ߞߵߊ߬ ߕߊ߬ ߂߀߂߂߅ ߕߎߟߊߝߌ߲ ߕߋ߬ߟߋ߫ ߂߆ ߡߊ߬ ߤߊ߲߯ ߊ߬ ߕߋ߬ߟߋ߫ ߂߈߸ ߒߞߏ ߓߍߣߊ߬ ߜߙߊ߬ ߓߟߋߓߟߋ߫ ߞߍ߫ ߊߓߐߓߐ߬߸ ߡߊ߲߬ߕߏ߲߬ߕߍ߬ ߜߙߊ߫ ߢߐ߲߰ߦߋ߬ߓߊߟߌ ߣߌ߲߬ ߓߍߣߊ߬ ߕߌߙߌ߲ߠߌ߲ߠߓߊ ߟߎ߬ ߣߌ߫ ߝߊ߬ߛߏ߬ߞߊ߲ ߠߎ߬ ߟߊߥߊ߲߬ߞߊ߲߬ߓߊ߮ ߟߎ߬ ߟߊߛߣߍ߫ ߦߋ߲߬.
ߞߵߊ߬ ߘߊߡߌ߬ߣߊ߬ ߛߌߣߌ߲߫ ߡߊ߬ ߌߞߘߐ߫߸ ߡߐ߱ߟߎ߬ ߘߌ߫ ߛߣߍ ߘߊߡߌ߬ߣߊ߬، ߊߓߌߖߊ߲߬ ߓߍߣߊ߬ ߟߊߡߊ߰ ߒߞߏ ߛߍ߬ߘߏ߲߬ߠߊ ߟߎ߬ ߓߟߏ߫߸ ߊߡߙߌߞߌ߬ ߞߊ߬ߝߏ߫ ߘߍ߬ߣߍ߲ ߒߞߏ ߕߐ߲ ߣߌ߫ ߒߞߏ ߥߙߎߞߟߌ߫ ߛߌ߲߬ߝߏ߲߬ߧߊ߬ߟߌ߬ ߖߊ߯ߓߡߊ ߟߊ߫ ߡߊ߲߬ߕߏ߲߬ߕߍ߫ ߜߙߊ߫ ߛߌ߲߬ߝߏ߲߬ߧߊ߬ߣߍ߲ ߞߣߐߡߊ߬، ߡߊ߲߬ߕߏ߲߬ߕߍ߬ ߜߙߊ ߏ߬ ߡߍ߲ ߞߍߕߐ߫ ߕߋ߬ߟߋ߫ ߛߓߊ߬ ߞߣߐ߫߸ ߒߞߏ ߡߊ߬ߞߟߐ߬ ߛߌߦߊߡߊ߲߫ ߢߊ ߓߕߐ߫ ߜߍ ߘߐ߫ ߡߍ߲ ߞߣߍ ߞߊ߲߬߸ ߞߊ߬ ߝߘߊ߫ ߕߟߋ߬ߓߋ߬ ߊߝߙߌߞߌ߬ ߟߊ߫߸ ߊ߬ ߣߌ߫ ߘߎߢߊ߫ ߝߊ߲߬ ߜߘߍ߫ ߟߎ߫ ߘߐ߫، ߊ߬ߟߎ߬ ߟߊ߫ ߜߊ߬ߙߊ ߞߎ߲߬ߕߐ߮ ߟߋ߬ ߢߌ߬ߣߊ߲߬߸ ߞߏ߫ <<ߒߞߏ ߟߐ߬ߦߙߐ ߝߊ߬ߛߏ߬ߞߊ߲ ߠߎ߬ ߟߊߥߙߎߞߟߌ ߘߐ߫ ߢߎߡߍߙߋ߲ߦߊߟߌ ߛߌߟߊ ߝߍ߬.>>
ߣߌ߲߬ ߕߍ߫ ߞߊ߬ߙߊ߲߬ ߞߏ߬ ߟߊߘߍ ߘߐߙߐ߲߫ ߘߌ߫ ߘߋ߬߸ ߟߊ߬ߘߍ ߣߌ߲߬ ߓߍߣߊ߬ ߞߍ߫ ߡߙߌ ߣߌ߫ ߡߙߌߡߝߊߟߋ߲ ߜߊ߬ߙߊ ߟߋ߬ ߘߌ߫߸ ߞߊ߬ ߤߊߞߟߌߣߊ߲ ߠߎ߫ ߦߌ߬ߘߊ߬ ߢߐ߲߮ ߠߊ߫ ߝߘߊ߬ߝߌ߲߬ ߞߊ߲ ߠ߬ߎ ߟߊ߫ ߛߌߣߌ߲ߢߍߛߌ߯ ߞߏ ߘߐ߫، ߕߌߙߌ߲ߠߌ߲ߠߊ ߟߎ߬ ߓߊ߬߸ ߞߝߊ߬ ߛߓߍ߬ߟߊ ߟߎ߬ ߓߊ߬߸ ߘߊ߲ߘߊߟߌߟߊ ߟߎ߫ ߓߊ߬߸ ߞߏ߲߬ߓߏ ߟߎ߬ ߣߌ߫ ߞߏ߲߬ߓߏ߬ߓߊ ߟߎ߬߸ ߞߵߏ߬ ߟߊ߫ ߒߞߏ ߘߏ߲߬ߖߟߎ߬ߡߊ߬ߘߊ ߘߏ߫ ߟߎ߫ ߣߴߊ߬ ߞߙߏ߬ߝߏ ߟߎ߬ ߞߊ߲߬߸ ߊ߬ ߣߌ߫ ߛߋߒߞߏߟߊߘߐߦߊ ߞߟߊ߬ߡߊ߬ߓߊ߮ ߟߎ߬߸ ߏ߬ ߟߎ߬ ߓߍ߯ ߟߋ߬ ߢߊ ߓߍߣߊ߬ ߓߐ߫ ߜߍ ߘߐ߫ ߞߊ߬ ߞߎߡߊ߫ ߒߞߏ ߟߊ߫ ߞߎߣߎ߲߬ ߕߊ߬ߡߌ߲߬ߣߍ߲ ߠߎ߬ ߣߴߊ߬ ߟߊ߫ ߛߌߣߌ߲߫ ߣߊ߬ߕߐ ߟߎ߬ ߞߊ߲߬، ߒߞߏ ߟߊ߫ ߛߋ߲߬ߕߊ߬ ߞߍߣߍ߲ ߠߎ߬ ߢߎߡߍߙߋ߲ߦߊߟߌ ߛߌߟߊ ߝߍ߬߸ ߊ߬ ߣߌ߫ ߟߊ߬ߣߐ߰ ߞߏ ߡߍ߲ ߠߎ߬ ߝߣߊ߫ ߦߋ߫ ߒߞߏ ߛߋ߲߬ߘߐ߫ ߘߎߢߊ߫ ߢߊߝߍ߬߸ ߊ߬ ߣߌ߫ ߡߊ߲߬ߘߋ߲߬ ߖߡߊߣߊ ߟߎ߫ ߖߍ߬ߘߍ ߞߣߐ߫.
ߜߋ߲ߞߐ߰ߖߌ߬ߘߊ ߛߌ߬ߟߡߊ߬ ߕߐ߲ ߠߊ߫ ߓߏ߲߬ߧߊ ߞߣߐߡߊ߬߸ ߞߵߏ߬ ߟߊ߫ ߦߋ߲߬ ߒߞߏߞߏ ߛߍ߬ߘߏ߲߬ߠߊ ߟߎ߫ ߞߊ߲߬߸ ߏ߬ ߟߎ߬ ߓߍߣߊ߬ ߜߙߊ߬ ߓߟߋߓߟߋ ߣߌ߲߬ ߞߍ߫߸ ߞߊ߬ ߛߋ߫ ߒߞߏ ߟߊ߫ ߢߎߡߍߙߋ߲ߦߊߟߌ ߛߍ߬ߘߏ߲߬ ߞߍߣߍ߲ ߠߎ߬ ߢߊߝߐ߫ ߕߟߋ߬ߓߊ߰ߦߊ߬ߟߌ ߣߌ߫ ߜ߭ߎ߯ߜ߭ߐߟ ߘߟߊߡߌߘߊߟߊ߲ ߠߊ߫ ߞߏ ߘߐ߫߸ ߦߟߌߟߊ߲ߘߌߦߊ߫ ߘߍ߲߰ߦߊ߬ߣߍ߲ ߠߎ߬ ߣߌ߫ ߟߞߊ߬ߙߊ߲߬ߠߌ߲ ߡߊ߬ߘߎ߮ ߘߐ߫، ߖߐ߲߰ߛߊ߫ ߒߞߏ ߘߌ߫ ߞߍ߫ ߝߘߊ߬ߝߌ߲߬ ߞߊ߲ ߠߎ߬ ߡߐ߬ߟߐ߲߬ߡߊ߬ߦߊ ߣߌߘߐ ߘߌ߫ ߢߎߡߍߙߋ߲ߦߊߟߌ ߘߊߞߎ߲ ߘߐ߫.
ߡߐ߰ߓߊ ߡߍ߲ ߠߎ߬ ߛߣߍߕߐ߫߸ ߡߎߛߊ߫ ߞߐߣߍ߫ ߦߴߏ߬ ߘߐ߫߸ ߊߡߙߌߞߌ߬ ߞߊ߬ߝߏ߫ ߘߍ߬ߣߍ߲ ߒߞߏ߫ ߕߐ߲ ߞߊ߲ߕߌ߮ ߟߵߏ߬ ߘߌ߫߸ ߣߴߊ߬ ߡߊߖߌ߰ߣߍ߲߫ ߣߌߦߐߙߑߞߎ߬، ߞߊ߬ߙߊ߲߬ߡߐ߯ ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߬ ߓߍߣߊ߬ ߛߣߍߡߊ߫߸ ߒߞߏ ߥߙߎߞߟߌ ߛߌ߲߬ߝߏ߲߬ߧߊ߬ߟߌ߬ ߖߊ߯ߓߡߊ ߞߊ߲ߕߌ߮، ߗߋߘߋ߲ ߘߏ߫ ߟߎ߫ ߓߍߣߊ߬ ߞߊ߬ ߝߘߊ߫ ߞߐߣߊߞߙߌ߫ ߣߌ߫ ߞߊ߲ߞߊ߲߫ ߠߊ߫߸ ߦߏ߫ ߒߞߏ ߝߘߏ߬ߓߊ߬ ߞߙߏߝߏ ߣߌ߫ ߞߊ߲߬ߜߍ߬ߘߊ ߣߌ߫ ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫، ߡߐ߱ ߟߎ߬ ߓߍߣߊ߬ ߓߐ߫ ߓߡߊ߬ߞߐ߫߸ ߜ߭ߊ߲ߓߌ߫߸ ߛߣߍ߬ߜ߭ߊߟߌ߫߸ ߊ߬ ߣߌ߫ ߦߙߐ߫ ߛߌߦߊߡߊ߲߫ ߘߐ߫.
ߖߊ߲߬ߖߏ߲ ߣߌ߲߬ ߛߌ߲߬ߝߏ߲߬ߧߊ߬ߓߊ߮ ߟߎ߬ ߟߊ߫ ߟߊ߬ߢߌߣߌ߲ ߦߋ߫ ߓߊߘߋ߲ߧߊ ߣߌ߫ ߞߊ߬ߣߌ߲߬ߢߐ߲߰ߦߊ ߟߊߟߐ߬ߞߎ ߟߋ߬ ߘߌ߫ ߘߎߢߊ߫ ߒߞߏߡߐ߮ ߟߎ߬ ߣߌ߫ ߢߐ߲߯ ߕߍ߫.
ߜߊ߬ߙߊ ߓߋߟߋ߲ߠߊ߫ ߤߏߞߌ ߟߎ߬ ߓߍߣߊ߬ ߞߊ߬ߙߊ߲߫ ߖߊ߲߬ߖߏ߲ ߣߌ߲߬ ߘߐ߫ ߞߊ߲߫ ߞߏ ߞߊ߲߬߸ ߥߙߎߞߌ ߞߊ߲߬߸ ߊ߬ ߣߌ߫ ߘߊߞߎ߲߫ ߛߌߦߊߡߊ߲߫ ߓߐߣߍ߲߫ ߢߐ߲߰ ߡߊ ߟߎ߬، ߓߊߏ߬߸ ߛߓߍߟߌ ߣߌ߫ ߛߋߒߞߏߟߊߘߐߦߊ ߕߍ߫ ߢߐ߲߯ ߞߟߍ߬ ߟߊ߫ ߡߎ߬ߕߎ߲߬߸ ߊ߬ߟߎ߬ ߦߋ߫ ߢߐ߲߯ ߠߊߥߙߎߞߌ߫ ߟߊ߫ ߟߋ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
