ߞߊ߬ߝߏ߬ ߖߊߛߏ߲ ߦߋ߫ ߛߋ߲߬ߠߊ߫ ߓߋߣߍ߲߫ ߖߡߊ߬ߣߊ ߞߣߐ߫ ߕߋ߲߬߸ ߓߌ߬ ߞߊ߯ߙߌ ߣߌ߲߬ ߛߐ߰ߡߊ߬ߘߊ ߟߊ߫ ߂߀߂߅ ߞߏߟߌ߲ߞߏߟߌ߲ ߕߟߋ߬ ߇، ߣߊ߲߬ߕߌ߰ ߞߙߎ ߘߏ߫ ߟߎ߫ ߓߘߴߊ߬ ߟߊߛߋ߫ ߞߕߏߣߎ߫߸ ߞߏ߫ ߊ߬ߟߎ߬ ߓߘߊ߫ ߛߋߓߊ߯ߦߊ ߕߊ߬߸ ߞߊ߬ ߞߊ߲ߕߌ߯ ߔߊ߬ߕߙߌߛ ߕߊߟߐ߲߫ ߠߊߥߟߏ߫.
ߊ߬ߟߋ߬ ߣߊ߲߬ߕߌ߰ ߞߙߎ ߢߌ߲߬ ߠߎ߬ ߦߋ߫ ߞߟߌ߫ ߟߊ߫ ߟߋ߬ ߞߏ߫ ߣߊ߲߬ߕߌ߮ ߟߎ߬ ߟߊ߫ ߜߘߌߛߌ߯ߟߌ ߥߛߊ߬ߓߊ߰ߦߊ (ߣߜߥ).
ߞߊ߬ߕߎ߲߯߸ ߣߊ߲߬ߕߌ߰ ߞߙߎ ߢߌ߲߬ ߠߎ߫ ߟߋ߬ ߥߊߣߍ߲߫ ߝߊ߬ߛߏ ߖߌ߬ߦߊ߬ߞߊ߲߬ߛߏ ߟߊ߫߸ ߊ߰ ߝߐ߫ ߟߊ߫ ߡߍ߲ ߡߊ߬ ߞߏ߫ ߓߋߣߍ߲߫ ߖߌ߬ߦߊ߬ߞߊ߲߬ߛߏ (Benin TV)߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߕߐ߯ ߟߋ߬ ߞߏ߫ ߣߊ߲߬ߕߌ߮ ߟߎ߬ ߟߊ߫ ߜߘߌߛߌ߯ߟߌ ߥߛߊ߬ߓߊ߰ߦߊ.
ߊ߬ߟߋ߬ ߞߙߎ ߡߊߡߙߊ߬ߣߍ߲߫ ߝߊߙߌ߲ ߘߊ߯ߕߌ߮ ߔߊߛߑߞߊߟ ߕߌߜ߭ߙߌ߫ ߟߋ߬ ߓߟߏ߫߸ ߊ߬ߟߋ ߟߋ߬ ߣߜߥ ߞߊ߲ߕߌ߮ ߘߌ߫.
ߞߊ߬ߝߏ߬ ߖߊߛߏ߲ ߟߊ߬ߛߋ߬ߟߌ ߘߐ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߞߊ߲ߕߌ߯ ߔߊ߬ߕߙߌߛ ߕߊߟߐ߲߫ ߠߊߥߟߏ߫߸ ߊ߬ ߣߌ߫ ߞߏ߫ ߊ߬ߟߎ߬ ߓߘߊ߫ ߛߌ߰ߞߊ߲ ߝߣߊ߫ ߟߊߘߎ߲߫.
ߟߊ߬ߛߋ߬ߟߌ ߣߌ߲߬ ߞߍ߫ ߘߊ߫ ߖߡߊ߬ߣߊ ߖߌ߬ߦߊ߬ߞߊ߲߬ߛߏ߬ߓߊ ߟߋ߬ ߟߊ߫߸ ߊ߬ ߞߏߢߊ ߞߏ߬ߣߌ߲ ߦߋ߫ ߦߋ߫ ߟߊ߫ ߡߐ߱ ߟߎ߬ ߓߟߏ߫ ߜߐ߬ߛߐ߲߬ߞߐ ߣߌ߫ ߞߏ߫ ߢߊ߯ߡߌ߲ߣߍ߲ ߠߋ߬ ߘߌ߫ ߡߎߣߎ߲߬߸ ߊ߬ߟߎ߬ ߟߊ߫ ߡߊ߬ߞߐ߬ߙߐ߲߬ߞߐߙߐ߲߬ߠߌ߲ ߞߎߓߋߘߊ ߣߌ߲߬ ߞߣߐ߫.
ߞߊ߬ߝߏ߬ ߖߊߛߏ߲ ߣߌ߲߬ ߛߌ߰ ߘߊ߫ ߛߋ߲߬ߠߊ߫ ߞߊ߬ߦߌ߯ ߖߍ߲ߓߎߙߍ߲ ߠߋ߬ ߝߍ߬߸ ߡߊ߬ߙߌ߬ߝߊ߬ ߡߊ߲ߞߊ߲ ߠߎ߬ ߝߣߊ߫ ߡߍ߲߫ ߘߊ߫ ߟߋ߬ ߔߊ߬ߕߙߌߛ ߕߊߟߐ߲߫ ߠߊ߫ ߟߎ ߞߍ߬ߙߍߝߍ߬ ߖߋߖ߭ߏ߫ ߞߌ߲߬ߘߊ ߟߊ߫، ߟߊ߬ߞߙߐ߬ߛߌ߬ߟߌ ߟߎ߫ ߞߵߊ߬ ߦߌ߬ߘߊ߬ ߞߏ߫ ߣߊ߲߬ߕߌ߮ ߘߏ߫ ߟߎ߫ ߟߋ߬ ߥߊߣߍ߲߫ ߓߋ߬ ߟߊ߫ ߦߋ߲߬ ߞߊ߲߬. ߡߊ߬ߙߌ߬ߝߊ߬ ߕߋ߬ ߞߏ ߏ߬ ߖߍ߬ߘߍ ߟߊߛߙߋߦߊ߫ ߘߊ߫ ߝߊ߬ߙߊ߲߬ߛߌ߬ ߣߌ߫ ߛߣߍ߬ߜ߭ߊߟߌ߫ ߟߊ߬ߛߌ߰ߘߊ ߟߎ߬ ߓߟߏ߫.
ߊߟߎ߫ ߞߏ߬ߣߌ߲ ߦߴߊ߬ ߟߐ߲߫ ߞߊ߬ߝߏ߬ ߖߊ߬ߛߏ߲߬ ߞߏ ߣߌ߲߬ ߘߊ߬ߟߎ ߛߐ߬ߘߐ߲߬ߣߴߊ߲ ߓߟߏ߫ ߞߊ߬ ߝߘߊ߫ ߣߊ߲߬ߕߌ߮ ߟߎ߬ ߟߊ߫ ߟߊ߬ߛߋ߬ߟߌ ߟߋ߬ ߟߊ߫ ߖߌ߬ߦߊ߬ߞߊ߲߬ߛߏ ߟߊ߫߸ ߞߊ߲߬ߞߎ߬ߡߊ߬ ߜߘߍ߫ ߡߊ߫ ߝߘߊ߬ ߖߡߊ߬ߣߊ ߞߣߐߟߊ ߘߐ߫ ߦߋ߲߬ ߡߎߣߎ߲߬߸ ߡߍ߲ ߦߴߊ߬ ߔߘߋߔߘߋߟߊߕߍ߰ ߟߊ߫، ߞߋߡߌ߫ ߛߋߓߊ߫ ߞߏ߬ߣߌ߲ ߓߘߊ߫ ߟߊ߬ߛߋ߬ߟߌ ߘߏ߫ ߞߍ߫ ߘߍ߬ߞߙߏߝߏ ߟߎ߫ ߞߊ߲߬ ߞߏ߫: <<ߞߊ߬ߝ߬ߏ ߖߊߛߏ߲ ߦߋ߫ ߛߋ߲߬ߠߊ߫ ߓߋߣߍ߲߫>>. ߞߎ߲߬ߠߊ߬ߛߌ߮ ߡߊ߫ ߝߋ߲߫ ߝߐ߫ ߊ߬ ߞߏ ߞߊ߲߬ ߡߎߣߎ߲߬، ߏ߬ ߘߐ߫߸ ߓߌ߬ ߞߏ߬ߣߌ߲ ߦߋ߫ ߞߙߐ߬ߛߌ ߣߌ߫ ߦߟߌߡߊߟߐ ߟߏ߲ ߠߋ߬ ߘߌ߫ ߓߋߣߍ߲߫ ߞߣߐ߫߸ ߓߊߏ߬ ߘߐ߬ߝߐ ߘߏ߫ ߟߋ߬ ߟߊߘߊ߲ ߦߋ߫ ߛߋ߲߬ߠߊ߫ ߕߋ߲߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
