ߛߘߋߦߊߥߏ ߣߐ߬ ߛߋߓߊ߯ߦߊ ߕߊ߬ ߢߊ ߓߍ߯ ߟߋ߬ ߞߎ߬ߡߊ߲߬ߘߌ߬ ߟߊ߫ ߞߎ߬ߙߎ߲߬ߘߎ߬ ߛߐߛߐ ߞߊ߲߬ ߝߊ߲߬ߞߊ ߟߊ߫، ߓߊߏ߬߸ ߊ߬ߟߎ߫ ߣߐ߬ ߓߋߣߍ߲߫ ߞߊ߬ߝߏ߬ ߖߊߛߏ߲ ߣߌ߲߬ ߓߛߌ߬ߞߌ߬ ߟߊ߫ <<ߓߋߣߍ߲߫ ߡߌ߬ߙߌ߲߬ߘߌ ߛߊ߬ߥߏ ߟߊߥߎ߬ߙߎ߲߬ߓߊ߬>> ߞߏ ߟߋ߬ ߘߌ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߛߌ߰ߞߊ߲ ߞߣߐ߫ ߞߎߡߊ ߟߋ߬ ߞߊ߫ ߞߊ߲߫ ߞߊ߬ ߡߊߓߏ߲߬ߧߊ߬ ߓߍ߯ ߓߟߏ߫߸ ߊ߬ ߣߌ߫ ߖߡߊ߬ߣߊ ߓߍ߯ߦߊ ߛߌ߲߬ߝߏ߲߬ߘߊ ߟߎ߬.
ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߞߊߝߏ ߟߎ߬ ߟߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߘߍ߬ߓߊ (ߝߕߞߡߘ=ߛߘߋߦߊߥߏ) ߓߘߊ߫ ߞߎߡߊ߫ ߓߋߣߍ߲߫ ߞߊ߬ߝߏ߬ ߖߊ߬ߛߏ߲߬ ߞߏ ߣߌ߲߬ ߞߊ߲߬߸ ߞߵߊ߬ ߟߊߜߏߦߊߢߍ߫ ߔߐ߫، ߓߊߏ߬߸ ߣߊ߲߬ߕߌ߮ ߟߎ߫ ߟߋ߬ ߣߐ߬ ߞߊ߬ߝߏ߬ ߖߊߛߏ߲ ߞߍ߫ ߟߊ߫ ߓߋߣߍ߲߫ ߞߣߐ߫ ߞߊ߯ߙߌ ߣߌ߲߬ ߡߊ߬ ߞߏߟߌ߲ߞߏߟߌ߲ ߕߟߋ߬ ߇، ߟߊ߬ߛߋ߬ߟߌ߬ ߞߟߊߒߞߋ ߡߍ߲ ߞߍ߫ ߘߊ߫ ߛߘߋߦߊߥߏ ߓߟߏ߫߸ ߊ߬ߟߎ߫ ߞߵߏ߬ ߡߍ߲ ߛߓߍ߫ ߊߓߎߖߊ߫߸ ߝߘߊ߬ߝߌ߲߬ߠߊ߫ ߕߟߋ߬ߓߋ ߛߌ߲߬ߝߏ߲߬ߘߊ ߣߌ߲߬ ߞߵߊ߬ ߟߊߛߋ߫ ߞߏ߫ ߊ߬ߟߎ߬ ߞߍߕߐ߫ ߊ߬ߟߎ߫ <<ߥߎ߬ߙߎ߲߬ߓߊ߬>> ߟߊ߫ ߣߌ߲߬ ߞߏ ߘߐ߫ ߟߋ߬ <<ߝߋߝߋ߫>>߸ ߓߊߏ߬ ߛߌ߰ߞߊ߲ ߕߊ߬ߣߊ ߟߋ߬ ߞߍߣߍ߲߫ ߣߊ߲߬ߕߌ߮ ߢߌ߲߬ ߠߎ߬ ߓߟߏ߫߸ ߛߘߋߦߊߥߏ ߟߊ߫ ߝߐߟߌ߫ ߘߐ߫.
ߊ߬ߟߎ߬ ߞߊ߲߫ ߌߞߐ߫ ߞߏ߫߸ ߊ߬ߟߎ߬ ߦߋ߫ <<ߓߋߣߍ߲߫ ߞߎ߲߬ߠߊ߬ߛߌ߮ ߝߏ߬ ߟߴߊ߬ߟߎ߬ ߟߊ߫ ߘߐ߬ߖߊ߬ ߞߍߣߍ߲ ߘߐ߫߸ ߞߵߏ߬ ߢߐ߲߰ ߝߏ߬ߟߌ߬ ߟߊߛߋ߫ ߣߊ߲߬ߕߌ߮ ߟߎ߬ ߝߣߊ߫ ߡߊ߬ ߖߡߊ߬ߣߊ ߡߞߊߘߊ߲ ߘߐ߫>> ߡߍ߲ ߠߎ߬ ߡߊ߫ ߖߊ߲߬ߝߊ߬ ߞߍ߫ ߞߊ߬ߣߌ߲߬߸ ߞߊ߬ ߕߎ߲߰ ߞߊ߬ߝߏ߬ ߖߊ߬ߛߏ߲߬ߠߊ ߟߎ߬ ߞߐ߫، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ <<ߞߏ߫ ߓߊ߯ ߡߐ߰ ߛߌ߫ ߛߐ߬ߘߐ߲߫ ߣߌ߲߬ ߞߏ ߘߐ߫߸ ߞߊ߬ ߘߏ߫ ߓߐ߬ߣߐ߫ ߊ߬ ߣߌ ߘߐ߫߸ ߥߟߊ߫ ߞߊ߬ ߓߟߏߝߋ߲ ߠߎ߬ ߘߐߕߌߢߍ߫، ߏ߬ ߓߍ߯ ߟߊߕߐ߫ ߞߊ߬ߝߏ߬ ߖߊߛߏ߲ ߞߍߓߊ߮ ߟߎ߫ ߟߋ߬ ߞߎ߲߬߸ ߊ߬ ߞߍ߫ ߘߊ߫ ߡߐ߰ ߞߋߟߋ߲߫ ߘߌ߫ ߥߟߊ߫ ߖߡߊ߬ߞߎߘߎ߲߫>> ߘߌ߫.
ߛߘߋߦߊߥߏ ߟߊ߫ ߗߋߛߓߍ ߣߌ߲߬ ߘߐ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߋ߫ ߓߋߣߍ߲߫ ߣߌ߫ ߓߋߣߍ߲߫ ߡߌ߬ߙߌ߲߬ߘߌ ߞߐߝߍ߬ ߣߌ߲߬ ߞߏ ߘߐ߫ ߟߋ߬ ߜߡߊ߫߸ ߊ߬ ߣߌ߫ ߛߊ߬ߙߌ߬ߦߊ ߛߐ߲߬ߣߍ߲߫ ߖߡߊ߬ߣߊ ߝߊ߰ߡߊ ߡߍ߲ ߠߎ߬ ߟߊ߫ ߞߏ ߡߊ߬ ߞߊ߬ߣߌ߲߬. ߊ߬ߟߎ߫ ߞߵߊ߬ ߦߌ߬ߘߊ߬ ߝߣߊ߫ ߞߏ߫߸ ߊ߬ߟߎ߬ ߘߌ߫ ߓߐ߫ <<ߝߍ߬ߙߍ ߣߌ߫ ߛߋߞߏߦߊ ߓߍ߯ ߘߌ߫>> ߞߊ߬ ߣߌ߲߬ ߞߏ ߟߊߘߊ߲߬، ߊ߬ ߖߍ߬ߘߍ߸ ߞߏ߫ ߊ߬ߟߎ߬ ߘߴߊ߬ߟߎ߬ ߟߊ߫ ߓߟߏߡߊߛߌ߯ ߣߊ߲ߕߌ߮ ߟߎ߬ ߟߊߕߊ߯߸ ߛߊ߫ ߞߊ߬ ߛߌ߰ߞߊ߲ ߡߊߞߊ߲ߞߊ߲߫߸ ߊ߬ ߣߌ߫ ߓߋߣߍ߲߫ ߖߡߊ߬ߣߊ ߟߊ߫ ߖߘߍ߬ߛߊ߬ߙߌ߬ߦߊ߬ߕߌ߰ߦߊ߸ ߞߊ߬ ߓߐ߫ ߖߎ߮ ߟߎ߬ ߟߊ߫ ߘߐ߬ߛߌ߬ߟߊ߲߬ߠߌ߲ ߓߍ߯ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
