ߞߎߣߎ߲߬ ߞߐ߬ߓߊ߬ߟߏ߲ ߘߓߊ߬ߓߌߟߊ ߕߟߋ߬ ߃߁ ߠߋ߬ ߡߊ߬߸ ߛߊ߰ߣߐ߬ߞߍ ߞߵߊ߬ ߟߊ߫ ߟߊ߬ߢߌߣߌ߲ ߣߴߊ߬ ߟߊ߫ ߢߍߥߟߊ ߘߏ߫ ߟߋ߬ ߓߐ߫ ߢߟߊ߫، ߏ߬ ߡߍ߲ ߕߊ߭ ߕߎ߲߬ ߓߘߊ߫ ߛߊ߲߭ ߛߓߊ߬ ߓߐ߫߸ ߣߴߏ߬ ߦߋ߫ ߝߟߊ߫ ߛߊߣߌ߲ߡߊ߲ ߘߏ߫ ߕߘߎ ߘߴߊ߬ߟߎ߫ ߝߊ߬ߛߏ ߘߏ߲߬ߘߊ ߟߊ߫߸ ߞߵߏ߬ ߞߍ߫ ߊ߬ ߕߊ߫ ߡߊ߬ߜߍ߲ ߣߴߊ߬ ߕߊ߫ ߛߘߊߟߊߟߌ߫ ߝߋ߲ ߘߌ߫߸ ߤߊߟߌ߬ ߣߴߊ߬ ߦߋ߫ ߛߎ߬ߣߐ߮ ߘߐ߫ ߕߎ߬ߡߊ ߡߍ߲، ߊ߬ ߞߵߊ߬ ߦߌ߬ߘߴߊ߲ ߠߊ߫ ߢߊߝߐߟߌ߫ ߓߟߏ߫ ߡߊ߬߸ ߞߏ߫ ߊ߬ߟߋ ߕߎ߲߬ ߦߋ߫ ߝߐ߰ߓߍ߬ߦߊ߬ߟߊ ߟߋ߬ ߘߌ߫߸ ߡߍ߲ ߞߊ߬ ߛߊ߲߬ ߥߐ߯ߙߐ߫ ߢߐ߲߰ ߞߍ߫ ߝߐ߰ߓߍ߬ߦߊ߬ߟߌ ߘߐ߫، ߊ߬ ߞߊ߬ ߝߐ߰ߓߍ߬ߦߊ߬ߟߌ ߟߊߟߐ߭ ߡߍ߲ߞߍ߬߸ ߊ߬ ߞߊ߬ ߒߞߏ ߞߊ߬ߙߊ߲߫ ߏ߬ ߟߋ߬ ߘߐ߫߸ ߊ߬ ߝߣߊ߫ ߞߊ߬ ߓߐߘߊ ߡߍ߲ ߦߋ߫ ߝߊ߬ߛߏ߬ ߞߊ߲ ߣߴߊ߬ ߛߓߍߟߌ ߛߘߊߟߊߟߌ߫ ߝߋ߲ ߠߎ߬ ߘߐ߫ ߓߏ߲߬ߓߊ ߘߌ߫߸ ߏ߬ ߟߋ ߝߟߊ߫ ߡߊߛߓߍߣߍ߲ ߘߏ߫ ߕߘߎ ߘߌ߫ ߛߏ߫ ߟߎ߬ ߞߣߐ߫ ߝߊ߬ߛߏ߬ ߛߓߍߟߌ ߘߐ߫߸ ߊ߬ ߣߌ߫ ߓߊ߯ߙߊ߫ ߞߍ߫ ߦߙߐ ߟߎ߬ ߓߍ߯߸ ߏ߬ ߟߋ߬ ߘߐ߫ ߊ߬ ߞߵߊ߬ ߦߌ߬ߘߴߊ߲ ߠߊ߫߸ ߞߏ߫:
<< ߝߟߊ ߡߍ߲ ߠߎ߬ ߕߘߎߣߍ߲߫ ߏ߬ߘߌ߫߸ ߌߟߋ߬ ߘߌ߫ ߛߋ߫ ߞߵߌ ߟߊ߫ ߛߎ߬ߣߐ߮ ߘߐ߫ ߞߊ߬ߛߐ߬ߘߐ߲߬ ߝߟߊ ߏ߬ ߕߘߎߣߍ߲߫، ߡߍ߲ ߠߎ߬ ߦߋ߫ ߕߊ߬ߡߌ߲߬ ߠߊ߫߸ ߏ߬ ߟߎ߫ ߟߋ߬ ߦߋ߫ ߝߟߊ ߏ߬ ߦߋ߫ ߟߊ߫߸ ߡߊ߲߬ߕߏ߲߬ߕߍ߬ߟߊ߬ߞߊ ߡߍ߲ ߠߎ߬ ߦߋ߫ ߣߊ߬ ߟߊ߫ ߞߊ߬ ߖߡߊ߬ߣߊ ߘߐߦߊ߯ߟߊ߫߸ ߏ߬ ߟߎ߬ ߦߴߏ߬ ߟߋ ߦߋ߫ ߟߊ߫߸ ߞߵߊ߬ ߟߐ߲߫ ߞߏ߫ ߖߊ߰ ߒߞߏ߫ ߞߊߙߊ߲ߠߊ ߟߎ߬ ߦߋ߫ ߛߏ ߣߌ߲߬ ߠߊ߫، ߝߟߊ ߟߴߏ߬ ߦߌ߬ߘߊ߬ ߟߊ߫ ߞߊ߬ߛߐ߬ߘߐ߲߬ ߊߟߎ ߟߊߣߍ߲߫ ߛߎ߬ߣߐ߮ ߘߐ߫ >>. ߊ߬ ߞߵߏ߬ ߦߌ߬ߘߊ߫.
ߣߴߌ ߞߵߊ߬ ߡߊߝߍߣߍ߲߫߸ ߟߏ߬ߙߏ߲߬ߓߏ߲߫ ߣߌ߲߬ ߦߋ߫ ߛߏ߫ ߘߝߐ߬ߡߊ߬ߓߊ߫ ߟߋ߬ ߘߌ߫ ߥߎߟߘߊ ߒߞߏ߫ ߞߏ ߞߣߐ߫، ߒߞߏ ߞߊ߬ߙߊ߲߬ ߝߟߐ ߞߍ߫ ߘߊ߫ ߦߋ߲߬ ߡߍ߲ ߘߐ߫ ߞߊ߬ߙߊ߲߬ߡߐ߯ ߛߌ߰ߘߊ߬ߝߊ߫ ߛߊ߰ߣߐ߫ ߕߋ߬ߟߋ ߘߐ߫، ߒ߬ߓߊ߬߸ ߛߟߊߕߌ߯ ߓߊߞߊ߬ߙߌ߫ ߛߊ߰ߣߐ߫ ߞߊ߬ ߛߙߊ߬ߣߎ߲ ߞߎ߲߬ߛߌ߲߫ ߊ߬ ߡߙߌߞߋߟߋ߲ߢߐ߲߮ ߠߎ߬ ߡߊ߬߸ ߡߍ߲ ߠߎ߬ ߦߋ߫ ߓߐ߫ ߟߏ߬ߙߏ߲߬ߓߏ߲߫، ߦߏ߫ ߞߊ߬ߙߊ߲߬ߡߐ߯ ߟߊ߲߬ߝߌߦߊ߫ ߛߎ߬ߞߎ߫ ߖߊ߰ߣߍ߫߸ ߞߵߊ߬ ߦߌ߬ߘߊ߬ ߞߴߏ߬ ߡߊ߫ ߞߍ߫ ߏ߬ ߢߐ߲߰ ߣߊ߲߬ߝߟߏ߬ߕߌ߰ ߟߊߞߊ߬ߟߌ߬ߣߍ߲߬ ߘߌ߫، ߞߊ߬ߕߎ߲߯߸ ߞߏ߫ ߡߐ߰ ߛߌߦߊߡߊ߲߫ ߦߋ߫ ߣߊ߲߬ߝߟߏ߬ߕߌ߰ߦߊ ߟߋ߬ ߖߌ߰ ߟߊ߫ ߓߙߊߞߊ ߕߐ߰ߡߊ߬ߛߙߋ ߘߌ߫ ߊ߲ ߓߌ߬ ߕߟߋ ߘߐ߫߸ ߞߊ߬ߛߐ߬ߘߐ߲߬߸ ߡߐ߰ ߘߌ߫ ߛߋ߫ ߞߍ߫ ߟߊ߫ ߘߟߊߝߊ߫ ߘߋ߲ ߣߌ߫ ߖߛߎ߬ߛߎߡߊ߫ ߘߋ߲ ߘߌ߫߸ ߞߊ߬ߕߘߍ߬ ߝߏߦߌ߬ ߕߴߌ ߓߟߏ߫߸ ߊ߬ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫߸ ߞߏ߫:
<< ߒߠߋ ߦߋ߫ ߊߟߊ߫ ߕߙߊ߫ ߟߊ߫ ߟߋ߬߸ ߒ ߧߋ߫ ߞߍ߫ ߘߟߊ߫ ߝߊ߫ ߘߋ߲ ߣߌ߫ ߖߛߎ߬ߛߎߡߊ߫ ߘߋ߲ ߘߌ߫߸ ߞߊ߬ ߛߋ߫ ߞߏ߫ ߞߍ߫ ߟߊ߫ ߝߊ߬ߛߏ ߟߊ߫߸ ߝߊ߬ߛߏ߬ ߘߋ߲ ߠߎ߫ ߣߕߊ߬ߣߍ߲߬ ߡߍ߲ ߠߊ߫، ߊ߬ߟߎ߫ ߣߕߊ߬ߣߍ߲߬ ߡߍ߲ ߠߊ߫߸ ߏ߬ ߘߏ߫ ߟߋ߬ ߝߟߊߞߏ ߏ߬ ߘߌ߫߸ ߊ߬ ߣߌ߫ ߓߊ߯ߙߊ߫ ߦߙߐ ߡߍ߲ ߠߎ߬ ߦߋ߫ ߛߏ ߞߣߐ߫ ߞߵߏ߬ ߟߎ߬ ߡߊߛߓߍ߫ ߒߞߏ ߟߊ߫߸ ߏ߬ ߘߌ߫ ߛߋ߫ ߞߊ߬ ߒߞߏ ߞߊ߬ߣߌ߲ ߘߏ߲߬ ߡߌ߬ߙߌ߲߬ߘߌ ߟߊ߫>>. ߊ߬ ߞߵߏ߬ ߣߊ߬ߕߊ߫.
ߝߟߊ߫ ߕߘߎ ߣߌ߲߬ ߘߐ߫߸ ߊ߬ ߓߟߏ ߛߋ߫ ߘߊ߫ ߝߟߊ߫ ߞߋߟߋ߲߫ ߠߋ߬ ߘߐ߫߸ ߞߵߏ߬ ߕߘߎ߫ ߟߏ߬ߙߏ߲߬ߓߏ߲߫ ߘߏ߲߬ߘߊ ߟߊ߫߸ ߞߵߏ߬ ߞߍ߫ ߒߞߏ߫ ߛߓߍߟߌ ߛߘߊߟߊ߫ ߝߋ߲ ߘߌ߫ ߕߊ߬ߡߌ߲߬ߓߊ߰ߕߐ ߟߎ߬ ߢߊߞߘߐ߫߸ ߡߍ߲ ߠߎ߬ ߓߐ߫ ߟߊ߫ ߞߐߣߊߞߙߌ߫ ߞߊ߬ ߕߊ߯ ߓߡߊ߬ߞߐ߫߸ ߊ߬ ߣߌ߫ ߞߊ߬ ߓߐ߫ ߓߡߊ߬ߞߐ߫ ߞߊ߬ ߕߊ߯ ߞߐߣߊߞߙߌ߫. ߛߓߊ߬ ߜߘߍ߫ ߦߋ߫ ߢߍߥߟߊ ߘߐ߫ ߊ߬ ߣߴߊ߬ ߘߍ߬ߒ߬ߞߏ߬ߡߊ߬ߢߐ߲߰ ߜߘߍ߫ ߟߎ߬ ߓߟߏ߫ ߣߌ߲߬ ߞߏ ߘߐ߫߸ ߝߌߘߊ ߓߍߣߊ߬ ߓߐ߫ ߡߍ߲ ߢߊߡߊ߬ ߕߎ߬ߡߊ߫ ߣߊ߬ߕߐ ߟߎ߬ ߘߐ߫ ߊ߬ߟߎ߬ ߓߟߏ߫.
ߓߊߞߊ߬ߙߌ߫ ߛߊ߰ߣߐ߫ ߞߵߊ߬ ߞߊ߲ߠߊߘߌ߫ ߝߊ߬ߛߏ߬ ߘߋ߲ ߕߐ߭ ߟߎ߬ ߡߊ߬ ߞߎߡߊ߫ ߟߊߓߊ߲߫ ߘߐ߫߸ ߞߏ߫ ߓߍ߯ ߦߴߊ߬ ߘߐߖߊ߬ ߞߊ߬ ߒߞߏ ߞߊ߬ߙߊ߲߫، ߏ߬ ߡߍ߲ ߦߋ߫ ߝߊ߬ߛߏ ߞߊ߬ߣߌ߲ ߣߴߊ߬ ߟߊߥߙߎߞߌ ߞߎ߬ߘߎ ߛߌ߰ ߟߊ߫ ߡߐ߰ ߞߊ߲ߠߊ߫߸ߞߏ߫ ߣߌ߫ ߓߍ߯ ߞߵߊ߬ ߕߊ߫ ߞߍ߫ ߕߊ߫ ߞߍ߫߸ ߞߊ߬ ߓߟߏ ߘߌ߫ ߢߐ߲߮ ߡߊ߬، ߝߊ߬ߛߏ ߘߌ߫ ߛߓߊ߬ߕߌ߫.
