ߝߊ߬ߙߊ߲߬ߛߌ߫ ߖߡߊ߬ߣߊ ߞߊ߲߬߸ ߕߎ߬ߡߊ߬ߙߋ߲߬ ߘߊ߲ߘߐ߫ ߞߣߐ߫߸ ߝߊߙߊ߲ߛߎߥߊ߫ ߓߊߦߑߙߎ߫ ߞߍߣߍ߲ ߞߐ ߞߵߊ߬ ߟߊ߫ ߓߙߐߕߐߟߌ߫ ߛߓߍ ߟߊߕߊ߬ߡߌ߲߬ ߞߊ߲ߕߌ߯ ߋߡߊߣߎ߳ߦߍߟ ߡߊߞߑߙߐ߲߫ ߡߊ߬߸ ߞߎߣߎ߲߬ ߡߎ߰ߡߍ ߌߞߘߐ߫߸ ߡߊߞߑߙߐ߲ ߞߊ߬ ߛߋߓߊߛߑߕߌߦߍ߲ ߟߋߞߐߙߑߣߎ ߞߍ߫ ߊ߬ ߟߊ߫ ߞߏߕߌ߯ ߞߎߘߊ ߘߌ߫߸ ߊ߬ߟߋ ߡߍ߲ ߕߘߍ߬ ߦߋ߫ ߞߎ߲߬ߠߊ߬ߛߌ߰ ߞߙߎ߬ ߞߘߐ ߣߊ߲߬ߕߌ߯ߦߊ ߓߊ߯ߙߊ ߟߎ߬ ߞߏߕߌ߮ ߘߌ߫߸ ߊ߲ ߧߋ߫ ߥߊ߯ߕߌ ߡߍ߲ ߘߐ߫ ߕߋ߲߬߸ ߊ߬ ߞߊ߫ ߞߊ߲߫ ߞߊ߬ ߖߡߊ߬ߣߊ ߟߊ߫ ߛߊ߲߬ ߞߎߘߊ ߡߎ߬ߛߊ߬ߞߊ ߟߎ߬ ߟߋ߬ ߘߊߘߐߓߍ߲߬.
ߞߏߕߌ߯ ߞߎߘߊ ߢߌ߲߬ ߛߌ߬ߞߛߊ߬ߓߌ ߦߋ߫ ߛߊ߲߬ ߃߉ ߟߋ߬ ߢߐ߲߰ ߘߐ߫ ߕߋ߲߬߸ ߊ߬ ߦߋ߫ ߡߐ߰ ߟߋ߬ ߘߌ߫߸ ߋߡߊߣߎ߳ߦߍߟ ߡߊߞߑߙߐ߲߫ ߠߊ߫ ߟߊ߲ߘߦߊ ߦߋ߫ ߡߍ߲ ߞߊ߲߬ ߞߏߛߓߍ߫߸ ߞߊ߬ߦߌ߯ ߂߀߁߇ ߟߋ߬ ߟߊ߫߸ ߊ߬ ߦߋ߫ ߡߊߞߑߙߐ߲߫ ߠߊ߫ ߞߊ߲ߕߌ߯ߦߊ ߞߎ߲߬ߠߊ߬ߛߌ߰ ߞߙߎ ߞߣߐ߫، ߊ߬ߟߋ ߟߊ߫ ߟߐ߬ߘߎ߰ ߟߊߓߊ߲ ߞߍ߫ ߘߊ߫ ߣߊ߲߬ߕߌ߰ ߓߊ߯ߙߊ ߟߎ߬ ߞߏߕߌ߯ߦߊ ߟߋ߬ ߘߌ߫߸ ߝߊߙߊ߲ߛߎߥߊ߫ ߓߊߦߑߙߎ߫ ߟߊ߫ ߞߎ߲߬ߠߊ߬ߛߌ߰ ߞߙߎ ߞߣߐ߫߸ ߊ߬ ߣߌ߫ ߏ߬ ߟߎ߬ ߓߍߣߊ߬ ߢߐ߲߯ߦߋ ߞߍ߫ ߕߟߋ߬ߘߐ߬ ߝߊ߲ߝߍ߬߸ ߖߐ߲߰ߛߴߊ߬ߟߎ߬ ߦߴߊ߬ߟߎ߫ ߟߐ߬ߘߎ߮ ߘߴߊ߬ ߡߊ߬.
ߋߟߌߖ߭ߋ߫ ߞߊ߲ߕߌ߮ ߞߵߊ߬ ߟߊߢߌߣߌ߲߫ ߊ߬ ߝߍ߬߸ ߞߏ߫ ߓߘߍ߬ߓߘߍ߬ߟߌ߬ ߞߙߎ ߡߍ߲ ߠߎ߬ ߦߋ߫ ߥߛߊ߬ߓߏߟߏ߲ ߞߣߐ߫߸ ߊ߬ ߦߋ߫ ߞߎߡߊ߫ ߏ߬ ߞߊ߲ߕߌ߮ ߟߎ߬ ߦߋ߫߸ ߖߐ߲߰ߛߊ߫ ߖߡߊ߬ߣߊ ߟߊ߫ ߛߊ߲߬ ߞߎߘߊ ߖߐ߰ߣߍ ߟߎ߬ ߘߌ߫ ߛߋ߫ ߘߊߘߐߓߍ߲߬ ߠߊ߫߸ ߊ߬ ߣߌ߫ ߓߘߍ߬ߓߘߍ߬ߟߌ߬ ߡߐ߮ ߟߎ߬ ߦߋ߫ ߓߍ߲߬ ߞߋߟߋ߲߫ ߡߊ߬ ߞߊ߬ ߜߟߍ߬ߦߊ ߟߎ߬ ߞߎ߲߭ ߓߍ߲߬߸ ߒ߬ߓߊ߬߸ ߏ߬ ߞߎߡߊߢߐ߲߯ߦߊ ߟߎ߬ ߓߘߊ߫ ߓߊ߲߫ ߛߊ߫߸ ߊ߬ ߦߴߊ߬ ߝߍ߬ ߞߊ߬ ߡߐ߱ ߡߍ߲ ߠߎ߬ ߟߊߘߏ߲߬ ߊ߬ ߟߊ߫ ߞߎ߲߬ߠߊ߬ߛߌ߰ ߞߙߎ ߞߣߐ߫߸ ߊ߬ ߘߌ߫ ߏ߬ ߟߎ߬ ߝߐ߫ ߖߡߊ߬ߣߊ ߞߊ߲ߕߌ߮ ߦߋ߫.
ߓߊ߬ߙߌ߫߸ ߞߊ߬ ߞߐ߲߰ ߏ߬ ߞߎߡߊߢߐ߲߯ߦߊ ߟߎ߬ ߢߍ߫߸ ߓߘߍ߬ߓߘߍ߬ߟߌ߬ ߞߙߎ ߡߍ߲ ߠߎ߬ ߦߋ߫ ߝߊ߲߬ߞߊߛߌ߬ߣߊ߬ߦߊ ߟߊ߫߸ ߏ߬ ߟߎ߬ ߓߍ߯ ߞߵߊ߬ߟߎ߬ ߟߊ߫ ߘߌߡߌ߲ ߦߌ߬ߘߊߞߊ߬ ߟߋ߬߸ ߡߊ߬ߙߌ ߟߋߔߍ߲ߣ ߟߊ߫ ߞߎߡߊ߫ ߘߐ߫߸ ߞߌ߬ߛߍ߬ ߟߊ߬ߓߊ߲ ߡߍ߲ ߕߏߣߍ߲߫ ߕߘߍ߬ ߦߋ߫ ߡߊߞߑߙߐ߲߫ ߓߟߏ߫߸ ߊ߬ ߣߐ߬ ߏ߬ ߟߋ߬ ߕߋ߬ ߟߊ߫ ߣߌ߲߬ ߛߌߣߍ߲߬، ߝߣߊ߫ ߝߏߛߌ߬ ߟߋ߬ ߕߍߣߊ߬ ߥߛߊ߬ߘߋ߲߬ ߢߣߊߟߌ ߣߌ߲߬ ߠߊߟߐ߬ ߟߊ߫߸ ߣߴߏ߬ ߞߍ߫ ߘߊ߫ ߖ߭ߐ߬ߙߑߘߊ߲ߣ ߓߊߙߑߘߋߟߊ߫ ߟߋ߬ ߓߍߣߊ߬ ߞߍ߫ ߞߏߕߌ߯ ߞߎߘߊ ߘߌ߫، ߣߴߏ߬ ߘߏ߲߬ ߞߍ߫ ߘߊ߫߸ ߏ߬ ߞߘߐ ߟߋ߬ ߞߏ߫ ߊ߬ߟߋ ߟߊ߫ ߓߘߍ߬ߓߘߍ߬ߟߌ߬ ߞߙߎ ߟߋ߬ ߓߍߣߊ߬ ߥߛߊ߬ߓߏߟߏ߲ ߝߊ߲߬ߓߊ ߛߐ߬ߘߐ߲߬.
ߜ߭ߎߛ ߓߘߍ߬ߓߘߍ߬ߟߌ߬ ߞߙߎ ߟߎ߬ ߝߣߊ߫ ߟߊ߫ ߖߙߊ߬ߞߟߌ߬ ߞߊ߲ ߠߎ߬ ߘߐ߫߸ ߏ߬ ߟߎ߫ ߞߵߊ߬ ߦߌ߬ߘߊߞߊ߬ ߟߋ߬ ߞߏ߫ ߞߏߕߌ߯ ߞߎߘߊ ߣߌ߲߬ ߣߌ߫ ߡߊ߬ߙߌ ߟߋߔߍ߲ߣ ߓߍ߯ ߦߋ߫ ߞߋߟߋ߲߫ ߠߋ߬ ߘߌ߫߸ ߓߊߏ߬߸ ߊ߬ߟߎ߬ ߓߍ߯ ߞߊ߬ ߥߎ߬ߙߊ߬ߟߊ ߘߊߥߎ߲ ߠߋ߬ ߢߐ߲߮ ߝߍ߬߸ ߊ߬ߟߋ ߡߍ߲ ߕߘߍ߬ ߦߋ߫ ߋߡߊߣߎ߳ߦߍߟ ߡߊߞߑߙߐ߲߫ ߠߊ߫ ߓߟߏߞߘߐߡߐ߯ߦߊ ߟߊ߫.
