ߞߎ߲߬ߠߊ߬ߛߌ߮ ߓߍ߯
ߜߘߍ ߟߎ߬ߟߓߌ߫ ߝߊ߰ߡߊ ߟߎ߬ ߞߊ߲߫ ߞߏ߫ ߊ߬ߟߎ߬ ߓߘߴߊ߬ߟߎ߬ ߓߟߏ ߟߊ߫ ߞߊ߲ߡߋߙߋ߲ ߘߏ߫ ߕߎߣߎ߲߫ ߞߏ ߞߌ߬ߛߍ ߘߐ߫߸ ߡߍ߲ ߕߎߣߎ߲߫ ߘߊ߫ ߞߊ߬ߦߌ߯ ߂߀߁߇ ߟߊ߫ ߓߊߕߕߊ߫ ߕߌ߲߬ߞߎߘߎ߲ ߘߐ߫߸ ߊ߬ߟߑߛߊߤߍߟ ߡߊ߬ߙߊ ߘߐ߫، ߊ߬ ߞߟߏ߫ ߓߘߎߓߘߎ ߟߎ߫ ߟߋ߬ ߦߋߣߍ߲߫ ߊ߬ ߞߐߙߍ ߟߊ߫ ߛߌ߬ߛߍ߬ߡߙߊ߬ ߦߙߐ߬ ߟߊߓߌ߬ߟߊ߬ߣߍ߲ ߘߏ߫ ߘߐ߫.
ߞߌ߬ߓߊ߬ߙߏߞߙߊߟߌߟߊ߫ ߛߊ߬ ߇߃ ߘߏ߫߸ ߞߏ߫ ߊߟߌߝߊ߫ ߡߊߡߎߘߎ߬ ߖߊ߬ߞߌ߬ߕߋ߫߸ ߏ߬ ߟߋ߬ ߛߊ߬ߣߍ߲߫ ߞߊ߯ߙߌߟߏ߲ ߂߀߂߆ ߥߊ߬ߛߌ߬ߥߙߊ ߕߟߋ߬ ߇ ߡߊ߬߸ ߓߊ߲ߕߡߊߦߊ߫ ߛߏ ߞߣߐ߫߸ ߎߙߋߞߊߓߊ߬ ߞߊ߬ߝߏ߬ߙߋ߲ ߘߐ߫߸ ߡߊ߯ߡߎ߲߫ ߡߙߊ߬ߓߊ߰ߘߊ ߘߐ߫، ߊ߬ ߣߐ߬ ߡߊ߬ߙߌ߬ߝߊ ߟߋ߬ ߕߋ߬ ߟߴߊ߬ ߖߘߍ߬ ߟߊ߫߸ ߊ߬ ߞߎ߲߭ ߘߐ߫ ߞߊ߬ߣߌ߲߬، ߝߍ߬ ߘߏ߲߬ ߕߴߊ߬ ߤߊ߲ߞߟߌ ߟߊ߫߸ ߊ߬ ߡߊ߫ ߕߐ߬ߡߊ߬ߛߙߋ߬ ߛߌ߫ ߕߏ߫ ߝߣߊ߫ ߞߊ߬ ߓߍ߲߬ ߊ߬ ߟߊ߫ ߛߦߊ߬ ߞߏ ߣߌ߲߬ ߡߊ߬، ߏ߬ ߟߋ ߣߐ߬ ߊ߬ ߞߏ ߘߐߝߌ߲߬ ߠߊ߫ ߡߌߡߐ߫.
ߜߘߍ ߟߎ߬ߘߊ߬ߡߊ߲߬ߓߋ ߟߋ߬ ߞߍߣߍ߲߫ ߞߊ߯ߙߌ ߂߀߂߆ ߥߊ߬ߛߌ߬ߥߙߊ ߕߟߋ߬ ߇ ߡߊ߬߸ ߘߊ߬ߡߊ߲߬ ߓߊ߰ߙߊ߬ ߦߌߟߊ ߘߏߘߐ߫ ߞߌ߲߬ߞߌ߬ߢߊ߲߫߸ ߞߏ߫ ߝߌߘߌ߬ ߺ ߘߐ߫، ߊ߬ ߞߍ߫ ߘߊ߫ ߕߙߎ߬ ߘߌ߫ ߞߊ߬ ߡߐ߰ ߣߊ߯ߣߌ߲߫ ߠߋ߬ ߓߐ߬ߣߐ߫ ߊ߬ ߣߌ ߘߐ߫ ߘߊ߬ߡߊ߲߬ߛߋ߲߬ߠߊ ߟߎ߬ ߘߐ߫.
ߜߘߍ ߟߎ߬ߓߋ߬ ߞߍߣߍ߲߫ ߛߙߎߓߊ߲ߣߍ߲߫ ߛߊ߲߬ ߁߄ ߘߏ߫ ߟߋ߬ ߞߊ߲߬ ߞߎߖߋߟ ߘߎ߱ ߞߣߐ߫߸ ߏ߬ ߞߏ ߓߘߊ߫ ߟߊ߬ߡߊ߮ ߟߊߘߏ߲߬ ߦߋ߲߬ ߞߏߛߓߍ߫، ߞߊ߬ߕߎ߲߯߸ ߘߋ߲ߡߛߏߣߍ߲ ߣߌ߲߬ ߦߋ߫ ߞߊ߬ߙߊ߲߬ߘߊ ߟߋ߬ ߟߊ߫߸ ߊ߬ ߘߍ߬ߢߐ߲߮ ߘߏ߫ ߟߋ߬ ߦߋ߲߬ ߛߍߣߍ߲߬߸ ߗߍ߬ߡߊ߲߬ߣߍ߲߫ ߛߊ߲߬ ߁߇ ߟߵߏ߬ ߘߌ߫߸ ߏ߬ ߟߋ ߓߋ߬ߣߴߊ߬ ߞߊ߲߬، ߘߋ߲ߡߛߏߣߍ߲ ߣߌ߲߬ ߘߏ߲߬ ߦߋ߫ ߝߊߙߌߕߊߣߍ߲߫ ߘߌ߫߸ ߊ߬ ߡߊ߬ ߝߣߊ߫ ߣߐ߬ ߥߊߘߌ ߟߋ߬ ߡߌ߬ߣߊ߬ ߞߊ߲ߡߋߙߋ߲ ߏ߬ ߟߊ߫ ߡߐ߱ ߟߎ߬ ߟߊ߫߸ ߞߵߊ߬ ߡߊߞߎ߲߬ ߓߋ߬ߒ߬ߞߊ߲߬ߠߌ߲߬ ߞߏ ߣߌ߲߬ ߡߊ߬ ߜߘߎ߫߸ ߛߊ߫ ߞߊ߬ ߝߎ߯ߘߌ ߞߍ߫ ߊ߬ ߢߍߡߊ߬.
ߜߘߍ ߟߎ߬ߗߍ߭ ߘߏ߫ ߟߋ߬ ߡߏ߬ߛߏ ߞߊ߬ ߕߟߎ߫ ߞߟߊߡߊ߲ ߠߊߓߐ߲߬ ߊ߬ ߞߊ߲߬ ߞߍ߲ߘߍߟߏ߲߸ ߂߀߂߆ ߘߓߊ߬ߕߊ ߕߟߋ߬ ߃߀ ߛߎ ߘߐ߫ ߕߎߓߊ߫، ߊ߬ ߡߏ߬ߛߏ ߛߌ߬ߞߛߊߓߌ ߦߋ߫ ߛߊ߲߭ ߂߆ ߟߋ߬ ߘߐ߫߸ ߊ߬ ߓߊ߲߫ ߘߊ߫ ߕߌߢߍߟߌ ߟߋ߬ ߞߍ߫ ߟߊ߫ ߞߵߊ߬ ߓߏ߬ߙߌ߬߸ ߕߍ߮ ߓߘߊ߫ ߞߍ߫ ߊ߬ ߘߐ߫ ߞߟߍ߬ߡߐ߮ ߟߎ߬ ߓߟߏ߫.
ߜߘߍ ߟߎ߬ߞߋߣߌߦߊ߫ ߞߌ߬ߓߊ߬ߙߏ߬ߘߊ ߡߍ߲ ߕߐ߯ ߞߏ߫ ߕߎߞߏ߫߸ ߏ߬ ߞߊ߲߫ ߞߏ߫ ߡߏ߬ߛߏ߫ ߛߊ߲߬ ߃߀ ߘߏ߫ ߟߋ߬ ߞߵߊ߬ ߝߐ߫ ߊ߬ ߦߋ߫ ߞߏ߫ ߡߛߏ߬ ߝߌ߬ߟߊ߬ߣߊ߲߬ ߕߊ߬ ߟߐ߮ ߦߴߊ߬ ߟߊ߫، ߒ߬ߓߊ߬߸ ߡߏ߬ߛߏ ߡߐߣߍߣߍ߲߫ ߏ߬ ߟߋ ߘߐ߫ ߞߊ߬ ߕߊ ߛߎ߫ ߊ߬ߟߎ߬ ߟߊ߫ ߟߎ ߟߊ߫߸ ߞߵߊ߬ ߛߐ߬ߘߐ߲߬ ߊ߬ߟߎ߬ ߘߋ߲߫ ߡߐ߰ ߝߌ߬ߟߊ ߦߋ߫ ߓߏ߲ ߠߊ߫߸ ߏ߬ ߟߎ߬ ߕߏ߫ ߘߴߊ߬ ߘߐ߫ ߟߋ߬، ߊ߬ߟߋ߫ ߖߍ߬ߘߍ ߝߣߊ߫ ߛߎ߭ ߟߋ߬ ߦߋߣߍ߲߫ ߤߏߡߊ߫ ߓߊߦߌ߬ ߘߎ߱ ߞߣߐ߫߸ ߞߋߣߌߦߊ߫ ߕߟߋ߬ߓߋ ߘߐ߫.
ߜߘߍ ߟߎ߬ߣߌ߲߬ ߞߍߣߍ߲߫ ߓߎ߬ߙߋ߬ ߓߎߞߊߙߌߦߊ߫ ߟߋ߬߸ߛߌ߯ߙߌ߲߫ ߡߙߊ߬ߘߊ߬ߓߊ ߘߐ߫، ߘߋ߲ߣߍ߲߫ ߛߊ߲߬ ߇ ߘߏ߫ ߟߋ߬ ߛߎ߭ ߦߋߣߍ߲߫ ߞߐ߲߬ߛߏ߬ ߞߏߙߏ߲ ߘߏ߫ ߞߣߐ߫߸ ߊ߬ߟߎ߬ ߟߊ߫ ߞߊ߬ߙߊ߲߬ߕߊ ߞߐߝߟߌ ߟߊߓߐ ߘߎ߰ߛߊ߬ߜߍ ߡߊ߬. ߛߌߞߊ߫ ߞߍߣߍ߲߫ ߞߏ߫ ߊ߬ ߡߊ߫ ߛߎߘߊ߲߫ ߡߍ߲ߞߍ߬߸ ߏ߬ ߟߋ ߞߵߊ߬ ߟߐ߬ ߊ߬ ߓߊ߲߬ ߠߊ߫ ߘߏ߲߬ ߠߊ߫ ߟߎ ߞߣߐ߫، ߢߊߢߌߣߌ߲߫ߠߌ߲߫ ߝߏߦߌ߬ ߞߏ߬ߣߌ߲߬ ߡߊ߫ ߞߍ߫ ߊ߬ ߟߊ߫ ߡߎߣߎ߲߬.
ߜߘߍ ߟߎ߬߂߀߂߆ ߘߓߊ߬ߕߊ ߕߟߋ߬ ߁߈ ߣߌ߲߬ ߡߊ߬߸ ߕߍ߮ ߞߍߣߍ߲߫ ߡߏ߬ߛߏ ߘߏ߫ ߟߋ߬ ߘߐ߫ ߗߋ߳ߕߍߡ ߔߋ߳ߟ߸ ߙߐߛ ߓߋߕߌߦߏ߫ ߘߊߝߍ߬߸ ߊ߬ߟߋ ߣߐ߬ ߖߌ߫ ߞߟߊߡߊ߲߫ ߥߟߌ߬ߣߍ߲ ߠߋ߬ ߞߍ߫ ߟߴߊ߬ ߗߍ߬ ߣߴߊ߬ ߛߌ߬ߣߊ߬ߡߛߏ߫ ߞߊ߲߬، ߡߐ߰ ߝߌ߬ߟߊ ߏ߬ ߟߎ߬ ߓߍ߯ ߖߐߞߌߣߍ߲߫ ߞߏߖߎ߯ ߡߊߓߙߏ߬ߓߙߏ߬ߣߍ߲ ߦߋ߫ ߘߊ߲ߘߊߛߏ ߟߊ߫ ߞߟߊߡߊ߲߫ ߓߟߏ ߡߊ߬ ߕߋ߲߬.
ߞߓߊߞߏ ߟߎ߬߂߀߂߄ ߞߏ߲ߞߏߜߍ ߟߊ߫߸ ߗߍ߭ ߘߏ߫ ߟߋ߬ ߞߵߊ߬ ߡߏ߬ߛߏ ߝߊ߰ ߛߑߥߌߛ ߖߡߊ߬ߣߊ ߞߊ߲߬߸ ߞߊ߬ ߞߊ߬ ߓߊ߲߫ ߞߵߊ߬ ߘߐߞߎߘߎ߲ߞߎߘߎ߲߫، ߒ߬ߓߊ߬߸ ߗߍ߬ ߛߊ߲߬ ߄߃ ߏ߬ ߟߋ ߟߊ߫ ߞߕߌ ߕߍ߰ߣߍ߲߫ ߞߎߣߎ߲ߟߏ߲ ߣߌ߲߬ ߡߊ߬߸ ߞߵߊ߬ ߓߌ߬ߟߊ߫ ߛߌ߭ ߡߎ߰ߡߍ ߥߛߎ ߟߊ߫، ߡߊ߬ߛߎߓߊ ߡߍ߲ ߦߋ߫ ߕߋ߲߬߸ ߊ߬ ߞߏ ߡߊߞߓߊ߫ ߘߊ߫ ߟߋ߬ ߞߏߛߓߍ߫߸ ߡߍ߲ ߥߙߊ߬ߣߍ߲߫ ߡߐ߰ ߛߌߦߊߡߊ߲߫ ߡߊ߬.
ߜߘߍ ߟߎ߬ߡߐ߰ ߝߊ߰ ߕߊߓߐ ߟߋ߬ ߞߍߣߍ߲߫ ߞߎߣߎ߲߬ ߞߐ߬ߟߏ߲ ߡߊ߬ ߕߤߋߙߊ߲߫ ߕߟߋ߬ߓߋ ߖߊ߬ߥߏ߬ ߕߊ߲ߓߊ߲ ߘߏ߫ ߞߣߐ߫ ߊ߲ߘߌߛ߭ߋ߫߸ ߊ߬ߟߋ߬ ߖߊ߬ߥߏ߬ ߕߊ߲ߓߊ߲ ߕߐ߯ ߞߏ߫ ߊߙߑߜ߭ߊߝ߭ߊ߲߫، ߞߕߌߓߋߟߋ߲ ߓߘߊ߫ ߘߐ߬ߛߏ߰ߙߋ߬ߟߌ ߟߊߥߟߌ߬ ߞߊ߬ ߡߌ߬ߣߊ߬ߟߌ߬ ߛߓߍ ߓߌ߬ߟߊ߬ ߓߏ߲ ߟߐ߬ߓߊ߮ ߞߐ߫.
ߜߘߍ ߟߎ߬ߛߊߣߌ߲߫ ߢߌߣߌ߲߫ ߘߋ߲ߞߊ߫ ߞߎߘߎ߲ ߘߏ߫ ߟߋ߬ ߖߎߙߊ߲ߣߍ߲߫ ߞߍ߲ߘߍߟߏ߲ ߣߌ߲߬ ߡߊ߬߸ ߂߀߂߆ ߘߓߊ߬ߕߊ ߕߋ߬ߟߋ߫ ߂ ߡߊ߬ ߞߌߢߍ߲ߞߎߘߊ߫߸ ߡߊ߲߬ߖߊ߲߬ߠߊ߫ ߡߙߊ߬ߘߊ߬ߓߊ ߘߐ߫، ߝߊ߰ߓߊ߰ߕߐ ߦߙߌߞߊ ߦߋ߫ ߝߌߙߌ߲ߝߌߙߌ߲߫ ߛߏ߫ ߞߣߐ߫ ߡߐ߮ ߟߎ߬ ߣߌ߫ ߛߏ ߝߊ߰ߡߊ ߟߎ߬ ߕߍ߫. ߊ߬ ߞߏ߬ߣߌ߲߸ ߡߐ߰ ߞߐ߬ߣߐ߲߬ߘߐ߫ ߢߐ߲߰ ߠߋ߬ ߕߏߣߴߊ߬ ߘߐ߫߸ ߡߐ߰ ߘߴߊ߬ ߓߟߏߞߍ߫ ߡߍ߲ ߠߊ߫ ߞߊ߬ߣߌ߲߬.
