ߖߌ߬ߣߍ߬ ߞߊ߲ߓߍ߲ ߞߎ߲߬ߠߊ߬ߛߌ߮ ߞߎ߲߬ߕߌ߮ ߣߌ߫ ߞߏߕߌ߯ ߝߟߐ߸ ߊߡߊߘߎ߫ ߎ߯ߙߌ߬ ߓߊ ߞߊ߬ ߓߐߒߡߊߟߌ߫ ߟߊߓߙߊ߬ߣߍ߲߫ ߠߋ߬ ߞߍ߫ ߞߊ߲ߞߊ߲߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߓߏ߲ߓߊ ߟߊ߫ ߓߌ߬ ߛߌ߬ߣߌ߲߬ߟߏ߲ ߣߌ߲߬ ߖߎߡߊ߫ ߛߊߟߌ ߢߊߞߘߐߟߊ ߘߐ߫߸ ߡߍ߲ ߞߎ߲߭ ߕߘߍ߬ ߊ߬ ߢߊ ߟߊ ߘߌ߫ ߝߐ߰ߓߍ߬ߦߊ߬ߟߊ ߟߎ߫ ߞߊ߲߬߸ ߏ߬ ߟߎ߬ ߡߍ߲ ߠߎ߬ ߦߋ߫ ߓߌ߬ߟߊ߬ߢߐ߲߰ߡߊ ߖߎ߬ߟߎ ߘߌ߫ ߝߊ߰ߡߊ ߟߎ߬ ߣߌ߫ ߡߌ߬ߙߌ߲߬ߘߌ ߕߍ߫.
ߓߌ߬ ߖߋ߲ߖߋ߲߫ ߕߎߡߊ ߢߌ߲߬ ߠߋ߬ ߟߊ߫߸ ߞߏߕߌ߯ ߝߟߐ߫ ߊߡߊߘߎ߫ ߎ߯ߙߌ߬ ߓߊ ߞߵߊ߬ ߞߎ߲߬ߛߌ߲߫ ߞߊ߲ߞߊ߲߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߓߏ߲ߓߊ ߟߊ߫߸ ߏ߬ ߡߍ߲ ߦߋ߫ ߕߌ߲߬ߞߎߘߎ߲ ߝߐ߰ߓߍ߬ߦߊ߬ߟߊ ߡߎ߰ߡߍ ߟߊ߫ ߝߊ߲ߓߊ ߘߌ߫ ߞߊ߬ߣߌ߲߬، ߓߐߒߡߊߟߌ ߣߌ߲߬ ߘߐ߫ ߓߌ߬߸ ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ ߕߘߍ߬ ߞߣߍ ߞߊ߲߬߸ ߝߊߙߌ߲ ߡߎߛߊ߫ ߞߐ߲ߘߍ߫߸ ߞߵߏ߬ ߟߊ߫ ߡߙߊ߬ߓߊ߮ ߞߊ߲߬߸ ߞߊ߲ߖߊ߬ ߡߊ߰ߙߊ߸ ߞߎߡߊߕߍ߫ ߞߊ߲ߞߊ߲߫ ߕߌ߲߬ߞߎߘߎ߲ ߞߌ߬ߓߊ߬ߙߏ߬ߦߊ߬ߟߌ ߣߌ߫ ߓߌ߬ߟߊ߬ߢߐ߲߰ߡߊ ߗߋߕߌ߮ ߡߊ߬߸ ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎ߬ߦߊ߫߸ ߊ߬ ߣߌ߫ ߓߌ߬ߟߊ߬ߢߐ߲߰ߡߊ ߞߏߟߊߕߍ߯ ߛߊ߲ߘߐߕߊ ߞߐߦߌߘߊߓߊ߮߸ ߟߊ߱ߖߌ߬ ߝߏߘߋ߫ ߓߊ߲߬ߜ߭ߊ߬ߟߌ߬ ߝߏߝߣߊ߫، ߓߐߡߊߟߌ ߣߌ߲߬ ߞߍ߫ ߘߊ߫ ߞߏ߫ ߕߣߐ߬ߡߊ߬ߓߊ߫ ߟߋ߬ ߘߌ߫ ߝߐ߰ߓߍ߬ߦߊ߬ߟߊ ߟߎ߫ ߡߊ߬߸ ߊ߬ߟߎ߬ ߣߌ߫ ߖߡߊ߬ߣߊ ߞߎ߲߬ߠߊ߬ߛߌ߰ ߞߎ߲ߕߌ߮ ߟߊ߫ ߘߊߘߐߖߊߥߏ ߘߌ߫߸ ߏ߬ ߡߍ߲ ߞߵߊ߬ ߟߊ߫ ߕߊ߯ߡߊ ߞߎ߲߭ ߝߐ߫ ߖߡߊ߬ߣߊ ߞߣߐߟߊ ߘߐ߫ ߕߋ߬ߟߋߝߌ߬ߟߊ ߣߌ߲߬ ߘߐ߫߸ ߣߴߊ߬ ߘߊߡߌ߬ߣߊ߬ ߘߴߊ߬ ߓߟߏ߫ ߒߛߙߍߜߘߍ߬ ߞߊ߬ ߣߊ߬ ߞߊ߲ߞߊ߲߫، ߊߡߊߘߎ߫ ߎ߯ߙߌ߬ ߓߊ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߕߊ߯ߡߊ ߣߌ߲߬: <<ߟߊ߬ߢߌߣߌ߲ ߦߋ߫ ߡߌ߬ߙߌ߲߬ߘߌ ߞߎߟߎ߲ߖߋ ߟߋ߬ ߘߌ߫߸ ߞߊ߬ ߘߏߞߍߟߊ ߓߍ߯ ߟߊߘߍ߬ߣߍ߲ ߝߏ߬߸ ߡߍ߲ ߺ ߍ ߺ ߡߍ߲߫ ߞߵߊ߬ ߛߋߞߏ ߞߍ߫ ߞߊ߲ߘߟߌ ߓߙߊߡߊߖߊ߲ߓߊ߲ ߘߐ߫، ߞߵߊ߬ߟߎ߫ ߝߏ߬ ߞߏߛߓߍ߫߸ ߓߊߏ߬ ߞߏ߫ ߛߌ߫ ߛߌ߲߬ߝߏ߲߬ߧߊ߬ ߘߊ߫ ߛߊ߲߬ ߝߌ߬ߟߊ߬ ߟߊ߬ߓߊ߲ ߣߌ߲߬ ߞߣߐ߫߸ ߊ߬ ߓߍ߯ ߕߊ߬ߡߌ߲߬ ߘߴߊ߬ ߢߌ߬ߡߊ ߟߊ߫ ߟߋ߬ ߝߛߊߦߌ߫، ߓߊߏ߬ ߊ߲ ߡߊ߫ ߡߐ߰ ߓߐ߫ ߡߐ߰ ߘߐ߫߸ ߊ߲ ߞߊ߬ ߓߍ߯ ߟߊ߫ ߕߘߍ߬ߒ߬ߘߐ߬ߟߌ ߟߋ߬ ߟߊߢߌߣߌ߲߫.>> ߊ߬ ߞߵߏ߬ ߟߋ ߝߐ߫.
ߏ߬ ߘߐ߫߸ ߊ߬ ߟߊ߫ ߞߣߐߟߊ ߕߊ߯ߡߊ ߣߌ߲߬ ߞߍ ߞߎߟߎ߲ߖߋߟߌ ߘߌ߫߸ ߝߐ߰ߓߍ߬ߦߊ߬ߟߊ ߟߎ߬ ߞߊ߬ ߓߏ߲߬ߓߊ߬ ߞߍ߫ ߏ߬ ߞߏ ߘߐ߫، ߓߊߏ߬߸ ߝߐ߰ߓߍ߬ߦߊ߬ߟߊ ߟߎ߫ ߟߋ߬ ߛߊߓߎ߫ ߟߊ߫߸ ߒ ߞߵߊ߬ ߡߍ߲ ߛߋ߫ ߘߊ߫ ߞߟߍ߬ ߟߊ߫߸ ߏ߬ ߟߋ ߞߏߛߐ߲߬߸ ߊ߬ ߣߊ߬ ߘߊ߫ ߕߊ߲߬ߘߏ߬ߟߌ ߟߊ߫ ߝߐ߰ߓߍ߬ߦߊ߬ߟߊ߫ ߟߎ߫ ߕߍ߰ߟߊ ߘߐ߫.
ߞߏߕߌ߯ ߝߟߐ ߞߵߊ߬ ߦߌ߬ߘߊ߬ ߞߏ߫ ߞߎߡߊߛߏ ߕߐ߬ߣߐ ߓߏ߲߬ߓߊ߬ߓߊ ߟߋ߬، ߏ߬ ߟߋ ߞߏߛߐ߲߬߸ ߞߏ߫ <<ߝߊ߲߬ߞߊ߬ ߞߊ߫ ߞߊ߲߫ ߞߊ߬ ߘߌ߫ ߞߏ߲ߞߏߘߐߕߊ ߥߎߢߊ߲ߖߍ߲ߛߍ߲ ߠߎ߬ ߡߊ߬߸ ߊ߬ ߣߌ߫ ߞߌ߬ߓߊ߬ߙߏ߬ߘߊ ߟߎ߫ ߡߊ߬>> ߊ߬ ߞߊ߬ ߝߐ߰ߓߍ߬ߦߊ߬ߟߊ ߟߎ߫ ߝߏ߬ ߊ߬ߟߎ߬ ߟߊ߫ ߓߊ߯ߙߊ߫ ߓߘߍ ߟߎ߬ ߟߊ߫߸ ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߞߏ߫ ߓߍ߯ ߟߊߘߍ߬ߣߍ߲ ߦߋ߫ ߥߊ߫ ߥߊ߫ ߢߊ ߏ߬ ߡߊ߬߸ ߖߐ߲߰ߛߊ߫ ߓߙߊߡߊߖߊ߲ߓߊ߲ ߡߍ߲ ߣߊ߬ߕߐ߫߸ ߏ߬ ߝߣߊ߫ ߦߋ߫ߛߋ߫ ߕߊ߬ߡߌ߲߬ ߠߴߊ߬ ߢߌ߬ߡߊ ߟߊ߫. ߖߐ߲߰ߛߊ߫ <<ߓߘߍ߬ߓߘߍ߬ߟߌ ߞߎߡߊ ߟߎ߬ ߘߌ߫ ߛߋ߫ ߞߍ߫ ߟߊ߫ ߢߡߊߞߊ ߘߐ߫ ߢߊ ߡߍ߲ ߡߊ߬.>>
ߞߏߕߌ߯ ߝߟߐ ߟߊ߫ ߘߍ߬ߡߍ߲߬ߠߌ߲ ߠߋ߬ ߛߘߊ߫ ߘߐ߫߸ ߞߊ߲ߞߊ߲߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߓߏ߲ߓߊ ߛߋ߫ ߘߊ߫ ߞߣߞߍ߫ ߟߊ߫ ߞߊ߬ ߛߓߍߘߊ ߟߎ߬ ߟߊߘߊ߲߫ ߊ߬ ߞߣߐ߫߸ ߓߏ߲ߓߊ ߏ߬ ߡߍ߲ ߡߊߡߊ߬ߙߊ ߢߍߡߐ߯ߦߊ ߦߋ߫ ߛߟߊߕߌ߯ ߓߟߊ߬ ߡߎߛߊ߫ ߞߙߏ߬ߡߊ߬ ߓߟߏ߫، ߏ߬ ߟߋ ߘߐ߫߸ ߞߊ߲ߞߊ߲߫ ߕߌ߲߬ߞߎߘߎ߲ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߘߍ߭ ߞߊ߲ߕߌ߮ ߟߊ߱ߦߌ߬ ߝߊ߬ߡߐ ߞߐ߲ߘߍ߫ ߣߌ߫ ߕߐ߰ߕߐ߰ߟߌ߬ߟߊ ߟߎ߬ ߟߊ߫ ߝߘߏ߬ߓߊ߬ ߞߟߊ߬ߕߌ߮ ߡߌ߬ߛߍߟ ߔߝ߭ߌ߫ ߟߎ߫ ߞߊ߬ ߞߐ߲ߘߐ߲߫ ߘߐߜߍ߫ ߝߌ߬ߟߊ߫ ߞߟߊ߬ߣߐ߬ߦߊ߬߸ ߞߊ߬ ߝߟߐߡߊ ߘߍ߬ߡߍ߲߬ߘߌ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫߸ ߞߊ߬ ߝߌߟߊߣߊ߲ ߘߍ߬ߡߍ߲߬ߘߌ߬ ߞߏߕߌ߯ ߝߟߐ߫ ߓߊ ߎ߯ߙߌ߬ ߖߍ߬ߘߍ ߟߊ߫، ߞߐ߲ߘߐ߲ ߏ߬ ߟߎ߬ ߟߊߕߊ߬ߡߌ߲߬ ߘߊ߫ ߞߏߕߌ߮ ߡߊ߬ ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎ߬ߦߊ߫ ߟߋ߬ ߓߟߏ߫߸ ߕߌ߲߬ߞߎߘߎ߲ ߞߌ߬ߓߊ߬ߙߏ߬ߦߊ߬ߟߌ ߣߌ߫ ߓߌ߬ߟߊ߬ߢߐ߲߰ߡߊ ߗߋߕߌ߮، ߏ߬ ߞߏ ߞߍ߫ ߘߊ߫ ߥߊ߬ߛߊ ߟߋ߬ ߘߌ߫߸ ߡߍ߲ ߘߌߦߊ߫ ߘߊ߫ ߞߏߕߌ߯ ߝߟߐ ߦߋ߫ ߞߏߛߓߍ߫.
ߞߏߕߌ߯ ߝߟߐ ߟߊ߫ ߣߊ߬ߟߌ ߣߌ߲߬ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߖߡߊ߬ߣߊ ߝߐ߰ߓߍ߬ߦߊ߬ߟߊ ߟߎ߬ ߞߊ߫ ߞߊ߲߫ ߞߵߊ߬ߟߎ߬ ߓߊ߲ߓߊ߲߫ ߖߡߊ߬ߣߊ ߞߣߐߟߊ ߟߌ߬ߤߟߊ ߟߎ߫ ߟߋ߬ ߞߊ߲߬߸ ߞߵߏ߬ ߟߎ߬ ߟߊߛߋ߫ ߢߊ߫ ߢߌߡߊ߫ ߡߊ߬߸ ߢߊ߬ߡߊ߲߬ ߕߍ߫ ߝߐ߫ ߢߊ ߡߍ߲ ߠߎ߬ ߟߊ߫، ߏ߬ ߟߋ ߞߎ߲߬ߠߊ߬ߦߋߙߋ߲ ߘߌ߫.
ߞߵߊ߬ ߓߍ߲߬ ߖߎߡߊ ߜߍ߬ߙߍ߲߬ߘߍ ߡߊ߬߸ ߘߐ߬ߝߎߟߋ߲߫ ߡߊ߫ ߛߋ߫ ߞߍ߫ ߟߊ߫ ߕߎ߬ߡߊ߬ ߞߏ ߘߐ߫߸ ߢߌ߬ߣߌ߲߬ߞߊ߬ߟߌ߬ ߜߘߍ߫ ߡߊ߫ ߛߋ߫ ߞߍ߫ ߟߊ߫ ߝߌ߬ߟߊ߬ ߘߐߙߐ߲߫ ߞߐߝߍ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
