ߒߞߏ ߥߙߎߞߟߌ ߛߌ߬ߝߏ߲߬ߧߊ߬ߟߌ߬ ߖߊ߯ߓߡߊ (ߒ.ߥ.ߛ.ߖ) ߟߊ߫ ߛߊ߲߬ߠߊ߬ߜߙߊ ߁߁߲ ߓߘߊ߫ ߘߊߡߌ߬ߣߊ߬ ߊߓߌߖߊ߲߬ ߞߣߐ߫ ߂߀߂߅ ߕߎߟߊߝߌ߲ ߕߋ߬ߟߋ߫ ߂߆ ߣߌ߲߬ ߡߊ߬߸ ߡߍ߲ ߢߣߊߓߊ߯ߦߊ߫ ߘߊ߫ ߞߊ߬ߝߏ߬ ߛߌߦߊߡߊ߲߫ ߓߟߏ߫߸ ߦߏ߫ ߖߌ߬ߣߍ߬߸ ߡߊ߬ߟߌ߫߸ߓߙߎߞߌߣߊ߫ ߝߊ߬ߛߏ߬߸ ߊߡߋߙߌߞߌ߬ ߊ߬ ߣߌ߫ ߛߌߦߊߡߊ߲߫ ߜߘߍ߫ ߟߎ߫، ߜߊ߬ߙߊ ߣߌ߲߬ ߟߐ߬ߣߍ߲߫ ߝߊ߬ߛߏ߬ ߞߊ߲ ߠߎ߬ ߞߐߡߊߓߌ߲ߓߌ߲ ߠߋ߬ ߡߊ߬߸ ߏ߬ ߡߍ߲ ߦߋ߫ ߓߛߌ߬ߞߌ߬ ߟߴߊ߬ߟߎ߬ ߓߟߏ߫ ߞߋ߬ߟߋ߲߬ߧߊ ߓߊ߬ߙߏ߲߬ߡߊ ߘߌ߫߸ ߊ߬ ߣߌ߫ ߟߊ߬ߞߟߏ߬ߞߟߏ߬ߟߌ ߣߌ߫ ߥߙߎߞߌ.
ߝߊ߬ߛߏ߬ ߞߊ߲߬ ߞߏ ߛߍ߬ߘߏ߲߬ߠߊ ߟߎ߬ ߣߌ߫ ߝߘߊ߬ߝߌ߲߬ߠߊ߬ߟߊ߲߬ߘߌ ߟߎ߬ ߦߋ߫ ߊߓߌߖߊ߲߬ ߞߣߐ߫ ߟߋ߬ ߕߋ߬ߟߋ߫ ߛߊ߬ߓߊ ߣߌ߲߬ ߞߣߐ߫߸ ߦߋ߲߬ ߡߍ߲ ߦߋ߫ ߜߋ߲ߞߐ߰ߖߌ߬ߘߊ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߞߎߓߋߘߊ ߘߌ߫ ߞߊ߬ߣߌ߲߬، ߦߋ߲߬ ߓߘߊ߫ ߞߍ߫ ߓߍ߲߬ߕߍ߬ߓߊ߫ ߟߋ߬ ߘߌ߫ ߝߘߊ߬ߝߌ߲߬ߟߊ߲߬ߘߌ ߟߎ߬ ߣߌ߫ ߝߘߊ߬ߝߌ߲߬ߠߊ߬ߟߊ߲߬ߘߌ ߟߎ߬ ߣߌ߫ ߟߐ߲ߠߌ߲ߦߊ ߣߌ߫ ߞߊ߲ߞߏ ߛߍ߬ߘߏ߲߬ߠߊ ߟߎ߬ ߓߟߏ߫، ߒߞߏ ߥߙߎߞߟߌ ߛߌ߲߬ߝߏ߲߬ߧߊ߬ߟߌ߬ ߖߊ߯ߓߡߊ ߦߋ߫ ߛߊ߲߬ߠߊ߬ߜߙߊ ߡߍ߲ ߞߍ߫ ߟߊ߫ ߛߐ߲߬߸ ߣߴߊ߬ ߘߋ߬ߙߌ߬ߣߍ߲߬ ߞߍ߫ ߟߊ߫ ߊߡߙߌߞߌ߬ ߞߊ߬ߝߏ߫ ߘߍ߬ߣߍ߲ ߞߣߐ߫ ߤߊ߯ߙߑߝ߭ߊ߯ߙ ߖߊ߯ߓߘߊ ߟߊ߫߸ ߏ߬ ߟߋ ߁߁߲ ߞߍߣߍ߲߫ ߊߓߌߖߊ߲߬ ߞߣߐ߫ ߢߌ߬ߣߊ߲߬ ߂߀߂߅ ߢߌ߲߬ ߠߊ߫߸ ߣߴߊ߬ ߞߎ߲߬ߕߐ߮ ߦߋ߫ ߞߏ߫: << ߒߞߏ ߟߐ߬ߦߙߐ ߝߊ߬ߛߏ߬ߞߊ߲ ߠߎ߬ ߟߊߥߙߎߞߟߌ ߘߐ߫ ߢߎߡߍߙߋ߲ߦߊߟߌ ߛߌߟߊ ߝߍ߬>> ߗߋߘߋ߲ ߠߎ߬ ߓߐߣߍ߲߫ ߖߌ߬ߣߍ߬ ߞߣߐ߫߸ ߡߊ߬ߟߌ ߟߊ߫߸ ߓߙߎߞߌߣߊ߫ ߝߊ߬ߛߏ߬߸ ߟߌߓߋߙߌߦߊ߫߸ ߊߡߙߌߞߌ߬ ߞߊ߬ߝߏ߫ ߘߍ߬ߣߍ߲߸ ߊ߬ ߣߌ߫ ߖߡߊ߬ߣߊ߬ ߛߌߦߊߡߊ߲߫ ߜߘߍ߫ ߟߎ߫، ߜߋ߲ߞߐ߰ߖߌ߬ߘߊ ߟߐ߲ߠߌ߲ߦߊ ߞߏߕߌ߯ߘߊ ߗߋߘߋ߲ ߠߎ߬ ߝߣߊ߫ ߛߣߍߡߊ߫ ߘߊ߫.
ߊ߬ߟߌ ߞߎ߬ߟߌߓߊ߬ߟߌ߫ ߟߋ߬ ߞߵߊ߬ߟߎ߬ ߟߊ߫ ߟߊ߬ߛߣߍ߬ߟߌ߬ ߓߋߟߋ߲ߠߊ ߞߊ߬ߙߊ߲߫ ߛߌ߲߬ߝߏ߲߬ߧߊ߬ߟߌ ߘߍ߬ߘߊ ߕߐ߯ ߘߐ߫߸ ߏ߬ ߞߊ߬ ߛߙߊ߬ߣߎ߲ ߞߊ߬ ߣߊ߬ߓߊ߮ ߟߎ߫ ߝߏ߬، ߊ߬ ߟߊ߫ ߓߋߟߋ߲ߠߊ ߘߐ߫߸ ߏ߬ ߡߍ߲ ߞߊ߬ߙߊ߲߬ ߘߴߊ߬ ߓߟߏ߫ ߝߊ߬ߙߊ߲߬ߛߌ߬ ߞߊ߲ ߘߐ߫߸ ߊ߬ ߞߊ߬ߙߊ߲߬ ߘߊ߫ ߒߞߏ ߘߐ߫ ߌߛߎ߬ߡߊ߬ߌ߯ߟߊ߫ ߖߊ߰ߓߌ߫ ߟߋ߬ ߓߟߏ߫߸ ߏ߬ ߡߍ߲ ߦߋ߫ ߜߋ߲ߞߐ߰ߖߌ߬ߘߊ ߒ.ߥ.ߛ.ߖ ߞߊ߲ߕߌ߮ ߘߌ߫ ߞߊ߬ߣߌ߲߬߸ ߓߋߟߋ߲ߠߊ ߏ߬ ߟߎ߬ ߞߍ߫ ߘߊ߫ ߓߋߟߋ߲ߠߊ߫ ߝߊߘߌ߲ ߠߎ߬ ߟߋ߬ ߘߌ߫ ߞߟߌߣߍ߲ ߠߎ߬ ߟߊߛߣߍ ߘߐ߫߸ ߊ߬ ߣߌ߫ ߝߘߊ߬ߝߌ߲߬ ߞߊ߲ ߠߎ߬ ߡߐ߬ߟߐ߲ ߞߘߐߕߊ߭ ߘߐ߫.
ߟߊ߬ߛߣߍ߬ߟߌ߬ ߓߋߟߋ߲ߠߊ ߣߌ߲߬ ߘߐ߫߸ ߊ߬ߟߌ߫ ߞߎ߬ߟߌߓߊ߬ߟߌ߫ ߞߊ߬ ߦߟߌߓߌߟߊߟߌ ߞߍ߫ ߛߌ߲ߡߌ߲߫ ߞߊ߲ ߠߎ߬ ߕߐ߬ߣߐ ߟߊ߫ ߕߊ߲߬ߘߐ: <<ߜߋ߲ߞߐ߰ߖߌ߬ߘߊ ߟߊ߫ ߦߊ߲߬߸ ߊ߲ ߓߍ߯ ߟߊߘߍ߬ߣߍ߲ ߞߵߊ߬ ߟߐ߲߫ ߞߏ߫ ߛߌ߲ߡߌ߲߫ ߞߊ߲ ߠߎ߬ ߕߍ߫ ߓߌ߬ߟߊ߬ߢߐ߲߰ߡߊ߬ ߝߋ߲ ߘߐߙߐ߲߫ ߘߌ߫: ߊ߬ߦߌ߫ ߊ߬ߟߎ߬ ߦߋ߫ ߒ߬ ߠߊ߫ ߟߐ߲ߠߌ߲ߦߊ ߟߎ߬ ߟߊߕߊ߲߬ߞߊ߬ ߝߋ߲ ߠߋ߬ ߘߌ߫߸ ߘߍ߭ ߟߊߛߓߊ߬ߕߌ߬ߟߊ߲ ߠߋ߬ ߦߴߊ߬ߟߎ߬ ߘߌ߫߸ ߊ߬ ߣߴߊ߬ߟߋ ߟߋ߬ ߜߎ ߦߋ߫ ߛߌߟߊ ߘߌ߫ ߟߊ߬ߞߟߏ߬ߞߟߏ߬ߟߌ ߣߌ߫ ߥߙߎߞߌ ߣߌ߫ ߢߐ߲߯ ߕߍ߫.>> ߊ߬ ߞߵߏ߬ ߝߐ߫ ߊ߬ ߟߊ߫ ߓߋߟߋ߲ߠߊ ߟߋ߬ ߘߐ߫.
ߢߐ߲߯ߓߍ߲ ߣߌ߲߬ ߞߍߣߍ߲߫ ߤߊߞߟߌ߫ ߖߊ߯ߓߐ ߞߣߍߓߊ ߟߋ߬ ߘߌ߫߸ ߛߌ߰ߞߊ߬ߝߐ ߟߎ߬ ߘߌߣߊ߬ ߞߍ߫ ߜߊ߬ߙߊ ߣߌ߲߬ ߘߐ߫߸ ߘߍ߰ߡߍ߲ ߦߴߊ߬ ߘߐ߫߸ ߟߐ߲ߠߌ߲ߦߊ߫ ߟߊߖߊ߲ߞߏ ߦߴߊ߬ ߘߐ߫، ߊ߬ߟߎ߬ ߟߊ߫ ߟߊ߬ߢߌߣߌ߲ ߘߏ߲߬ ߜߍߣߍ߲߫ ߠߋ߬ ߛߎߋ߫: ߞߊ߬ ߒߞߏ ߛߋߞߏߦߊ ߦߌ߬ߘߊ߬ ߘߎߢߊ߫ ߟߊ߫ ߛߓߍߛߎ߲ߧߊߟߌ ߓߘߍ߬ߓߘߍ߬ߟߌ ߘߐ߫߸ ߟߐ߲ߠߌ߲ ߠߎ߬ ߟߊߕߊ߬ߡߌ߲ ߘߐ߫߸ ߊ߬ ߣߌ߫ ߊ߲ ߓߘߊ ߟߊߥߙߎߞߌ ߘߐ߫.
ߒߞߏ ߏ߬ ߡߍ߲ ߛߌ߲ߘߌ߫ ߘߊ߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߓߟߏ߫ ߁߉߄߉ ߟߊ߫߸ ߒߞߏ ߏ߬ ߕߍ߫ ߞߊ߲߫ ߞߏ߫ ߞߟߍ ߘߐߙߐ߲߫ ߞߊ߲߬ ߘߋ߬߸ ߓߊ߬ߙߵߊ߬ ߦߋ߫ ߦߟߌߘߐ ߟߋ߬ ߘߌ߫ ߖߊ߬ߡߊ ߦߋ߫߸ ߞߊ߬ ߞߏ ߟߎ߬ ߟߊߡߊ߲߬ߘߌ߫߸ ߞߊ߬ ߛߋ߫ ߦߟߍ߬ߡߊ߲ ߠߊߘߏ߲߬ ߠߊ߫ ߟߊ߬ߣߐ߰ ߞߏ ߟߎ߬ ߘߐ߫، ߏ߬ ߟߋ ߘߐ߫߸ ߛߟߊߕߌ߯ ߞߎ߬ߟߌߓߊ߬ߟߌ߫ ߞߵߊ߬ ߦߌ߬ߘߊ߬ ߞߏ߫: <<ߛߓߍߛߎ߲ ߘߐߙߐ߲߫ ߕߍ߫ ߘߋ߬߸ ߊ߬ ߦߋ߫ ߟߐ߲ߠߌ߲ ߡߎ߬ߙߊ߲ ߠߋ߬ ߘߌ߫߸ ߞߋ߬ߟߋ߲߬ߧߊ ߣߌ߫ ߟߊ߬ߡߊ߲߬ߘߌ߬ߟߌ ߡߎ߬ߙߊ߲ ߞߊ߬ߣߌ߲߬.>>
ߊ߬ߟߎ߫ ߞߊ߬ ߞߎߟߎ߲ߖߋߟߌ ߝߏ߬ߟߌ߬ ߓߟߏߕߍ߰ߓߊߟߌ ߟߊߛߋ߫ ߞߏߟߊߘߍߢߐ߲߮ ߠߎ߬ ߡߊ߬߸ ߦߏ߫ ߜߋ߲ߞߐ߰ߖߌ߬ߘߊ ߟߊ߬ߞߟߏ߬ߞߟߏ߬ߟߌ ߞߏߕߌ߯ߘߊ߸ ߟߐ߲ߠߌ߲ߦߊ ߞߏߕߌ߯ߘߊ߸ ߊ߬ ߣߌ߫ ߛߌ߬ߟߡߊ߬ ߕߐ߲߬ߓߊ߸ ߣߴߏ߬ ߦߋ߫ ߞߏߖ߭ߌߡ ߘߌ߫߸ ߞߵߏ߬ ߟߊ ߟߐ߲ߠߌ߲ߦߊ ߟߊߛߓߊ߬ߕߌ߬ߓߊ߮ ߟߎ߫ ߞߊ߲߬߸ ߊ߬ ߣߌ߫ ߎ߳ߣߌߛߍߝ ߣߌ߫ ߛߣߍߓߊ߯ ߛߌߦߊߡߊ߲߫߸ ߡߍ߲ ߠߎ߬ ߦߋ߫ ߞߣߍ ߞߊ߲߬ ߦߋ߲߬.
<<ߢߐ߲߯ߓߍ߲ ߣߌ߲߬ ߡߊ߲߫ ߞߊ߲߫ ߞߊ߬ ߞߍ߫ ߢߊ߰ߢߊ߮ ߘߐߙߐ߲߫ ߘߌ߫ ߦߋ߲߬ ߕߋ߲߬، ߊ߬ ߞߊ߫ ߞߊ߲߫ ߞߊ߬ ߞߍ߫ ߣߊ߬ߡߘߊ߬ߟߊ߬ߥߟߌ ߟߋ߬ ߘߌ߫ ߝߊ߬ߛߏ ߓߘߍ߬ߓߘߍ߬ߟߌ ߘߐ߫߸ ߝߊ߬ߛߏ߬ ߞߊ߲ ߠߎ߬ ߟߊߥߊ߲߬ߞߊ߲ ߘߐ߫.>> ߊ߬ߟߌ ߞߎ߬ߟߌߓߊ߬ߟߌ߫ ߞߵߊ߬ ߟߊ߫ ߞߎߡߊ ߞߎ߲߬ߘߏ߲ ߞߍ߫ ߏ߬ ߟߋ ߘߌ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫
