ߝߘߊ߬ߝߌ߲߬ ߞߊ߲ ߠߎ߬ ߟߊ߫ ߢߝߍߕߊ߯ߟߌ ߞߍ ߞߐ߫ ߜߊ߬ߙߊ ߣߌ߲߬ ߤߊߡߊߣߊ߲ߞߏ ߘߌ߫߸ ߏ߬ ߟߋ ߞߊ߬ ߒߞߏ ߗߋߘߋ߲ ߠߎ߬ ߓߐ߫ ߡߊ߲߬ߘߋ߲߫ ߖߡߊ߬ߣߊ߬ ߛߌߦߊߡߊ߲߫ ߞߣߐ߫ ߞߊ߬ ߜߋ߲ߞߐ߰ߖߌ߬ߘߊ ߡߊߜߍ߲߫، ߘߊ߲߬ߕߍ߰ߟߌ ߛߋ߫ ߘߊ߫ ߞߍ߫ ߟߊ߫ ߘߎ߰ ߛߌߦߊߡߊ߲߫ ߓߟߏ߫ ߓߌ߬߸ ߏ߬ ߡߍ߲ ߦߋ߫ ߜߊ߬ߙߊ ߟߏ߲߫ ߝߟߐ ߢߍߥߟߊ ߘߌ߫ ߞߊ߬ߣߌ߲߬.
ߜߊ߬ߙߊ ߣߌ߲߬ ߟߊߝߟߐ߫ ߘߊ߫ ߡߐ߰ߓߊ߬ ߡߊߞߟߌߣߍ߲ ߠߎ߬ ߟߊ߫ ߓߋߟߋ߲ߠߊ ߟߋ߬ ߡߊ߬߸ ߞߵߏ߬ ߟߊߕߎ߲߰ ߖߡߊ߬ߣߊ߬ ߛߣߍߣߍ߲ ߠߎ߬ ߟߊ߫ ߘߊ߲߬ߕߍ߰ߟߌ ߟߊ߫ ߛߊ߫، ߏ߬ ߟߋ ߘߐ߫߸ ߒߞߏ ߛߍ߬ߘߏ߲߬ߠߊ߫ ߞߐߞߊ߲߫ ߛߌ߯ߓߊ߮ ߟߎ߬ ߣߌ߫ ߝߊ߬ߛߏ߬ߘߋ߲ ߠߎ߬ ߟߊ߫ ߘߍ߬ ߓߟߋߓߟߋ ߡߍ߲ ߕߐ߯ ߞߏ߫ ߡ߃߸ ߏ߬ ߟߊ߫ ߓߋߟߋ߲ߠߊ ߞߊ߬ ߝߏ߬ߟߌ ߟߊߛߋ߫ ߒߞߏ ߕߐ߲߫ ߖߊ߯ߓߡߊ ߛߌ߲߬ߝߏ߲ ߠߎ߬ ߡߊ߬.
ߓߎ߬ߥߊ߬ߞߍ߫ ߒߞߏ ߥߙߎߞߟߌ ߘߍ߭ ߞߟߊ߬ߕߌ߮߸ ߡߊ߬ߡߎߘߎ߬ ߓߊߟߊ߲ߘߎ߯ ߖߊߟߏ߫ ߞߊ߬ ߓߋߟߋ߲ߠߊ߫ ߞߍ߫ ߊ߬ߟߎ߬ ߟߊ߫ ߕߐ߲ ߕߐ߯ ߘߐ߫߸ ߏ߬ ߞߊ߬ <<ߒߞߏ ߥߙߎߞߟߌ ߛߌ߲߬ߝߏ߲߬ߧߊ߬ߟߌ߬ ߖߊ߯ߓߡߊ ߝߏ߬ ߜߙߊ߬ ߛߎ߮ ߣߌ߲߬ ߛߌ߲߬ߝߏ߲߬ߧߊ ߘߐ߫ ߛߊ߲߬ ߺ ߊ ߺ ߛߊ߲߬،>> ߊ߬ ߓߊ߲߫ ߘߊ߫ ߞߵߊ߬ ߟߊ߫ ߛߍߥߊ ߦߌ߬ߘߊ߬ ߒߞߏ ߟߊ߫ ߛߋ߲߬ߕߊ߬ ߞߍߣߍ߲ ߠߎ߬ ߘߐ߫ ߢߎߡߍߙߋ߲ߦߊߟߌ ߛߌߟߊ ߝߍ߬، <<ߒߞߏ ߟߊߘߏ߲߭ ߜ߭ߎߜ߭ߐߟ ߘߟߊߡߌߘߊߟߊ߲ ߞߣߐ߫߸ ߏ߬ ߓߟߏߡߊ߬߸ ߞߵߊ߬ ߓߍ߲߬ ߒߞߏ ߥߙߎߞߟߌ ߛߌ߲߬ߝߏ߲߬ߧߊ߬ߟߌ߬ ߖߊ߯ߓߡߊ ߢߍߥߟߊ ߟߎ߬ ߟߊ߫ ߓߘߍ߬ߦߊ ߡߊ߬߸ ߊ߲ߠߎ߬ ߓߐ߬ߞߋ߬ ߞߊ߬ ߟߎ߬ ߦߴߊ߬ ߞߐߡߊߓߌ߲ߓߌ߲߫ ߠߊ߫ ߁߀߀% ߟߋ߬ ߟߊ߫.>>
ߡߊ߬ߡߎߘߎ߬ ߓߊߟߊ߲ߘߎ߯ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߕߐ߲ ߓߘߊ߫ ߛߋ߫ ߞߏ߫ ߛߌߦߊߡߊ߲߫ ߞߍ߫ ߟߊ߫ ߛߌ߲߬ߝߏ߲߬ߧߊ߬ߟߌ߬ ߞߏ߬ߢߌ߲ ߞߏߛߐ߲߬߸ ߊ߬ߟߎ߬ ߓߘߊ߫ ߛߋ߫ ߞߊ߬ << ߒߞߏ ߟߊߘߏ߲߬ ߝߘߊ߬ߝߌ߲߬ߠߊ߬ ߖߊ߯ߓߘߊ߫ ߘߊߦߟߍ߬ߣߍ߲ ߞߊ߬ߙߊ߲ ߢߍߥߟߊ ߞߣߐ߫ ߂߀߁߈ ߠߊ߫، ߊ߬ ߣߌ߫ ߞߵߊ߬ ߟߊߘߏ߲߬ ߊ߬ߟߎ߬ ߟߊ߫ ߘߎ߲߬ߘߎ߲߬ߡߊ߬ ߞߊߙߊ߲ߕߊ ߢߍߥߟߊ ߟߎ߬ ߞߣߐ߫.>> ߊ߬ ߞߊ߬ ߘߏ߫ ߝߐ߫ ߊ߬ߟߎ߬ ߟߊ߫ ߞߊ߬ߙߊ߲߬ߡߐ߮ ߟߎ߬ ߘߛߍ߫ ߞߏ ߟߎ߫ ߞߊ߲߬ << ߞߊ߬ߙߊ߲ ߢߍߥߟߊ߫ ߞߏ ߘߐ߫߸ ߞߊ߬ߙߊ߲߬ߡߐ߮ ߟߎ߬ ߟߊߞߐ߯ ߞߏ ߘߐ߫߸ ߊ߬ ߣߌ߫ ߟߊ߬ߟߌ߬ߟߌ ߣߴߊ߬ ߢߐ߲߰ߘߐ߫ ߜߘߍ߫ ߟߎ߫.>>
ߡߊ߲ߞߊ ߟߎ߬ ߟߊ߫ ߘߊ߲߬ߕߍ߰ߟߌ ߞߍ߫ ߘߊ߫ ߛߟߏ߬ߡߣߊ߫ ߝߌ߲߬ߡߊ߲ ߛߊ߲ߞߊߙߋ߫ ߟߋ߬ ߓߟߏ߫߸ ߊ߬ߟߋ ߡߍ߲ ߞߊ߬ ߡߐ߰ߓߊ߬ ߛߌߦߊߡߊ߲߫ ߝߏ߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߟߊ߫ ߓߊ߯ߙߊ ߓߍ߯ ߟߊߘߍ߬ߣߍ߲ ߓߎ߲ߓߎ߲ߣߍ߲߫ ߞߊ߬ߙߊ߲߬ ߞߏ ߟߋ߬ ߡߊ߬߸ ߏ߬ ߡߍ߲ ߖߍ߬ߘߍ ߓߘߊ߫ ߞߍ߫ ߕߙߎ߬ ߘߌ߫ <<ߞߊ߬ߙߊ߲߬ ߦߙߐ߬ ߘߌ߲ߞߌߙߊ߫ ߛߓߊ߬ ߓߘߊ߫ ߒߞߏ ߓߌ߬ߟߴߊ߬ߟߎ߫ ߖߍ߬ߘߍ ߛߊ߬ߥߏ߬ ߘߐ߫ ߞߏ߫ ߞߊ߬ ߥߊ߫ ߞߊ߬ߙߊ߲ ߞߍ߫ ߦߋ߲߬ ߝߍ߯ߛߌ߫߸ ߏ߬ ߘߏ߲߬ ߝߣߊ߫ ߦߋ߫ ߓߊ߯ߙߊ߫ ߟߊ߫ ߁߀߀% ߟߊ߫.>>
ߘߣߊߣߋߞߊ ߟߎ߬ ߟߊ߫ ߓߋߟߋ߲ߠߊ ߞߵߊ߬ ߦߌ߬ߘߵߊ߬ߟߎ߬ ߟߊ߫ ߞߊ߲ߕߌ߯ ߛߟߏ߬ߡߣߊ߬ ߞߐ߲ߘߍ߫ ߕߐ߯ ߘߐ߫߸ ߞߏ߫ ߊ߬ߟߎ߫ ߛߍ߰ߣߍ߲߫ ߞߏ߫ ߛߌߦߊߡߊ߲߫ ߘߐ߫، ߏ߬ ߟߋ ߘߐ߫߸ << ߘߣߊߣߍ߫ ߦߋ߫ ߞߊ߬ߛߌ߬ ߟߊ߫ ߞߏ߫ ߡߍ߲ ߘߐ߫ ߓߌ߬߸ ߏ߬ ߟߋ߬ ߥߋ߫ ߒߞߏߞߏ ߘߌ߫߸ ߊ߬ ߜߋ߲ߜߋ߲߫ ߒߞߏ߫ ߞߊߙߊ߲ߡߐ߮ ߟߎ߬ ߟߊ߫ ߟߊ߬ߞߐ߰ߟߌ߬ ߞߏ߸ ߊ߲ ߠߊ߫ ߞߊ߲ߕߌ߮ ߣߴߊ߬ ߣߐ߬ߟߊ ߦߋ߫ ߏ߬ ߞߊ߬ߛߌ ߟߊ߫ ߕߋ߲߬ ߞߏߛߓߍ߫.>>
ߛߜ߭ߍߟߞߊ ߟߎ߬ ߝߣߊ߫ ߟߊ߫ ߓߋߟߋ߲ߠߊ ߞߍ߫ ߘߊ߫ ߥߊ߬ߛߊ ߟߋ߬ ߘߌ߫߸ ߏ߬ ߟߎ߫ ߞߊ߬ ߞߐߙߍ ߓߍ߯ ߟߊߘߍ߬ߣߍ߲ ߥߟߋ߫ ߒߞߏ ߞߊ߬ߙߊ߲ ߠߋ߬ ߡߊ߬، ߞߏ߫: <<ߟߐ߲ߠߌ߲ ߛߐ߬ߘߐ߲ ߛߌߟߊ߫ ߛߎߘߎ߲ ߦߋ߫ ߛߌ߲ߡߌ߲߫ ߞߊ߲ ߠߋ߬ ߘߌ߫.>> ߊ߬ ߞߵߊ߬ ߦߌ߬ߘߊ߬ ߞߏ߫ ߜߊ߬ߙߊ ߣߌ߲߬ ߦߋ߫ <<ߤߊ߲ߞߟߌ߫ ߛߐߘߐ߲߫ ߞߣߍ ߟߋ߬߸ ߢߐ߲߯ ߟߐ߲߫ ߞߣߍ ߟߋ߬߸ ߟߐ߲ߠߌ߲߫ ߢߌߣߌ߲߫ ߦߙߐ ߟߋ߬ ߝߣߊ߫ ߦߋ߫.>>
ߓߙߎߞߌߣߊ߫ ߝߊ߬ߛߏ߬ ߞߐߦߌ߬ߘߊ߬ ߘߊ߫ ߛߟߊߕߌ߯ ߓߘߍ ߘߎ߲ߓߎ߫ ߛߘߊߡߊ߫ ߘߊ߲߬ߓߟߍ߫ ߟߋ߬ ߓߟߏ߫߸ ߊ߬ߟߋ ߡߍ߲ ߞߵߊ߬ ߟߊ߫ ߛߙߊ߬ߣߎ߲ ߘߊߝߟߐ߫ ߕߌ߲ߞߌ ߡߊ߬ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߦߋ߫، ߊ߬ߟߋ ߟߋ߬ ߞߊ߬ ߜߋ߲ߞߐ߰ߖߌ߬ߘߊ ߞߊ߲ߕߌ߮ <<ߓߊ߬ߓߊ ߊߟߛߊߣ ߥߊߕߙߊ߫ ߝߏ߬>> ߞߊ߬ ߓߊ߲߫ ߞߊ߬ <<ߒߞߏ ߥߛߊ߬ߓߊ߮ ߣߴߊ߬ ߞߎ߲߬ߠߊ߬ߦߋ߬ߙߋ߲߬ߓߊ߮ ߣߌ߫ ߞߊ߬ߙߊ߲߬ߡߐ߯ ߛߟߏ߬ߡߣߊ߫ ߖߌ߰ߦߊ ߝߊߓߊ߮ ߝߏ߬ ߞߏ߲߬ߓߏ߫ ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߬.>> ߊ߬ߟߋ߫ ߞߊ߬ ߛߌߦߊߡߊ߲߫ ߝߐ߫ ߒߞߏߞߏ ߘߐ߬ߝߐ ߞߊ߲߬߸ ߞߵߊ߬ ߕߊ߬ ߂߀߁߀ ߡߊ߬ ߤߊ߲߯ ߕߋ߲߬، ߊ߬ߟߎ߫ ߞߊ߬ ߒߞߏ ߛߘߊߟߊ߫ ߞߎߡߊߛߏ ߟߎ߬ ߣߌ߫ ߖߌ߬ߦߊ߬ߞߊ߲߬ߛߏ ߟߎ߬ ߟߊ߫߸ ߞߵߏ߬ ߟߊ߫ ߝߟߊ߫ ߕߘߎ ߟߎ߫ ߞߊ߲߬߸ ߊ߬ ߣߌ߫ ߞߊ߬ ߒߞߏ ߟߊߛߋ߫ ߛߏ߫ ߕߊ߲߫ ߣߌ߫ ߞߐ߫ ߞߣߐ߫ ߓߙߎߞߌߣߊ߫ ߖߡߊ߬ߣߊ ߞߊ߲߬، ߒߞߏ ߦߋ߫ ߞߊ߬ߙߊ߲߬ ߠߴߊ߬ߟߎ߬ ߓߟߏ߫ <<ߓߐ߬ߓߐ߫ ߖߎ߬ߟߊ߫ ߞߌ߲߭ ߂߄ ߠߊ߫߸ ߊ߬ ߣߌ߫ ߞߊ߬ ߛߋ߫ ߕߍߓߊ߯ߦߊ߫ ߢߌߣߌ߲߫ ߠߊ߫ ߥߊ߱ߘߎ߰ ߟߊ߬ߞߟߏ߬ߞߟߏ߬ߟߌ ߞߏߕߌ߯ߘߊ ߟߊ߫.>> ߏ߬ ߓߌ߬ߟߊ߬ߢߐ߲߰ߡߊ ߘߏ߲߬ ߦߴߊ߬ߟߎ߬ ߕߍ߫ ߕߋ߲߬ ߝߛߊߦߌ߫.
ߡߊ߬ߟߌ ߥߛߊ߬ߓߊ߰ߦߊ ߞߊ߲ߕߌ߮߸ ߓߖߊ߫ ߞߎ߬ߟߌߓߊ߬ߟߌ߫ ߞߊ߬ ߛߌߦߊߡߊ߲߫ ߝߐ߫ ߊ߬ߟߎ߬ ߟߊ߫ ߝߊ߬ߛߏ߬ ߞߊ߲߬ ߞߏ ߛߍ߬ߘߏ߲߬ ߞߍߣߍ߲ ߠߎ߬ ߞߊ߲߬ ߡߊ߬ߟߌ ߛߌ߰ߞߊ߬ߝߐ ߘߊߞߎ߲ ߘߐ߫، ߊ߬ ߞߵߊ߬ߟߎ߬ ߟߊ߫ ߛߍ߰ ߛߌߦߊߡߊ߲߫ ߢߊߝߐ߫߸ ߞߵߊ߬ ߕߊ߬ ߞߎ߬ߙߎ߲߬ߘߎ߫ ߛߌ߲߬ߝߏ߲߬ߠߊ߬ߞߊ ߟߊߘߊ߲ ߡߊ߬߸ ߞߊ߬ ߝߊ߬ߛߏ߬ ߞߊ߲ ߠߎ߬ ߟߊߘߌ߬ߢߍ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
