ߞߝߊ߬ ߞߎ߲߬ߠߊ߬ߓߐ ߣߌ߲߬ ߛߌ߲߬ߝߏ߲߬ߧߊ߬ ߘߊ߫ ߛߊ߲ߕߙߌߘߊ ߟߋ߬ ߟߊ߫߸ ߖߊ߬ߡߊ߫ ߝߌ߬ߙߌ߲ߞߐ߲߬ߞߐ߲ ߠߋ߬ ߓߐ߫ ߘߊ߫ ߞߊ߬ ߦߋ߲߬ ߝߊ߫߸ ߞߊ߬ߙߊ߲߬ߝߊ ߞߊ߬ߣߌ߲߬ߓߊ߮ ߟߎ߬ ߓߐ߫ ߘߊ߫ ߞߐߣߊߞߙߌ߫ ߞߐ߰ߖߌ߬ߘߊ ߟߊ߫߸ ߞߊ߲ߞߊ߲߫߸ ߓߋߦߌߟߊ߫߸ ߞߎ߬ߙߋߡߊ߬ߟߋ߲߬߸ ߊ߬ ߣߌ߫ ߦߙߐ߫ ߛߌߦߊߡߊ߲߫ ߠߎ߫ ߘߐ߫߸ ߡߍ߲ ߠߎ߬ ߓߍ߯ ߦߴߊ߬ ߟߊ߫ ߞߊ߬ߝߊ ߞߊ߬ߙߊ߲߬ߓߊ߮ ߟߎ߬ ߘߌ߫، ߒߞߏ ߞߊߙߊ߲ߡߐ߮ ߟߎ߬߸ ߒߞߏ ߛߍ߬ߘߏ߲߬ߠߊ ߟߎ߬߸ ߛߌ߯ߙߌ߲߫ ߝߊ߰ߡߊ ߟߎ߬߸ ߘߋ߲ߡߌߛߍ߲ ߠߎ߬߸ ߢߌ߲߬ ߠߎ߬ ߓߍ߯ ߟߋ߬߬ ߞߊ߬ ߝߏ߮ ߟߝߊ߫ ߓߌ߬߸ ߞߊ߬߬ ߣߵߊ߬߬ ߕߟߏߡߊߟߐ߬ ߞߊ߬ߙߊ߲߬ߝߊ߬ ߡߏߙߌ ߟߊ߫.
ߛߌ߯ߙߌ߲߫ ߝߊ߰ߡߊ ߟߎ߬ ߡߊ߫ ߕߏ߫ ߞߐ߫߸ ߞߊ߬ ߝߘߊ߫ ߟߊ߬ߞߟߏ߬ߞߟߏ߬ߟߌ ߣߌ߫ ߛߓߍߛߎ߲ߧߊߟߌ ߡߊ߬ߘߎ߮ ߟߊ߫߸ ߛߏ ߞߏߟߊߕߍ߮ ߟߎ߬߸ ߒߞߏ ߕߐ߲ ߠߎ߬: ߒ.ߢ.ߦ.ߘ߸ ߒ.ߓ.ߘ߸ ߟߞߝ߸ ߟߝߖ߸ ߜߛߞߘ߸ ߞߵߏ߬ ߟߊ߫ ߘߋ߲ߡߌߛߍ߲߫ ߕߐ߲߫ ߛߌߦߊߡߊ߲߫ ߞߊ߲߬.
ߞߝߊ߬ ߕߊ߲ ߡߍ߲ ߞߎ߲߬ߠߊ߬ߓߐ ߞߍ߫ ߘߊ߫߸ ߏ߬ ߛߙߊߛߌ߰ߣߍ߲߫ ߛߌ߰ ߘߊ߲ߘߐ߫ ߟߋ߬ ߘߌ߫߸ ߟߐ߲ߞߏ ߣߌ߫ ߘߌ߯ߣߊ ߣߌ߫ ߟߐ߲ߠߌ߲ߦߊ ߣߌ߫ ߓߊߛߌߦߊ ߘߐ߫، ߞߝߊ߬ ߞߋߟߋ߲߫ ߦߴߊ߬ ߘߐ߫߸ ߞߏ߫ ߛߎߞߏ ߣߌ߫ ߞߣߍߓߐ߸ ߏ߬ ߦߋ߫ ߞߎߘߎ߲߫ ߕߊ߲߫ ߠߋ߬ ߘߌ߫߸ ߡߍ߲ ߦߋ߫ ߞߎߡߊ߫ ߟߊ߫ ߓߊߛߌߦߊ ߣߌ߫ ߘߊ߲ߘߊߟߌ ߣߌ߫ ߡߐ߰ߦߊ ߣߌ߫ ߢߣߊߡߦߊ ߣߴߊ߬ ߘߐߞߏ ߟߎ߫ ߟߋ߬ ߞߊ߲߬.

ߟߊ߬ߛߣߍ߬ߟߌ߬ ߓߋߟߋ߲ߠߊ ߞߊ߬ߙߊ߲߬ ߘߊ߫ ߡߊ߲߬ߘߋ߲߬ߞߊ ߟߊ߫ ߛߊߘߊ߲ ߘߎ߲ߓߎߦߊ߫ ߟߋ߬ ߓߟߏ߫߸ ߞߊ߬ ߡߛߏ߬ߦߊ߫ ߞߎ߲߬ߠߊ߬ߦߋߙߋ߲߫ ߛߎߞߏ ߣߌ߫ ߞߣߍߓߐ ߕߍ߫ ߓߍ߯ ߢߣߊ߫، ߊ߬ߟߋ ߡߍ߲ ߞߵߊ߬ ߦߌ߬ߘߊ߬ ߓߋߟߋ߲ߠߊ߫ ߞߟߊߒߞߋ ߏ߬ ߞߣߐ߫ ߞߏ߫: <<ߖߐ߲߬ߡߊߛߌߣߌ߲ߟߐ߲߫ ߦߋ߫ ߡߐ߰ ߟߋ߬ ߘߌ߫߸ ߡߍ߲ ߥߟߌ߬ ߘߊ߫ ߞߝߊ߬ ߛߓߍ߬ߟߊ ߟߎ߬ ߞߐ߫߸ ߞߊ߬ ߓߊ߲߫ ߞߊ߬ ߕߊ߬ߡߌ߲߫ ߊ߬ߟߎ߬ ߟߊ߫، ߊ߬ ߞߋߟߋ߲߫ ߓߘߊ߫ ߞߊ߬ߝߊ߫ ߗߍ߬ߡߍ߫ ߝߌ߬ߟߊ߬ ߛߓߍ߫ ߟߐ߲ߠߌ߲ ߓߏߟߏ߲߫ ߛߌߦߊߡߊ߲߫ ߒߞߏ ߘߐ߫߸ ߡߍ߲ ߠߎ߬ ߕߎ߲߬ ߕߴߊ߬ ߘߐ߫ ߞߘߐ߬ߡߊ߲߬، ߊ߬ ߟߊ߫ ߛߓߍߟߌ ߓߘߊ߫ ߞߏ߫ ߛߌߦߊߡߊ߲߫ ߢߊ߬ ߒߞߏ ߞߊߙߊ߲ߘߋ߲ ߠߎ߬ ߡߊ߬߸ ߤߊߟߵߊ߬ ߓߊ߯ ߕߋ߬ߟߋ߲߬ ߏ߬ ߘߝߐ߫ ߟߊ߫߸ ߊ߲ ߕߍ߫ ߓߊ߲߫ ߏ߬ ߢߊߝߐ߫ ߟߊ߫، ߏ߬ ߞߘߐߡߊߛߎߘߎ߲ ߠߋ߬ ߛߎߞߏ ߣߌ߫ ߞߣߍߓߐ ߞߊ߬ߝߊ ߢߌ߲߬ ߘߌ߫، ߏ߬ ߦߋ߫ ߞߝߊ߬ ߞߟߊߒߞߋ߫ ߟߋ߬ ߘߌ߫߸ ߡߍ߲ ߦߋ߫ ߞߎߡߊ߫ ߟߊ߫ ߘߎߢߊ߫ ߟߊ߫ ߟߐ߲ߠߌ߲ ߓߍ߯ ߞߊ߲߬ ߝߊߦߌߘߊ߫، ߘߊ߲ߘߊߟߌ ߓߊ߬߸ ߡߐ߰ߟߐ߲ ߓߊ߬߸ ߗߍ߬ߣߌ߬ߡߛߏ߬ߦߊ ߓߊ߬߸ ߞߙߌߛߌ ߓߊ߬߸ ߘߏߞߏ ߓߊ߬߸ ߞߍ߲ߘߍߟߐ߲ ߓߊ߬߸ ߊ߬ ߣߌ߫... ߣߴߌ ߡߊ߫ ߛߎߞߏ ߣߌ߫ ߞߣߍߓߐ ߞߊ߬ߝߊ ߟߐ߲߫߸ ߌ ߦߴߊ߬ ߝߐ߫ ߊ߬ ߡߊ߬ ߞߏ߫ ߘߎߢߊ߫ ߟߐ߲ߠߌ߲ ߠߎ߬ ߔߘߋߞߎ߸ ߥߟߊ߫ ߕߐ߬ߕߏߓߊߟߌ߫.>> ߊ߬ ߞߵߏ߬ ߦߌ߬ߘߊ߬.

ߖߊ߬ߡߊ ߢߊߞߘߐ߫߸ ߖߐ߲߬ߡߊ߬ߛߌߣߌ߲ߟߐ߲߫ ߠߊ߫ ߓߋߟߋ߲ߠߊ ߓߏ߬ߙߌ߬ ߘߴߊ߬ ߟߊ߫ ߞߊ߬ߝߊ߫ ߞߎ߲߬ߠߊ߬ߓߐ߬ߕߊ߬ ߁߀ ߕߐ߬ߝߍ߬ߦߊ ߟߋ߬ ߡߊ߬، ߞߵߊ߬ߟߎ߬ ߛߓߍ߫ ߞߎ߲ ߠߎ߬ ߣߴߊ߬ߟߎ߬ ߞߣߐ߫ ߞߏ ߟߎ߬ ߞߐߣߐ߲ߞߎ߲ߓߊߘߏ߲߫.

ߖߊ߲߬ߖߏ߲ ߝߊ߬ߓߘߍ ߦߋ߫ ߘߊ߲߬ߞߊ߬ ߡߎߛߊ߫ ߡߊ߰ߛߎߓߊ߫ ߡߍ߲ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߣߍߓߊ ߣߌ߲߬ ߞߊ߲߬߸ ߞߏ߫ <<ߡߍ߲ ߓߊ߯ ߞߍ߫ ߘߊߞߎ߲ ߡߍ߲ ߘߐ߫߸ ߓߍ߯ ߟߋ߬ ߞߊ߫ ߞߊ߲߫ ߞߵߊ߬ ߕߊ߫ ߞߍߕߊ߫ ߞߍ߫، ߊߟߊ߫ ߕߊ߲ߘߏ߫߸ ߓߍ߯ ߞߊ߬ ߞߊ߬ߙߊ߲߬ߝߊ߬ ߡߏߙߌ ߟߐ߲߫߸ ߊ߬ ߓߘߊ߫ ߛߓߍ߫ ߛߌߦߊߡߊ߲߫ ߠߊߓߐ߫. (...) ߞߊ߬ߙߊ߲߬ߝߊ߬ ߡߏߙߌ ߦߋ߫ ߛߓߍߟߌ ߡߍ߲ ߠߊ߫߸ ߞߏ߫ ߞߊ߬ ߒߞߏ ߟߊߛߓߊ߬ߕߌ߫ ߞߵߊ߬ ߦߌ߬ߘߊ߬ ߘߎߢߊ߫ ߟߊ߫. ߊ߲ ߝߣߊ߫ ߏ߬ ߟߋ ߛߍ߬ߘߏ߲ ߠߊ߫߸ ߞߵߊ߬ ߞߐߞߘߐߓߌ߲ߓߌ߲߫߸ ߡߍ߲ ߠߎ߬ ߦߴߏ߬ ߛߍ߬ߘߏ߲ ߠߊ߫߸ ߞߵߏ߬ ߟߎ߬ ߡߊߘߍ߬ߡߍ߲߬.>> ߊ߬ ߞߵߏ߬ ߦߌ߬ߘߊ߬.

ߞߝߊ߬ ߞߎ߲߬ߠߊ߬ߓߐ ߡߍ߲ ߦߋ߫ ߕߋ߲߬߸ ߖߊ߬ߡߊ ߢߊߞߘߐߛߋ߫ ߘߊ߫ ߡߊ߲߬ߘߋ߲߫ ߖߋ߬ߟߌ߬ߓߊ ߣߴߊ߬ ߟߊ߫ ߛߘߍߘߋ߲ ߠߎ߬ ߓߟߏ߫ ߓߙߊߘߐߦߊ߫ ߡߐ߬ߟߐ߲߬ߡߊ߬ߓߊ߫ ߟߊ߫، ߡߍ߲ ߡߏ߬ߛߏ߫ ߝߌ߬ߟߊ ߞߵߊ߬ ߟߊ߫ ߕߋ߬ߟߋ ߟߊ߫ ߢߊ߱ ߣߌ߲߬ ߘߐ߫، ߞߵߏ߬ ߞߍ߫ ߞߊ߬ߙߊ߲߬ߝߊ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߦߌ߬ߘߊ߬ߟߊ߲ ߘߌ߫.

ߊ߲ ߠߊ߫ ߕߌߙߌ߲ߠߌ߲߫ ߞߍߣߍ߲ ߠߎ߬ ߘߐ߫߸ ߞߊ߬ߙߊ߲߬ߝߊ߬ ߡߏߙߌ ߟߊ߫ ߞߊ߬ߝߊ߫ ߗߍ߬ߡߍ߫ ߝߌ߬ߟߊ߬ ߣߌ߫ ߞߐ ߝߊ߲߬ߓߊ ߓߘߊ߫ ߜߌ߬ߙߌ߲߬ߘߌ߫ ߞߊ߬ ߛߋ߫ ߖߊ߬ߡߊ ߓߟߏߟߊ߫.

ߝߐ߰ߓߍ߫ ߣߊ߬ߕߐ ߟߎ߬ ߓߍߣߊ߬ ߖߊ߲߬ߖߏ߲ ߡߎ߰ߡߍ ߢߊߝߐ߫ ߕߎ߬ߜߍ߬ߕߎ߬ߜߍ߬ߟߌ߬ ߓߟߏ ߡߊ߬.