ߊ߬ ߡߌ߬ߘߊ߬ ߘߊ߫ ߞߏ߲ߓߌߕߌ߮ ߕߋ߬ߟߋ߫ ߂ ߟߋ߬ ߡߊ߬߸ ߞߍߒߞߊ߲ߠߌ߲߫ ߞߏ ߘߏ߫ ߘߐ߫، ߒ߬ߓߊ߬߸ ߓߟߏ߫ ߓߘߊ߫ ߓߐ߫ ߖߌ߯ߓߊ߫ ߡߟߌ߬ߡߣߏ߬ ߘߐ߫ ߓߌ߬ ߞߎߣߎ߲ߟߏ߲ ߣߌ߲߬ ߡߊ߬ ߂߀߂߅ ߞߏ߲ߓߌߕߌ߮ ߕߟߋ߬߸ ߞߟߍ߬ߕߌ߯ ߓߊ߬ߟߊ߫ ߛߊ߬ߡߎߙߊ߬ ߟߊ߫ ߕߍߓߊ߯ߦߊ߫ ߢߌߡߦߊ ߞߏߛߐ߲߬، ߕߍ߮ ߞߍ ߖߌ߯ߓߊ ߘߐ߫ ߣߌ߲߬ ߢߊ߸ ߏ߬ ߛߊߓߎ ߞߍߣߍ߲߫ ߊ߬ ߣߌ߫ ߡߊ߭ߦߊ߬ ߞߊ߬ߓߊ ߟߊ߫ ߝߐߢߐ߲߯ߞߐ ߟߋ߬ ߘߌ߫.
ߝߐ߰ߓߍ߬ߦߊ߬ߟߊ߫ ߖߌ߯ߓߊ߫ ߡߟߌ߬ߡߣߏ߬߸ ߍߛߑߔߊߛߌ߬ ߞߎߡߊߛߏ ߟߊߡߍ߲ߓߊ߮ ߟߎ߬ ߣߴߊ߬ ߖߌ߬ߦߊ߬ߞߊ߲߬ߛߏ ߘߐߜߍߓߊ߮ ߟߎ߬ ߞߵߊ߬ ߡߊߟߐ߲߫ ߞߏߛߓߍ߫߸ ߓߊߏ߬ ߊ߬ ߕߘߍ߬ ߜ߭ߊߙߊ߲߫ ߖߋ߳ߟ ߞߟߋߞߟߋ ߢߊ߰ߘߐ߬ߘߌ߬ߦߊ߬ߟߊ ߘߏ߫ ߟߋ߬ ߘߌ߫، ߊ߬ ߕߍ߬ߘߍ߫ ߟߊ߬ߡߙߊ ߘߐ߫ ߞߟߍ߬ߡߐ߰ߘߊ ߞߕߌߞߏ ߟߎ߬ ߘߐߛߏ߯ߙߋ ߗߋߕߌ߯ߘߊ ߟߊ߫߸ ߊ߬ ߓߐ߫ ߘߊ߫ ߦߋ߲߬ ߓߌ߬ ߞߎߣߎ߲ߟߏ߲ ߣߌ߲߬ ߡߊ߬ ߞߏ߲ߓߌߕߌ߮ ߕߟߋ߬ ߈، ߣߌ߲߬ ߞߍߣߴߊ߬ ߡߊ߬ ߞߘߐߓߐߟߌ ߟߋ߬ ߘߌ߫߸ ߓߊ߬ߙߵߊ߬ ߞߎ߲߬ߠߊ߬ߦߋ߬ߙߋ߲߬ߣߴߊ߬ ߘߐ߫߸ ߊ߬ ߟߊ߫ ߞߎߡߊ ߞߵߏ߬ ߟߋ ߦߌ߬ߘߊ߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫߸ ߊ߬ ߓߌ߬ߟߊ ߞߐ ߣߌ߲߬ ߘߐ߫: <<ߒ ߧߋ߫ ߛߐ߰ ߟߊ߫ ߊߟߊ߫ ߕߊ߲߬ߘߏ ߟߋ߬ ߡߊ߬߸ ߏ߬ ߡߍ߲ ߦߋ߫ ߛߎ ߣߌ߫ ߕߋ߬ߟߋ ߕߌ߱ ߘߌ߫، (…) ߌ ߕߴߌ ߖߍ߬ߘߍ߫ ߓߙߍ߬ ߟߐ߲߫ ߠߊ߫߸ ߝߏ߫ ߣߌ߫ (ߞߘߐߓߐߟߌ) ߞߏ߫ ߞߵߌ ߛߐ߬ߘߐ߲߬.>> ߊ߬ ߞߵߏ߬ ߟߋ ߝߐ߫ ߞߎߡߊߓߘߎ ߟߊ߫.
ߊ߬ ߞߊ߬ ߕߊ߲߬ߘߏ߬ߟߌ ߟߊߛߋ߫ ߡߐ߰ ߟߎ߫ ߡߊ߬߸ ߡߍ߲ ߠߎ߬ ߞߵߊ߬ ߞߐߡߊߓߌ߲ߓߌ߲߫ ߜߟߍ߬ߦߊ ߣߌ߲߬ ߘߐ߫߸ ߡߐ߱ ߟߎ߫ ߞߵߊ߬ ߦߌ߬ߘߴߊ߬ ߟߊ߫ ߢߊ ߡߍ߲ ߞߏ߫ ߊ߬ ߟߊ߫ ߞߏ ߕߴߊ߬ߟߎ߬ ߓߟߏ߫ ߞߏߣߍ߲߫ ߘߌ߫߸ ߊ߬ ߞߵߏ߬ ߕߊ߲߬ߘߏ߬ߟߌ ߟߊߛߋ߫، <<ߒ ߧߋ߫ ߓߍ߲߬ߛߋ߲߬ߡߊ߬ ߞߋߟߋ߲ ߣߌ߲߬ ߕߣߐ߬ߓߐ߬ ߟߊ߫ ߞߊ߬ ߖߌ߬ߣߍ߬ߞߊ ߟߎ߫ ߝߏ߬߸ ߞߊ߬ ߓߍ߯ ߟߊߘߍ߬ߣߍ߲ ߝߏ߬߸ ߞߊ߬ ߝߐ߰ߓߍ߬ߦߊ߬ߟߊ ߟߎ߫ ߝߏ߬߸ ߊ߬ ߣߌ߫ ߖߌ߬ߣߍ߬ ߘߋ߲ߡߌߛߍ߲ ߠߎ߬߸ ߡߍ߲ ߠߎ߬ ߡߊ߫ ߛߍ߰ ߊ߬ߟߎ߬ ߟߊ߫ ߞߐߡߊߓߌ߲ߓߌ߲ߠߌ߲ ߡߙߌߦߊ ߘߐ߫߸ ߊ߬ ߣߴߊ߬ ߡߊ߬ߤߌ߬ߣߊ߬ ߟߊ߬ߡߌߘߊ ߘߐ߫، ߒ ߓߘߴߊ߬ ߟߐ߲߫ ߞߏ߫ ߖߊ߰ ߒ ߞߋߟߋ߲߫ ߕߎ߲߬ ߕߍ߫ ߘߐ߲߭ ߘߐ߫، ߏ߬ ߟߋ ߞߏߛߐ߲߬߸ ߒ ߘߴߊ߬ ߝߐ߫ ߞߏ߫ ߊߟߎ߫ ߣߌ߫.>> ߖߌ߯ߓߊ ߞߵߏ߬ ߟߋ ߝߐ߫ ߊ߬ ߟߊߓߐߣߍ߲ ߞߐ ߢߌ߲߬ ߠߋ߬ ߘߐ߫.
ߣߌ߲߬ ߞߏ ߘߊߡߌ߬ߣߊ߬ ߘߊ߫ ߞߌߔߋ߬ ߟߊ߬߸ ߞߏ߲ߓߌߕߌ߮ ߕߟߋ߬ ߁߭ ߡߊ߬ ߞߐߣߊߞߙߌ߫ ߞߣߐ߫، ߘߊߘߛߐߛߐߟߌ ߟߋ߬ ߘߏ߲߬ߣߴߊ߬ ߣߌ߫ ߡߊ߭ߦߊ߬ ߞߊ߬ߓߊ ߕߍ߫߸ ߓߊߛߌ߫ ߝߙߋߟߊ ߏ߬ ߡߍ߲ ߡߊߟߐ߲ߣߍ߲߫ ߡߐ߰ ߛߌߦߊߡߊ߲߫ ߓߟߏ߫ ߘߍ߬ߞߙߏߝߏ ߞߊ߲߬߸ ߊ߬ ߟߐ߲ߣߍ߲߫ ߝߣߊ߫ ߞߏ߫ ߊ߬ ߣߌ߫ ߥߊ߯ߕߌ ߣߌ߲߬ ߖߡߊ߬ߣߊ߬ ߢߍߡߐ߮ ߟߎ߬ ߛߎ߬ߘߎ߲߬ߡߊ߲߬ ߢߐ߲߯ ߠߊ߫ ߜߐߞߎ߫،ߝߐ߰ߓߍ߬ߦߊ߬ߟߊ ߡߊߛߎ߬ߘߎ߲߬ߧߊ߬ ߡߐ߮ ߘߏ߫ ߟߎ߫ ߟߊ߫ ߞߎߡߊ߫ ߘߐ߫߸ ߞߏ߫ ߖߌ߯ߓߊ ߡߟߌ߬ߡߣߏ߫ ߞߊ߬ ߞߎߡߊ ߟߋ߬ ߟߊߓߐ߫ ߡߊ߭ߦߊ߬ ߞߊ߬ߓߊ ߡߊ߬߸ ߞߵߊ߬ ߖߙߊ߬ߞߌ߫ ߊ߬ ߟߊ߫ ߞߎߡߊ߫ ߝߐߣߍ߲ ߘߏ߫ ߟߎ߫ ߞߏߛߐ߲߬ ߝߐ߰ߓߍ߬ߦߊ߬ߟߊ߫ ߡߊ߬ߡߎߘߎ߬ ߓߊߓߌߟߊ߫ ߞߋߕߊ߬ ߛߐ߬ߘߐ߲߬ ߝߊ ߡߌ߬ߘߊ ߞߐߝߍ߬ ߒߛߙߍߜߘߍ߬߸ ߓߊߓߌߟߊ߫ ߏ߬ ߡߍ߲ ߦߋ߫ ߓߊߦߌ߲ߓߊߦߌ߲ߣߍ߲߫ ߕߋ߲߬ ߞߊ߬ߣߌ߲߬، ߞߊ߬ߕߎ߲߯߸ ߡߊ߭ߦߊ߬ ߞߵߊ߬ ߦߌ߬ߘߊ߫ ߟߋ߬ ߏ߬ ߞߏ ߘߐ߫ ߞߏ߫ ߓߊߓߌߟߊ߫ ߞߊ߲߫ ߞߏ߫ ߊ߬ <<ߝߊ߬ ߓߘߊ߫ ߕߎߣߎ߲߫>> ߓߊ߬ߙߌ߬ ߞߏ߫ ߓߊߓߌߟߊ߫ ߡߊ߫ <<ߣߌ߲߬ ߢߐ߲߰ ߥߎߦߊ߫ ߝߐ߫ ߡߎߣߎ߲߬>> ߊ߬ ߞߵߏ߬ ߝߐ߫ ߖߌ߬ߦߊ߬ߖߟߎ ߘߏ߫ ߟߋ߬ ߘߐ߫ ߦߟߍߓߊߘߐߕߋ ߘߌ، ߝߏ߫ ߞߵߊ߬ ߦߌ߬ߘߊ߬ ߞߏ߫ ߓߊߓߌߟߊ߫ <<ߝߊ߬ ߟߊ߫ ߕߙߐߛߌ ߔߌ߯ߟߌ ߟߋ߬ ߓߊ߲ߣߍ߲߫ (…) ߊ߬ ߦߋ߫ ߥߴߊ߬ ߖߍ߬ߘߍ߫ ߛߐ߬ߘߐ߲߫ ߞߐ߬ߟߐ߲ ߞߣߐ߫.>> ߒ߬ߓߊ߬߸ ߏ߬ ߟߋ ߞߎߡߊ ߟߊߓߐߣߍ߲߫ ߖߌ߯ߓߊ ߓߟߏ߫ ߡߊ߭ߦߊ߬ ߡߊ߬߸ ߞߵߊ߬ ߟߊߟߌ߫ ߞߵߊ߬ ߦߌ߬ߘߴߊ߬ ߟߊ߫ ߞߏ߫: <<ߝߘߊ߬ߝߌ߲߬ߠߊ߬ ߞߣߐ߫ ߦߊ߲߬߸ ߣߌ߫ ߡߐ߰ߓߊ ߕߎߣߎ߲߫ ߘߊ߫ ߣߌ߲߬ ߢߊ߸ ߊ߲ ߣߌ߫ ߡߊ߬ߤߌ߬ߣߊ߬ ߟߊ߬ߡߌߘߊ ߟߋ߬ ߞߊ߫ ߞߊ߲߫ ߏ߬ ߞߏ ߘߐ߫ ߞߊ߬ ߕߊ߬ߡߌ߲߬ ߞߏ ߓߍ߯ ߞߊ߲߬، ߏ߬ ߘߐ߫ ߌ ߞߊ߬ ߡߍ߲ ߞߍ߫ ߏ߬ ߘߌ߫߸ ߏ߬ ߜߊ߬ߣߍ߲߫ ߠߋ߬ ߡߐ߰ ߛߌߦߊߡߊ߲߫ ߠߊ߫.>> ߞߎߡߊ ߣߌ߲߬ ߛߐ߬ߘߐ߲߬ ߘߊ߫ ߡߟߌ߬ߡߣߏ߫ ߡߊߛߎ߬ߘߎ߲߬ߧߊ߬ ߡߐ߮ ߘߏ߫ ߟߎ߫ ߟߋ߬ ߟߊ߫ ߘߡߌߦߏ ߝߐ߰ߓߍ߬ߘߊ ߡߊ߬ߣߊߡߊ߬.
ߒ߬ߓߊ߬߸ ߏ߬ ߟߋ ߞߏ ߞߟߊߦߊߣߍ߲߫ ߡߊ߭ߦߊ߬ ߣߌ߫ ߖߌ߯ߓߊ ߕߍ߫߸ ߝߏ߫ ߡߊ߭ߦߊ߬ ߞߊ߬ ߞߎߡߊߢߐ߲߯ߦߊ ߏ߬ ߖߌ߬ߦߊ߬ߖߟߎ߬ߦߊ ߘߊߡߌ߬ߣߊ߬߸ ߞߊ߬ ߕߊ߯ ߊ߬ ߡߊߞߊ߬ߛߌ߬ ߖߌ߯ߓߊ߫ ߡߟߌ߬ߡߣߏ߫ ߞߊ߲߬ <<ߜߍߘߐ߫ ߖߓߍߟߌ ߣߌ߫ ߞߍߒߞߊ߲ߠߌ߲ ߞߏߛߐ߲߬.>>
ߏ߬ ߘߎ߰ߛߊ߬ߜߍ ߞߏ߲ߓߌߕߌ߮ ߕߋ߬ߟߋ߫ ߂ ߡߊ߬߸ ߡߟߌ߬ߡߣߏ߬ ߡߊߞߟߌ߫ ߘߊ߫ ߞߊ߬ ߥߴߊ߬ ߘߌ߫ ߞߌߔߋ߬ ߞߟߍ߬ߡߐ߰ߘߊ ߟߊ߫߸ ߞߣߊ߬ߕߏ߫ ߊ߬ ߟߊߕߊ߯ ߟߊ߫ ߝߊ߬ߛߏ ߞߟߍ߬ߡߐ߰ߘߊ ߡߊ߬ߡߙߊ߬ߟߌ߬ ߛߊ߲ߘߐߕߊ ߟߊ߫߸ ߕߍߝߐ߫ ߞߊ߲ߡߊ߬ ߡߐ߰ ߝߌ߬ߟߊ ߢߌ߲߬ ߠߎ߬ ߣߌ߫ ߢߐ߲߯ ߕߍ߫.
ߏ߬ ߟߋ ߞߍ߫ ߘߊ߫ ߖߌ߯ߓߊ߫ ߡߟߌ߬ߡߣߏ߬ ߟߊ߫ ߢߟߊߥߛߎ ߘߊߡߌ߬ߣߊ߬ߣߍ߲ ߘߌ߫߸ ߘߐ߬ߢߌ߬ߣߌ߲߬ߞߊ߬ߟߌ߬ ߛߌߦߊߡߊ߲ ߠߎ߬ ߕߎ߲߰ ߘߊ߫ ߏ߬ ߟߋ ߟߊ߫، ߓߊߏ߬߸ ߊ߬ ߕߘߍ߬ ߞߎߡߊ ߘߐ߫߸ ߞߏ߫ ߖߌ߯ߓߊ ߣߌ߫ ߞߐߘߏ߲ߓߊ߮ ߘߏ߫ ߟߎ߫ ߓߟߏ ߦߋ߫ ߢߐ߲߯ ߓߟߏ߫߸ ߊ߬ ߣߌ߫ ߞߏ߫ ߊ߬ ߦߋ߫ ߘߏ߫ ߞߊ߬ߟߊߡߊ߬ ߓߊߓߌߟߊ߫ ߟߊ߫ ߞߏ ߘߐ߫، ߞߏ߲ߓߌߕߌ߮ ߕߟߋ߬ ߆ ߟߋ߬ ߡߊ߬ ߛߊ߫߸ ߊ߬ ߟߊߕߊ߯ ߘߊ߫ ߞߊߟߎߡ ߞߕߌߘߊ ߟߊ߫߸ ߓߊ߬ߙߌ߬ ߞߕߌ߫ ߡߊ߫ ߛߌ߰ ߛߋ߲߬ߠߊ߫ ߦߋ߲߬، ߊ߬ ߟߊߛߊ߬ߦߌ߲߬ ߘߊ߫ ߝߊ߬ߛߏ ߞߟߍ߬ߡߐ߰ߘߊ ߟߊ߫߸ ߏ߬ ߞߏ߬ߣߌ߲ ߞߎ߲߬ ߡߊ߫ ߝߐ߫.
ߞߏ ߕߏߣߍ߲߫ ߏ߬ ߢߊ ߟߋ߬ ߡߊ߬ ߣߌ߲߬ ߛߊ߫߸ ߞߟߍ߬ߕߌ߯ ߓߊ߬ߟߊ߫ ߛߊ߬ߡߎߙߊ߬ ߡߍ߲ ߦߋ߫ ߝߊ߬ߛߏ ߞߟߍ߬ߡߐ߰ߘߊ ߡߙߊ߬ߓߊ߰ ߛߊ߲ߘߐߕߊ ߘߌ߫߸ ߏ߬ ߛߋ߫ ߘߊ߫ ߘߏ߫ ߝߐ߫ ߟߴߊ߬ߟߎ߬ ߕߍ ߘߐ߫، ߞߎߡߊ ߘߌ߫ ߘߊ߫ ߡߊ߭ߦߊ߬ ߣߌ߫ ߖߌ߯ߓߊ ߡߟߌ߬ߡߣߏ߫ ߡߊ߬ ߓߊ߬ߟߊ ߛߊ߬ߡߎߙߊ߬ ߟߊ߫ ߛߓߍߘߊ ߟߊ߫ ߦߋ߲߬، ߊ߬ ߞߏ߬ߣߌ߲ ߡߊ߫ ߟߐ߲߫߸ ߓߍ߲߬ ߞߍ߫ ߘߊ߫ ߡߍ߲ ߞߋߟߋ߲߫ ߡߊ߬ ߦߋ߲߬ ߣߴߊ߬ ߞߏ ߛߋ߫ ߘߊ߫ ߓߊ߲߫ ߠߊ߫، ߝߐ߰ߓߍ߬ߦߊ߬ߟߊ߫ ߖߌ߯ߓߊ ߟߊ߫ ߟߊ߬ߝߛߊ߬ߟߌ߬ߟߊ ߞߊ߬ߙߊ߲߬ߡߐ߯ ߘߊ߬ߝ߭ߌߘ ߓߋߦߊߝ߭ߏߖߌ߫ ߞߵߊ߬ ߦߌ߬ߘߊ߬ ߞߏ߫ ߘߏ߬ߣߌ߲߬ ߝߏߦߌ߬ ߞߏ߬ߣߌ߲ ߡߊ߫ ߟߴߊ߬ ߟߊ߫ ߟߊ߬ߝߛߊ߬ߕߊ ߞߎ߲߬ ߢߊߖߎ߯ ߢߊ߫ ߢߌߡߊ߫.
ߛߋߟߎ߫ ߘߊߟߍ߲߬ ߖߊߟߏ߫ ߓߍ߯ ߞߎߡߊ߫ ߘߊ߫ ߟߋ߬ ߣߌ߲߬ ߞߏ ߘߐ߫߸ ߏ߬ ߡߍ߲ ߞߵߊ߬ ߦߌ߬ߘߊ߬ ߞߏ߫ ߖߌ߯ߓߊ ߡߟߌ߬ߡߣߏ߫ ߡߌ߬ߘߊ ߣߌ߲߬ ߦߋ߫ <<ߛߊ߬ߙߌ߬ߦߊ߬ ߓߊߖߎ ߟߎ߬ ߛߐ߬ߛߐ߬ ߢߊ߬ ߖߎ߰ߓߊ߫>> ߟߋ߬ ߘߌ߫، ߊ߬ ߞߵߏ߬ ߟߋ ߛߓߍ߫ ߊ߬ ߟߊ߫ ߝߍߛߑߓߎߞ ߖߊ߬ߕߋ߬ߘߊ ߟߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
