ߕߋߙߌߦߊ ߡߍ߲ ߦߋ߫ ߜ߭߭ߊ߲ߓߌ߫ ߣߌ߫ ߖߌ߬ߣߍ߬ ߞߊ߲ߓߍ߲ ߕߍ߫߸ ߓߊߘߋ߲ߧߊ ߡߍ߲ ߦߴߊ߬ߟߎ߬ ߕߍ߫߸ ߊ߬ ߣߌ߫ ߓߊ߯ߙߊߢߐ߲߯ߦߊ ߡߍ߲ ߦߴߊ߬ߟߎ߬ ߕߍ߫߸ ߓߐߒߡߊߟߌ ߢߌ߲߬ ߞߍߣߍ߲߫ ߏ߬ ߟߋ ߞߊߡߊ߲ ߞߣߐ߫.

ߟߊ߬ߛߣߍ߬ߟߌ߬ ߞߏ߬ߢߌߡߊ ߟߎ߬ ߞߐߝߍ߬߸ ߞߊ߲ߕߌ߯ ߝߌ߬ߟߊ ߓߊ߬ߘߏ߬ ߘߊ߫߸ ߊ߬ߟߎ߬ ߕߊ߫ ߜߋ߲߬ ߘߐ߫߸ ߞߊ߬ ߓߍ߲߬ ߞߏߟߊߘߍߢߐ߲߯ߦߊ߫ ߝߊ߲߬ߝߌ߬ߟߊ߬ߡߊ ߡߊ߬߸ ߊ߬ ߣߌ߫ ߓߊ߯ߙߊߢߐ߲߯ߦߊ ߟߊߘߍ߬ ߞߏ ߘߊߞߎ߲߫ ߛߌߦߊߡߊ߲߫ ߘߐ߫߸ ߦߏ߫ ߟߐ߬ߟߌ ߣߌ߫ ߛߌߟߊ߫ ߞߏ ߟߎ߬߸ ߟߊ߬ߞߊ߲߬ߘߊ߬ߟߌ߸ ߖߌ߰ߣߌ߬ߦߟߍ߸ ߢߎߡߍ߫ ߞߏ߸ ߊ߬ ߣߌ߫ ߟߐ߲ߠߌ߲ߦߊ߫ ߞߏ߫ ߛߌߦߊߡߊ߲߫.

ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߌ߫ ߊߘߡߊ߫ ߓߊߙߏ߫ ߞߵߊ߬ ߦߌ߬ߘߊ߬߸ ߞߏ߫ ߖߡߊ߬ߣߊ߫ ߝߌ߬ߟߊ ߡߍ߲ ߦߋ߫ ߕߋ߲߬߸ ߓߌ߬ߡߴߊ߬ߟߎ߫ ߓߌ߬ߟߊ߬ ߞߏ߫ ߡߊ߬߸ ߏ߬ ߘߐ߫߸ ߞߏ߫ ߝߏ߫ ߞߊ߬ ߛߴߊ߬ߟߎ߬ ߟߊ߫ ߞߏߟߊߘߍߢߐ߲߯ߦߊ ߏ߬ ߟߋ ߕߐ߬ߣߐ ߟߊߘߏ߲߬ ߠߊ߫ ߢߐ߲߮ ߞߎ߲߬߸ ߖߡߊ߬ߣߊ߬ߘߋ߲ ߠߎ߬ ߓߍ߯ ߦߋ߫ ߘߏ߫ ߛߐ߬ߘߐ߲߫ ߊ߬ ߕߐ߬ߣߐ ߘߐ߫.

ߖߌ߬ߣߍ߬ ߞߊ߲ߕߌ߮ ߞߵߊ߬ ߦߌ߬ߘߊ߬߸ ߞߏ߫ ߓߊߘߋ߲ߧߊ ߣߌ߫ ߜ߭ߊ߲ߓߌ߫ ߣߌ߫ ߖߌ߬ߣߍ߬ ߕߍ߫، ߊߘߡߊ߫ ߓߊߙߏ߫ ߞߊ߬ ߕߊ߲߬ߘߏ߬ߟߌ ߟߊߛߋ߫ ߖߌ߬ߣߍ߫ ߝߊ߰ߡߊ ߟߎ߫ ߡߊ߬߸ ߊ߬ ߟߊߓߍ߲߬ ߞߏ߬ߢߌߡߊ ߟߊ߫߸ ߢߊߞߘߐ ߣߌ߫ ߟߏ߲ߟߊ߲߫ ߓߏ߲ߧߊ ߟߊ߫߸ ߊ߬ ߣߌ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߍ ߞߵߊ߬ ߓߌ߬ߟߴߊ߬ ߛߊ߬ߥߏ ߘߐ߫.

ߞߊ߲ߕߌ߯ ߡߐ߰ ߝߌ߬ߟߊ ߟߊ߫ ߢߐ߲߯ߦߋ ߞߐ ߟߋ߬ ߘߐ߫߸ ߖߡߊ߬ߣߊ߫ ߝߌ߬ߟߊ ߢߌ߲߬ ߠߎ߬ ߞߐߞߊ߲߫ ߞߏ ߟߎ߬ ߞߏߕߌ߮ ߞߊ߬ ߘߍ߬ߡߊ߬ ߟߊߛߋߟߌ ߘߏ߫ ߞߍ߫߸ ߞߊ߬ ߞߎߡߊ߫ ߘߊߞߎ߲߫ ߢߊߝߐߣߍ߲ ߠߎ߬ ߞߊ߲߬.

ߊ߬ߟߎ߬ ߟߊ߫ ߞߎߡߊ ߟߎ߬ ߘߐ߫߸ ߖߌ߬ߣߍ߬ߞߊ ߡߍ߲ ߠߎ߬ ߦߋ߫ ߛߌ߱ ߘߐ߫ ߜ߭ߊ߲ߓߌ߫߸ ߊ߬ ߣߌ߫ ߜ߭ߊ߲ߓߌߞߊ ߡߍ߲ ߠߎ߬ ߦߋ߫ ߛߌ߱ ߘߐ߫ ߖߌ߬ߣߍ߬߸ ߞߎߡߊ߫ ߞߍ߫ ߘߴߏ߬ ߟߎ߬ ߟߊ߫ ߞߏ ߟߌ߬ߤߟߊ ߞߊ߲߬، ߊ߬ߟߎ߬ ߞߎߡߊ߫ ߘߊ߫ ߝߣߊ߫߸ ߖߐ ߣߌ߫ ߖߛߎ߬ߛߎߡߊ ߘߌ߫ ߛߋ߫ ߘߏ߲߬ ߠߊ߫ ߕߟߋ߬ߓߋ߬ ߊߝߙߌߞߌ߬ ߞߣߐ߫ ߢߊ ߡߍ߲ ߡߊ߬߸ ߞߊ߬ ߓߊߛߌ߮ ߟߊߘߏ߲߬.

ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߌ߫ ߣߊ߲߬ߝߟߏ߬ ߞߏ ߛߌߟߊ ߝߍ߬߸ ߖߡߊ߬ߣߊ߫ ߝߌ߬ߟߊ ߣߌ߲߬ ߞߊ߬ ߓߊ߯ߙߊߢߐ߲߯ߦߊ߫ ߞߎߘߊ ߘߏ߫ ߟߎ߫ ߓߍ߲߬ߒ߬ߛߋ߲߬ߡߊ ߘߐߖߊ߬ߥߏ߬߸ ߡߍ߲ ߞߎߡߊ ߓߎ߲ߓߎ߲߫ ߘߊ߫ ߢߎߡߍߞߏ ߡߊ߬.

ߘߊߞߎ߲ ߢߌ߲߬ ߘߐ߫߸ ߞߏߕߌ߮ ߡߍ߲ ߠߎ߬ ߘߐ߱ߘߏ߲߬ߣߍ߲߬ ߢߎߡߍ߫ ߞߏ ߟߊ߫ ߓߊ߬߸ ߡߍ߲ ߠߎ߬ ߘߐ߱ߘߏ߲߬ߣߍ߲߫ ߕߍߓߊ߯ߦߊ ߟߊ߫ ߓߊ߬߸ ߘߊ߬ߡߊ߲ ߞߏߕߌ߮߸ ߞߵߏ߬ ߟߊ߫ ߣߊ߲߬ߒ߬ߕߊ߲߬ ߡߊߞߟߐ ߟߎ߬ ߣߌ߫ ߣߊ߲߬ߕߌ߰ ߛߊ߲ߘߐ ߟߎ߫ ߞߊ߲߬߸ ߏ߬ ߟߎ߬ ߛߌߦߊߡߊ߲߫ ߕߘߍ߬ ߞߣߍ ߞߊ߲߬߸ ߞߵߊ߬ ߦߌ߬ߘߊ߬ ߞߏ߫ ߖߡߊ߬ߣߊ߫ ߝߌ߬ߟߊ ߢߌ߲߬ ߠߎ߬ ߜߎ ߦߴߊ߬ ߝߍ߬ ߟߋ߬ ߞߵߊ߬ߟߎ߬ ߟߊ߫ ߓߊ߯ߙߊߢߐ߲߯ߦߊ ߞߣߐ ߘߐߘߎ߲߬ߧߊ߬ ߞߏߛߓߍ߫.

ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߌ߫ ߊߘߡߊ߫ ߓߊߙߏ߫ ߞߵߊ߬ ߦߌ߬ߘߊ߬ ߢߐ߲߮ ߠߊ߫߸ ߞߏ߫ ߊ߬ߟߎ߬ ߡߊ߲߫ ߞߊ߲߫ ߞߊ߬ ߝߡߊ߬ ߢߐ߲߮ ߡߊ߬߸ ߞߏ߫ ߛߴߊ߬ߟߎ߬ ߘߌ߫ ߛߋ߫ ߓߊ߬ߘߏ߬ ߟߊ߫ ߛߐ߲߬ ߞߵߊ߬ߟߎ߬ ߤߊ߲ߞߟߌ ߟߎ߫ ߝߙߊ߬ ߢߐ߲߮ ߞߊ߲߬.

ߏ߬ ߡߙߌߦߊ ߟߋ߬ ߞߏߛߐ߲߬߸ ߊߘߡߊ߫ ߓߊߙߏ߫ ߞߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊߞߟߌ߫ ߜߍ ߘߐ߫߸ ߞߏ߫ ߛߴߊ߬ ߘߌ߫ ߥߊ߫ ߓߐ߫ ߜ߭ߊ߲ߓߌ߫ ߢߊ ߡߍ߲ ߡߊ߬،  ߖߌ߬ߣߍ߬ ߞߊ߲ߕߌ߮ ߘߏ߲߬ ߡߊ߫ ߜߟߍ߬ߦߊ߫ ߘߏ߲߬ ߏ߬ ߘߐ߫߸ ߊ߬ ߛߐ߲߬ ߘߊ߫، ߏ߬ ߞߍߕߐ߫ ߟߏ߲߫ ߞߋߟߋ߲ ߡߍ߲ ߡߊ߬ ߛߊ߫߸ ߏ߬ ߞߊ߫ ߞߊ߲߫ ߞߊ߬ ߟߊߕߍ߰ ߥߊ߯ߕߌ߫ ߣߊ߬ߕߐ ߟߎ߫ ߟߋ߬ ߘߐ߫ ߕߍߓߊ߯ߦߊ ߞߣߐߡߊ߬.

ߟߊ߬ߛߋ߬ߟߌ ߡߍ߲ ߞߍ߫ ߘߊ߫߸ ߊ߬ ߞߍ߫ ߘߊ߫ ߞߊ߲߫ ߝߌ߬ߟߊ߫ ߟߋ߬ ߘߐ߫߸ ߊ߲߬ߜ߭ߌ߬ߟߋ߬ ߞߊ߲ ߣߌ߫ ߝߊ߬ߙߊ߲߬ߛߌ߬ ߞߊ߲߸ ߓߍ߯ ߝߣߊ߫ ߞߵߊ߬ ߞߟߊ߬ߣߐ߬ߦߊ߬ ߞߐߘߍ߫.

ߏ߬ ߘߐ߫߸ ߜ߭ߊ߲ߓߌ߫ ߞߊ߲ߕߌ߮ ߟߊ߫ ߓߐߒߡߊߟߌ ߣߌ߲߬ ߓߘߊ߫ ߞߍ߫ ߛߋ߲߬ߕߊ߬ ߞߎߘߊ߫ ߘߴߊ߬ ߟߊ߫ ߖߡߊ߬ߣߊ ߣߌ߫ ߖߌ߬ߣߍ߬ ߕߍ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߴߊ߬ ߝߍ߬ ߞߵߊ߬ߟߎ߬ ߟߊ߫ ߓߊ߯ߙߊߢߐ߲߯ߦߊ ߟߊߥߙߎߞߌ߫߸ ߞߵߊ߬ߟߎߎ߬ ߓߊ߲ߓߊ߲߫ ߛߐ߬ߘߐ߲ ߞߊ߲߬߸ ߟߊ߬ߞߊ߲߬ߘߊ߬ߟߌ ߞߊ߲߬߸ ߜߟߐߡߌ߲ ߞߊ߲߬߸ ߟߐ߲ߠߌ߲ߦߊ ߞߊ߲߬߸ ߊ߬ ߣߌ߫ ߕߍߓߊ߯ߦߊ.

ߞߎߣߎ߲߬ ߕߟߋ߬ ߞߋߟߋ߲ ߏ߬ ߡߊ߬߸  ߢߐ߲߯ߦߋ ߓߊ߲ ߡߍ߲ ߞߍ߫ ߘߊ߫ ߞߎߓߋ ߟߊ߫߸ ߊߘߡߊ߫ ߓߊߙߏ߫ ߡߊ߫ ߛߌ߬ ߜߘߍߞߍ߫߸ ߊ߬ ߞߵߊ߬ ߞߐߞߎ߬ߘߎ߫ ߞߐ߬ߣߐ߫ ߢߊ߬ߡߊ߲߬ߡߊ ߞߣߐ߫߸ ߞߊ߬ ߓߐ߫ ߞߐߣߊߞߙߌ߫ ߞߵߊ߬ ߝߊ߬ߛߏ ߡߊߜߍ߲߫߸ ߓߊ߲߬ߖߎߟ، ߓߐߒߡߊߟߌ ߏ߬ ߟߋ ߘߏ߲߬ ߞߍߣߍ߲߫ ߛߌߟߊ ߟߊߞߊ߬ߣߍ߲ ߘߌ߫ ߖߌ߬ߣߍ߬ ߣߌ߫ ߜ߭ߊ߲ߓߌ߫ ߕߍ߫.