ߓߌ߬ ߞߎߣߎ߲ߟߏ߲ ߂߀߂߅ ߕߎߟߊߝߌ߲ ߕߟߋ߬ ߁߇ ߢߌ߲߬ ߡߊ߬߸ ߖߊ߬ߡߊ߫ ߝߌ߬ߙߌ߲ߞߐ߬ߞߐ߲ ߠߋ߬ ߓߐ߫ ߘߊ߫ ߞߊ߲ߞߊ߲߫ ߞߣߐ߫ ߞߊ߬ ߓߙߊߡߊ߲ߓߊ߲ ߞߍ߫ ߢߐ߲߮ ߝߍ߬ ߞߋߟߋ߲ߘߌ߫߸ ߞߵߊ߬ ߦߌ߬ߘߊ߬ ߞߎ߲߬ߠߊ߬ߛߌ߮ ߟߎ߬ ߟߊ߫ ߞߏ߫ ߊ߬ߟߎ߬ ߓߘߊ߫ ߛߐ߲߬ ߛߌ߰ߞߊ߲߬ ߞߎߘߊ ߡߊ߬߸ ߤߊߟߌ߬ ߣߴߊ߬ ߦߴߊ߬ ߛߐ߬ߘߐ߲߬ ߞߏ߫ ߓߐߟߌ߫ ߜߘߍ߫ ߕߘߍ߬ ߓߘߊ߫ ߞߍ߫ ߞߘߐ߬ߡߊ߲߫߸ ߓߊ߬ߙߌ߫߸ ߓߐߟߌ߫ ߞߏ߫ ߝߌߟߊߣߊ߲ ߡߊ߫ ߞߍ߫ ߦߏ߫ ߞߘߐ߬ߡߊ߲߸ ߓߊߏ߬.
ߓߌ߬ ߕߊ ߖߊ߬ߡߊ ߞߊ߫ ߛߌߦߊ߫ ߕߘߍ߬ ߦߋ߫ ߝߟߐߡߊ ߕߊ ߘߌ߫߸ ߏ߬ ߡߍ߲ ߞߍ߫ ߘߊ߫ ߞߎߣߎ߲ߟߏ߲ ߂߀߂߅ ߕߎߟߊߝߌ߲ ߕߟߋ߬ ߁߀ ߡߊ߬، ߓߌ߬ ߓߙߊߡߊߖߊ߲ߓߊ߲ ߣߌ߲߬ ߘߐ߫߸ ߖߋ߬ߓߌ߬ߦߊ߬ߟߊ ߘߏ߫ ߟߊ߫ ߝߐߟߌ߫ ߘߐ߫ ߊ߲ ߧߋ߫߸ ߣߴߊ߬ ߕߐ߯ ߦߋ߫ ߡߏߙߌ߬ ߞߎߦߊߕߋ߫ ߘߌ߫߸ ߊ߬ߟߋ ߡߍ߲ ߦߋ߫ ߛߋ߫-ߍߡ-ߘߋ-ߞߊ، ߟߊ߫ ߓߋߟߋ߲ߠߊ ߘߌ߫ ߞߊ߲ߞߊ߲߫ ߞߣߐ߫؛ ߊ߬ߟߋ ߞߵߊ߬ߟߎ߬ ߟߊ߫ ߓߐߟߌ߫ ߢߌ߲߬ ߞߎ߲߭ ߝߐ߫߸ <<ߣߴߌ ߞߊ߬ ߊ߲ ߓߐߣߍ߲߫ ߦߋ߫ ߓߌ߬.
ߘߏ߫ ߜߘߍ߫ ߕߍ߫߸ ߊ߲ ߠߊ߫ ߓߐߟߌ ߢߌ߲߬ ߞߎ߲߭ ߠߋ߬ ߞߵߊ߬ ߦߌ߬ߘߊߞߊ߬ ߝߊ߰ߡߊ ߟߎ߬ ߟߊ߫߸ ߊ߬ ߜߋ߲ߜߋ߲߫ ߣߴߊ߬ ߦߋ߫ ߊ߲ ߠߊ߫ ߞߊ߲ߕߌ߮ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߌ߫߸ ߞߵߊ߬ ߝߐ߫ ߞߏ߫ ߊ߬ߟߎ߫ ߞߊ߬ ߛߊ߬ߙߌ߬ߦߊ߬ ߞߎߘߊ ߡߍ߲ ߠߊߘߊ߲߫ ߣߴߊ߬ ߦߋ߫ ߛߌ߰ߞߊ߲ ߘߌ߫߸ ߞߏ߫ ߊ߲ ߓߘߊ߫ ߓߍ߲߬ ߏ߬ ߡߊ߬>> ߞߊ߬ ߓߍ߲߬ ߓߐߟߌ߫ ߞߎ߲߬ߝߟߐ ߡߊ߬ ߞߎߣߎ߲ߟߏ߲ ߂߀߂߅ ߕߎߟߊߝߌ߲ ߕߟߋ߬ ߁߀ ߕߊ߬ߡߌ߲߬ߣߍ߲ ߡߊ߬، ߊ߬ߟߋ ߞߊ߬ ߡߍ߲ ߦߴߏ߬ ߘߐ߫.
ߊ߬ ߞߵߏ߬ ߝߐ߫ <<ߓߐߟߌ߫ ߝߐߟߌ߫ ߝߟߐߡߊ ߞߍ߫ ߘߴߊ߲ ߓߟߏ߫߸ ߊ߬ ߘߏ߲߬ ߖߊ߬ߡߊ ߓߐ߫ ߘߊ߫ ߟߋ߬ ߏ߬ ߝߣߊ߫ ߘߐ߫ ߝߛߊߦߌ߫߸ ߓߊ߬ߙߌ߫߸ ߕߐ߬ ߕߏ߫ ߘߊ߫ ߏ߬ ߖߡߊ߬ ߞߏ ߟߊ߫߸ ߓߊߏ߬߸ ߊ߲ ߕߘߍ߬ ߦߴߊ߬ ߝߍ߬ ߖߊ߬ߡߊ ߡߍ߲ ߦߋ߫ ߓߐ߫߸ ߏ߬ ߡߊ߫ ߛߋ߫ ߓߐ߫ ߟߊ߫߸ ߏ߬ ߓߟߏߡߊ߬߸ ߒߠߋ ߘߌ߫ ߛߴߊ߬ ߝߐ߫ ߟߊ߫ ߞߏ߫ ߝߌߟߊߣߊ߲߫ ߣߌ߲߬ ߠߋ߬ ߖߊ߬ߡߊ ߛߌߦߊߦߊ߫ ߘߊ߫ ߝߟߐߡߊ ߘߌ߫، ߏ߬ ߘߐ߫߸ ߛߍߥߊߣߊ߲ߞߊ߲ ߡߍ߲ ߦߋ߫ ߒ ߓߟߏ߫ ߞߵߊ߬ ߟߊߛߋ߫ ߡߐ߰ ߓߐߣߍ߲߫ ߡߍ߲߬ ߠߎ߫ ߡߊ߬.
ߏ߬ ߟߋ߬ ߦߴߊ߬ߟߎ߫ ߝߏ߬ ߘߌ߫ ߞߵߊ߬ߟߎ߬ ߞߎߟߎ߲ߖߋ߫، ߝߋ߲߫-ߋ߲߫-ߝߋ߲߫، ߞߵߊ߬ ߖߘߍ߬ ߡߊߛߐ߬ߘߐ߲߬ ߞߣߊ߬ ߓߙߊߡߊ߲ߓߊ߲ ߢߌ߲߬ ߘߐ߫߸ ߊ߲ ߧߋ߫ ߊ߬ߟߎ߬ ߓߍ߯ ߟߊߘߍ߬ߣߍ߲ ߝߏ߬ ߟߊ߫ ߞߏ߫ ߊ߬ߟߎ߬ ߣߌ߫ ߗߋ߫>>.
ߜߘߍ߫ ߟߊ߫ ߝߐߟߌ߫ ߘߐ߫߸ ߊ߬ߟߋ ߡߍ߲ ߕߐ߯ ߦߋ߫ ߛߌ߲߬ߓߏ߲ ߛߋߞߎ߬ ߕߙߊߥߟߋ߫ ߘߌ߫ ߣߌ߫ ߘߏ߫ ߟߎ߫ ߦߴߊ߬ ߝߐ߫ ߟߴߊ߬ ߡߊ߬ ߞߏ߫ ߓߊ߬ߣߊ߲߬ߞߐ߬ߣߍ߲ ߥߟߐ߬ߓߊ߸ ߞߊ߬ ߓߐ߫ ߓߊ߬ߣߊ߲߬ߞߐ߬ߣߍ߲ ߠߊ߫߸ ߊ߬ ߣߴߊ߬ߟߋ ߡߍ߲ ߦߋ߫ ߘߏ߲߬ߛߏ߬ ߞߎ߲ߕߌ߮ ߘߌ߫ ߞߊ߲ߞߊ߲߫ ߞߣߐ߫߸ ߊ߬ߟߋ ߝߣߊ߫ ߞߊ߬ ߘߏ߫ ߝߐ߫ ߊ߬ߟߎ߬ ߟߊ߫ ߕߊ߯ߡߊ ߣߌ߲߬ ߞߎ߲߭ ߞߊ߲߬ <<ߣߴߌ ߞߵߊ߬ ߦߋ߫ ߓߌ߬ ߢߐ߲߰ ߟߏ߲߫ ߞߊ߲ߞߊ߲߫ ߓߘߊ߫ ߓߐ߫ ߞߊ߬ ߕߊ߯ߡߊ ߞߍ߫ ߢߐ߲߮ ߝߍ߬߸ ߘߏ߫ ߜߘߍ߫ ߕߍ߫.
ߊ߲ ߞߊ߬ ߞߊ߲ ߡߍ߲ ߡߍ߲߫ ߊ߲ ߕߟߏ ߟߊ߫߸ ߣߴߊ߬ ߦߋ߫ ߛߊ߬ߙߌ߬ߦߊ߬ ߞߎߘߊ ߘߌ߫߸ ߏ߬ ߟߋ߬ ߘߌߦߊ߫ ߘߴߊ߲ ߧߋ߫ ߞߏߛߓߍ߫߸ ߏ߬ ߓߟߏߡߊ߬߸ ߝߏ߫ ߊ߲ ߧߋ߫ ߓߐ߫ ߟߋ߬ ߏ߬ ߘߐ߫ ߞߵߏ߬ ߦߌ߬ߘߊߞߊ߬ ߖߊ߬ߡߊ ߟߊ߫ ߞߵߊ߬ ߝߐ߫ ߞߏ߫ ߊ߲ ߓߘߊ߫ ߓߍ߲߬ ߊ߬ ߡߊ߬߸ ߣߴߏ߬ ߕߍ߫ ߘߏ߲߬ߛߏ ߕߍ߫ ߘߏ߲߬ ߠߊ߫ ߞߏߘߐߞߏߟߏ߲ ߘߐ߫ ߕߋ߲߬ ߘߋ߬߸ ߊ߲ ߠߊ߫ ߟߐ߲ߠߌ߲ߠߊ ߟߎ߬ ߟߋ߬ ߞߵߊ߬ ߝߐ߫ ߞߏ߫ ߣߊ߬ߝߊ ߦߋ߫ ߐ߲߰ߤߐ߲߫߹ ߠߋ߬ ߟߊ߫߸ ߏ߬ ߟߋ߬ ߞߊ߬ ߥߟߐ߬ߓߊ ߝߣߊ߫ ߣߴߊ߬ ߟߊ߫ ߖߊ߬ߡߊ ߟߐ߬ ߓߐ߫ ߟߊ߫ ߞߊ߬ ߐ߲߰ߤߐ߲ ߛߎߥߊ߲ߘߌ߫>>
ߞߊ߬ ߓߍ߲߬ ߊ߬ߟߎ߬ ߟߊ߫ ߕߊ߯ߡߊ ߞߎ߲߬ߝߟߐ ߡߊ߬߸ ߥߟߐ߬ߓߊ ߛߋ߫ ߘߊ߫ ߘߏ߫ ߝߐ߫ ߟߊ߫ ߏ߬ ߞߏߢߊ ߞߊ߲߬ <<ߕߊ߯ߡߊ߫ ߝߟߐߡߊ ߞߍ߫ ߘߴߊ߲ ߓߟߏ߫ ߓߐ߲ߓߟߏߟߊ ߟߋ߬ ߘߌ߫߸ ߣߴߏ߬ ߕߍ߫ ߖߊ߬ߡߊ ߓߐ߫ ߘߊ߫ ߏ߬ ߝߣߊ߫ ߘߐ߫߸ ߓߊ߬ߙߌ߫߸ ߞߐߟߕߊ߫ ߢߌ߲߬ ߠߋ߬ ߘߏ߲߬ ߘߴߊ߲ ߖߋ߬ߟߌ ߟߊ߫ ߓߊߞߍ߭߸ ߓߊߏ߬߸ ߞߏ ߡߍ߲ ߦߴߊ߬ ߘߌ߫ ߝߏ߫ ߊ߲ ߧߋ߫ ߓߐ߫ ߟߋ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߘߌߡߴߊ߲ ߧߋ߫، ߊ߬ ߕߍ߫ ߘߋ߬ ߞߏ߫ ߖߡߊ߬ ߡߊ߫ ߓߐ߫ ߝߟߐߡߊ ߓߐߟߌ ߝߍ߬߸ ߞߏ߬ߣߌ߲߫.
ߡߐ߰ߘߐ߬ߜߍ߬ ߞߏ ߟߋ߬ ߞߏ߫ ߦߋ߫߸ ߏ߬ ߛߊߓߎ߫ ߟߊ߫ ߒߠߋ ߘߴߊ߬ ߝߐ߫ ߞߏ߫ ߖߊ߬ߡߊ ߡߍ߲ ߓߐ߫ ߘߊ߫ ߞߐߟߕߊ߫ ߢߌ߲߬ ߘߐ߫߸ ߏ߬ ߡߊ߫ ߓߐ߫ ߝߟߐߡߊ ߝߍ߬>> ߊ߬ ߟߊ߫ ߞߎߡߊ߫ ߟߊߓߊ߲߫ ߘߐ߫ ߛߊ߫߸ ߊ߬ ߞߊ߬ ߖߊ߬ߡߊ ߡߊߞߟߌ߫ ߟߋ߬ ߞߵߊ߬ߟߎ߫ ߟߐ߬ ߐ߲߰ߤߐ߲ ߛߎߥߊ߲ߘߌ߫ ߟߊ߫߸ ߓߊߏ߬߸ ߞߏ߫ ߕߐ߬ߣߐ ߦߋ߫ ߏ߬ ߟߋ߬ ߟߊ߫߸ ߊ߬ ߘߏ߲߬ ߣߊ߬ߝߊ ߦߋ߫ ߖߌ߬ߣߍ߫ ߞߊ߲߬ <<ߒߠߋ ߦߋ߫ ߡߍ߲ ߝߐ߫ ߟߊ߫ ߖߡߊ߬ߣߊ߬ߘߋ߲ ߠߎ߬ ߦߋ߫߸ ߊ߬ߟߎ߬ ߦߴߊ߬ߟߎ߫ ߥߟߌ߬ ߞߊ߬ ߐ߲߰ߤߐ߲ ߛߎߥߊ߲ߘߌ߫.
ߝߋ߲߫-ߋ߲߫-ߝߋ߲߬، ߣߴߌ ߘߌ߫ ߛߋ߫ ߌ ߞߊ߲߫ ߘߌ߫ ߟߊ߫߸ ߌ ߦߋ߫ ߐ߲߰ߤߐ߲߫ ߕߊ߬߸ ߊ߲ ߞߴߊ߬ ߞߍ߫ ߢߐ߲߯ ߠߊߜߏߦߊߒߢߍ ߘߌ߫ ߘߋ߬߸ ߊ߲ ߧߴߊ߬ ߞߍ߫ ߖߌ߬ߣߍ߬ ߟߋ߬ ߦߋ߫، ߡߐ߱ ߕߴߊ߬ ߓߊ߲߬ ߠߴߊ߬ ߖߘߍ߬ ߘߐ߫߸ ߣߴߏ߬ ߕߍ߫ ߌ ߘߌ߫ ߣߡߌߛߊ߫، ߝߏ߫ ߊ߲ ߧߴߊ߲ ߠߊ߫ ߛߌߣߌ߲ߢߍߛߌ߮ ߟߋ߬ ߞߍ߫߸ ߛߋߞߎ߬ ߕߎ߬ߙߋ߫ (ߊ.ߘ) ߊ߬ ߞߊ߬ ߛߌߣߌ߲ߢߍߛߌ߮ ߡߍ߲ ߠߊߘߴߊ߲ ߢߍ߫߸ ߊ߲ ߓߘߊ߫ ߛߋ߫ ߏ߬ ߟߋ߬ ߡߊ߬ ߕߋ߲߬߸ ߊ߲ ߕߘߍ߬ ߦߋ߫ ߖߟߊ߫ ߖߌ߫ ߡߌ߲ ߠߋ߬ ߟߊ߫ ߞߎߣߎ߲߬߸ ߞߏ߬ߣߌ߲߫߸ ߊ߲ ߓߘߊ߫ ߛߋ߫ ߟߌߖߌ߫ ߡߌ߲ ߠߋ߬ ߡߊ߬ ߣߌ߲߬ ߓߌ߬߸ ߓߊ߬ߙߌ߫߸ ߏ߬ ߕߍ߫ ߣߊ߬ ߛߋ߫ ߞߍ߫ ߟߊ߫ ߝߏ߫ ߊ߲ ߧߋ߫ ߐ߲߰ߤߐ߲ ߠߋ߬ ߛߎߥߊ߲ߘߌ߫>>.
