ߖߌ߬ߣߍ߬ ߞߊ߲ߓߍ߲ ߞߊ߲ߕߌ߮߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߏ߲߬ ߘߊ߫ ߊߓߌߖߊ߲߬ ߞߎߣߎ߲߬ ߛߌ߬ߣߌ߲߬ߟߏ߲ ߛߎ ߟߋ߬ ߘߐ߫߸ ߂߀߂߆ ߕߎߟߊߝߌ߲ ߕߟߋ߬ ߁߁߸ ߖߡߊ߬ߣߊ ߓߐߒߡߊߟߌ ߟߊ߫ ߜߋ߲ߞߐ߰ߖߌ߬ߘߊ ߞߣߐ߫، ߊ߬ ߖߌ߰ ߘߊ߫ ߛߊ߲ߡߊߞߎߟߎ߲ ߞߣߐ߫ ߡߊ߲߬ߕߏ߲߬ߕߍ߬ ߛߊ߲ߡߊߘߊ߲߫ ߝߋ߬ߟߌߞߛ ߤߎ߬ߝߏߦߌ߬ ߓߎߥߊߢߍ߫ ߟߋ߬߸ ߊ߬ ߟߊߛߣߍ߫ ߘߊ߫ ߜߋ߲ߞߐ߰ߖߌ߬ߘߊ ߞߊ߲߬ߜߍ߬ߘߊ ߞߊ߲ߕߌ߯ ߡߛߏ ߞߊ߲߬ߖߊ߫ ߞߡߊ߬ߙߊ߫ ߟߋ߬ ߓߟߏ߫߸ ߊ߬ ߣߌ߫ ߞߎ߲߬ߠߊ߬ߛߌ߰ ߛߌ߲߬ߝߏ߲߬ ߛߌߦߊߡߊ߲߫.
ߖߌ߬ߣߍ߫ ߟߊ߬ߛߌ߰ߘߋ߲ ߡߍ߲ ߦߋ߫ ߜߋ߲ߞߐ߰ߖߌ߬ߘߊ ߟߊ߫߸ ߓߊ߬ߛ߭ߌߙ ߖߊߟߏ߫߸ ߏ߬ ߝߣߊ߫ ߕߍ߬ߘߍ߫ ߟߊ߬ߛߣߍ߬ߟߌ߬ ߖߡߊ ߢߌ߲߬ ߘߐ߫߸ ߊ߰ ߦߋ߫ ߟߊ߫ ߖߌ߬ߦߊ߬ߓߍ ߟߎ߬ ߘߐ߫߸ ߞߊ߲ߕߌ߯ߘߊ ߝߣߊ߫ ߞߵߊ߬ ߟߊߛߙߋߦߊ߫ ߟߌ߬ߤߟߊ߬ ߘߌߣߍ߲ ߘߐ߫.
ߟߊ߬ߛߣߍ߬߬ߟߌ ߞߐߝߍ߬߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ ߞߎ߲߬ߟߊ߫ ߖߌ߬ߣߍ߬ߞߊ ߟߎ߫ ߞߊ߲߬߸ ߡߍ߲ ߠߎ߬ ߦߋ߫ ߛߌ߱ ߘߐ߫ ߜߋ߲ߞߐ߰ߖߌ߬ߘߊ ߟߊ߫ ߦߋ߲߬߸ ߣߴߊ߬ߟߎ߬ ߓߐ߫ ߘߊ߫ ߓߐߟߌ߫ ߞߐߟߌߞߐߟߌ ߟߊ߫ ߞߵߊ߬ߟߎ߫ ߝߊ߬ߛߏ ߞߊ߲ߕߌ߮ ߟߊߓߍ߲߬ ߥߎ߬ߘߊ߲ ߘߝߊߣߍ߲ ߘߐ߫، ߗߍ߭ ߟߎ߬߸ ߡߏ߬ߛߏߏ ߟߎ߬߸ ߘߋ߲ߡߌߛߍ߲ ߠߎ߬߸ ߊ߬ߟߎ߬ ߓߍ߯ ߣߊ߬ ߘߊ߫ ߞߊ߲ߕߌ߮ ߝߏ߬߸ ߛߍߥߊ ߖߍ߬ߘߍߖߍ߬ߘߍ ߘߐ߫.
ߖߌ߬ߣߍ߬ ߞߊ߲ߓߍ߲ ߞߊ߲ߕߌ߯ߘߊ ߟߊ߫ ߟߊ߬ߛߋ߬ߟߌ ߘߐ߫߸ ߟߊ߬ߓߍ߲߬ߠߌ߲ ߞߍ߫ ߘߊ߫ ߖߌ߬ߣߍ߬ߞߊ ߟߎ߬ ߓߟߏߏ߫ ߟߋ߬ ߝߛߊߦߌ߫߸ ߊ߬ߟߎ߬ ߛߌߦߊߡߊ߲߫ ߠߋ߬ ߓߐ߫ ߘߊ߫.
ߓߐߒߡߊߟߌ ߢߌ߲߬ ߞߎ߲߭ ߦߋ߫ ߖߌ߬ߣߍ߬ ߣߌ߫ ߜߋ߲ߞߐ߰ߖߌ߬ߘߊ ߡߊߘߏ߲߭ ߠߋ߬ ߘߌ߫ ߢߐ߲߮ ߠߊ߫ ߓߘߍߞߍ߭، ߞߊ߬ߕߎ߲߯߸ ߖߡߊ߬ߣߊ߫ ߝߌ߬ߟߊ ߢߌ߲߬ ߠߎ߫ ߕߎߎ߲߰ߣߍ߲߬ ߢߐ߲߮ ߠߊ߫ ߟߋ߬ ߜߐߞߎ߫߸ ߞߎߡߊ߫ ߛߌߦߊߡߊ߲߫ ߘߏ߲߬ ߝߣߊ߫ ߘߐߖߊ߬ߥߏ ߦߴߊ߬ߟߎ߬ ߣߌ߫ ߢߐ߲߯ ߕߍ߫ ߡߐ߰ߦߊ ߛߌߟߊ ߝߍ߬߸ ߊ߬ ߣߌ߫ ߛߐ߬ߘߐ߲ ߛߌߟߊ ߝߍ߬، ߞߊ߬ߕߎ߲߯߸ ߖߌ߬ߣߍ߬ߞߊ ߞߊ߫ ߛߌߦߊ߫ ߓߊߟߋ߬ ߜߋ߲ߞߐ߰ߖߌ߬ߘߊ ߟߊ߫.
ߊߟߎ߫ ߦߴߊ߬ ߟߐ߲߫߸ ߂߀߂߅ ߥߊ߬ߛߌ߬ߥߙߊ ߕߟߋ߬ ߁߇ ߣߴߊ߬ ߡߊ߬߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߊ߯ ߘߊ߫ ߓߐ߫ ߟߋ߬ ߊߓߌߖߊ߲߬، ߊ߬ ߟߊ߫ ߓߐߒߡߊߟߌ ߏ߬ ߟߋ ߘߐ߫߸ ߊ߬ߟߎ߬ ߞߎߡߊ߫ ߘߊ߫ ߞߏ߫ ߛߌߦߊߡߊ߲߫ ߞߊ߲߬߸ ߝߏ߫ ߊߟߛߊߣ ߥߊߕߙߊ߫ ߞߵߊ߬ ߝߐ߫ ߞߏ߫: <<ߊ߲ ߓߘߊ߫ ߞߎߡߊ߫߸ ߞߊ߬ ߞߎߡߊ ߘߐߘߎ߲߬ߧߊ߬ ߞߏߛߓߍ߫߸ ߡߍ߲ ߞߍߣߍ߲߫ ߕߙߎ߬ ߘߌ߫߸ ߊ߲ ߓߘߊ߫ ߞߏ߫ ߛߌߦߊߡߊ߲߫ ߘߐߖߊ߬ߥߏ߫ ߒ߬ ߣߌ߫ ߢߐ߲߯ ߕߍ߫.>> ߞߊ߬ ߞߎߡߊ߫ ߞߏ߫ ߛߌߦߊߡߊ߲߫ ߞߊ߲߬ ߣߌ߲߬، ߥߊߕߙߊ߫ ߞߵߏ߬ ߟߋ ߝߐ߫ ߊ߬ ߣߌ߫ ߞߊ߲ߕߌ߮ ߟߊ߫ ߢߐ߲߯ߦߋ ߞߐ ߘߐ߫.
ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߝߣߊ߫ ߞߵߊ߬ ߦߌ߬ߘߊ߫ ߏ߬ ߥߊ߯ߕߌ ߟߋ߬ ߟߊ߫߸ ߞߏ߫ ߓߊ߯ߙߊߢߐ߲߯ߦߊ ߡߍ߲ ߦߴߊ߬ߟߎ߬ ߣߌ߫ ߜߋ߲ߞߐ߰ߖߌ߬ߘߊ ߕߍ߫߸ ߏ߬ ߛߌ߰ߣߍ߲߫ <<ߟߊߒߠߦߊ߫ ߝߊ߲߬ߝߌ߬ߟߊ߬ߡߊ ߟߋ߬ ߡߊ߬߸ ߢߐ߲߯ ߠߊߡߍ߲ ߣߌ߫ ߢߐ߲߯ ߓߏ߲ߧߊ.>>
ߛߊߙߏ߲߬ ߓߐߒߡߊߟߌ߫ ߞߋߟߋ߲ ߏ߬ ߟߋ ߘߐ߫߸ ߊ߬ߟߎ߬ ߞߎߡߊ߫ ߘߊ߫ ߣߍ߰ߛߌ߬ߟߊ߬ ߞߏ ߞߊ߲߬߸ ߞߊ߬ ߓߐ߫ ߛߊ߲ߔߋߘߙߏ߫߸ ߞߊ߬ ߣߊ߬ ߖߌ߬ߣߍ߬ ߞߣߐ߫، ߊ߬ ߣߌ߫ ߞߊ߬ ߞߋ߬ߡߎ߲߬ߓߏ ߟߊ߫߸ ߞߊ߬ ߓߐ߫ ߜߋ߲ߞߐ߰ߖߌ߬ߘߊ ߟߊ߫ ߞߊ߬ ߣߊ߬ ߟߐ߬ߟߊ߫.
ߏ߬ ߘߐ߫߸ ߛߋ߲߬ߢߊ߬ ߣߌ߲߬ ߝߣߊ߫ ߓߐߒߡߊߟߌ߸ ߊ߲ ߛߌ߰ߣߍ߲߫ ߞߵߏ߬ ߞߐߝߟߌ ߟߎ߬ ߡߊߞߐ߬ߣߐ߲߬߸ ߣߴߊ߬ ߟߊߥߟߌ߬ߣߍ߲߫ ߓߊ߯ߙߊ ߏ߬ ߟߎ߬ ߘߊߓߊ߲ ߠߋ߬ ߡߊ߬߸ ߥߟߊ߫ ߘߏ߫ ߜߘߍ߫، ߓߊߘߋ߲ߧߊ ߟߋߋ߬ ߞߏ߬ߣߌ߲ ߦߋ߫ ߖߡߊ߬߬ߣߊ߫ ߝߌ߬ߟߊ ߢߌ߲߬ ߠߎ߬ ߕߍ߫߸ ߛߌ߰ߢߐ߲߰ߦߊ ߟߋ߬ ߦߴߊ߬ߟߎ߬ ߕߍ߫߸ ߞߏ߫ ߛߌߦߊߡߊ߲߫ ߦߋ߫ ߡߍ߲ ߞߣߐ߫.
