߓߊ߯ߙߊ ߡߊߝߟߍ߫߸ ߊ߬ ߦߋ߫ ߓߊ߯ߙߊ߫ ߜߍߟߍ߲ߓߊ߫ ߟߋ߬ ߘߌ߫߸ ߡߍ߲ ߦߋ߫ ߞߍ߫ ߟߊ߫ ߝߊ߬ߘߌ߬ߞߟߏ ߟߊ߫ ߝߊ߲߬ߞߊ ߟߊ߫߸ ߡߍ߲ ߞߐߝߟߌ ߞߊ߫ ߛߌߦߊ߫ ߞߏߛߓߍ߫، ߊ߬ ߦߋ߫ ߓߊ߯ߙߊߞߍߟߊ ߡߊ߬ ߛߍ߰ ߞߐߝߌ ߟߋ߬ ߘߌ߫ ߞߘߐ߬ߦߊ ߕߎ߬ߡߊ ߟߊ߫߸ ߞߵߏ߬ ߘߐߓߊ߲߫ ߞߵߊ߬ ߛߐ߬ߘߐ߲߬ ߌ ߞߢߊ ߛߌߦߊߡߊ߲߫ ߞߍ߲ߘߍ߫، ߖߘߐ߬ߞߏ ߞߊ߫ ߛߌߦߊ߫ ߘߊ߬ߡߊ߲߬ ߓߊ߯ߙߊ ߘߐ߫ ߞߏߛߓߍ߫، ߓߊߏ߬߸ ߘߊ߬ߡߊ߲ ߠߎ߬ ߦߋ߫ ߛߋ߲߬ ߠߊ߫ ߥߊ߬ߞߊߟߌ ߣߌ߫ ߖߎ߬ߛߎ ߟߋ߬ ߟߊ߫߸ ߊ߬ ߕߍ߫ ߛߋ߲߬ ߠߊ߫ ߟߐ߲ߠߌ߲ߓߊ߫ ߟߊ߫، ߏ߬ ߟߋ ߘߐ߫߸ ߊ߬ ߞߐߝߟߌ ߦߋ߫ ߞߍ߫ ߟߊ߫ ߘߊ߬ߡߊ߲߬ߓߋ ߟߎ߬ ߘߌ߫ ߞߊ߬ ߞߊ߬ߛߙߊ߬ ߛߌߦߊߡߊ߲߫ ߠߊߛߋ߫ ߊ߬ ߞߍߓߊ߮ ߟߎ߫ ߡߊ߬ ߥߊ߯ߕߌ ߘߏ߫ ߟߎ߫ ߟߊ߫، ߏ߬ ߖߍ߬ߘߍ ߓߘߊ߫ ߞߍ߫ ߕߙߎ߬ ߘߌ߫߸ ߞߊ߬ ߥߎߟߊ߫ ߖߊ߲߫ ߠߊ߫ ߡߐ߮ ߘߏ߫ ߟߎ߫ ߛߌߟߊ߲߫ ߘߊ߬ߡߊ߲߬ ߓߊ߯ߙߊ ߦߋ߫߸ ߓߊߏ߬ ߊ߬ߟߎ߬ ߕߍ߫ ߡߊ߲߬ߞߕߎ߬ ߢߌߡߊ߫ ߡߍ߲߫ ߠߴߊ߬ ߞߏ ߘߐ߫، ߏ߬ ߟߋ ߘߐ߫߸ ߖߎ߬ߡߍ߫ ߞߊ߬ ߘߊ߬ߡߊ߲߬ߛߋ߲ ߡߊ߬ߛߎߓߊ ߝߐ߫߸ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߞߏ ߓߍ߯ ߣߴߊ߬ ߡߊ߲߬ߕߙߐ߫ ߟߋ߬: <<ߘߊ߬ߡߊ߲߬ߛߋ߲ ߡߊߛߌߟߊ߲ߣߍ߲߫߸ ߊߟߊ߫ ߟߋ߬ ߘߐߙߐ߲߫ ߦߋ߫ ߡߐ߰ ߟߊߞߊ߲ߘߊ߫ ߟߴߊ߬ ߘߐ߫߸ ߊ߬ ߣߌ߫ ߞߵߏ߬ ߟߴߊ߬ ߢߊߟߐ߲ ߞߊ߲߬، ߣߴߌ ߦߴߊ߬ ߝߍ߬ ߞߊ߬ ߕߐ߬ߣߐ ߛߐ߬ߘߐ߲߫ ߘߎ߰ߞߘߐ߬ ߣߊ߲ߝߟߏ ߟߊ߫߸ ߊ߬ ߢߊߢߌߣߌ߲ ߦߋ߫ ߞߎ߲߫ ߌ ߘߐ߫߸ ߊ߬ ߕߙߐߦߊ ߓߍ߯ ߦߋ߫ ߞߎ߲߫ ߌ ߘߐ߫، ߌ ߕߴߛߋ߫ ߛߐ߬ߘߐ߲ ߞߍ߫ ߟߊ߫ ߘߎ߰ ߞߘߐ߬ ߣߊ߲ߝߟߏ ߘߐ߫ ߓߌ߬ ߣߴߌ ߡߊ߫ ߕߙߐ߫ ߝߟߐ߫، ߌ ߕߏߕߐ߫ ߕߙߐ ߏ߬ ߟߋ ߘߐ߫߸ ߊߟߊ߫ ߘߌ߫ ߥߊ߫ ߌ ߛߐ߫߸ ߌ ߘߌ߫ ߥߊ߫ ߛߊߣߌ߲ ߦߴߌ ߖߘߍ߬ ߓߟߏ߫.>>
ߛߊ߲߬ ߦߙߌߞߊ ߣߌ߲߬ ߓߍ߯ ߞߐߝߍ߬ ߘߊ߬ߡߊ߲ ߞߣߐ߫߸ ߘߏ߫ ߟߎ߫ ߕߍ߫ ߝߋ߲߫ ߛߐ߬ߘߐ߲߬ ߠߊ߫، ߘߏ߫ ߟߎ߫ ߘߌ߫ ߣߊ߬ ߌߞߘߐ߫߸ ߜߐ߲߬ߜߍ ߘߌ߫ ߓߐ߫ ߏ߬ ߟߎ߬ ߦߋ߫ ߞߵߊ߬ߟߎ߬ ߞߍ߫ ߝߋ߲߫ ߘߌ߫ ߛߎ߫ ߞߏ ߣߌ߫ ߞߣߍߓߐ ߕߍ߫، ߘߏ߫ ߟߎ߫ ߖߍ߬ߘߍ ߦߋ߫ ߘߊ߬ߡߊ߲ ߞߣߐ߫߸ ߒ ߡߴߊ߬ ߞߍߢߊ߫ ߟߐ߲ ߠߋ߬ ߡߊ߬߸ ߊ߬ ߣߌ߫ ߊߟߊ߫ ߟߊ߫ ߟߏ߲߫ ߡߊߞߐߣߐ߲߫، ߓߊߏ߬߸ ߊ߬ ߦߴߊ߬ ߓߍ߯ ߦߟߌ߫ ߟߊ߫߸ ߞߏ߫ ߊ߬ߟߎ߬ ߓߍߣߊ߬ ߝߋ߲ ߛߐ߬ߘߐ߲߫ ߘߊ߬ߡߊ߲ ߞߣߐ߫ ߟߏ߲߫ ߣߊ߬ߕߐ ߟߎ߬ ߘߐ߫، ߏ߬ ߟߋ ߞߏߛߐ߲߬߸ ߖߎ߬ߡߍ߬ ߝߣߊ߫ ߘߍ߲߬ߞߣߍ߬ߦߊ߬ߣߍ߲߬ ߕߌ߯ߕߌ߯߸ ߞߏ߫ ߊ߬ ߘߌ߫ ߛߋ߫ ߞߏߢߊ߬ ߟߊ߫ ߘߊ߬ߡߊ߲߬ ߓߊ߯ߙߊ ߣߌ߲߬ ߘߐ߫ ߥߊ߯ߕߌ߫ ߣߊ߬ߕߐ ߟߎ߬ ߘߐ߫: <<ߣߴߊߟߊ߫ ߞߵߊ߬ ߟߊߕߍ߰ ߌ ߡߊ߬߸ ߌ ߘߌ߫ ߡߊߝߊ߬ߟߋ߲߬، ߓߍ߯ ߘߴߊ߬ ߝߐ߫ ߌ ߡߊ߬ ߞߏ߫ ߊߟߊ߫ ߟߊ߫߸ ߞߊ߬ߘߌ߬ߛߊ߫ ߘߏ߲߬ ߜߎ ߕߙߐߣߍ߲ߓߊ ߟߋ߬ ߕߘߍ߬، ߓߊ߬ߙߌ߬߸ ߊߟߊ߫ ߓߘߊ߫ ߞߏ߫ ߘߐߦߟߍߡߊ߲߫ ߞߍ߫ ߊ߬ ߦߋ߫.>>
ߘߊ߬ߡߊ߲ ߦߋ߫ ߓߊ߯ߙߊ߫ ߦߙߐ߫ ߟߋ߬ ߘߌ߫߸ ߡߍ߲ ߦߋ߫ ߞߍ߫ ߟߊ߫ ߦߏ߫ ߓߋ߲ߓߊ߫ ߕߊ߬ߡߌ߲߬ߣߍ߲ ߠߎ߬ ߦߴߊ߬ ߞߍ߫ ߟߊ߫ ߢߊ ߡߍ߲ ߗߐ߫، ߓߊ߬ߙߌ߬߸ ߊ߬ ߛߊ߬ߙߌ߬ߦߊ ߟߎ߬ ߘߐߖߊ߬ߣߍ߲߫ ߠߋ߬ ߜߘߋߜߘߋ߫، ߓߊߏ߬߸ ߡߐ߰ ߟߎ߬ ߟߋ߬ ߓߐ߫ ߟߊ߫ ߛߏ ߞߣߐ߫ ߡߐ߮ ߟߎ߬ ߓߟߏ߫߸ ߊ߰ ߝߐ߫ ߟߊ߫ ߡߍ߲ ߠߎ߬ ߡߊ߬ ߦߋ߲߬ ߞߏ߫ ߕߐ߲ߓߟߏߡߊ ߟߎ߬߸ ߏ߬ ߟߎ߫ ߟߋ߬ ߘߐ߱ߘߏ߲߬ߣߍ߲߫ ߘߊߞߎ߲߫ ߞߎߘߊ ߟߎ߬ ߟߊ߫߸ ߊ߬ ߣߌ߫ ߘߊ߬ߡߊ߲߬ ߞߣߐ߬ߟߊ ߥߦߐ߬ ߡߌߛߍ߲ ߠߎ߬ ߣߴߊ߬ ߕߌߢߍߟߌ߫ ߞߏ ߟߎ߬ ߘߊ߲ߘߊ ߟߊ߫.
ߞߎ߲߬ߠߊ߬ߛߌ߮ ߟߎ߫ ߘߏ߲߬ ߖߊ߲߬ ߦߋ߫ ߘߊ߬ߡߊ߲ ߞߣߐ߫ ߢߊߣߍ߲ ߘߏ߫ ߡߊ߬߸ ߣߴߏ߬ ߦߴߊ߬ ߟߊߟߐ߭ ߘߌ߫ ߛߊ߬ߡߊ ߘߐ߫ ߛߐ߲߬߸ ߞߵߏ߬ ߞߎ߲߭ ߞߍ߫ ߖߌ ߥߊ߬ߙߊ ߣߌ߫ ߘߊ߬ߡߊ߲߬ߓߋ ߢߍߛߌߟߊ߲ߢߍ ߘߌ߫، ߓߊ߬ߙߌ߬߸ ߞߐߝߟߌ߫ ߜߘߍ߫ ߦߋ߫ ߘߊ߬ߡߊ߲߬ ߞߏ ߢߌ߲߬ ߠߊ߫߸ ߣߊߟߌ߬ߡߎ߲߬ ߛߎ߲ߞߎ߲ ߘߐߖߊߛߌ ߘߌ߫߸ ߦߙߌ߫ ߕߍ߮ ߘߌ߫߸ ߦߙߌ߫ ߕߘߎߓߊߟߌߦߊ ߘߌ߫߸ ߘߋ߲߬ߞߊ߬ ߞߎ߬ߘߎ߲߬ ߠߊ߬ߘߊ߲ ߠߎ߬ ߘߌ߫߸ ߡߍ߲ ߓߍߣߊ߬ ߞߍ߫ ߊ߬ ߕߊ߫ ߝߐ߰ߓߍ߬ ߓߟߏߡߊߞߊ߬ߣߍ߲߬ ߘߴߊ߲ ߓߟߏ߫ ߥߊ߯ߕߌ߫ ߣߊ߬ߕߐ ߟߎ߬ ߘߐ߫.
ߛߎ߯ߟߊ߲ߘߌ߫ ߛߊ߬ߞߐ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
