ߛߊ߲߬ ߓߌߣߊ߯ߣߌ߲߫ ߥߛߎ߫ ߟߋ߬ ߛߎߡߊ ߦߋ߫ ߓߙߋߖ߭ߌߟ ߞߊ߲ߕߌ߯ ߞߘߐ ߝߍ߬ ߕߋ߲߬߸ ߘߐ߬ߝߐ ߓߍߣߴߊ߬ ߢߊߣߐ ߣߴߊ߬ ߘߊߣߐ ߕߏ߫ ߡߍ߲ ߡߊ߬، ߞߵߏ߬ ߞߎ߲߭ ߞߍ߫߸ ߞߕߌߖߌ߲ ߛߊ߲ߘߐߕߊ ߓߘߴߊ߬ ߞߕߌ߫ ߞߵߊ߬ ߝߐ߫ ߞߏ߫ ߊ߬ ߛߐ߲߭ ߦߋ߫ ߞߊ߬ߝߏ߬ ߖߊߛߏ߲ ߘߐߓߍ߲߬ ߞߏ ߘߐ߫ ߊ߬ ߟߊ߫ ߗߌߙߏ߲ߠߌ߲ ߞߐߝߍ߬ ߢߣߊߕߊߟߌ ߘߐ߫.
ߓߙߋߖ߭ߌߟ ߞߕߌߖߌ߲ ߛߊ߲ߘߐߕߊ ߓߘߊ߫ ߡߙߌߘߐ߫ ߜߍߟߍ߲ ߘߏ߫ ߕߊ߬ ߞߊ߲ߕߌ߯ ߞߘߐ߫ ߖ߭ߊ߬ߦߌߙ ߓߐߟߑߛߏߣߊߙߏ߫ ߞߊ߲ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ ߛߐ߲߭ ߦߋ߫ ߞߊ߬ߝߏ߬ ߖߊ߬ߛߏ߲߬ ߞߏ ߘߏ߫ ߘߐ߫߸ ߞߊ߬ ߘߏ߲߬ ߡߐ߰ ߞߏ߬ߙߏ߲ ߠߎ߬ ߟߊ߫ ߛߌ߲߬ߝߏ߲߬ߧߊ߬ߟߌ ߘߐ߫ ߖߡߊ߬ߣߊ ߞߊ߲ߡߊ߬، ߂߀߂ ߞߊ߲ߕߌ߯ ߢߣߊߕߊߟߌ ߝߍ߬߸ ߟߎ߬ߥߌ ߌߣߊߛߌߦߏ߫ ߟߎ߬ߟߊ ߘߊ߬ ߛߌߟߑߝ߭ߊ߬ ߟߋ߬ ߛߎߘߊ߲߫ ߘߊ߫߸ ߓߊ߬ߙߌ߬ ߓߐߟߑߛߏߣߊߙߏ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߡߊ߫ ߓߍ߲߬ ߏ߬ ߡߊ߬߸ ߞߏ߫ ߊ߬ ߕߍ߫ ߝߊ߲߬ߞߊ ߟߊߕߊ߬ߡߌ߲߬ ߠߊ߫ ߟߎ߬ߟߊ ߘߊ߬ ߛߌߟߑߝ߭ߊ߬ ߡߊ߬.
ߓߌ߬ ߓߌߟߏ߲ ߣߌ߲߬ ߡߊ߬߸ ߞߕߌߕߍ߯ߟߊ߫ ߞߊߙߑߡߍ߲ ߟߎߛߌߦߊ߫ ߞߵߊ߬ ߡߙߌߦߊ ߦߌ߬ߘߊ߬߸ ߏ߬ ߡߍ߲ ߞߍ߫ ߘߊ߫ ߡߐ߱ ߣߊ߯ߣߌ߲ߣߊ߲ ߘߌ߫߸ ߡߍ߲ ߠߎ߬ ߓߘߴߊ߬ߟߎ߬ ߡߙߌߦߊ ߘߌ߫ ߞߵߊ߬ ߓߍ߲߬ ߊ߬ ߖߊ߲߬ߞߌ߬ ߞߏ ߡߊ߬، ߡߐ߰ ߃ ߞߵߊ߬ ߦߌ߬ߘߊ߬ ߞߏ߫ ߊ߬ ߞߊ߫ ߞߊ߲߫ ߞߊ߬ ߖߊ߲߬ߞߌ߫ ߛߊ߲߬ ߄߀ ߥߛߎ ߟߊ߫߸ ߁ ߠߋ߬ ߡߊ߫ ߛߐ߲߬ ߏ߬ ߡߊ߬، ߒ߬ߓߊ߬߸ ߞߕߌߕߍ߯ߟߊ߫ ߞߋߟߋ߲ ߡߍ߲ ߕߏߣߍ߲߫߸ ߏ߬ ߟߋ ߞߙߌߛߌߦߊߣߏ ߖ߭ߊ߬ߣߌ߲߬ ߘߌ߫߸ ߟߎ߬ߟߊ ߟߊ߫ ߟߊ߬ߝߛߊ߬ߟߌ߬ߟߊ߬ ߞߘߐ ߟߵߏ߬ ߘߌ߫߸ ߏ߬ ߟߋ ߞߊ߫ ߞߊ߲߫ ߞߵߊ߬ ߡߙߌߦߊ ߘߌ߫ ߡߎ߬ߕߎ߲߬، ߏ߬ ߟߊ߫ ߡߙߌߦߊ߫ ߦߌߘߊ ߏ߬ ߟߋ ߞߍߕߐ߫ ߞߊ߲ߕߌ߮ ߟߊ߫ ߖߊ߲߬ߞߌ߬ߟߌ ߟߊߕߍ߰ ߟߊ߫ ߣߍߣߍ߲߬ ߝߛߊߦߌ߫߸ ߡߍ߲ ߥߊߣߍ߲߫ ߝߏ߯ ߛߊ߲߬ ߄߃ ߥߛߎ߫.
ߓߐߟߑߛߏߣߊߙߏ߫ ߘߏ߲߬ ߛߊ߲߬ ߇߀ ߟߋ߬ ߕߋ߲߬߸ ߊ߬ ߞߊ߲߫ ߞߏ߫ ߊ߬ ߛߐ߲߬ ߛߌ߫ ߕߍ߫ ߣߌ߲߬ ߞߏ ߘߐ߫، ߊ߬ ߡߊߝߌ߲߬ߣߍ߲߫ ߠߋ߬߸ ߞߏ߫ ߊ߬ ߞߊ߬ ߞߙߏ߬ߝߏ ߘߏ߫ ߟߋ߬ ߟߊߘߊ߲߫߸ ߣߊ߲߬ߕߌ߰ ߞߎ߲߬ߕߌ߰ ߛߌߦߊߡߊ߲߫ ߕߘߍ߬ ߡߍ߲ ߘߐ߫߸ ߊ߬ ߣߌ߫ ߓߘߍ߬ߓߘߍ߬ߟߌ߬ߟߊ ߘߏ߫ߟ ߎ߫߸ ߞߏ߫ ߝߏ߫ ߞߵߊ߬ ߟߊ߫ ߗߌߙߏ߲ ߓߐ߫ ߊ߬ ߡߊ߬ ߟߋ߬߸ ߞߊ߬ ߟߎ߬ߟߊ ߟߊ߫ ߛߎߘߊ߲ ߘߐߛߊ߬، ߞߊ߬ߦߌ߯ ߘߓߊ߬ߓߌߟߊ߫ ߕߊ߬ߡߌ߲߬ߣߍ߲ ߘߊߡߌߣߊ ߟߊ߫߸ ߊ߬ ߞߎ߬ߡߊ߲߬ߘߌ߬ ߘߊ߫ ߓߐߟߌ ߡߵߊ߬ ߟߊ߫ ߟߎ ߡߊ߬߸ ߊ߬ ߡߊ߫ ߛߋ߫ ߥߊ߫ ߟߊ߫ ߞߕߌ߫ ߘߊߞߎ߲ ߘߐ߫߸ ߞߵߏ߬ ߞߎ߲߭ ߞߍ߫ ߊ߬ ߝߊ߬ߘߌ߬ ߞߘߐ߬ ߞߏ ߘߌ߫.
ߊ߬ ߟߊ߫ ߞߕߌ ߣߌ߲߬ ߞߎߡߊ ߓߘߊ߫ ߛߌߦߊߦߊ߫ ߓߊߟߋ߬ ߖߡߊ߬ߣߊ ߞߣߐ߫، ߘߎ߰ߘߋ߲ ߘߏ߫ ߟߎ߫ ߞߊ߲߫ ߠߋ߬ ߞߏ߫ ߞߕߌ ߣߌ߲߬ ߦߋ߫ ߓߘߍ߬ߓߘߍ߬ߟߌ ߟߋ߬ ߘߌ߫߸ ߘߏ߫ ߟߎ߫ ߝߣߊ߫ ߛߍߥߊߣߴߊ߬ ߞߏ ߟߊ߫ ߞߏߛߓߍ߫߸ ߞߵߊ߬ ߦߌ߬ߘߊ߬ ߞߏ߫ ߞߏ߫ ߘߋ߲ߣߍ߲߫ ߕߍ߫ ߣߌ߲߬ ߞߏ ߘߌ߫، ߏ߬ ߟߋ ߘߐ߫߸ ߖ߭ߍߙߑߡߊߣߏ ߞߝ߭ߊߟߑߞߊ߲ߕ ߦߋ߫ ߗߋ߬ߥߎ߬ߣߍ߲߬ߗߋߥߎ߫ ߛߊ߲߬ ߆߀ ߘߏ߫ ߟߋ߬ ߘߌ߫߸ ߏ߬ ߞߊ߲߫ ߞߏ߫ ߣߌ߲߬ ߦߋ߫ « ߘߐ߬ߝߐ ߞߣߐ߫ ߣߘߐ߬ߓߍ߲ ߘߏ߫ ߟߋ߬ ߘߌ߫ »، ߊߣߊ ߞߊߙߑߟߊ߫ ߛߊ߲߭ ߂߁ ߠߋ߬ ߕߊ߲߬߸ ߏ߬ ߞߊ߲߫ ߞߏ߫ ߣߌ߫ ߓߐߟߑߛߏߣߊߙߏ߫ ߖߊ߲߬ߞߌ߬ ߘߊ߫߸ ߊ߬ߟߎ ߞߍߕߐ߫ ߝߌ߬ߘߊ ߟߋ߬ ߞߍ߫ ߟߊ߫.
ߞߕߌ ߣߌ߲߬ ߓߘߊ߫ ߞߍ߫ ߕߙߎ߬ ߘߌ߫ ߞߊ߬ ߡߊ߲߬ߞߊ߲ ߠߊߘߏ߲߬ ߊߡߙߌߞߌ߬ ߣߌ߫ ߓߙߋߖ߭ߌߟ ߕߍ߫، ߓߊߏ߬߸ ߊߡߙߌߞߌ߬ ߞߊ߲ߕߌ߮ ߘߏߣߊߟ ߕߑߙߐ߲ߔ ߞߊ߲߫ ߞߏ߫ ߊ߬ ߦߋ߫ ߓߐߟߑߛߏߣߊߙߏ߫ ߞߐߡߊߓߌ߲ߓߌ߲߫ ߠߊ߫ ߣߌ߲߬ ߞߏ ߘߐ߫ ߞߏߛߓߍ߫، ߊ߬ ߖߍ߬ߘߍ߸ ߞߏ߫ ߊ߬ߟߎ߬ ߓߍߣߊ߬ ߓߌ߲߬ߓߊߥߏ ߓߋ߬ ߓߙߋߖ߭ߌߟ ߞߊ߲߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߡߊ߬ߘߎ߮ ߘߐ߫߸ ߞߵߊ߬ߟߎ߬ ߟߊ߫ ߟߊ߬ߝߏ߬ߦߌ߬ߟߌ ߘߏ߫ ߟߎ߫ ߟߊ߲ߞߎ߲ ߠߊߥߊ߬ߙߊ߫ %߅߀ ߢߐ߲߰ ߠߊ߫. ߝߣߊ߫߸ ߥߊ߲ߛߌ߲ߕߐ߲߫ ߓߘߊ߫ ߓߙߋߖ߭ߌߟ ߞߕߌߖߌ߲ ߛߊ߲ߘߐߕߊ ߞߕߌߕߍ߯ߟߊ ߟߎ߬ ߟߊ߫ ߘߌ߬ߢߍ߬ߡߊ߬ߛߓߍ ߘߐߛߊ߬.
ߞߕߌߕߍ߯ߟߊ߫ ߊߟߍߞߑߛߊ߲ߘߙ ߘߋ߬ ߡߏߙߊߦߍߛ ߟߋ߬ ߞߍ߫ ߘߊ߫ ߡߐ߰ ߝߟߐ߫ ߘߌ߫߸ ߡߍ߲ ߞߊ߬ ߛߍߥߊ߲ߘߟߌ ߞߍ߫ ߞߊ߬ ߖߊ߲߬ߞߌ߬ߟߌ ߞߐߡߊߓߌ߲ߓߌ߲߫߸ ߞߵߊ߬ ߦߌ߬ߘߊ߬ ߞߏ߫ ߣߌ߫ ߞߌ߬ߦߊ߫ ߕߎ߲߬ ߡߊ߫ ߞߍ߫߸ ߓߐߟߑߛߏߣߊߙߏ߫ ߕߎ߲߬ ߘߌ߫ ߓߙߋߖ߭ߌߟ ߞߍ߫ « ߖߊߟߌߞߦߊ߫ ߖߡߊߣߊ ߘߌ߫ »، ߓߐߟߑߛߏߣߊߙߏ߫ ߞߕߌ ߦߴߌߘߐ߫ ߊ߬ ߞߏߟߊߘߍߢߐ߲߯ ߞߘߐ߫ ߡߐ߰ ߥߐߙߐ߲ߝߌ߬ߟߊ߫ ߟߋ߬ ߓߟߏ߫߸ ߊ߬ ߟߊ߫ ߞߏߕߌ߯ ߞߘߐ ߘߏ߫ ߟߎ߫ ߣߌ߫ ߞߟߍ߬ߕߌ߰ ߞߘߐ ߘߏ߫ ߟߎ߫ ߦߴߊ߬ ߘߐ߫، ߞߕߌߕߍ߯ߟߊ߫ ߟߎ߬ߥߌ ߝߐߞߛ ߟߋ߬ ߞߋߟߋ߲߫ ߣߐ߬ ߞߊ߯ߙߌ ߛߎߥߊ߲ߘߌ߫ ߟߊ߫߸ ߞߏ߫ ߓߟߏ߫ ߞߊ߫ ߞߊ߲߫ ߞߊ߬ ߓߐ߫ ߊ߬ ߘߐ߫߸ ߞߏ߫ ߓߌ߬ߟߊ߬ ߞߍߣߴߊ߬ ߞߐ߫ ߞߏ ߡߍ߲ ߠߎ߬ ߘߐ߫߸ ߏ߬ ߟߎ߬ ߕߍ߫ ߓߘߍ߬ ߘߌ߫.
ߥߊ߯ߕߌ ߣߌ߲߬ ߖߡߊ߬ߣߊ ߞߎ߲߬ߠߊ߬ߛߌ߮ ߟߎ߬ ߞߊ߲߫ ߞߏ߫ ߡߐ߰ ߛߌ߫ ߞߊߣߵߊ߬ ߦߟߌߛߌ߰ ߡߊ߬ߞߕߏ߬ߟߌ߬ ߞߏ߫ ߟߊ߫، ߞߏ߫ « ߓߐߟߑߛߏߣߊߙߏ߫ ߕߍ߬ߘߍ߫ ߊ߬ ߝߍ߬ ߞߊ߬ ߞߊ߬ߝߏ߬ ߖߊߛߏ߲ ߠߋ߬ ߞߍ߫ ߖߡߊ߬ߣߊ ߞߣߐ߫ » ߞߊ߲ߕߌ߯ ߟߎ߬ߟߊ ߖߍ߬ߘߍ ߟߋ߬ ߞߵߏ߬ ߝߐ߫، ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ « ߘߊ߬ߟߎ߬ ߛߌߦߊߡߊ߲߫ ߠߋ߬ ߦߋ߲߬߸ ߘߊ߬ߟߎ߬ ߓߌ߫ ߦߙߌߞߊ ߣߴߊ߬ ߗߡߍ߬ ߦߙߌߞߊ ߞߊ߬ߣߌ߲߬. »
ߓߐߟߑߛߏߣߊߙߏ߫ ߟߋ߬ ߞߍߣߍ߲߫ ߞߊ߲ߕߌ߯ ߝߟߐ߫ ߘߌ߫ ߓߙߋߖ߭ߌߟ ߞߣߐ߫߸ ߡߍ߲ ߞߕߌߣߍ߲߫ ߞߏߖߎ߯ߓߊ߫ ߛߎ߮ ߣߌ߲߬ ߘߐ߫، ߓߙߋߖ߭ߌߟ ߘߏ߲߬ ߦߋ߫ ߖߡߊ߬ߣߊ߫ ߟߋ߬ ߘߌ߫߸ ߖߊߟߌߞߦߊ ߕߘߍ߬ ߡߍ߲ ߞߣߐ߫ ߣߊ߲߬ߕߌ߮ ߟߎ߫ ߕߋ߬ߟߋ ߘߐ߫߸ ߁߉߆߄ ߣߌ߫ ߁߉߈߅ ߕߍߟߊ ߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
