ߞߐ߬ߟߏ߲ ߂߀߂߅ ߣߍߣߍߓߊ ߕߋ߬ߟߋ߫ ߂߅ ߞߍ߫ ߘߊ߫ ߢߐ߲߯ߓߍ߲߫ ߕߣߐ߬ߡߊ߫ ߟߋ߬ ߘߌ߫ ߞߊ߲ߞߊ߲߫ ߣߊ߬ߓߊ߰ߦߊ߬ ߞߣߐ߫߸ ߞߊ߬ ߝߘߊ߫ ߞߊ߲ߞߊ߲߫ ߡߙߊ߬ߓߊ߰ߘߊ߬ ߟߏ߯ߟߎ ߞߐ߲ߘߍ ߟߎ߬ ߟߊ߫ ߖߌ߬ߣߍ߬ ߜߍߞߊ߲ߠߊ ߘߐ߫߸ ߏ߬ ߟߎ߫ ߟߋ߬ ߞߵߊ߬ߟߎ߬ ߟߊߘߍ߬ ߛߘߊߞߊߓߐ ߘߏ߫ ߞߊ߲ߡߊ߬߸ ߊ߬ ߣߌ߫ ߞߊ߬ ߘߐ߬ߛߊߙߌ ߞߊ߬ߙߊ߲߫ ߞߵߊ߬ ߞߍ߫ ߓߊߘߋ߲ߧߊ ߘߐߞߙߊߟߊ߲ ߘߌ߫߸ ߞߊ߬ ߓߊ߲߫ ߞߊ߬ ߘߎ߬ߥߊ߬ߥߎ ߞߍ߫ ߖߡߊ߬ߣߊ ߦߋ߫ ߤߙߊ߫ ߛߐߘߐ߲ ߠߊ߫.
ߛߘߊߞߊ ߦߋ߫ ߓߐ߫ ߟߊ߫ ߤߊߡߌ߲ ߣߌ߫ ߞߊߡߌ߲ ߘߏ߫ ߟߎ߫ ߟߋ߬ ߦߊ߬ߙߊ ߣߊ߬ߕߊ ߘߌ߫߸ ߊ߬ ߦߋ߫ ߞߍ߫ ߟߊ߫ ߕߙߎ߬ ߘߌ߫ ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߊ߫ ߞߊ߬ ߞߍ߫ ߢߐ߲߯ ߠߊߘߍ߲ ߛߓߊߓߎ ߘߌ߫߸ ߓߊߘߋ߲ߡߊ ߟߎ߬ ߘߌ߫ ߘߏ߫ ߝߐ߫ ߢߐ߲߯ ߦߋ߫ ߓߊߘߋ߲ߧߊ ߘߐߞߙߊ߫ ߝߙߍ ߟߎ߫ ߞߊ߲߬، ߒ߬ߓߊ߬߸ ߞߐ߲ߘߍ ߟߎ߬ ߝߣߊ߫ ߕߊ߫ ߛߘߊߞߊߓߐ ߏ߬ ߟߋ ߘߏ߫ ߞߍߣߍ߲߫߸ ߡߍ߲ ߕߘߍ߬ߒ߬ߘߐ߬ߓߊ߮ ߦߙߌߞߊ ߞߊ߬ ߡߐ߰ ߗߍ߬ߡߍ߫ ߛߓߊ߬ ߣߌ߫ ߝߊ߲ߘߊ߫ ߓߐ߫߸ ߞߊ߬ ߝߘߊ߫ ߜߍߞߊ߲ߠߊ ߞߐ߲ߘߍ ߟߎ߬ ߟߊ߫ ߖߡߊ߬ߣߊ߬ ߓߐߣߍ߲߫ ߢߐ߲߰ ߡߊ ߟߎ߬ ߞߣߐ߫، ߞߊ߬ߕߎ߲߯߸ ߞߐ߲ߘߍ ߟߎ߬ ߟߊ߫ ߛߌ߲߬ߝߏ߲߬ߧߊ߬ߟߌ ߞߏߛߐ߲߬߸ ߊ߬ߟߎ߬ ߓߘߴߊ߬ ߟߐ߲߫ ߞߏ߫ ߞߐ߲ߘߍ߫ ߖߡߊߣߊ߫ ߁߃߄ ߠߋ߬ ߓߍ߫߸ ߡߍ߲ ߠߎ߬ ߝߊ߲߬ߓߊ ߦߋ߫ ߖߌ߬ߣߍ߬ ߣߌ߫ ߡߏߖ߭ߊ߲ߓߌߞ ߘߐ߫.
ߖߊ߲߬ߕߎ߬ ߡߘߎ ߞߐ߲ߘߍ߫ ߡߍ߲ ߦߋ߫ ߞߐ߲ߘߍ ߟߎ߬ ߟߊ߫ ߗߋߟߊߘߋ߲ ߘߌ߫߸ ߊ߬ ߣߌ߫ ߒߞߏ ߘߊ߲ߘߊߟߌߟߊ ߣߌ߫ ߞߊ߲߬ߜߍ߬ߘߊ ߞߎ߲߬ߕߌ߮، ߏ߬ ߞߵߊ߬ ߦߌ߬ߘߊ߬ ߞߏ߫: <<ߖߊ߬ߡߊ ߟߊߘߍ߬ ߞߎ߲ ߞߍߣߍ߲߫ ߤߊߘߌߦߊߓߐ ߟߋ߬ ߘߌ߫߸ ߡߍ߲ ߣߐ߬ ߞߐ߲ߘߍ߫ ߖߡߊߣߊ ߓߍ߯ ߡߊߞߟߌ߫ ߟߊ߫ ߞߊ߲ߞߊ߲߫ ߛߏ ߞߣߐ߫ ߓߌ߬ ߕߟߊ߬ߕߊ ߣߌ߲߬ ߡߊ߬، ߞߵߏ߬ ߞߎ߲߭ ߞߍ߫߸ ߡߐ߰ ߢߌߡߊ ߟߎ߫ ߟߋ߬ ߞߌ߬ߓߊ߬ߙߏ߬ߣߍ߲߬ ߊ߲ ߠߊ߫ ߞߏ߫ ߊ߲ ߧߋ߫ ߛߊ߰ߖߌ߬ ߟߏ߯ߟߎ߫ ߞߍ߫ ߤߊߘߌߦߊ ߘߌ߫߸ ߞߐ߲ߘߍ ߡߎ߰ߡߍ ߟߊߘߍ߬ߣߍ߲ ߢߍ߫، ߡߍ߲ ߓߘߊ߫ ߛߊ߬߸ ߡߍ߲ ߡߊ߫ ߛߊ߬، ߡߍ߲ ߓߘߊ߫ ߛߐ߬ߘߐ߲߬߸ ߡߍ߲ ߡߊ߫ ߛߐ߬ߘߐ߲߬، ߊ߬ ߓߍ߯ ߟߊ߫ ߤߊߘߌߦߊ ߟߋ߬߸ ߡߏ߬ߛߏ ߣߌ߫ ߗߍ߭߸ ߊ߬ ߛߌ߬ߟߊ߬ߡߊ ߣߴߊ߬ ߛߌ߬ߟߊ߬ߒ߬ߕߊ߲. ߌ ߓߊ߯ ߞߍ߫ ߘߎߢߊ߫ ߝߊ߲߭ ߺ ߊ ߺ ߝߊ߲߬ ߘߎߢߊ߫ ߜߙߋ ߣߌ߲߬ ߞߣߐ߫، ߓߊߏ߬߸ ߞߐ߲ߘߍ ߦߋ߫ ߖߡߊ߬ߣߊ ߡߍ߲ ߘߐ߫ ߘߎߢߊ߫ ߞߣߐ߫ ߦߊ߲߬߸ ߖߡߊ߬ߣߊ߫ ߁߃߄ ߠߋ߬߸ ߓߊ߬ߙߌ߬ ߞߐ߲ߘߍ ߞߊ߫ ߛߌߦߊ߫ ߖߡߊ߬ߣߊ ߡߍ߲ ߞߣߐߐ߫ ߖߡߊ߬ߣߊ ߓߍ߯ ߘߌ߫߸ ߏ߬ ߟߋ ߖߌ߬ߣߍ߬ ߣߌ߫ ߡߏߖ߭ߊ߲ߓߌߞ ߘߌ߫.>>
ߞߐ߲ߘߍ ߟߎ߫ ߛߌ߲߬ߝߏ߲߬ߧߊ߬ߣߍ߲߬ ߞߏߛߓߍ߫߸ ߞߵߏ߬ ߞߎ߲߭ ߞߍ߫ ߊ߬ߟߎ߬ ߟߊ߫ ߛߌ߲߬ߝߏ߲߬ߧߊ߬ߟߌ ߘߊߡߌߣߊ ߞߍ ߘߌ߫ ߞߊ߬ ߝߊ߯ߘߐߞߍ߫ ߛߓߊ߬ ߓߐ߫، ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߖߊ߲߬ ߦߋ߫ ߢߐ߲߯ ߞߐ߫߸ ߊ߬ߟߎ߫ ߘߏ߲߬ ߦߴߊ߬߬ ߝߍ߬ ߊ߬ߟߎ߬ ߟߊ߫ ߓߊߘߋ߲ߧߊ ߦߋ߫ ߛߓߊ߬ߕߌ߬، ߏ߬ ߟߋ ߞߏߛߐ߲߬߸ ߛߘߊߞߊߓߐ ߣߌ߲߬ ߖߊ߬ߡߊ ߡߊ߫ ߓߐ߫ ߖߌ߬ߣߍ߬ ߞߋߟߋ߲߫ ߞߣߐ߫ ߦߊ߲߬߸ ߞߐߞߊ߲߫ ߡߐ߮ ߟߎ߬ ߝߣߊ߫ ߞߐߦߌ߬ߘߊ߬ߣߍ߲߫ ߕߍ߬ߘߍ߫ ߊ߬ ߞߏ ߘߐ߫.
ߡߊ߬ߡߊ߬ߘߌ߬ ߖߊ߲ ߞߐ߲ߘߍ߫ ߡߍ߲ ߦߋ߫ ߜߍߞߊ߲ߠߊ ߞߐ߲ߘߍ ߟߎ߬ ߟߊ߫ ߓߋߟߋ߲ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߛߘߊ ߣߌ߲߬ ߓߐ߫ ߞߎ߲ ߦߋ߫ ߓߊߘߋ߲ߧߊ ߕߌ߲߭ ߘߌߦߊߘߏ߲߭ ߠߋ߬ ߘߌ߫߸ ߊ߬ ߣߌ߫ ߞߊ߬
<<ߖߊ߬ߡߊ ߓߘߊ߫ ߣߊ߬߸ ߞߊ߬ ߓߐ߫ ߛߋ߲߬ߞߐ߫ ߡߊ߬߸ ߤߊ߲߯ ߞߊ߬ ߥߴߊ߬ ߓߌ߬ߟߴߊ߲ ߣߌ߫ ߞߘߏߥߊߙߌ߫ ߘߊ߲߭ ߠߊ߫߸ ߏ߬ ߞߐ߲ߘߍ ߟߎ߬ ߦߋ߫ ߦߊ߲߬، ߞߊ߬ ߓߐ߫ ߦߊ߲߬ ߡߊ߬ ߞߊ߬ ߥߴߊ߬ ߓߌ߬ߟߊ߫ ߞߎ߬ߙߋߡߊ߬ߟߋ߬߸ ߏ߬ ߞߐ߲ߘߍ ߟߎ߫ ߦߊ߲߬، ߞߊ߬ ߓߐ߫ ߦߊ߲߬ ߞߊ߬ ߥߴߊ߬ ߓߌ߬ߟߊ߬ ߝߙߊߣߊ߫߸ ߏ߬ ߞߐ߲ߘߍ ߟߎ߫ ߦߊ߲߬، ߞߊ߬ ߓߐ߫ ߦߊ߲߬ ߡߊ߬ ߞߵߊ߬ ߥߴߊ߬ ߓߌ߬ߟߊ߫ ߞߛߌ߬ߘߎ߯ ߘߊ߲߭ ߠߊ߫߸ ߏ߬ ߞߐ߲ߘߍ ߟߎ߫ ߦߊ߲߬، ߓߌ߬߸ ߊ߲ ߘߌ߫ ߊߟߊ߫ ߕߊ߲߬ߘߏ߬߸ ߏ߬ ߓߍ߯ ߛߐ߬ߛߐ ߕߐ߬ߡߐ߲߬ ߠߊ߫ ߖߐ߲ ߠߊ߫ ߢߐ߬ߕߎ ߞߘߐ߫ ߓߌ߬߸ ߏ߬ ߟߋ ߕߊ߬ߞߎ߬ߙߊ߬ ߘߌ߫، ߕߊ߬ߞߎ߬ߙߊ߬ ߝߣߊ߫ ߛߐ߬ߛߐ ߕߐ߬ߡߐ߲߬ ߠߊ߫ ߖߐ߲߫ ߠߊ߫ ߢߐ߬ߕߎ ߞߘߐ߫߸ ߏ߬ ߟߋ ߝߘߊߡߊ߫ ߘߌ߫، ߡߊ߬ߣߋ߲߬ߞߊ ߟߎ߬ ߞߊ߲߫ ߛߊ߲߬ߘߐ ߘߐ߫ ߞߏ߫ ߓߍ߲߭ ߠߋ߬ ߣߐ߬ ߡߊ߬ߣߐ߰ߓߊ ߡߌ߬ߣߊ߬ ߟߊ߫ ߖߌ ߘߐ߫߸ ߣߴߊߟߎ߫ ߡߊ߫ ߓߍ߲߬ ߊߟߎ߫ ߕߴߛߋ߫ ߝߏߦߌ߬ ߟߊ߫، ߊ߲ ߧߋ߫ ߓߍ߲߭ ߏ߬ ߟߋ ߞߍ߫ ߟߊ߫ ߛߘߊߞߊ ߘߌ߫ ߣߌ߲߬߸ ߡߐ߰ߓߊ ߟߎ߬ ߟߊ߫ ߘߌ߬ߢߍ ߞߣߐ߫߸ ߞߊ߬ ߞߏߟߊߒߞߘߐߢߐ߲߯ߦߊ߫ ߞߍ߫ ߢߐ߲߮ ߦߋ߫.>>
ߛߘߊߞߊߓߐ ߢߌ߲߬ ߘߏ߲߬ ߣߌ߫ ߓߘߍ߬ߓߘߍ߬ߟߌ߬ ߞߏ ߡߊ߫ ߡߊߘߏ߲߬ ߢߐ߲߯ ߠߊ߫ ߤߊߟߌ߬ ߞߋߟߋ߲߫، ߊ߬ ߟߊߥߟߌ߬ߣߍ߲߫ ߓߊߘߋ߲ߧߊ ߣߌ߫ ߓߋ߲ߓߊ߫ ߞߘߐ ߟߎ߬ ߕߊ߫ߛߌߟߊ ߟߊߥߙߎߞߌ ߟߋ߬ ߡߊ߬، ߏ߬ ߟߋ ߘߐ߫߸ ߖߊ߲߬ߕߎ߬ ߡߘߎ ߞߐ߲ߘߍ߫ ߞߊ߬ ߘߐ߬ߞߣߍ߬ߟߌ߬ ߖߐ߲ߖߐ߲߫ ߞߍ߫ ߏ߬ ߞߏ ߞߊ߲߬، <<ߊ߲ ߣߐ߬ ߊ߲ ߡߊߕߊ߯ ߟߊ߫ ߓߘߍ߬ߓߘߍ߬ߟߌ ߟߊ߫ ߟߋ߬، ߞߊ߬ߡߊߛߐ߬ߘߐ߲߬߸ ߣߴߌ ߞߵߊߘߡߊߦߊ ߕߊ߬߸ ߓߘߍ߬ߓߘߍ߬ߟߌ ߞߎ߲߬ߘߐߛߎ߬ߘߎ߲߬ߡߊ߲߬ ߣߍ߲ߞߍ߫، ߊ߬ ߘߏ߲߬ ߊߘߡߊߘߋ߲߸ ߤߊߟߌ߬ ߡߐ߱ ߞߊߓߙߎ߸ ߌ ߦߋ߫ ߛߌ ߡߍ߲ ߘߌ߫߸ ߌ ߦߴߏ߬ ߟߋ ߘߌ߫߸ ߣߴߌ ߞߵߊ߬ ߝߐ߫ ߛߍ߲ ߞߏ߫ ߟߏ߲ߞߊߛߌߦߊ߫߸ ߟߏ߲ߞߊߛߌߦߊ߫ ߛߌ ߡߍ߲ ߘߌ߫߸ ߓߋ߲ߓߊ ߕߊ߫ ߓߋ߲ߓߊ ߕߊ߫ ߓߋ߲ߓߊ߫ ߛߌ߫ ߞߋߟߋ߲ ߏ߬ ߟߋ ߦߋ߲߬، ߓߊߘߋ߲ߧߊ ߣߌ߫ ߓߘߍ߬ߓߘߍ߬ߟߌ ߕߴߛߋ߫ ߥߊ߫ ߟߊ߫߸ ߛߌ߲ߖߌ ߣߌ߫ ߓߘߍ߬ߓߘߍ߬ߟߌ ߕߴߛߋ߫ ߥߊ߫ ߟߊ߫.>>
ߖߊ߲߬ߖߏ߲߬ ߘߊߞߎ߲ ߣߌ߲߬ ߘߐ߫߸ ߟߊ߱ߖߌ߬ ߣߎ߬ߡߊ߲߬ ߞߐ߲ߘߍ߫߸ ߞߊ߬ ߓߐ߫ ߛߊ߬ߞߐ߬ߘߎ߯ ߞߎ߲ߖߊ߲߫߸ ߖߊ߲߬ߕߎ߫ ߞߡߊ߬ߙߊ߫ ߞߊ߬ ߓߐ߫ ߓߊ߬ߟߌ߬ߦߊ߬߸ ߡߎߛߊ߫ ߞߐ߲ߘߍ߫ ߞߊ߬ ߓߐ߫ ߕߊ߬ߞߎߙߊ߫߸ ߊ߬ ߣߌ߫ ߕߍ߬ߣߍ߲߬ߜߍ ߞߐ߲ߘߍ߫߸ ߏ߬ ߟߎ߬ ߛߋ߫ ߘߴߊ߬ߟߎ߬ ߡߙߌߦߊ ߘߌ߫ ߟߊ߫ ߖߊ߲߬ߖߏ߲ ߣߌ߲߬ ߞߊ߲߬߸ ߞߎߡߊߕߍ߫ ߕߓߌߟߌߟߊ߫ ߘߛߎ߬ߜߍ ߞߐ߲ߘߍ߫، ߏ߬ ߟߎ߫ ߓߍ߯ ߞߵߊ߬ߟߎ߬ ߟߊ߫ ߛߍߥߊ ߟߋ߬ ߦߌ߬ߘߊ߬߸ ߞߵߊ߬ ߓߍ߲߬ ߛߘߊߞߊߓߐ ߣߌ߲߬ ߕߐ߬ߣߐ ߡߊ߬߸ ߓߊߘߋ߲ߡߊ ߟߎ߬ ߟߊ߫ ߢߐ߲߯ߦߋ ߡߊ߬.
ߞߎߡߊ ߟߊߓߊ߲߫ ߘߊ߫ ߞߟߌߟߌ ߟߋ߬ ߡߊ߬ ߖߊ߲߬ߕߎ߬ ߡߘߎ ߞߐ߲ߘߍ߫ ߓߟߏ߫߸ ߞߊߕߘߍ߬ ߞߐ߲ߘߍ ߓߍ߯ ߟߊߘߍ߬ߣߍ߲ ߡߊ߬، <<ߞߏ ߕߍ߫ ߓߊ߲߫ ߠߊ߫ ߘߎߢߊ߫ ߞߣߐ߫، ߣߴߊ߬ ߝߐ߫ ߘߊ߫ ߞߏ߫ ߊߟߎ߫ ߦߋ߫ ߢߐ߲߯ ߠߊߘߍ߬߸ ߊߟߎ߫ ߦߋ߫ ߞߊߘߊ߲߫ ߞߊ߬ ߢߐ߲߮ ߠߊߘߍ߬، ߓߊ߸ ߡߐ߱ ߘߌ߫ ߛߋ߫ ߓߟߏߟߊߘߍ ߟߊߕߊ߯ ߟߊ߫ ߖߊ߬ߡߊ ߘߐ߫߸ ߓߊ߬ߙߵߌ ߕߍ߫ ߛߴߌ ߤߊ߲ߞߟߌ ߟߊߕߊ߯ ߟߊ߫، ߏ߬ ߟߋ ߞߏߛߐ߲߬ ߖߊ߬ߡߊ ߓߊ߯ ߡߊߞߟߌ߫߸ ߡߍ߲ ߓߍ߯ ߣߊ߬ ߟߊ߫߸ ߓߊ߯ߙߊ߫ ߞߍ߫ ߟߊ߫ ߏ߬ ߟߎ߬ ߤߊ߲ߞߟߌ ߟߋ߬ ߟߊ߫.>>
ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߎ߯ߟߊ߲ߘߌ߫ ߛߊ߬ߞߐ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
