ߓߌ߬ ߞߐ߬ߓߊ߬ߟߏ߲ ߣߌ߲߬߸ ߂߀߂߅ ߣߍߣߍߓߊ ߕߋ߬ߟߋ߫ ߃ ߟߋ߬ ߦߋ߫ ߞߏߟߌ߲ߞߏߟߌ߲ ߕߋ߬ߟߋ߫ ߂߈ ߣߊ߬ߕߐ ߞߊ߲ߕߌ߯ ߢߣߊߕߊߟߌ ߡߊ߬ߡߌ߬ߘߊ߬ߟߌ ߛߓߍ߫ ߟߊߘߏ߲ ߞߎ߲߬ߝߊ߮ ߘߌ߫، ߞߐߣߊߞߙߌ߫ ߞߣߐ߫߸ ߟߊ߬ߞߊ߲߬ߘߊ߬ߟߌ ߘߐ߬ߓߍ߲ ߡߍ߲ ߠߎ߬ ߛߌ߰ߣߍ߲߫ ߛߋ߲߬ߠߊ߫ ߦߋ߲߬߸ ߣߊ߲߬ߕߌ߮ ߟߎ߬ ߓߘߊ߫ ߛߌߦߊߦߊ߫ ߞߕߌߖߌ߲ ߛߊ߲ߘߐߕߊ ߘߊߞߘߐߟߊ ߘߐ߫ ߛߐ߱ ߢߌ߲߬ ߡߊ߬ ߞߏߛߓߍ߫، ߞߵߊ߬ ߟߴߊ߬ ߞߊ߲߬߸ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߐߡߊߓߌ߲ߓߌ߲ߓߊ߮ ߛߌߦߊߡߊ߲߫ ߠߋ߬ ߦߋ߲߬ ߕߋ߲߬߸ ߖߐ߬ߟߋ߲ ߦߋ߫ ߡߍ߲ ߠߎ߬ ߞߊ߲ߠߊ߫ ߞߟߍ߬ߕߌ߮ ߖߌ߬ߦߊ߬ߓߍ ߘߌ߫߸ ߊ߬ߟߎ߬ ߦߋ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߡߊ߬ߡߌ߬ߘߊ߬ߟߌ ߛߓߍ߫ ߟߊߘߏ߲ ߡߊ߬ߞߐ߬ߣߐ߲߬ߠߌ߲ ߞߊ߲߬ ߘߌߞߍߘߌߞߍߦߊ߫ ߓߟߏ ߡߊ߬.
ߤߊ߲߯ ߕߋ߲߬ ߞߏ߬ߣߌ߲߸ ߞߊ߬ߝߏ߬ ߞߎ߲ߕߌ߮ ߡߊ߫ ߜߟߋ߬ߞߋ߫ ߓߌ߬ߟߴߊ߬ ߢߌ߲ ߝߍ߬ ߡߎߣߎ߲߬߸ ߞߵߊ߬ ߦߌ߬ߘߊ߬ ߣߴߊ߬ ߘߌ߫ ߛߐ߬ߘߐ߲߫ ߊ߬ ߘߐ߫ ߥߟߊ߫ ߍ߲߬ߍ߲ߍ߲߬، ߓߊ߬ߙߌ߬߸ ߟߊ߬ߞߙߐ߬ߛߌ߬ߟߌߟߊ ߛߌߦߊߡߊ߲߫ ߞߏ߬ߣߌ߲ ߘߍ߲߬ߞߣߍ߬ߦߊ߬ߣߍ߲߫ ߞߏ߫ ߊ߬ ߘߌ߫ ߞߍ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫، ߞߏߓߊ ߘߏ߫ ߦߋ߫ ߢߣߊߕߊߟߌ ߣߌ߲߬ ߘߐ߫߸ ߖߡߊ߬ߣߊ ߞߙߎߞߓߊ߫ ߛߌߦߊߡߊ߲߫ ߦߋ߫ ߦߋ߲߬߸ ߖߡߟ ߞߟߐ߬ߟߐ߬ߓߊ߸ ߖߓߝߘ߸ ߊ߬ ߣߌ߫ ߞߝߘ߸ ߏ߬ ߟߎ߬ ߡߊ߫ ߛߐ߬ߘߐ߲߫ ߊ߬ ߘߐ߫߸ ߊ߬ߟߎ߬ ߟߊ߫ ߞߎ߲߬ߕߌ߮ ߟߎ߬ ߝߣߊ߫ ߦߋ߫ ߢߊߣߌ߲ߡߊߓߏߙߌ ߣߌ߫ ߞߎ߲߬ߞߊ߬ߙߌ߬ߝߊ߬ߟߌ ߘߐ߫.
ߓߘߍ߬ߓߘߍ߬ߟߌ߬ߟߊ ߡߍ߲ ߠߎ߬ ߟߊ߫ ߛߓߍ ߟߊߘߏ߲߬ߣߍ߲߬ ߝߟߐ߫߸ ߏ߬ ߟߎ߬ ߛߌ߫ ߕߍ߫ ߝߊ߲߬ߞߊ߬ߡߊ߫ ߟߎ߫ ߘߌ߫߸ ߏ߬ ߟߎ߫ ߞߏ߬ߣߌ߲ ߓߘߴߊ߬ߟߎ߫ ߥߊ߬ߣߌ߲߬ߞߋ ߦߌ߬ߘߊ߬ ߞߵߊ߬ߟߎ߬ ߟߊ߫ ߡߊ߬ߡߌ߬ߘߊ߬ߟߌ ߟߊߘߏ߲߬߸ ߘߏ߫ ߟߎ߫ ߖߍ߬ߘߍ ߝߣߊ߫ ߦߴߊ߬ ߞߊ߲߬ ߓߌ߬߸ ߦߏ߫ ߡߊ߬ߞߊߟߋ߫ ߞߡߊ߬ߙߊ߬ ߦߋ߫ ߢߊ ߡߍ߲ ߡߊ߬، ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫߸ ߣߴߊ߬ߟߋ ߞߵߊ߬ ߟߊ߫ ߡߊ߬ߡߌ߬ߘߊ߬ߟߌ ߟߊߘߏ߲߬ ߞߵߊ߬ ߛߐ߬ߘߐ߲߬ ߊ߬ ߡߊ߫ ߓߐ߫ ߣߊ߲߬ߕߌ߰ߦߊ ߘߐ߫߸ ߊ߬ ߘߌ߫ ߞߍ߫ ߖߌ߬ߣߍ߫ ߣߊ߲߬ߕߌ߰ ߞߎ߲ߕߌ߮ ߝߌߟߊߣߊ߲ ߘߌ߫ ߘߐ߬ߝߐ ߞߣߐ߫߸ ߡߍ߲ ߠߎ߬ ߞߊ߬ ߖߡߊ߬ߣߊ ߡߊ߬ߙߊ ߡߊ߬ߡߌ߬ߘߊ߬ߟߌ ߟߊߘߏ߲߬ ߞߵߊ߬ߟߎ߬ ߕߏ߫ ߣߊ߲߬ߕߌ߰ߦߊ ߘߐ߫߸ ߏ߬ ߡߍ߲ ߝߟߐߡߊ ߞߍߣߍ߲߫ ߟߊ߲߬ߛߣߊ߬ ߞߐ߲ߕߍ߬ ߘߌ߫ ߞߊ߬ߣߌ߲߬.
ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߓߟߏ߫.
