ߘߏߕߎ ߟߊ߫ ߛߊ߲߬ߠߊ߬ ߜߙߊ ߞߍߞߏ߫ ߛߓߊߣߊ߲ ߞߍߣߍ߲ ߞߐߝߍ߬ ߞߐߣߊߞߙߌ߫߸ ߡߍ߲ ߞߍ߫ ߘߊ߫ ߞߵߊ߬ ߕߎ߬ߙߎ ߞߍ߫ ߝߘߊ߬ߝߌ߲߬ ߘߊ߲ߘߊߟߌߟߊ ߟߎ߬ ߛߋߞߏߦߊ ߣߴߊ߬ߟߎ߬ ߟߐ߲ߕߊ ߟߎ߬ ߡߊߞߊ߬ߝߏ ߘߌ߫ ߕߟߋ߬ ߛߓߊ߬ ߟߊߞߐ߯ߟߌ߫ ߘߐ߫߸ ߞߏߕߍߓߊ߲߫ ߠߊ߫ ߘߏߕߎ ߘߍ߬ߞߙߎ ߛߓߍߘߊ ߣߐ߬ ߗߋߛߓߍ߫ ߞߙߍߞߙߍߣߍ߲߫ ߠߋ߬ ߞߍ߫ ߟߊ߫ ߏ߬ ߘߐ߫߸ ߞߊ߬ ߞߎߟߎ߲ߖߋߟߌ ߟߊߛߋ߫ ߖߊ߲߬ߖߏ߲ ߕߘߍ߬ߒ߬ߘߐ߬ߓߊ߮ ߟߎ߫ ߡߊ߬߸ ߊ߬ ߣߌ߫ ߡߍ߲ ߠߎ߬ ߞߵߊ߬ߟߎ߫ ߘߍ߬ߡߍ߲߫ ߛߌ߲߬ߝߏ߲߬ߧߊ߬ߟߌ ߟߊ߫، ߞߊ߬ ߒߞߏ ߡߐ߮ ߓߍ߯ ߝߏ߬ ߝߏ߬ߟߌ߬ ߓߟߏߕߍ߰ߓߊߟߌ ߟߊ߫߸ ߊ߬ߟߎ߬ ߟߊ߫ ߛߎߘߊ߲ ߥߊ߬ߣߌ߲߬ߗߋ ߞߏߛߐ߲߬߸ ߊ߬ ߣߴߊ߬ ߓߊ߯ߙߊ ߓߐߢߟߊ ߞߏߛߐ߲߬.

ߗߋߛߓߍ ߣߌ߲߬ ߛߓߍ߫ ߘߊ߫ ߘߏߕߎ ߞߊ߲ߕߌ߮ ߟߋ߬ ߓߟߏ߫ ߞߊ߬ ߝߘߊ߫ ߡߊ߲߬ߘߋ߲߬ ߜߋ߲ߞߐ߰ߖߌ߬ߘߊ߸ ߞߊ߬ߙߊ߲߬ߡߐ߯ ߘߊ߲߬ߞߏ߬ߟߊ߬ ߖߊߥߙߊ߫، ߊ߬ ߞߊ߬ ߒߞߏ ߘߏ߲߬ߞߏ ߟߎ߫ ߝߏ߬ ߞߏ߫ ߝߟߐ ߡߍ߲ ߘߐ߫ ߡߎߣߎ߲߬߸ ߏ߬ ߟߋ ߞߍ߫ ߘߴߊ߬ߟߎ߬ ߟߊ߫ ߓߐߟߌ߫ ߞߐߟߌߞߐߟߌ ߘߌ߫ ߖߊ߲߬ߖߏ߲ ߣߌ߲߬ ߘߐ߫، ߊ߬ ߓߊ߲߫ ߘߊ߫ ߞߵߊ߬ߟߎ߫ ߝߏ߬ ߊ߬ߟߎ߬ ߡߊߘߍ߬ߡߍ߲ ߘߐ߫ ߛߌ߲߬ߝߏ߲߬ߧߊ߬ߟߌ ߟߊ߫ ߟߊ߬ߞߐ߰ߟߌ ߞߎ߲߬ߕߊ߮ ߞߣߐ߫߸ ߡߊ߬ߘߍ߬ߡߍ߲ߠߌ߲ ߏ߬ ߞߍ߫ ߘߊ߫ ߝߊ߬ߘߌ߬ߞߟߏ ߟߊ߫߸ ߊ߬ ߞߍ߫ ߘߊ߫ ߛߋߞߏ ߟߊ߫ ߥߊߘߌ߫ ߞߏ ߛߌߟߊ ߝߍ߬߸ ߞߎߡߊߕߍ߫ ߥߊ߬ߣߌ߲߬ߞߋ ߡߊ߬.

ߏ߬ ߟߋ ߘߐ߫߸ ߘߊ߲߬ߞߏ߬ߟߊ߬ ߖߊߥߙߊ߫ ߞߵߊ߬ ߛߓߍ߫ ߞߏ߫: <<ߞߏߕߍߓߊ߲߫ ߠߊ߫ ߘߏߕߎ ߟߊ߫ ߓߊߙߌߞߊߓߌߟߊ ߦߋ߫ ߛߋ߫ ߟߊ߫ ߞߐߣߊߞߙߌ߫ ߒߞߏ߫ ߡߐ߮ ߓߍ߯ ߡߊ߬ ߸ ߞߵߊ߬ ߞߎ߲߭ ߞߍ߫ ߘߏߕߎ ߞߐߡߊߓߌ߲ߓߌ߲ ߘߌ߫ ߊ߬ ߟߊ߫ ߟߊ߬ߞߐ߰ߟߌ ߘߐ߫.>> ߊ߬ ߞߵߏ߬ ߟߊߛߋ߫.

ߞߏ߲߬ߓߏ߫ ߘߊ߲߬ߞߏ߬ߟߊ߬ ߖߊߥߙߊ߫ ߟߊ߫ ߗߋߛߓߍ ߣߌ߲߬ ߘߐ߫߸ ߊ߬ ߞߊ߬ ߓߌ߲ߕߎ߫ ߓߎߙߡߊ߫ ߞߓߊ߬ ߕߐ߯ߘߐߕߍ߰߸ ߒ.ߢ.ߦ.ߘ ߘߍ߬ߞߙߎ ߞߊ߲ߕߌ߮߸ ߊ߬ ߟߊ߫ ߕߘߍ߬ߒ߬ߘߐ߬ߟߌ ߞߏߛߐ߲߬، ߊ߬ ߣߌ߫ ߎߡߊߙߎ߫ ߛߏߡߊߛߌ߫ ߞߊ߲ߕߍ߫߸ ߒ.ߓ.ߘ ߞߏߟߊߕߍ߮߸ ߏ߬ ߝߣߊ߫ ߕߘߍ߬ ߞߣߍ ߞߊ߲߬.

ߘߏߕߎ ߛߓߍߘߊ ߞߵߊ߬ ߟߊ߫ ߞߎߟߎ߲ߖߋߟߌ߫ ߞߋߟߋ߲ ߏ߬ ߢߐ߲߰ ߠߊߛߋ߫ ߡߎߛߊ߫ ߓߊߟߊ߲ߘߎ߯ ߖߊߟߏ߫ ߡߊ߬߸ ߒߞߏ ߝߘߏ߬ߓߊ߬ ߞߙߏߝߏ ߞߊ߲ߕߌ߮߸ ߊ߬ ߞߍ ߘߐ߫ ߞߊ߬ ߟߊ߬ߞߐ߰ߟߌ ߘߏ߲߬ߖߟߎ߬ߡߊ߫ ߕߎ߬ߜߍ߬ߕߎ߬ߜߍ߬ߟߌ߬ ߓߟߏ ߡߊ߬ ߤߊ߲߯ ߞߵߊ߬ ߓߊ߲߫.

ߥߊߟߢߌߡߊߟߐ߲ ߝߏ߬ߟߌ ߟߊߛߋ߫ ߘߊ߫ ߡߏ߬ߤߊ߬ߡߍ߬ߘ ߣߊߛߍߙ ߓߊߓߌߟߊ߫ ߞߋߕߊ߬ ߡߊ߬߸ ߒߞߏ ߘߎ߲ߓߎ ߞߊ߲ߕߌ߮߸ ߞߵߏ߬ ߟߴߊ߬ ߣߐ߬ߟߊ ߞߊ߲߬.

ߘߏߕߎ ߞߊ߲ߕߌ߮ ߟߊ߫ ߗߋߛߓߍ ߢߌ߲߬ ߘߐ߫߸ ߒߞߏ ߘߎ߲ߓߎ ߞߵߊ߬ߟߎ߫ ߘߍ߬ߡߍ߲߬ ߞߏߛߓߍ߫߸ ߞߊ߬ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߝߌ߬ߟߊ߬ ߥߊߘߌߜߍ߫ ߘߴߊ߬ߟߎ߫ ߡߊ߬߸ ߟߊ߬ߞߐ߰ߟߌ ߟߊ߫ ߛߎߘߊ߲ ߘߐ߫.

<<ߞߊ߬ ߞߏߕߍߓߊ߲߫ ߠߊ߫ ߘߏߕߎ ߝߊ߲߬ߘߊ߬ ߟߊ߫ ߖߌ߬ߣߍ߬ ߕߊߡߊ߲߫ ߞߋ߲߬ߥߟߎ߫ ߂ ߟߊ߫ ߸ ߊ߬ ߣߌ߫ ߞߊ߬ ߘߏߘߋ߲ ߠߎ߬ ߖߊ߲߬ߛߊ߫ ߞߊ߲ߡߊߞߍ߫ ߡߊߛߓߍߣߍ߲߫ ߗߋ߲߰ߓߊ߬ ߟߊ߫ ߸ ߞߵߏ߬ ߞߍ߫ ߞ߃ ߡߊߜߍ߲ ߘߌ߫ ߊ߬ ߟߊ߫ ߘߏߕߎ ߟߊ߫ ߟߊ߬ߞߐ߰ߟߌ ߘߐ߫، ߓߊߏ߬ ߞ߃ ߖߍ߬ߘߍ ߦߋ߫ ߘߎ߲ߓߎߘߋ߲ ߠߋ߬ ߘߌ߫.>> ߗߋߛߓߍ ߣߌ߲߬ ߞߵߏ߬ ߔߘߋߔߘߋߟߊߕߍ߰.

ߞߏߕߍߓߊ߲߫ ߠߊ߫ ߘߏߕߎ ߞߊ߬ ߟߞߝ ߛߌ߲߬ߝߏ߲ ߠߎ߬ ߝߣߊ߫ ߝߏ߬ ߞߎߟߎ߲ߖߋߟߌ ߘߌ߫߸ ߊ߬ߟߎ߬ ߟߊ߫ ߕߘߍ߬ߒ߬ߘߐ߬ߟߌ ߟߊ߫: << ߞߊ߬ ߝߏ߬ߟߌ߬ ߞߋߟߋ߲߫ ߣߌ߲߬ ߠߊߛߋ߫ ߟߞߝ ߛߌ߲߬ߝߏ߲ ߠߎ߬ ߡߊ߬ ߸ ߊ߬ߟߎ߬ ߟߊ߫ ߕߘߍ߬ߒ߬ߘߐ߬ߟߌ ߟߊ߫.>> ߏ߬ ߛߓߍߣߍ߲߫ ߊ߬ߟߋ߬ ߗߋߛߓߍ ߢߌ߲߬ ߘߐ߫.

ߊߟߎ߫ ߦߴߊ߬ ߟߐ߲߫߸ ߞߏߢߌߡߊߟߐ߲ ߝߏ߬ߟߌ ߢߌ߲߬ ߞߍߣߍ߲߫ ߘߏߕߎ ߟߊ߫ ߕߟߋ߬ ߛߓߊ߬ ߟߊߞߐ߯ߟߌ ߞߐ ߟߋ߬ ߝߍ߬߸ ߡߍ߲ ߛߌ߲߬ߝߏ߲߬ߧߊ߬ ߘߊ߫ ߞߐߣߊߞߙߌ߫߸ ߣߴߊ߬ ߕߘߍ߬ߒ߬ߘߐ߬ߓߊ߮ ߟߎ߬ ߓߐ߫ ߘߊ߫ ߕߟߋ߬ߓߋ߬ ߊߝߙߌߞߌ߬ ߝߊ߲߬ ߛߌߦߊߡߊ߲߫ ߘߐ߫، ߊ߬ ߞߊ߬ ߡߐ߬ߟߐ߲ ߘߌ߫ ߝߘߊ߬ߝߌ߲߬ ߓߊߛߌߦߊ ߡߊ߬، ߟߊ߬ߞߐ߰ߟߌ ߏ߬ ߡߍ߲ ߞߏ ߟߎ߬ ߓߎ߲ߓߎ߲߫ ߘߊ߫ ߗߍ߭ ߣߌ߫ ߡߏ߬ߛߏ ߕߍߡߊ߫ ߖߊ߲ߞߊߙߏ ߘߏ߫ ߟߎ߫ ߞߊ߲߬.