ߣߍߣߍߓߊ ߕߋ߬ߟߋ߫ ߂߁ ߛߎ ߟߋ߬ ߘߐ߫ ߞߵߊ߬ ߘߎ߰ߛߊ ߜߍ߫ ߣߍߣߍߓߊ ߕߋ߬ߟߋ߫ ߂߂ ߟߊ߫ ߁߉߇߀ ߟߊ߫߸ ߞߐߣߊߞߙߌߞߊ ߟߎ߬ ߟߊ߫ ߛߎ߬ߣߐ߮ ߕߍ߰ ߘߊ߫ ߡߊ߬ߙߌ߬ߝߊ߬ ߡߊ߲ߞߊ߲ ߠߋ߬ ߟߊ߫߸ ߡߍ߲ ߕߘߍ߬ ߓߐ߫ ߟߊ߫ ߞߐ߰ߖߌ ߝߊ߲߭ ߝߍ߬، ߔߕߏ߬ߞߌ߬ߟߊ߬ ߞߎ߲߬ߞߊ߬ߓߊ߮ ߟߎ߬߸ ߡߍ߲ ߠߎ߬ ߣߌ߫ ߖߌ߬ߣߍ߬ߞߊ߬ ߞߣߐߘߐߛߏߙߏ߲ߞߏߣߍ߲ ߘߏ߫ ߟߎ߫ ߕߘߍ߬ ߢߐ߲߯ ߓߟߏ߫߸ ߏ߬ ߟߎ߫ ߣߊ߬ ߘߴߊ߬ߟߎ߬ ߝߘߌ߫ ߞߎ߲߬ߠߊ߬ߛߌ߮ ߞߊ߲߬ ߛߋߞߎ߫ ߕߎ߬ߙߋ߬ ߟߊ߫ ߡߙߊ߬ߞߊ߲ ߘߊߝߘߌ߫ ߞߊ߲ߡߊ߬ ߞߎߜߋ߫߸ ߊ߬ ߣߌ߫ ߞߊ߬ ߕߊ ߟߊ߫ ߖߌ߬ߣߍ߬ ߣߌ߫ ߜߙߋߞߎ߲߫ ߝߙߌߛߌ ߟߊ߫ ߖߘߍ߬ߕߌ߰ߦߊ ߝߘߊ߬ߝߌ߲߬ ߞߙߎߞߊ ߞߊ߲߬، ߤߊ߫ ߣߌ߲߬ ߟߏ߲ ߞߟߊߦߊ߫ ߘߊ߫ ߞߐߣߊߞߙߌ߫ ߞߣߐ߫ ߞߏߛߓߍ߫.
ߊ߬ߟߎ߫ ߞߵߊ߬ ߝߐ߫ ߦߙߍߞߍߟߌ ߣߌ߲߬ ߡߊ߬ ߟߋ߬ ߞߏ߫ <<ߞߐ߰ߖߌ߬ ߝߙߌߛߌ>>߸ ߊ߬ ߟߊߘߊ߲߫ ߘߊ߫ ߟߌߛߑߓߐߣ ߠߋ߬ ߓߟߏ߫، ߦߙߍߞߍߟߌ ߢߌ߲߬ ߠߊߘߊ߲߫ ߘߊ߲߫ ߔߕߏ߬ߞߌ߬ߟߊ߫ ߢߍߡߌߘߊ߫ ߊߟߑߔߏߌߡ ߞߊߟߑߝ߭ߊߥߐ߲߫ ߠߋ߬ ߓߟߏ߫߸ ߊ߲ߕߏߣߌߦߏ ߘߋ߬ ߛߑߔߌߣߏߟߊ ߟߊ߫ ߡߊ߬ߙߊ ߞߣߐ߫߸ ߏ߬ ߡߍ߲ ߕߎ߲߬ ߦߋ߫ ߖߌ߬ߣߍ߫ ߓߌ߬ߛߊߥߏ߫ ߣߊ߲߬ߕߌ߮ ߟߎ߬ ߟߊ߫ ߞߎ߲߬ߠߊ߬ߛߌ߰ߟߊ ߘߌ߫. ߁߉߇߀ ߟߋ߬ ߟߊ߫߸ ߞߵߊ߬ ߛߐ߬ߘߐ߲߬ ߖߌ߬ߣߍ߬ ߟߊ߫ ߖߘߍ߬ߕߌ߰ߦߊ ߦߋ߫ ߛߊ߲߬ ߕߊ߲߫ ߣߌ߫ ߞߐ ߘߐ߫߸ ߝߘߊ߬ߝߌ߲߬ߠߊ߬ ߓߍ߯ ߟߊ߫ ߖߘߍ߬ߕߌ߰ߦߊ ߣߊ߬ߕߊ ߦߴߊ߬ ߟߊ߫ ߞߵߊ߬ ߟߊ߫ ߏ߬ ߞߊ߲߬، ߒ߬ߓߊ߬߸ ߏ߬ ߥߊ߯ߕߌ ߟߋ߬ ߟߊ߫߸ ߊߡߌߟߑߞߊߙ ߞߊߓߙߊߟ ߟߊ߫ ߞߙߎߞߊ ߘߏ߫ ߣߊ߬ ߘߊ߫ ߖߌ߬ߣߍ߫ ߘߎ߰ߞߟߏ ߞߊ߲߬ ߖߌ߬ߣߍ߬ ߣߌ߫ ߜߙߋߞߎ߲߫ ߝߙߌߛߌ ߟߊ߫ ߖߘߍ߬ߕߌ߰ߦߊ ߡߊߞߊ߲ߞߊ߲߫ ߞߊ߲ߡߊ߬߸ ߡߍ߲ ߠߊߘߊ߲߫ ߘߊ߫ ߊߡߌߟߑߞߊߙ ߞߊߓߙߊߟ ߓߟߏ߫߸ ߊ߬ߟߎ߬ ߟߊ߫ ߞߙߎߞߊ ߏ߬ ߟߊߘߊ߲߫ ߞߎ߲ ߠߋ߬ ߕߘߍ߬߸ ߞߏ߫ ߝߏ߫ ߖߌ߬ߣߍ߫ ߓߌ߬ߛߊߥߏ߫ ߣߌ߫ ߞߊߔ ߝ߭ߍߙ ߟߋ߬ ߓߊ߯ ߕߟߊ߫ ߔߕߏ߬ߞߌ ߟߎ߬ ߟߊ߫ ߖߐ߭ ߟߊ߫ ߘߍ߯، ߏ߬ ߟߋ ߞߏߛߐ߲߬߸ ߖߌ߬ߣߍ߬ ߞߍ߫ ߘߊ߫ ߟߌߛߑߓߐߣ ߖߎ߯ ߓߟߋߓߟߋ ߘߌ߫߸ ߓߊߏ߬ ߞߏ߫ ߊ߬ ߝߍ߬ߙߍ ߓߍ߯ ߦߋ߫ ߕߍ߰ ߟߊ߫ ߦߋ߲߬ ߠߋ߬: ߖߌ߬ߣߍ߫ ߓߌ߬ߛߊ߬ߥߏ߬ ߣߌ߫ ߜߙߋߞߎ߲߫ ߝߙߌߛߌ ߖߘߍ߬ߕߌ߰ߦߊ ߛߍ߬ߘߏ߲߬ߠߊ ߟߎ߬ ߟߊ߫ ߛߎ߬ߟߎ ߟߋ߬ ߦߋ߲߬ ߘߌ߫߸ ߔߕߏ߬ߞߌ߬ ߞߟߍߘߋ߲߫ ߡߌ߬ߘߊ߬ߣߍ߲ ߠߎ߬ ߦߋ߫ ߓߘߍ߬ߓߘߍ߬ߟߌ ߥߛߎ ߟߊ߫ ߖߌ߬ߣߍ߫ ߟߋ߬߸ ߓߘߍ߬ߓߘߍ߬ߟߌ ߞߏߟߊߕߍ߮ ߟߎ߬ ߝߣߊ߫ ߦߋ߫ ߖߌ߬ߣߍ߫ ߟߋ߬.
ߏ߬ ߟߋ ߞߏߛߐ߲߬߸ ߢߍߡߌߘߊ߫ ߊߟߑߔߏߌߡ ߞߊߟߑߝ߭ߊߥߐ߲߫ ߘߍ߬ߡߍ߲߬ ߘߊ߫ ߞߟߍ߬ߕߌ߰ ߊ߲ߕߏߣߌߦߏ ߘߍߛߑߔߌߣߏߟߊ߫ ߞߊ߲߬߸ ߞߏ߫ ߊ߬ߟߎ߬ ߦߋ߫ ߣߊ߬ ߓߋ߬ ߖߌ߬ߣߍ߫ ߞߊ߲߬ ߞߎ߲߭ ߝߌ߬ߟߊ߬ ߞߏߛߐ߲߬: ߞߊ߬ ߊߡߌߟߑߞߊߙ ߞߊߓߙߊߟ ߟߊ߫ ߞߙߎߞߊ߫ ߟߊߘߊ߲ߣߍ߲ ߘߌ߲߬ߞߌߙߊ ߓߎߙߎ߲ߞߐ߫߸ ߞߵߊ߬ߟߎ߬ ߟߊ߫ ߥߛߎߟߊߘߋ߲ ߠߎ߬ ߟߊߓߐ߫߸ ߞߊ߬ ߛߋߞߎ߬ ߕߎ߬ߙߋ߬ ߟߊ߫ ߞߊ߲ߕߌ߯ߦߊ ߘߊߝߘߌ߫߸ ߞߊ߬ ߞߎ߲߬ߠߊ߬ߛߌ߰ ߞߎߘߊ߫ ߟߊߛߌ߰ ߡߍ߲ ߛߏ߯ߙߏߕߐ߫ ߊ߬ߟߎ߬ ߓߟߏ߫ ߖߡߊ߬ߣߊ ߛߌߦߊ߫ ߓߐߣߍ߲߫ ߢߐ߲߰ ߡߊ ߟߎ߬ ߟߊ߫߸ ߊ߬ ߣߌ߫ ߡߍ߲ ߘߌ߫ ߔߕߏ߬ߞߌ߬ߟߊ߫ ߛߊ߬ߥߏ ߞߍ߫، ߊ߬ߟߋ߬ ߦߙߍߞߍߟߌ ߞߍ߫ ߘߊ߫ ߞߎ߲߬ߝߍ߬ ߦߙߍߞߍߟߌ ߟߋ߬ ߘߌ߫߸ ߤߊ߲߯ ߕߋ߲߬ ߔߕߏ߬ߞߌ߬ߟߊ߫ ߖߡߊ߬ߣߊ ߡߊ߫ ߛߐ߲߬ ߡߍ߲ ߠߊߟߐ߬ ߟߊ߫.
ߞߊ߬ ߗߍߒߞߊ߲ߠߌ߲ߠߊ߫ ߡߐ߰ ߄߀߀ ߘߐߓߍ߲߬߸ ߔߕߏ߬ߞߌ߬ߟߊ߫ ߣߊ߲߬ߕߌ߯ ߂߂߀ ߦߴߊ߬ ߘߐ߫߸ ߖߌ߬ߣߍ߬ߞߊ߬ߘߋ߲߫ ߞߣߐߘߐߛߏߙߏ߲ߞߏߣߍ߲߫ ߡߐ߰ ߂߀߀ ߢߐ߲߰ ߦߴߊ߬ ߘߐ߫߸ ߏ߬ ߟߎ߫ ߟߋ߬ ߞߵߊ߬ߟߎ߬ ߡߊߘߏ߲߬ ߞߐߣߊߞߙߌ߫ ߟߊ߫ ߞߐ߰ߖߌ ߛߌߟߊ ߝߍ߬، ߞߎ߲߬ߞߊ߬ߓߊ߮ ߟߎ߫ ߞߵߊ߬ߟߎ߬ ߖߎߙߊ߲߫ ߞߐ߰ߖߌ߬ߘߊ ߟߊ߫߸ ߞߊ߬ ߞߎߟߎ߲ߙߋ߲ ߠߎ߬ ߡߌ߬ߘߊ ߘߊߡߌ߬ߣߊ߬߸ ߞߊ߬ ߖߡߊ߬ߣߊ ߣߌߡߊ߫ ߦߙߐ߫ ߞߐ߬ߣߐ߲߬ߘߐ߬ ߛߎߡߊ߲߫ ߊ߬ߟߎ߬ ߓߟߏ߫߸ ߓߍߟߑߝ߭ߌ߫ ߦߴߏ߬ ߟߋ ߘߐ߫߸ ߊ߬ ߣߌ߫ ߘߊ߮ ߓߎߥߊߙߏ߫ ߣߌ߫ ߦߙߐ߫ ߛߌߦߊߡߊ߲߫߸ ߞߏ߫ ߛߴߊ߬ߟߎ߬ ߘߌ߫ ߥߴߊ߬ߟߎ߬ ߟߊ߫ ߥߛߎߟߊߘߋ߲ ߠߎ߬ ߟߊߓߐ߫، ߞߐ߰ߖߌ߬ߘߊ ߞߟߊߦߊ߫ ߘߊ߫ ߣߌ߲߬ ߟߏ߲ ߞߏߛߓߍ߫.
ߓߊ߬ߙߌ߬߸ ߗߍߒߞߊ߲ߠߌ߲ߠߊ ߟߎ߫ ߢߌ߬ߣߊ߬ ߘߊ߫ ߛߌߛߌ ߟߋ߬ ߞߐ߫ ߜߏ߬ߟߏ ߘߐ߫، ߓߊߏ߬߸ ߛߋߞߎ߬ ߕߎ߬ߙߋ߬ ߡߊ߫ ߦߴߊ߬ߟߎ߬ ߓߟߏ߫߸ ߊߡߌߟߑߞߊߙ ߞߊߓߑߙߊߟ ߡߊ߫ ߦߴߊ߬ߟߎ߬ ߓߟߏ߫، ߕߏ߰ߝߏ߬ ߜߘߍ߫ ߛߌ߫ ߡߊ߫ ߥߌ߬ߟߌ߫ ߖߡߊ߬ߣߊ ߞߣߐ߫ ߞߵߊ߬ߟߎ߫ ߘߍ߬ߡߍ߲߬، ߏ߬ ߟߋ ߘߐ߫߸ ߖߌ߬ߣߍ߫ ߣߊ߲߬ߕߌ߮ ߟߎ߬ ߟߊ߫ ߓߊ߲ߓߊ߲ ߞߏߛߐ߲߬߸ ߊ߬ߟߎ߬ ߛߋ߫ ߘߊ߫ ߛߋ߫ ߛߐ߬ߘߐ߲߬ ߠߊ߫، ߊ߬ߟߋ߬ ߡߐ߱ ߟߎ߫ ߞߵߊ߬ߟߎ߬ ߞߍ߫ ߓߎߥߊߙߏ߫ ߘߊ߮ ߞߊ߲߬߸ ߞߵߊ߬ߟߎ߬ ߟߊ߫ ߥߛߎߟߊߘߋ߲ ߠߎ߬ ߟߊߓߐ߫߸ ߏ߬ ߕߎ߬ߡߊ ߞߐߣߊߞߙߌ߫ ߟߊߡߊ߰ߣߍ߲߬ ߦߏ߫ ߝߍߓߊߘߐ߫ ߖߌ، ߊ߬ߟߎ߫ ߞߵߊ߬ ߦߋ߫ ߢߊ߫ ߡߊ߫ ߛߐ߬ߘߐ߲߫ ߖߌ߬ߦߊ߬ߞߊ߲ ߡߌ߬ߣߊ߬ ߞߏ ߡߊ߬߸ ߢߊ߫ ߡߊ߫ ߛߐ߬ߘߐ߲߬ ߛߋߞߎ߬ ߕߎ߬ߙߋ߬ ߟߊ߫ ߞߊ߲ߕߌ߯ߦߊ ߘߊߝߘߌ߫ ߞߏ ߡߊ߬߸ ߊ߬ߟߎ߫ ߞߵߊ߬ߟߎ߬ ߞߐߓߌ߲ ߠߊߝߎߟߋ߲߫.
ߗߍߒߞߊ߲ߠߌ߲ ߣߌ߲߬ ߘߎ߰ߛߊ߬ߜߍ ߞߍ߫ ߘߊ߫ ߟߏ߲߫ ߡߊߞߌ߬ߣߌ߲߬ߞߌ߬ߣߌ߲߬ߣߍ߲߬ߓߊ߫ ߘߌ߫ ߖߌ߬ߣߍ߬߸ ߊ߬ ߣߌ߫ ߛߍߥߊ ߟߏ߲ ߝߣߊ߫ ߘߌ߫߸ ߛߎ߬ ߛߌߦߊߡߊ߲ ߠߎ߬ ߞߏߛߐ߲߬߸ ߊ߬ ߣߌ߫ ߛߋߒߠߓߊߟߌߦߊ ߞߏߛߐ߲߬، ߛߋߞߎ߬ ߕߎ߬ߙߋ߫ ߞߊ߬ ߡߊ߬ߡߙߊ߬ߟߌ߬ ߛߊ߲ߘߐ ߘߏ߫ ߛߌ߰ ߛߋ߲߬ߠߊ߫߸ ߞߊ߬ ߖߌ߬ߣߍ߬ ߓߍ߯ߦߊ ߞߙߎߞߊ ߝߊ߲߬ߞߊߘߏ߲߬߸ ߞߊ߬ ߡߌ߬ߘߊ߬ߟߌ߬ ߛߌߦߊߡߊ߲ ߠߎ߬ ߛߌ߰ ߛߋ߲߬ߠߊ߫ ߛߌߞߊߒߡߊߓߊ߯ߕߐ ߟߎ߫ ߞߊ߲߬، ߓߘߍ߬ߓߘߍ߬ߟߌ߬ߟߊ ߟߎ߫ ߓߊ߬߸ ߣߊ߲߬ߕߌ߮ ߟߎ߫ ߓߊ߬߸ ߡߊ߬ߞߟߐ ߟߎ߫ ߓߊ߬߸ ߘߎ߰ߘߋ߲ ߠߎ߬ ߓߊ߬: ߡߐ߰ ߓߌ߫ ߦߙߌߞߊ߫ ߡߌ߬ߣߊ߬ ߘߊ߫߸ ߡߍ߲ ߠߎ߬ ߡߊߝߌ߲߬ߣߍ߲߫ ߞߏ߫ ߊ߬ߟߎ߫ ߞߊ߬ ߖߎ߮ ߟߎ߫ ߘߍ߬ߡߍ߲߫ ߖߡߊ߬ߣߊ ߡߊ߬߸ ߊ߬ ߣߌ߫ ߖߊ߲߬ߝߊ߬ ߞߏ ߘߐ߫، ߡߌ߬ߘߊ߬ߟߌ߬ ߛߌߦߊߡߊ߲߫ ߞߍ߫ ߘߊ߫߸ ߥߎ߬ߦߊ߲߬ߞߟߌ߬ ߞߕߌ ߛߌߦߊߡߊ߲߫ ߟߊ߫ ߘߊ߫߸ ߞߊ߬ ߡߐ߰ ߛߌߦߊߡߊ߲߫ ߛߊ߲ߞߎ߲߫ ߜߍ ߘߐ߫ ߁߉߇߁ ߠߊ߫߸ ߘߏ߫ ߟߎ߫ ߓߌ߬ߟߊ߬ ߘߊ߫ ߥߛߎ߫ ߘߎߡߊߣߍ߲ ߠߊ߫߸ ߘߏ߫ ߟߎ߫ ߓߟߏߝߋ߲ ߠߎ߬ ߡߌ߬ߣߊ߬ ߘߊ߫.
ߞߐߞߊ߲߫ ߡߐ߮ ߟߎ߬ ߟߊ߫ ߞߎ߲߬ߠߊ߫߸ ߞߏߟߌ߲ߞߏߟߌ߲ ߕߟߋ߬ ߈ ߠߋ߬ ߡߊ߬߸ ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߞߊ߬ ߔߕߏ߬ߞߌ߬ߟߊ߬ߞߊ ߟߎ߬ ߟߊ߫ ߓߊ߰ߒ߬ߡߊ ߣߌ߲߬ ߞߐ߲߫ ߝߋߝߋ߫، ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ ߝߣߊ߫ ߞߵߏ߬ ߛߌߟߊ߫ ߞߋߟߋ߲ ߠߋ߬ ߕߊ߯ߡߊ߫، ߝߘߊ߬ߝߌ߲߬ ߖߡߊߣߊ ߛߌߦߊߡߊ߲߫ ߞߵߊ߬ߟߎ߬ ߟߊߘߍ߬ ߞߊ߬ ߣߊ߬ ߞߐߣߊߞߙߌ߫ ߞߐߡߊߓߌ߲ߓߌ߲߫ ߞߊ߲ߡߊ߬، ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߋ ߟߊ߫߸ ߙߎ߬ߛߌ߬ ߝߣߊ߫ ߞߊ߬ ߞߎߟߎ߲ ߘߏ߫ ߟߎ߫ ߟߊߣߊ߬ ߓߋ߬ߒ߬ߞߊ߲߬ߠߌ߲߬ ߛߎ߮ ߏ߬ ߟߎ߬ ߢߍߓߍ߲߬ ߞߊ߲ߡߊ߬.
ߊ߲ ߧߋ߫ ߟߏ߲ ߡߍ߲ ߘߐ߫ ߦߏ߫ ߓߌ߬߸ ߁߉߇߀ ߣߍߣߍߓߊ ߕߋ߬ߟߋ߫ ߂߂ ߦߋ߫ ߟߏ߲߫ ߠߋ߬ ߘߌ߫߸ ߡߍ߲ ߕߍ߫ ߓߐ߫ ߖߌ߬ߣߍ߬ߞߊ߫ ߛߌ߫ ߦߟߌ ߟߊ߫߸ ߊ߬ ߟߏ߲ ߠߋ߬ ߞߍ߫ ߘߊ߫ ߖߌ߬ߣߍ߬ ߟߊ߫ ߞߍ߬ߞߌ߬ߛߍ߬ߦߊ ߟߏ߲ ߘߌ߫߸ ߊ߬ ߟߏ߲ ߠߋ߬ ߖߌ߬ߣߍ߫ ߞߊ߬ ߖߊߟߌߞߊ ߟߊ߫ ߖߎ߮ ߟߎ߫ ߞߊ߲߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
