߁߉߅߈ ߞߏ߲ߓߌߕߌ߮ ߕߋ߬ߟߋ߫ ߂ ߟߋ߬ ߡߊ߬߸ ߖߌ߬ߣߍ߫ ߞߵߊ߬ ߟߊ߫ ߢߊ߬ߡߊ߲ ߘߏ߫ ߟߊߥߟߌ߬߸ ߣߴߏ߬ ߦߋ߫ ߓߟߏߡߐ߯ߦߊ ߢߊ߬ߡߊ߲ ߘߌ߫߸ ߞߵߊ߬ ߟߊ߫ ߖߘߍ߬ߕߌ߰ߦߊ ߕߊ߬ ߘߏߦߌ߲߫، ߞߵߊ߬ ߕߊ߬ ߏ߬ ߡߊ߬ ߞߵߊ߬ ߛߌ߰ ߢߌ߬ߣߊ߲߬ ߠߊ߫߸ ߏ߬ ߛߊ߲߬ ߆߇ ߟߋ߬ ߕߋ߲߬߸ ߊ߬ ߟߏ߲ ߞߎ߲߬ߢߐ߲߮ ߓߊ߯ ߛߋ߫ ߞߏߕߊ߲߬߸ ߊ߬ ߦߋ߫ ߖߡߊ߬ߣߊߘߋ߲ ߠߎ߬ ߦߟߌ ߟߊߛߋ߫ ߟߊ߫ ߟߏ߲ߓߊ ߘߏ߫ ߟߋ߬ ߡߊ߬߸ ߣߴߏ߬ ߦߋ߫ ߓߌߟߏ߲ ߘߌ߫ ߛߊ߲߬ߥߟߊ ߟߎ߬ ߞߣߐ߫߸ ߏ߬ ߡߍ߲ ߞߍ߫ ߘߊ߫ ߖߡߊ߬ߣߊ ߟߊ߫ ߞߍߒߖߘߍߘߌ ߛߌߟߊ ߕߊ߯ߡߊ ߘߊߡߌ߬ߣߊ߬ ߟߏ߲ ߘߌ߫.
ߞߏ߲ߓߌߕߌ߮ ߕߋ߬ߟߋ߫ ߂ ߓߍ߲߬ ߘߊ߫ ߓߌߟߏ߲ ߘߏ߫ ߟߋ߬ ߡߊ߬ ߁߉߅߈ ߠߊ߫߸ ߏ߬ ߡߍ߲ ߓߘߊ߫ ߓߌ߬ߟߊ߫ ߘߐ߬ߝߐ ߞߣߐ߫߸ ߞߊ߬ ߞߍ߫ ߓߌߟߏ߲߫ ߘߌ߫߸ ߖߌ߬ߣߍ߬ ߟߊ߫ ߖߘߌ߬ߕߌ߰ߦߊ ߓߌߟߏ߲، ߏ߬ ߟߏ߲ ߠߋ߬߸ ߛߋߞߎ߬ ߕߎ߬ߙߋ ߟߊ߫ ߞߎߡߊߣߍ߲߫ ߢߊ߬ߡߊ߲߬ߕߐ ߞߐߝߟߌ ߦߋ߫ ߘߊ߫߸ ߊ߬ߟߋ ߡߍ߲ ߞߵߊ߬ ߦߌ߬ߘߊ߬ ߘߋߜ߭ߏߟ ߟߊ߫ ߓߙߊߡߊߖߊ߲ߓߊ߲ ߝߍ߬߸ ߞߏ߫ ߖߌ߬ߣߍ߫ ߥߞߊ߬ߟߌ߬ߣߍ߲߫ <<ߞߊ߲ߠߊߓߌߟߊ ߟߊ߫ ߓߟߏߞߏߏߟߏ߲ߧߊ ߘߐ߫߸ ߝߋ߲ߕߌ߯ߦߊ ߞߊ߲߬ ߖߐ߲߬ߧߊ ߘߐ߫.>> ߏ߬ ߟߋ ߞߍ߫ ߘߊ߫ ߞߊ߬ߝߏ߫ ߖߘߍ߬ߕߌ߮ ߕߌ߲߭ ߥߟߌ߬ ߟߏ߲ ߘߌ߫ ߁߉߅߈ ߘߓߊ߬ߓߌߟߊ ߟߊ߫، ߞߊ߬ ߞߏ߲ߓߌߕߌ߮ ߕߋ߬ߟߋ߫ ߂ ߞߍ߫ ߊ߬ ߡߏߦߌ߫ ߟߏ߲ ߘߌ߫߸ ߞߊ߬ ߖߌ߬ߣߍ߬ ߞߍ߫ ߝߊ߬ߙߊ߲߬ߛߌ߬ ߟߊ߫ ߊߝߙߌߞߌ߬ ߖߐ߲߬ ߖߡߊߣߊ ߟߎ߬ ߘߐ߫ ߝߟߐߡߊ ߘߌ߫߸ ߡߍ߲ ߞߵߊ߬ ߟߊ߫ ߖߘߍ߬ߕߌ߰ߦߊ ߕߊ߬߸ ߞߊ߬ ߥߙߎߣߍߦߊ ߖߟߐ߬ߞߐ ߘߐߕߍ߰.
ߞߊ߬ߦߌ߯ ߞߊ߬ߣߌ߲ ߛߊ߬ ߘߊ߫ ߣߌ߲߬ ߟߏ߲߸ ߞߏ߲ߓߌߕߌ߮ ߕߋ߬ߟߋ߫ ߂ ߦߋ߫ ߓߍ߲߬ ߓߌߟߏ߲ ߡߊ߬߸ ߏ߬ ߡߊ߲߫ ߛߌߦߊ߫، ߝߏ߫ ߛߋ߲߬ߢߊ߬ ߘߊ߲ߘߐ߫: ߁߉߆߉، ߁߉߇߅، ߁߉߈߀، ߁߉߈߆، ߁߉߉߇، ߂߀߀߃، ߂߀߀߈، ߂߀߁߄߸ ߊ߬ ߣߌ߫ ߂߀߂߅ ߕߊ ߡߍ߲ ߣߊ߬ߕߐ߫ ߣߌ߲߬. ߊ߬ ߓߍ߲߬ߢߐ߲߰ߡߊ ߡߊ߲߫ ߛߌߦߊ߫߸ ߊ߬ ߦߋ߫ ߞߍ߫ ߟߊ߫ ߥߊ߯ߕߌ߫ ߣߌ߫ ߥߊ߯ߕߌ߫ ߟߋ߬߸ ߓߊߏ߬ ߛߊ߲߬ ߆߇ ߣߌ߲߬ ߞߣߐ߫߸ ߊ߬ ߓߘߊ߫ ߞߍ߫ ߛߋ߲߬ߧߊ߫ ߞߐ߬ߣߐ߲߬ߘߐ߫ ߟߋ߬.
߁߉߆߉ ߟߊ߫߸ ߖߌ߬ߣߍ߫ ߥߎ߬ߦߊ߲߬ߞߌ߬ߟߌ ߕߋ߬ߟߋ ߏ߬ ߘߐ߫߸ ߞߏ߲ߓߌߕߌ߮ ߕߋ߬ߟߋ߫ ߂ ߓߍ߲߬ ߘߊ߫ ߓߌߟߏ߲ ߠߋ߬ ߡߊ߬، ߁߉߇߅ ߟߊ߫߸ ߞߙߎߞߊ߫ ߞߋߟߋ߲ߧߊ ߕߎ߬ߡߊ ߏ߬ ߟߊ߫ ߖߐ߫߸ ߞߵߊ߬ ߛߐ߬ߘߐ߲߬ ߕߋߙߌ ߘߏ߫ ߟߎ߫ ߓߊ߲߬ߣߴߊ߬ ߘߐ߫߸ ߏ߬ ߞߏ߲ߓߌߕߌ߮ ߕߋ߬ߟߋ߫ ߂ ߓߍ߲߬ ߘߊ߫ ߓߌߟߏ߲ ߠߋ߬ ߡߊ߬، ߁߉߈߀ ߓߊ߬߸ ߁߉߈߆ ߓߊ߬߸ ߞߊ߲ߕߌ߯ ߛߋߞߎ߬ ߟߊ߫ ߛߊ߬ߦߊ ߞߍ߫ ߘߊ߫ ߕߍߟߊ ߏ߬ ߡߍ߲ ߘߐ߫߸ ߛߊ߲߭ ߝߌ߬ߟߊ ߏ߬ ߓߍ߯ ߞߏ߲ߓߌߕߌ߮ ߕߋ߬ߟߋ߫ ߂ ߓߍ߲߬ ߘߊ߫ ߓߌߟߏ߲ ߠߋ߬ ߡߊ߬، ߂߀߀߃ ߟߊ߫߸ ߊ߬ ߣߌ߫ ߂߀߀߈ ߠߊ߫߸ ߛߊ߲߭ ߝߌ߬ߟߊ ߏ߬ ߝߣߊ߫ ߞߏ߲ߓߌߕߌ߮ ߕߋ߬ߟߋ߫ ߂ ߓߍ߲߬ ߘߊ߫ ߓߌߟߏ߲ ߠߋ߬ ߡߊ߬، ߂߀߁߄ ߠߊ߫߸ ߋߓߏߟߊ߫ ߞߏߏ ߖߊߡߊ߲߫ ߥߊ߫ߕߌ ߏ߬ ߖߐ߫߸ ߏ߬ ߝߣߊ߫ ߞߏ߲ߓߌߕߌ߮ ߕߋ߬ߟߋ߫ ߂ ߓߍ߲߬ ߘߊ߫ ߓߌߟߏ߲ ߠߋ߬ ߡߊ߬.
ߒ߬ߓߊ߬߸ ߛߋ߫ ߓߘߊ߫ ߞߍ߫ ߂߀߂߅ ߟߋ߬ ߝߣߊ߫ ߘߐ߫ ߣߌ߲߬߸ ߏ߬ ߞߏ߲ߓߌߕߌ߮ ߕߋ߬ߟߋ߫ ߂ ߟߋ߬ ߛߌߣߌ߲߫ ߘߌ߫߸ ߏ߬ ߓߍߣߊ߬ ߓߍ߲߬ ߓߌߟߏ߲ ߠߋ߬ ߡߊ߬، ߖߌ߬ߣߍ߬ ߟߊ߫ ߖߘߍ߬ߕߌ߰ߦߊ ߛߊ߲߬ߞߎ߲߬ߢߐ߲߮ ߓߊ߯ ߛߋ߫ ߞߏߕߊ߲߫߸ ߏ߬ ߦߋ߫ ߡߙߌ ߟߎ߬ ߟߊߖߌ߰ ߟߊ߫ ߛߍ߰ ߞߍߣߍ߲߫ ߞߘߐ ߟߎ߬ ߘߐ߫߸ ߡߍ߲ ߞߍ߫ ߘߊ߫ ߖߘߍ߬ߕߌ߰ߦߊ߬ ߢߌߣߌ߲ ߘߐ߫، ߓߊ߬ߙߌ߬ ߣߴߊ߬ ߓߍ߲߬ ߘߊ߫ ߓߌߟߏ߲ ߝߣߊ߫ ߡߊ߬߸ ߏ߬ ߦߋ߫ ߕߊ߬ߡߌ߲߬ ߠߊ߫ ߡߙߌ ߟߎ߬ ߟߊߖߊ߲߬ߝߊ߲߬ ߟߊ߫ ߟߋ߬ ߞߏߞߎߘߊ߫.
ߒ߬ߓߊ߬߸ ߢߌ߬ߣߊ߲߬ ߕߊ ߣߌ߲߬ ߓߍ߲߭ ߓߌߟߏ߲ ߡߊ߬߸ ߏ߬ ߞߊ߫ ߞߊ߲߫ ߞߊ߬ ߓߍ߯ ߟߐ߬ ߢߌ߬ߣߌ߲߬ߞߊ߬ߟߌ߫ ߟߋ߬ ߞߍ߫ ߟߴߊ߬ ߖߍ߬ߘߍ ߞߎ߲߬߸ ߡߎ߲߬ ߓߘߊ߫ ߛߋ߫ ߞߍ߫ ߟߊ߫ ߖߘߍ߬ߕߌ߰ߦߊ ߛߊ߲߬ ߆߇ ߣߌ߲߬ ߞߣߐ߫߸ ߡߎ߲߬ ߡߊ߫ ߛߋ߫ ߞߍ߫ ߟߊ߫؟ ߘߎ߬ߘߐ߬ߝߋ߲ ߠߎ߬ ߖߘߌߥߊ ߣߴߊ߬ ߕߊ߫߸ ߘߋ߲ߡߌߛߍ߲ ߠߎ߬ ߛߌߦߊߦߊ ߣߴߊ߬ ߕߊ߫߸ ߞߊ߬ߙߊ߲߬ߠߊ ߟߎ߬ ߛߌߦߊߦߊ ߣߴߊ߬ ߕߊ߫߸ ߡߎ߲߬ ߕߏߣߍ߲߫؟ ߡߎ߲߬ ߞߍߣߍ߲߫؟ ߡߎ߲߬ ߡߊ߫ ߞߍ߫.
ߊ߲ ߧߴߊ߲ ߠߊ߫ ߘߝߐ߬ߦߊ߬ߟߊ ߟߎ߫ ߝߏ߬ ߟߊ߫ ߣߌ߲߬ ߦߙߐ ߘߐ߫߸ ߥߎ߬ߦߊ߲߬ߞߌ߬ߟߌ߫ ߝߊ߬ ߛߏ߬ߙߌ߫ ߡߊ߲߬ߘߋ߲߬ߞߊ߫ ߞߊ߬ߓߊ ߦߴߏ߬ ߘߏ߫ ߟߋ߬ ߘߌ߫߸ ߏ߬ ߡߍ߲ ߓߘߊ߫ ߡߐ߱ ߟߎ߬ ߡߊߞߟߌ߫ ߛߌ߯ߙߌ߲߫ ߛߌߣߌ߲߫ ߞߏ߲ߓߌߕߌ߮ ߕߋ߬ߟߋ߫ ߂ ߡߊ߬߸ ߞߏ߫ ߓߍ߯ ߦߋ߫ ߓߐ߫߸ ߡߍ߲ ߺ ߍ ߺ ߡߍ߲߫ ߦߋ߫ ߒߞߏ ߛߍ߬ߘߏ߲߬ߠߊ߫ ߘߌ߫ ߛߌߣߌ߲߫߸ ߞߏ߫ ߓߍ߯ ߥߊ߫ ߛߐ߬ߘߐ߲߬ ߓߙߊߓߐ ߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
