ߘߊ߬ߡߊ߲߬ ߞߏ ߝߐߢߐ߲߯ߞߐ ߘߏ߫ ߟߋ߬ ߦߋ߫ ߖߌ߬ߣߍ߬ ߣߌ߫ ߋߡߌߙߊߕ ߊߙߊߓ ߎ߳ߣߌ ߥߊߟߌߘߊ ߘߏ߫ ߕߍ߫ ߕߋ߲߬߸ ߏ߬ ߟߎ߬ ߟߊ߫ ߕߣߐ߬ߓߐ߬ߟߌ߬ ߘߌߢߍߛߓߍ ߡߌ߬ߣߊ ߞߐߝߍ߬ ߊ߬ߟߎ߬ ߟߊ߫، ߞߏߢߊ ߣߌ߲߬ ߓߘߊ߫ ߛߋ߫ ߞߌߢߍ߲߫ ߜߍߓߏ߲ ߞߕߌߘߊ ߢߊߞߘߐ߫، ߓߊߏ߬ ߕߋ߲߭ߕߋ߲߭ ߣߌ߲߬ ߘߐ߫߸ ߖߌ߬ߣߍ߬ ߟߊ߫ ߘߊ߬ߡߊ߲ ߞߏߢߊ ߟߎ߬ ߡߊ߬ߡߙߊ߬ߟߌ ߦߴߊ߬ߟߎ߬ ߖߍ߬ߘߍ ߟߋ߬ ߕߍ߯ ߞߘߐ߫ ߕߋ߲߬.
ߊߞߑߛߌ ߍ߲ߕߍߙߑߣߊߛߌߦߐ߲ߣߊߟ ߍߟ.ߕߋ.ߘߋ ߓߘߴߊ߬ ߟߊߛߋ߫ ߞߐ߬ߓߊ߬ߟߏ߲ ߣߌ߲߬ ߡߊ߬߸ ߞߏ߫ ߊ߬ߟߎ߬ ߓߘߊ߫ ߞߕߌ߫ ߞߏ ߘߏ߫ ߛߌ߰ ߛߋ߲߬ߠߊ߫߸ ߛߊ߫ ߣߌ߲߬ ߞߏ ߘߌ߫ ߟߛߊߣߌ߲ߧߊ߫ ߊ߬ߟߎ߬ ߣߌ߫ ߖߌ߬ߣߍ߫ ߖߡߊ߬ߣߊ ߕߍ߫، ߊ߬ߟߎ߬ ߥߊߣߴߊ߬ ߞߏ ߘߌ߫ ߞߕߌߘߊ ߡߍ߲ ߠߊ߫߸ ߊ߰ ߝߐ߫ ߟߴߏ߬ ߟߋ ߡߊ߬ ߞߏ߫ ߣߊ߲߬ߝߟߏ߬ ߞߏ ߟߎ߬ ߝߐߢߐ߲߯ߞߐ ߞߏߢߊߓߐ ߡߊ߲߬ߕߏ߲߬ߕߍ߬ ߕߊ߲ߓߊ߲ (ߣ.ߝ.ߞ.ߡ.ߕ)߸ ߞߕߌߘߊ ߏ߬ ߦߋ߫ ߞߌߢߍ߲߫ ߜߍߓߏ߲ ߓߏߟߏ߲ߝߘߊ ߘߏ߫ ߟߋ߬ ߘߌ߫، ߥߊߟߌߘߊ ߞߊ߲߫ ߠߋ߬߸ ߞߏ߫ ߣߌ߫ ߖߌ߬ߣߍ߬ ߓߘߴߊ߬ߟߎ߬ ߟߊ߫ ߘߌ߬ߢߍ߬ߛߓߍ ߡߌ߬ߣߴߊ߬ߟߎ߬ ߟߊ߫ ߛߊ߲߭ ߢߌ߲߬ ߠߊ߫ ߖߏߣߦߊ߫ ߓߟߏ ߡߊ߬߸ ߘߟߊ߫ ߥߊߘߌ ߞߋ߲߬ߥߟߎ߫ ߂߈،߉ ߟߋ߬ ߞߊ߫ ߞߊ߲߫ ߘߴߊ߬ߟߎ߫ ߡߊ߬ ߏ߬ ߘߐ߫߸ ߊ߬ߟߎ߬ ߓߟߏߢߐ߲߯ߠߛߊߦߌ߲ ߘߌ߫.
ߣߴߌ ߘߏ߲߬ ߞߊ߬ ߖߌ߬ߣߍ߫ ߕߊ߬߸ ߞߌߢߍ߲߫ ߝߎߥߊ߲ߢߊߘߊ߲ ߓߟߏߡߊߛߌ߮ ߡߍ߲ ߦߋ߲߬߸ ߏ߬ ߞߊ߫ ߛߌߦߊ߫، ߊ߬ ߘߏ߲߬߸ ߡߙߌߦߊ߫ ߜߘߍ߫ ߓߘߊ߫ ߣߊ߬ ߖߌ߬ߣߍ߬ ߞߣߐ߫ ߞߊ߬ߦߌ߯ ߕߎ߬ߡߊ߬ ߖߊ߲߫߸ ߞߏ߫ ߝߏ߫ ߖߡߊ߬ߣߊ ߘߊ߬ߡߊ߲߬ ߞߏ ߓߍ߯ ߦߋ߫ ߟߊ߫ ߞߎ߲߬ߠߊ߬ߛߌ߮ ߟߋ߬ ߕߊ߫ ߓߟߏ߫ ߞߊ߲߬߸ ߞߵߊ߬ ߡߊ߬ߡߙߊ߬ߟߌ ߕߏ߫ ߖߡߊ߬ߣߊ ߖߍ߬ߘߍ ߓߟߏ߫، ߏ߬ ߟߋ ߘߐ߫߸ ߊ߬ߟߎ߫ ߞߊ߬ ߥߊߟߌߘߊ߫ ߛߌߦߊߡߊ߲߫ ߠߊ߫ ߘߌ߬ߢߍ߬ߛߓߍ ߡߌ߬ߣߴߊ߬ߟߎ߬ ߟߊ߫߸ ߞߏ߫ ߛߊ߫ ߖߡߊ߬ߣߊ ߟߊ߫ ߕߐ߬ߣߐ ߘߌ߫ ߥߙߊ߬߸ ߊ߬ ߣߌ߫ ߛߊ߫ ߘߊ߬ߡߊ߲߬ߘߐ߬ߝߋ߲ ߛߌߦߊߡߊ߲߫ ߘߌ߫ ߛߋ߫ ߕߣߐ߬ߓߐ߬ ߟߊ߫ ߖߡߊ߬ߣߊ ߖߍ߬ߘߍ ߞߣߐ߫ ߢߊ ߡߍ߲ ߡߊ߬߸ ߞߵߊ߬ ߛߐ߬ߘߐ߲߬ ߊ߬ ߓߍ߯ ߡߊ߫ ߕߏ߫ ߕߍ߬ ߟߊ߫ ߛߐ߲߬ ߞߊ߬ ߥߴߊ߬ߟߎ߬ ߘߌ߫ ߞߐߞߊ߲߬، ߓߘߍ߬ߓߘߍ߬ߟߌ ߏ߬ ߛߌ߰ ߘߊ߫ ߛߋ߲߬ߠߊ߫ ߘߐ߬ߕߊߡߌ߲ ߞߊ߲ߕߌ߮߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߞߍߞߌߦߊ ߟߋ߬ ߞߏߛߐ߲߬.
ߞߊ߬ ߞߐ߲߰ ߊߞߑߛߌ ߡߊ߲߬ߕߏ߲߬ߕߍ߬ߟߊ߬ߞߊ ߢߍ߫߸ ߣߏߡߊߘ ߓߐߞߑߛߌߕ ߞߐߙߑߔߏߙߊߛߌߦߐ߲ ߝߣߊ߫ ߞߵߊ߬ ߡߊߞߊ߬ߛߌ߫ ߟߋ߬ ߖߌ߬ߣߍ߫ ߞߊ߲߬ ߣߍߣߍߓߊ߫ ߛߊ߬ߣߍ߲ ߠߊ߫߸ ߣߌ߲ߓߊ ߍߝ߭ߍߛߕߑߡߊ߲ ߝߣߊ߫ ߞߵߏ߬ ߢߐ߲߰ ߞߍ߫ ߞߊߙߏ ߢߌ߲߬ ߠߊ߫، ߟߊ߬ߛߋ߬ߟߌ ߡߍ߲ ߞߍ߫ ߘߊ߫ ߊߞߑߛߌ ߍ߲ߕߍߙߑߣߊߛߌߦߐ߲ߣߊߟ ߓߟߏ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߣߌ߫ ߖߌ߬ߣߍ߫ ߞߵߊ߬ ߓߊ߲߬ ߛߐ߬ߘߐ߲߬ ߠߊ߫ ߞߕߌ ߣߌ߲߬ ߘߐ߫߸ ߥߟߊ߫ ߞߵߊ߬ ߓߊ߲߬ ߊ߬ߟߎ߬ ߓߟߏߢߐ߲߯ߠߊߛߊ߬ߦߌ߲߬ ߠߊ߫߸ ߏ߬ ߘߌ߫ ߓߣߐ߬ߓߊ߫ ߟߊߘߏ߲߬ ߖߌ߬ߣߍ߫ ߞߎ߲߬، ߓߊߏ߬߸ ߊ߬ߟߎ߬ ߘߌ߫ ߝߐ߫ ߟߊߒߠߦߊ ߟߊ߫ ߞߐߞߊ߲߫ ߡߊߣߊ߲ߞߎ߲ߕߌ߮ ߟߎ߬ ߟߊ߫ ߞߎ߲߬ߠߊ߫߸ ߊ߬ ߣߴߊ߬ߟߎ߬ ߘߌ߫ ߜߟߍ߬ߦߊ ߛߐ߬ߘߐ߲߫ ߣߊ߲߬ߝߟߏ߬ߦߊ߬ߟߌ ߞߏߟߊߛߌ߮ ߟߎ߬ ߘߐ߫.
ߖߌ߬ߣߍ߫ ߘߊ߬ߡߊ߲߬ ߞߏߟߊߘߍ ߡߍ߲ ߕߐ߯ ߞߏ߫ ߊߞߑߛߌ ߡߌߣߋߙߊߟ ߙߋߛߎߙߛ߸ ߓߏߝߊ߬ ߕߌ߲߬ߞߎߘߎ߲ ߝߎߢߊߘߊ߲ ߘߊ߬ߡߊ߲ ߘߏ߫ ߤߊߞߍ ߦߴߏ߬ ߓߟߏ߫، ߒ߬ߓߊ߬߸ ߏ߬ %߈߅ ߦߋ߫ ߊߞߑߛߌ ߍ߲ߕߍߙߑߣߊߛߌߦߐ߲ߣߊߟ ߢߌ߲߬ ߠߋ߬ ߕߊ߫ ߓߟߏ߫ ߡߊ߬، ߥߊߟߌߘߊ ߟߊ߫ ߝߐߟߌ߫ ߘߐ߫߸ ߊ߬ߟߎ߬ ߟߊ߫ ߘߌ߬ߢߍ߬ߛߓߍ ߓߐ߫ ߘߴߊ߬ߟߎ߬ ߓߟߏ߫ ߘߓߊ߬ߕߊ ߟߋ߬ ߟߊ߫߸ ߞߵߏ߬ ߟߊ߫ ߥߊߟߌߘߊ߫ ߛߌߦߊߡߊ߲߫ ߝߣߊ߫ ߞߊ߲߬߸ ߊ߬ߟߎ ߞߋߟߋ߲߫ ߕߍ߫ ߝߋߎ߫، ߖߡߊ߬ߣߊ ߝߊ߰ߡߊ ߟߎ߫ ߘߏ߲߬ ߞߵߊ߬ ߝߐ߫ ߟߋ߬߸ ߞߏ߫ ߊ߬ߟߎ߫ ߣߐ߬ ߘߌ߬ߢߍ߬ߛߓߍ ߓߐ߫ ߟߴߊ߬ߟߎ߬ ߓߟߏ߫ ߟߋ߬߸ ߓߊߏ߬ ߊ߬ߟߎ߬ ߟߊ߫ ߕߣߐ߬ߓߐ߬ߟߌ ߡߴߊ߬ߟߎ߬ ߤߣߍ߫߸ ߘߏ߫ ߟߎ߫ ߖߍ߬ߘߍ ߕߍ߫ ߓߊ߯ߙߊ߫ ߞߍ߫ ߟߊ߫߸ ߥߊߟߌߘߊ ߡߊ߫ ߛߐ߲߬ ߞߎߡߊ ߏ߬ ߟߋ ߡߊ߬.
ߊߞߑߛߌ ߍ߲ߕߍߙߑߣߊߛߌߦߐ߲ߣߊߟ ߞߊ߲߫ ߞߏ߫ ߊ߬ߟߎ߬ ߟߊ߫ ߘߊ߬ߡߊ߲ ߕߘߍ߬ ߓߊ߯ߙߊ߫ ߟߊ߫ ߝߋߝߋ߫߸ ߊ߬ ߣߌ߫ ߓߊ߯ߙߟߊ߫ ߡߐ߰ ߥߊ߮ ߟߋ߬ ߕߎ߲߬ ߦߴߊ߬ߟߎ߬ ߓߟߏ߫ ߦߋ߲߬߸ ߏ߬ ߟߎ߬ ߣߴߊ߬ߟߎ߬ ߟߊ߫ ߘߋ߲ߓߦߊ، ߂߀߂߄ ߠߊ߫߸ ߞߏ߫ ߊ߬ߟߎ߬ ߛߋ߫ ߘߊ߫ ߝߎߥߊ߲ߢߊߘߊ߲ ߞߙߌߕߌ߫ ߞߋ߲߬ߥߟߎ߬ ߁߈ ߠߋ߬ ߟߊߓߐ߫ ߟߊ߫߸ ߞߵߊ߬ߟߎ߬ ߞߍ߫ ߖߡߊ߬ߣߊ ߝߎߥߊ߲ߢߊߘߊ߲߫ ߠߊߝߏߦߌߟߊ ߝߌߟߊߣߊ߲ ߘߌ߫، ߊ߬ߟߎ߬ ߞߊ߲߫ ߞߏ߫ ߖߌ߬ߣߍ߬ ߞߍ ߞߊ߬ ߘߌ߬ߢߍ߬ߛߓߍ ߡߌ߬ߣߴߊ߬ߟߎ߬ ߟߊ߫ ߏ߬ ߓߐ߬ߣߐ ߟߋ߬ ߛߋߣߴߊ߬ߟߎ߫ ߡߊ߬، ߓߊߏ߬߸ ߝߎߥߊ߲ߢߊߘߊ߲ ߞߙߌߕߌ߫ ߞߋ߲߬ߥߟߎ߫ ߈߀߀ ߠߋ߬ ߘߊ߬ߡߊ߲ ߏ߬ ߞߣߐ߫، ߏ߬ ߟߋ ߘߐ߫߸ ߞߏ߫ ߝߏ߫ ߞߵߊ߬ߟߎ߬ ߓߟߏߢߐ߲߯ߠߊߛߊ߬ߦߌ߲߫ ߠߋ߬.
<<ߊ߲ ߘߴߊ߬ ߦߌ߬ߘߊ߬ ߞߌߢߍ߲߫ ߜߍߓߏ߲ ߠߊ߫ ߞߕߌߘߊ ߟߊ߫߸ ߞߏ߫ ߖߌ߬ߣߍ߫ ߣߐ߬ ߊ߲ ߕߐ߬ߢߍ߰ ߟߊ߫ ߟߋ߬߸ ߡߍ߲ ߕߍ߫ ߓߍ߲߬ ߛߊ߬ߙߌ߬ߦߊ߫ ߡߊ߬.>> ߏ߬ ߝߐ߫ ߘߊ߫߸ ߜ߭ߎ߲ߖߊ߲ ߛ߭ߊߙߑߡߊ߫ ߟߋ߬ ߓߟߏ߫߸ ߊ߬ߟߋ ߟߋ߬ ߦߋ߫ ߊߞߑߛߌ ߍ߲ߕߍߙߑߣߊߛߌߦߐ߲ߣߊߟ ߞߕߌߞߏ ߟߎ߬ ߞߏߟߊߕߍ߮ ߘߌ߫، ߖߌ߬ߣߍ߫ ߞߎ߲߬ߠߊ߬ߛߌ߮ ߞߏ߬ߣߌ߲ ߡߊ߫ ߝߋ߲߫ ߝߐ߫ ߣߌ߲߬ ߞߏ ߞߊ߲߬ ߜߍ ߘߐ߫ ߡߎߣߎ߲߬߸ ߞߌ߬ߓߊ߬ߙߏ ߣߌ߲߬ ߛߓߍ߫ ߕߎߡߊ ߟߊ߫ ߒ߬ ߓߟߏ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
