ߓߌ߬ ߓߌߟߏ߲ ߂߀߂߅ ߣߍߣߍߓߊ ߕߋ߬ߟߋ߫ ߂߀ ߠߋ߬ ߞߍߣߍ߲߫ ߥߘߋ߬ߥߘߋ߬ߟߌ߬ ߖߊ߯ߓߡߊ ߢߊ߰ߢߊ߰ ߟߏ߲߬ߓߊ ߘߌ߫.
ߞߌ߲ߘߌߦߊ߫ ߖߊ߯ߓߘߊ ߣߐ߬ ߓߍ߲߬ߒ߬ߛߋ߲߬ߡߊ ߏ߬ ߟߋ߬ ߕߣߐ߬ߓߐ߬ ߟߊ߫ ߓߌ߬ ߸ ߞߊ߬ ߛߋ߫ ߥߘߋ߬ߥߘߋ߬ߟߌ ߡߐ߬ߟߐ߲ ߣߴߊ߬ ߛߋߞߏߦߊ ߟߎ߬ ߦߌ߬ߘߊ߬ ߟߊ߫ ߡߐ߰ߦߊ߫ ߞߊߡߊ߲ ߘߐ߫.
ߖߊ߲߬ߖߏ ߘߊߡߌ߬ߣߊ߬ ߘߊ߫ ߞߌ߲ߘߌߦߊ߫ ߊ߲ߝߌߕߋߦߊߕߙߌ ߝߏ߮ ߟߋ߬ ߞߣߐ߫ ߁߀ ߙߋ߲ ߀߀ ߠߋ߬ ߡߊ߬ ߕߋߙߎ߫߸ ߣߴߊ߬ߟߋ߬ ߝߏ߮ ߦߋ߫ ߥߟߋ߫ ߟߊ߫ ߞߏ߫ : ߊ߲ߝߌߕߋߦߊߕߙߌ ߞߊ߬ߙߊ߲߬ߝߊ ߘߊߣߌߦߍߟ ߟߡߊ߬
߸ ߖߊ߲߬ߖߏ߲ ߏ߬ ߡߍ߲ ߢߣߊߓߊ߯ߦߊ߫ ߟߊ߫ ߖߊ߯ߓߘߊ ߖߍ߬ߘߍ ߡߊ߬ߞߟߐ߬ ߛߘߍߡߊ߲߫ ߣߌ߫ ߞߊ߬ߙߊ߲߬ߠߊ߬ߘߋ߲ ߠߎ߬ ߓߟߏ߫ ߞߵߊ߬ ߓߍ߲߬ ߥߘߋ߬ߥߘߋ߬ߟߌ ߟߐ߬ߘߎ߮ ߡߊ߬ ߟߏ߲ߞߏ ߞߊߡߊ߲߫ ߘߐ߫.
ߓߐ߬ߟߐ߲߬ߞߊ߬ ߤߊߥߊ߬ ߦߊ߬ߕߊߙߊ߬ ߟߋ߬ ߞߊ߬ ߣߊ߬ߓߊ߮ ߟߎ߬ ߢߣߊߓߊ߯ߦߊ߫ ߝߏ߮ ߞߣߐ߫ ߡߐ߮ ߟߎ߬ ߦߋ߫ ߕߊ߲߬ :
<< ߒ ߧߋ߫ ߡߊ߬ߞߕߏ߬ߟߌ ߢߌߣߌ߲߫ ߠߊ߫ ߛߟߊߕߌ߯ ߣߌ߫ ߓߐ߬ߟߐ߲߬ߞߊ ߟߎ߬ ߓߍ߯ ߟߊߘߍ߬ߣߍ߲ ߝߍ߬߸ ߖߐ߲߰ߛߊ߫ ߒ ߘߌ߫ ߛߋ߫ ߞߊ߬ ߒ߬ ߠߊ߫ ߡߊ߬ߞߟߐ ߟߎ߬ ߢߣߊߓߊ߯ߦߊ߫ ߸ߟߏ߲ߟߊ߲߫ ߓߟߋ߬ߓߟߋ ߏ߬ ߟߎ߬ ߡߍ߲ ߠߎ߬ ߞߵߊ߲ ߓߏ߲߬ߧߴߊ߬ߟߎ߬ ߟߊ߫ ߣߊ߬ߟߌ ߟߊ߫ ߞߣߍ ߞߊ߲߬ ߸ ߊ߲ ߧߴߊ߬ߟߎ߫ ߝߏ߬ ߟߴߊ߬ߟߎ߬ ߟߊ߫ ߘߍ߬ߡߍ߲߬ߠߌ߲ ߣߌ߫ ߞߐߞߘߐ߫ ߓߌ߲ߓߌ߲߫ ߣߌ߫ ߕߌߙߌ߲ߠߌ߲ ߠߊ߫ ߞߵߊ߬ ߟߐ߬ ߥߘߋ߬ߥߘߋ߬ߟߌ ߡߊ߬.
ߡߊ߬ߓߎ߲߬ߧߊ߬ߕߊ ߏ߬ ߟߎ߫ ߟߋ߬ :
ߡߊ߬ߓߎ߲߬ߧߊ߬ߕߊ ߞߊ߬ߙߊ߲߬ߝߊ߫ ߊߞߏߦߌ߫ ߡߊߛߊ߫ ߖ߭ߎ߬ߡߊ߬ߣߌ߬ߜ߭ߌ߫ ߘߌ߫.
ߡߊ߬ߓߎ߲߬ߧߊ߬ߕߊ ߞߊ߬ߙߊ߲߬ߝߊ ߡߊߡߊߘߎ߫ ߛߊ߲ߓߊ߬ ߓߊߙߌ߫.
ߡߊ߬ߓߎ߲߬ߧߊ߬ߕߊ ߞߏ߲߬ߓߏ߫ ߡߊߡߊߘߎ߫ ߓߌߟߏ߬ ߘߎ߲߬ߓߎߦߊ߬ ߊ߬ ߣߌ߫… >>
ߏ߬ ߟߋ߬ ߞߐߝߍ߬ ߛߊ߫߸ߗߋߝߊ߫ ߛߙߍߞߍ ߝߣߊ߫ ߞߊ߬ ߛߙߊ߬ߣߎ߲ ߕߊ߬، ߞߵߊ߬ ߦߌ߬ߘߊ߬ ߞߏ߫ ߥߘߋ߬ߥߘߋ߬ߟߌ߬ ߖߊ߯ߓߡߊ ߟߏ߲ߓߊ ߣߌ߲߬ ߕߐ߬ߣߐ ߞߊ߫ ߓߏ߲߬ ߓߊߟߋ߬.
ߏ߬ ߡߍ߲ ߞߎߡߊ߫ ߘߊ߫ ߕߘߍ߬ ߞߏ߫ : <<ߞߢߊߓߊߟߌߦߊ ߕߊ߯ߛߌߟߊ ߟߎ߬ ߊ߬ ߣߌ߫ ߟߊ߲߬ߓߋ ߡߍ߲ ߠߎ߬ ߘߌ߫ ߊߘߡߊߦߊ ߟߊߘߊ߲߫ ߛߌߣߌ߲߫ ߣߊ߬ߕߐ ߘߐ߫ >>.
ߞߊ߬ߙߊ߲߬ߝߊ ߡߊߡߊߘߎ߫ ߛߊ߲ߓߊ߬ ߓߊߙߌ߫ ߞߵߊ߬ ߦߌ߬ߘߴߊ߬ ߟߊ߫ ߓߋߟߋ߲ߠߊ ߘߐ߫ ߕߊ߲߬ : << ߞߢߊߓߊߟߌߦߊ ߘߌ߫ ߡߊߞߊ߬ߝߏ߬. ߟߋ߬ ߘߍ߯ ߤߊߟߌ߬ ߣߌ߫ ߛߋ߲ߞߏߟߊߘߐߦߊ ߛߓߊ߬ߕߌ߬ ߘߊ߫ ߟߋ߬.
ߎߣߍߛߑߞߏ ߞߊ߬ ߛߌߡߊߟߌ ߢߌߣߌ߲߫ ߊ߲ ߝߍ߬ :
ߦߊ߯ߟߴߊ߬ ߘߌ߫ ߘߊ߬ߤߊ ߓߊ߬ ߡߐ߰ ߘߊ߲ߘߐ߫ ߦߋ߫ ߞߍ߫ ߣߊ߲߬ߝߟߏ߬ߕߌ߮ ߘߌ߫ ߞߵߊ߬ ߕߘߍ߬ ߡߐ߰ ߦߙߌߞߊߖߊ߲ ߦߋ߫، ߡߍ߲ ߠߎ߬ ߓߊߟߏߞߏ ߜߟߍ߬ߡߊ߲߫ ߊ߬ߟߎ߫ ߡߊ߬ ؟
ߒ߬ߓߊ߬ ߸ ߥߘߋ߬ߥߘߋ߬ߟߌ ߟߊ߫ ߟߊ߬ߢߌߣߌ߲ ߦߋ߫ ߝߙߋߞߋ߫ ߛߎ߯ ߏ߬ ߟߋ߬ ߝߊ߰ߡߎ߲߫ ߘߌ߬ ߸ ߏ߬ ߞߐߝߍ߬ ߞߊ߬ ߓߐ߲ߘߊ߫ ߢߌߣߌ߲߫ ߊ߬ߟߎ߬ ߟߊ߫.
ߓߌ߬ ߟߏ߲ߓߊ ߣߌ߲߬ ߦߋ߫ ߞߊ߬ߙߊ߲߬ߡߐ߯ ߟߎ߬ ߞߟߊߓߎ ߘߏ߲߬ ߟߏ߲ ߠߋ߬ ߘߌ߫ ߛߴߊ߬ߟߎ߬ ߣߌ߫ ߞߊ߬ߙߊ߲ ߓߏߟߏ߲ߝߘߊ ߕߐ߭ ߟߎ߬ ߦߋ߫ ߓߊ߯ߙߊ߫ ߸ ߊ߬ ߣߴߊ߬ ߢߊ߬ߕߣߐ ߞߊ߫ ߓߏ߲߬ ߓߊߟߋ߬ ߞߊ߬ߙߊ߲߬ߠߊ߬ߘߋ߲ ߠߎ߬ ߟߊ߫ ߛߌߣߌ߲߫ ߣߊ߬ߕߐ ߡߊ߬.
ߢߊ߬ߕߣߐ߫ ߡߐ߬ߟߐ߲߬ߡߊ ߘߏ߫ ߟߎ߫ ߝߟߍ߫ ߣߌ߲߬ :
ߓߟߏߘߌߢߐ߰ߡߊ: ߞߊ߬ ߢߐ߲߮ ߘߍ߬ߡߍ߲߬.
ߞߢߊߟߌ : ߞߊ߬ ߓߍ߯ ߟߊ߫ ߞߢߊ ߞߏ ߟߎ߬ ߘߐ߫.
ߓߏ߲߬ߧߊ : ߞߊ߬ ߕߐ߭ ߟߎ߬ ߓߏ߲߬ߧߊ߬.
ߞߊ߬ ߟߊ߬ߡߌߣߌ߲ ߥߟߊ߫ ߛߎ߲ߞߎ߲ ߞߣߐ߬ߜߍ߲߬ >>.
ߞߊ߬ߙߊ߲߬ߝߊ ߡߊߡߊߘߎ߫ ߛߊ߲ߓߊ߬ ߓߊߙߌ߫ ߟߊ߫ ߞߎߡߊ ߞߏ߲߬ߘߏ ߘߐ߫ ߛߊ߫ ߸ ߊ߬ ߞߵߊ߬ ߦߌ߬ߘߊ߬ ߞߏ߫ :
ߓߌ߬ ߢߐ߲߰ ߟߏ߲߬ߓߊ ߣߌ߲߬ ߦߋ߫ ߥߟߋߟߌ ߟߐ߬ ߟߊ߫ ߛߌߡߊߟߌ ߟߋ߬ ߡߊ߬߸ ߊ߬ ߣߌ߫ ߞߊ߬ ߞߍ߫ ߘߎ߰ߘߋ߲߬ ߓߘߍ ߘߌ߫ ߞߊ߬ ߛߋ߫ ߘߍ߭ ߟߊߛߓߊ߬ߕߌ߬ ߟߊ߫.
ߏ߬ ߟߋ߬ ߞߐߝߍ߬ ߛߊ߫ ߸ߡߊ߬ߓߎ߲߬ߧߊ߬ߕߊ ߞߊ߬ߙߊ߲߬ߝߊ߫ ߊߞߏߦߌ߫ ߡߊߛߊ߫ ߖ߭ߎ߬ߡߊ߬ߣߌ߬ߜ߭ߌ߫ ߝߣߊ߫ ߞߊ߬ ߓߋߟߋ߲ߠߊ ߕߊ߬ ߞߏ߫ :
<< ߓߋߟߋ߲ߠߊ ߣߌ߲߬ ߦߋ߫ ߟߏ߲ߟߊ߲ ߠߎ߬ ߟߊߛߣߍ߫ ߟߋ߬ ߦߌ߬ߘߊ߬ ߟߊ߫ ߥߘߋ߬ߥߘߋ߬ߟߌ߬ ߖߊ߯ߓߡߊ ߟߏ߲ߓߊ ߣߌ߲߬ ߡߊ߬ ߞߌ߲ߘߌߦߊ߫ ߂߀߂߅ ߢߌ߲߬ ߡߊ߬ ߸ߊ߬ ߦߴߊ߬ ߦߌ߬ߘߊ߬ ߟߵߌߞߐ߫ ߞߏ߫ ߎߣߋߛߑߞߏ߫ ߞߊ߬ ߟߏ߲ ߣߌ߲߬ ߛߌ߲ߘߌ߫ ߟߋ߬ ߸ ߛߊ߫ ߞߖߊ߫ߥߘߋ߬ߥߘߋ߬ߟߌ ߕߐ߬ߣߐ ߦߌ߬ߘߊ߬ : ߞߊ߬ ߡߙߌ߫߸ ߞߊ߬ ߢߌ߬ߣߌ߲߬ߞߊ߬ߟߌ ߞߍ߫ ߊ߬ ߣߌ߫ ߞߵߏ߬ ߟߊ߫ ߕߋߟߋ߲ߓߊ߯ߦߊ ߢߌߣߌ߲߫ ߞߊ߲߬.
ߓߌ߬ ߞߎߡߘߊ ߕߘߍ߬ ߦߋ߫ » ߞߢߊߓߊߟߌߦߊ ߕߊ߯ߛߌߟߊ ߟߎ߬ ߣߌ߫ ߟߊ߲߬ߓߋ ߡߍ߲ ߠߎ߬ ߘߌ߫ ߊߘߡߊߦߊ ߟߊߘߊ߲߫ ߛߌߣߌ߲߫ ߣߊ߬ߕߐ ߘߐ߫ » ߟߋ߬ ߞߊ߲߬.
ߊ߲ ߧߋ߫ ߞߎߡߊ ߟߊ߫ ߡߐ߱ ߟߎ߬ ߕߍ߫ ߘߊ߲߬ߝߘߊ߬ߓߐ ߞߊ߲߬ ߦߏ߫ 🙁 ߥߊߘߌ߫߸ ߞߊ߬ߙߊ߲߬ߕߊ߸ߘߍ߬ߞߙߎ) ߊ߬ ߣߌ߫ ߝߋ߲߫ ߡߐ߬ߟߐ߲߬ߡߊ߬ ߜߘߍ߫ ߟߎ߬ ߝߣߊ߫ ߸ ߡߍ߲ ߘߌ߫ ߛߓߊ߬ߕߌ߫ ߟߊߘߏ߲߬: ߕߋߟߋ߲ߓߊ߯ߦߊ ߸ ߕߍߕߋߟߋ߲ ߸ߓߏߟߏ߲ߘߌߢߐ߰ߡߊ ߣߌ߫ ߓߏ߲߬ߧߊ.
ߞߎߡߘߊ߫ ߛߊ߬ߓߊ߫ ߢߌ߲߬ ߠߎ߬ ߦߴߊ߬ߟߎ߬ ߞߎ߲߬ ߓߐ߫ ߟߊ߫ ߏ߬ ߟߋ߬ ߞߣߐߡߊ߬ :
߁- ߖߏ߯ߦߊߟߌ ߡߙߌߦߊ ߘߐ߬ߝߐ.
߂-ߊ߲ ߠߊ߫ ߝߘߊ߬ߝߌ߲߬ߠߊ߫ ߡߐ߬ߟߐ߲ ߠߎ߬ ߞߵߊ߬ ߓߍ߲߬ ߛߋ߲ߞߏߟߊߘߐߦߊ ߞߎߘߊ ߟߎ߬ ߦߋߝߊߘߌ߫ ߡߊ߬.
߃-ߞߢߊߓߊߟߌߦߊ ߟߎ߬ ߖߌ߬ߣߍ߬ ߞߊ߲ߓߍ߲ ߞߣߐ߫،ߊ߬ ߣߴߊ߬ߟߎ߬ ߘߌ߫ ߡߊߘߐ߯ߦߊ ߘߌ߬ .
ߓߋߟߋ߲ߠߊ ߣߌ߲߬ ߦߋ߫ ߓߍ߯ ߟߊߘߍ߬ߣߍ߲ ߞߟߊߓߎ ߘߏ߲߬ ߠߊ߫ ߟߋ߬ ߞߊ߬ ߕߘߍ߬ ߖߊ߲߬ߖߏ߲ ߠߎ߬ ߘߐ߫ ߛߐ߲߬߸ ߞߊ߬ ߘߊߘߐߖߊߥߏ ߞߍ߫߸ ߊ߬ ߣߌ߫ ߞߵߌ ߡߙߌߦߊ ߘߌ߫ ߖߐ߲߰ߛߊ߫ ߘߍ߭ ߦߋ߫ ߟߊߥߙߎߞߌ.
ߒ ߧߋ߫ ߣߊ߬ߓߊ߮ ߟߎ߬ ߓߍ߯ ߟߊߘߍ߬ߣߍ߲ ߝߏ߬ ߟߊ߫ ߞߏߛߓߍ߫ >>
ߓߋߟߋ߲ߠߊ ߏ߬ ߟߎ߬ ߟߋ߬ ߓߍ߯ ߞߐߝߍ߬ ߸ ߜߊ߬ߙߊ ߟߎ߬ ߘߊߡߌ߬ߣߊ߬ ߘߊ߫ .
ߛߟߊߕߌ߯ ߛߎ߬ߜ߭ߟߎ߬ߡߊ߲߫ ߓߊ߲ߒߔߣߌ߫ ߟߊ߫ ߜߊ߬ߙߊ ߞߎߡߘߊ ߕߘߍ߬ ߦߋ߫ » ߞߢߊߓߊߟߌߦߊ ߘߍ߭ ߘߐ߫߸ߢߐ߲߯ ߞߐߣߌߢߊ ߊ߬ ߣߌ߫ ߖߌ߬ߣߍ߫ ߡߌ߬ߙߌ߲߬ߘߌ ߟߊ߫ ߛߌߣߌ߲߫ ߣߊ߬ߕߐ » ߟߋ߬ ߞߊ߲߬.
ߛߟߊߕߌ߯ ߞߋߦߊ߫ ߕߎߦߊߙߏ߫ ߟߊ߫ ߞߎߡߘߊ߫ ߕߘߍ߬ ߦߋ߫ :
ߓߋ߲ߓߊ߫ ߡߐ߬ߟߐ߲ ߠߎ߬ ߞߘߐߓߐ߫ ߘߊ߫ ߕߟߋ߬ߓߊ߰ߦߊ ߟߐ߲ߕߊ ߟߎ߬ ߛߌߟߊ ߝߍ߬ ߝߘߊ߬ߝߌ߲߬ߠߊ߫ » ߏ߬ ߝߣߊ߫ ߞߎߡߊ߫ ߟߴߏ߬ ߟߋ߬ ߞߊ߲߬
ߊ߬ ߣߌ߫ ߛߟߊߕߌ߯ ߙߋ߬ߣߋ߫ ߦߙߊ߬ߘߎ߬ߣߏ߫߸ ߏ߬ ߝߣߊ߫ ߕߊ ߕߘߍ߬ ߞߏ߫
» ߦߋߢߐ߲߯ߠߊ ߖߏ߯ߦߊߟߌ ߞߟߏߡߊ ߟߎ߬ ߞߵߊ߬ ߓߍ߲߬ ߥߘߋ߬ߥߘߋ߬ߟߌ ߘߐ߬ߝߐ ߞߣߐߟߊ ߡߊ߬ «
ߓߌ߬ ߖߊ߲߬ߖߏ߲ ߞߎ߲߭ ߝߊ߰ ߘߊ߫ ߕߏ߬ߟߊ߲߬ߕߊ߲ ߠߋ߬ ߡߊ߬ ߞߌ߲ߘߌߦߊ߫ ߥߘߋ߬ߥߘߋ߬ߟߌ߬ߟߊ߬ ߞߊ߬ߙߊ߲߬ߠߊ߬ߘߋ߲ ߠߎ߬ ߣߌ߫ ߢߐ߲߯ ߕߍ߫.
ߛߟߊߕߌ߯ ߘߊߣߌߦߍߟ ߞߊ߲߬ߕߓߊ߬߬ߘߎ߬ߣߏ߫ ߟߋ߬ ߕߘߍ߬ ߖߊ߲߬ߖߏ߲ ߣߌ߲߬ ߛߌ߲߬ߝߏ߲߬ߧߊ߬ߟߊ ߟߎ߬ ߟߊ߫ ߞߎ߲߬ߕߌ߮ ߘߌ߫ ߞߌ߲ߘߌߦߊ߫ ߖߊ߯ߓߘߊ ߟߊ߫ ߞߏߛߓߍ߫.
ߏ߬ ߡߍ߲ ߘߊߡߌ߬ߣߊ߫ ߘߊ߫ ߕߏߟߏ߲ ߡߊ߬ ߸ߞߵߊ߲ ߞߎ߲߭ ߘߏ߲߬ ߢߊ߰ߢߊ߮ ߡߊ߬ ߁߈ ߙߋ߲ ߕߎ߬ߡߊ ߝߍ߬.
ߣߊߡߊ߲߬ߖߊ߲߫ ߡߐ߰ߟߊ߲߬ߘߌ߫ ߡߊ߰ߛߎߓߊ߫ ߓߟߏ߫ ߞߌ߲ߘߌߦߊ߫
