ߓߌ߬ ߞߊ߯ߙߌ ߡߍ߲ ߦߋ߫ ߣߌ߲߬ ߂߀߂߆ ߕߎߟߊߝߌ߲ ߕߋ߬ߟߋ߫ ߂߀ ߦߋ߫ ߟߏ߲ߓߊ߫ ߟߋ߬ ߘߌ߫߸ ߞߵߊ߬ ߟߐ߬ ߥߊߘߌ߫ ߛߐߘߐ߲ߘߊߣߍ߲ ߠߎ߫ ߡߊ߬ ߖߌ߫ ߡߣߊ߫ ߞߏ ߡߊ߬ߘߎ߮ ߘߐ߫، ߖߌ߫ ߡߣߊ ߡߍ߲ ߦߋ߫ ߝߙߋ߬ ߟߊ߫ ߟߐ߯ߝߍ ߟߎ߬ ߘߐ߫ ߣߌ߲߬߸ ߊ߬ ߣߌ߫ ߓߍ߲߬ߕߍ ߟߎ߬ ߣߌ߫ ߛߌߟߊ߫ ߝߍߟߊ ߟߎ߬ ߘߐ߫ ߕߋ߬ߟߋ ߡߎ߰߰ߡߍ ߞߣߐ߫߸ ߡߐ߰ ߟߎ߫ ߟߋ߬ ߦߋ߲߬߸ ߡߍ߲ ߠߎ߬ ߦߴߊ߬ ߟߊߥߟߏ߫ ߟߊ߫ ߞߵߊ߬ ߟߊߛߋ߫ ߖߊ߬ߡߊ ߡߊ߬߸ ߓߊ߯ߙߟߊ ߟߎ߫ ߟߋ߬ ߦߋ߲߬ ߡߍ߲ ߠߎ߬ ߦߴߏ߬ ߓߊ߯ߙߊ ߞߍ߫ ߟߊ߫߸ ߞߊ߬ߙߊ߲߬ߘߋ߲ ߘߏ߫ ߟߎ߫ ߦߴߏ߬ ߘߐ߫߸ ߡߍ߲ ߠߎ߬ ߡߊ߫ ߓߊ߯ߙߊ߫ ߜߘߍ߫ ߛߐ߬ߘߐ߲߬ ߡߎߣߎ߲߬߸ ߖߌ߫ ߟߊߘߊ߲ ߓߊ߯ߙߊ ߟߵߏ߬ ߟߎ߫ ߖߌ߱ ߘߌ߫، ߡߏ߬ߛߏ ߘߏ߫ ߟߎ߫ ߛߌ߰ߣߍ߲߫ ߖߌ߫ ߝߙߋ ߢߌ߲߬ ߠߋ߬ ߡߊ߬߸ ߞߵߊ߬ ߛߌ߰ ߊ߬ߟߎ߫ ߞߎ߲߬ ߘߐ߫ ߞߊ߬ ߦߊ߯ߟߊ߫، ߖߌ ߣߌ߲߬ ߦߋ߫ ߡߐ߰ ߥߊ߯ ߦߙߌߞߊ߫ ߟߋ߬ ߓߟߏ߫ ߕߋ߬ߟߋ ߞߘߐ߫.
ߟߏ߲߫ ߠߋ߬ ߓߘߊ߫ ߛߋ߫ ߣߌ߲߬ ߏ߬ ߘߐ߫߸ ߡߍ߲ ߦߋ߫ ߖߌ߫ ߡߣߊ ߏ߬ ߟߎ߬ ߟߊߕߐ߲߫ ߟߏ߲ ߘߌ߫߸ ߞߵߊ߬ ߛߐ߬ߘߐ߲߬ ߞߎߡߊ ߦߋ߫ ߡߌ߲߫: ߡߍ߲ ߠߎ߬ ߛߌ߰ߣߍ߲߫ ߖߌ߫ ߡߣߊ ߞߏ ߡߊ߬߸ ߏ߬ ߟߎ߬ ߞߍߕߐ߫ ߘߌ߬؟ ߖߡߊ߬ߣߊ߬ߘߋ߲ ߠߎ߬ ߝߣߊ߫ ߞߍߕߐ߫ ߊ߬ߟߎ߬ ߘߌߦߊߣߊ߲߫ ߖߌ ߛߐ߬ߘߐ߲߬ ߠߊ߫ ߣߐ߰ߦߊ ߘߐ߫ ߘߌ߬؟
ߞߊ߬ߕߎ߲߯߸ ߞߊ߬ߦߌ߯ ߂߀߂߄ ߕߎߟߊߝߌ߲ ߠߋ߬ ߟߊ߫߸ ߟߊ߬ߕߍ߰ߦߊ ߟߊߓߐ߫ ߘߊ߫ ߞߵߊ߬ ߦߌ߬ߘߊ߬ ߞߏ߫ ߓߍ߯ ߦߴߊ߬ ߓߟߏߘߐߓߍ߲߬ ߛߊ߲߭ ߝߌ߬ߟߊ ߣߌ߲߬ ߞߣߐ߫߸ ߖߐ߲߰ߛߊ߫ ߡߣߊ߫ ߞߏ ߘߌ߫ ߟߊߟߐ߬ ߢߊ ߡߍ߲ ߡߊ߬، ߏ߬ ߟߋ ߛߊ߲߭ ߝߌ߬ߟߊ ߘߝߊ ߦߋ߫ ߂߀߂߆ ߕߎߟߊߝߌ߲ ߕߋ߬ߟߋ߫ ߂߀ ߢߌ߲߬ ߘߌ߫، ߞߵߊ߬ ߛߐ߬ߘߐ߲߬ ߡߐ߱ ߟߎ߬ ߡߊ߫ ߘߐ߬ߓߍ߲߬ ߛߌ߫ ߟߋ߬ ߞߍߣߍ߲ ߦߋ߫ ߖߌ߫ ߡߣߊ ߟߎ߫ ߣߐ߬ߘߐߓߌ߬ߟߊ߬ ߞߏ ߘߐ߫.
ߕߎߟߊߝߌ߲ ߕߟߋ߬ ߁߀ ߡߊ߬߸ ߝߊ߲ߞߊ߲ ߘߏ߫ ߟߊߓߐ߫ ߘߊ߫ ߞߏߕߌ߯ߘߊ ߓߟߏ߫߸ ߞߊ߬ ߡߣߊ ߛߎ߯ߦߊ߫ ߟߊߕߐ߲ߣߍ߲ ߠߎ߬ ߡߊߘߊ߲߫߸ ߖߌ߫ ߡߣߊ ߦߴߏ߬ ߟߋ ߘߐ߫.
ߊ߲ ߛߋ߫ ߘߊ߫ ߖߌ߫ ߓߊ߯ߙߟߊ ߘߏ߫ ߝߍ߬߸ ߓߊߏ߬ ߛߣߊ߬ߛߌ߬ ߘߎ߲ߓߎߦߊ߫ ߦߋ߫ ߖߌ߫ ߓߊ߯ߙߊ ߟߋ߬ ߞߍ߫ ߟߊ߫߸ ߏ߬ ߞߎߡߊ߫ ߘߊ߫ ߞߊ߬ ߓߍ߲߬ ߊ߬ߟߎ߬ ߟߊ߫ ߖߌ߫ ߝߙߋ߬ߕߊ ߦߙߌߞߊ ߡߊ߬: <<ߊ߲ ߠߊ߫ ߖߌ߫ ߟߊߘߊ߲ ߓߙߍ߬ߦߊ ߦߋ߫ ߓߐ߫ ߟߊ߫ ߥߊ߯ߕߌ ߟߋ߬ ߘߐ߫߸ ߛߊ߬ߡߊ ߣߌ߫ ߕߟߋ߬ߡߊ، ߣߌ߫ ߛߊ߬ߡߊ ߟߋ߬߸ ߊ߲ ߘߌ߫ ߛߋ߫ ߖߌ߫ ߟߊߛߘߌ߫ ߃߀߀ ߟߊߘߊ߲߫ ߠߊ߫ ߕߋ߬ߟߋ ߞߘߐ߫߸ ߊ߬ ߘߌ߫ ߛߋ߫ ߦߟߍ߬ ߟߴߏ߬ ߛߊ߲ߘߐ߫߸ ߏ߬ ߦߋ߫ ߓߐ߫ ߟߊ߫ ߥߊ߯ߕߌ ߟߌ߬ߤߟߊ ߟߋ߬ ߘߐ߫.>> ߊ߬ ߞߵߏ߬ ߢߊߝߐ߫.
ߞߏ߬ߣߌ߲߬߸ ߕߙߏ߬ߞߏ ߡߍ߲ ߦߋ߫ ߞߍ߫ ߟߊ߫ ߞߊ߬ ߖߌ ߟߊߘߊ߲߫߸ ߖߌ߫ ߡߣߊ ߡߍ߲ ߠߎ߬ ߦߋ߫ ߝߙߋ߬ ߟߊ߫߸ ߏ߬ ߓߍ߯ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߡߐ߰ ߜߘߍ߫ ߟߎ߫ ߦߋ߫ ߓߊ߯ߙߊ ߛߐ߬ߘߐ߲߬ ߠߊ߫ ߖߌ߫ ߞߏ ߣߌ߲߬ ߛߊߓߎ߫ ߟߊ߫߸ ߞߵߊ߬ߟߎ߫ ߞߎ߲߬ߞߏ ߟߎ߬ ߢߊߓߐ߫ ߊ߬ߟߎ߫ ߖߘߍ߬ ߦߋ߫. ߏ߬ ߟߋ ߞߏߛߐ߲߬߸ ߊ߬ߟߎ ߟߊ߫ ߖߊ߬ߕߋ߬ ߘߐ߫߸ ߖߌ߫ ߓߊ߯ߙߊ ߟߊߟߐ߭ ߞߍߕߐ߫ ߖߘߐ߬ߣߊ߲߬ߞߏ ߟߋ߬ ߘߌ߫߸ ߖߌ߫ ߝߊ߲ߓߏ߲߫ ߕߌ߮ ߟߎ߬ ߞߋߟߋ߲߫ ߕߍ߫ ߝߋߎ߫߸ ߡߍ߲ ߠߎ߬ ߦߋ߫ ߓߊ߯ߙߊ߫ ߟߊ߫ ߦߋ߲߬ ߖߐ߫.
<<ߣߌ߫ ߖߌ߫ ߡߣߊߣߍ߲߫ ߠߊߘߊ߲ ߓߟߏߞߊ߬ ߘߊ߫߸ ߊ߬ ߘߌ߫ ߜߟߍ߬ߦߴߊ߲ߠߎ߬ ߡߊ߬ ߞߏߛߓߍ߫، ߓߊߏ߬߸ ߊ߲ߠߎ߬ ߦߋ߫ ߛߋ߫ ߟߴߊ߲ ߞߎ߲߬ߞߏ ߟߎ߬ ߢߊߓߐ߫ ߟߴߊ߬ߟߋ ߟߋ߬ ߘߐ߫߸ ߞߊ߬ ߛߋ߫ ߡߐ߰ ߜߘߍ߫ ߟߎ߫ ߝߣߊ߫ ߡߊߘߍ߬ߡߍ߲߬ ߠߴߊ߲ ߝߍ߬߸ ߦߏ߫ ߞߊ߬ߙߊ߲߬ߘߋ߲ ߠߎ߬߸ ߡߍ߲ ߠߎ߬ ߡߊ߫ ߓߊ߯ߙߊ߫ ߜߘߍ߫ ߛߐ߬ߘߐ߲߬ ߡߎߣߎ߲߬.>> ߛߣߊ߬ߛߌ߬ ߘߎ߲ߓߎߦߊ߫ ߞߵߏ߬ ߟߊߛߙߋߦߊ߫.
ߊ߲ ߧߋ߫ ߦߙߐ ߡߍ߲ ߘߐ߫ ߕߋ߲߬߸ ߊ߲ ߛߋߣߍ߲߫ ߖߌ߫ ߓߊ߯ߙߟߊ ߡߍ߲ ߠߎ߬ ߡߊ߬߸ ߏ߬ ߟߎ߬ ߡߊ߫ ߛߋ߫ ߓߐߘߊ߫ ߜߘߍ߫ ߛߐ߬ߘߐ߲߬ ߠߊ߫ ߡߎߣߎ߲߬߸ ߡߍ߲ ߘߌ߫ ߞߍ߫ ߖߌ߫ ߡߣߊߣߍ߲ ߣߘߐ߬ߓߌߟߊ ߘߌ߫߸ ߛߴߊ߬ߟߎ߬ ߟߊ߫ ߓߊ߯ߙߊ ߞߊߣߊ߬ ߟߊߟߐ߬߸ ߊ߬ ߣߌ߫ ߛߴߊ߬ߟߎ߬ ߟߊ߫ ߓߊ߯ߙߟߊ ߟߎ߬ ߞߊߣߊ߬ ߓߌ߬ߟߊ߬ ߓߊ߯ߙߓߊߟߌߦߊ ߘߐ߫.
ߡߍ߲ ߠߎ߬ ߦߋ߫ ߖߌ߫ ߝߙߋ ߞߍ߫ ߟߊ߫߸ ߞߵߊ߬ߟߎ߫ ߡߎ߬ߛߊ߬ߞߊ ߟߎ߫ ߛߐ߬ߘߐ߲߫ ߊ߬ ߕߐ߬ߣߐ ߘߐ߫ ߛߌߟߊ߫ ߞߊ߲ߠߊ ߟߎ߬ ߘߐ߫߸ ߏ߬ ߟߎ߬ ߝߣߊ߫ ߖߘߐ߬ߣߍ߲߫ ߣߌ߲߬ ߞߏ ߘߐ߫، ߡߊߙߌߦߊߡ ߓߊ ߦߴߏ߬ ߡߐ߱ ߘߏ߫ ߟߋ߬ ߘߌ߫߸ ߡߍ߲ ߦߴߊ߬ ߟߊ߫ ߕߐ߬ߣߐ ߛߐ߬ߘߐ߲߬ ߠߊ߫ ߖߌ ߕߐ߬ߝߍ߬ߦߊ ߘߐ߫.
<<ߊ߲ߠߎ߬ ߦߋ߫ ߖߌ߫ ߟߊߛߘߌ ߛߊ߲߬ ߠߊ߫ ߕߊߡߊ߲ ߆ ߀߀߀ ߟߋ߬ ߟߊ߫߸ ߣߴߊ߲ ߞߵߏ߬ ߝߙߋ߬߸ ߊ߲ ߘߌ߫ ߁߅ ߀߀߀ ߛߐ߬ߘߐ߲߫ ߊ߬ ߘߐ߫߸ ߞߊ߬ ߉ ߀߀߀ ߕߣߐ߫ ߛߐ߬ߘߐ߲߬.>> ߊ߬ ߞߵߏ߬ ߢߊߝߐ߫.
ߏ߬ ߘߐ߫߸ ߡߍ߲ ߠߎ߬ ߦߋ߫ ߖߌ ߣߌ߲߬ ߝߙߋ߬ ߟߊ߫ ߕߐ߬ߝߍ߬ߦߊ ߘߐ߫߸ ߏ߬ ߟߎ߬ ߟߊ߫ ߕߐ߬ߣߐ ߡߎ߰ߡߍ ߟߋ߬ ߉ ߀߀߀ ߏ߬ ߘߌ߫߸ ߞߏ߫ ߜߘߍ ߕߐ߭ ߟߎ߬ ߕߴߏ߬ ߘߐ߫.
ߏ߬ ߟߋ ߞߏߛߐ߲߬߸ ߣߌ߫ ߖߌ߫ ߡߣߊ ߟߎ߬ ߟߊߕߎߣߎ߲߫ ߘߊ߫߸ ߊ߬ ߞߣߐ߬ߘߐ߬ߝߟߌ ߘߌ߫ ߥߊ߬ߙߊ߫ ߖߎ߬ߟߊ ߏ߬ ߟߎ߫ ߞߊ߲߬߸ ߊ߬ߟߎ߫ ߖߍ߬ߘߍ ߟߊ߫ ߝߐߟߌ߫ ߘߐ߫.
<<ߣߌ߫ ߖߌ߫ ߡߣߊ߫ ߟߊߘߊ߲ ߓߟߏߞߊ߬ ߘߊ߫߸ ߊ߬ ߘߌ߫ ߜߟߍ߬ߦߊ߬ ߒߠߋ ߡߊ߬ ߞߊ߬ ߝߋ߲߫ ߜߘߍ߫ ߛߐ߬ߘߐ߲߫ ߞߵߊ߬ ߝߙߋ߬، ߓߊߏ߬߸ ߒ ߡߊ߫ ߝߋ߲߫ ߜߘߍ߫ ߟߐ߲߫߸ ߒ ߧߋ߫ ߡߍ߲ ߛߐ߬ߘߐ߲߬ ߠߊ߫ ߖߌ ߘߐ߫߸ ߒ ߘߌ߫ ߛߴߏ߬ ߛߐ߬ߘߐ߲߬ ߠߊ߫ ߡߍ߲ ߘߐ߫، ߏ߬ ߟߋ ߤߊߡߌ߲ ߦߋ߫ ߒ ߠߊ߫.>> ߡߊߙߌߦߊߡ ߓߊ ߟߋ߬ ߞߊ߲߫ ߕߋ߲߬.
ߞߊ߬ߕߎ߲߯߸ ߛߐ߲߬ߞߐ߬ ߞߏ ߦߋ߫ ߣߌ߲߬ ߞߏ ߘߐ߫ ߞߏߓߊ߫ ߘߌ߫، ߓߊߏ߬߸ ߖߌ ߦߋ߫ ߛߊ߲߬ ߠߊ߫ ߡߐ߱ ߟߎ߬ ߓߟߏ߫ ߘߊ߫ ߘߌߡߊ߲ ߠߊ߫߸ ߞߊ߬ ߛߋ߫ ߛߌߦߊߡߊ߲߫ ߡߌ߲߬ ߠߊ߫ ߕߋ߬ߟߋ ߞߘߐ߫ ߣߌ ߟߊߞߛߌ߫ ߞߊ߲ߡߊ߬، ߊ߬ߝߐ߫ ߡߍ߲ ߓߌ߬ߟߊ߬ߕߐ߫ ߡߣߊߣߍ߲ ߣߐ߭ ߘߐ߫߸ ߊ߬ ߣߴߏ߬ ߘߌ߫ ߞߢߊ߫ ߛߐ߲߬ߞߐ߬ ߞߏ ߘߐ߫ ߓߊ߬؟
ߓߊߞߊ߬ߙߌ߫ ߖߊ߰ߣߍ ߦߋ߫ ߥߊߟߌߥߊߟߌ߫ ߓߏߙߌߟߊ ߟߋ߬ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߘߌ߫ ߛߋ߫ ߖߌ߫ ߡߣߊ߫ ߥߐ߯ߙߐ߫ ߡߌ߲߬ ߠߊ߫ ߕߋ߬ߟߋ ߞߘߐ߫، ߞߊ߬ߕߎ߲߯߸ ߊ߬ߟߋ ߟߊ߫ ߝߐߟߌ߫ ߘߐ߫߸ ߞߏ߫ ߣߴߌ ߞߊ߬ ߛߘߊ ߟߊߣߍ߲ ߦߋ߫ ߖߌ߫ ߡߣߊ ߟߊ߫ߟ ߊ߬ߟߋ ߟߋ߬ ߛߐ߬ߘߐ߲߬ ߘߌߡߊ߲߫ ߝߊ߲߭ ߓߍ߯ ߘߐ߫.
ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߖߌ߫ ߡߣߊ ߣߐ߬ߘߐߓߌ߬ߟߊ߸ ߏ߬ ߜߏߡߊ߲߫ ߕߴߊ߬ߟߋ߬ ߦߋ߫ ߘߋ߬، ߓߊ߬ߙߌ߬߸ ߡߍ߲ ߓߌ߬ߟߊ߬ߕߐ߫ ߊ߬ ߣߐ߭ ߘߐ߫߸ ߝߏ߫ ߢߊ ߦߋ߫ ߡߊߖߌ߰ ߏ߬ ߟߋ ߛߐ߲߬ߞߐ߬ ߞߏ ߞߘߐ߫߸ ߊ߬ ߞߊߣߊ߬ ߕߊ߬ߡߌ߲߬ ߖߌ߫ ߡߣߊ ߛߐ߲߬ߞߐ ߟߊ߫.
<<ߣߴߊ߬ߟߎ߫ ߞߊ߬ ߖߌ߫ ߡߣߊ ߣߐ߬ߘߐߓߌ߬ߟߊ߬ ߡߣߊߘߎ߲ ߠߊ߫߸ ߊ߲ ߘߴߏ߬ ߛߊ߲߬ ߞߍ߰، ߓߊߏ߬߸ ߖߌ߫ ߡߣߊ ߦߋ߫ ߟߊ߬ߡߌߣߌ߲ ߘߐߞߛߐ߫ ߟߊ߫ ߟߋ߬.>>
ߢߌ߲߬ ߠߋ߬ ߓߍ߯ ߞߏߛߐ߲߬߸ ߖߌ߫ ߡߣߊ ߟߊߕߐ߲ ߕߴߊ߬ ߟߊ߫ ߘߋ߬߸ ߝߏ߫ ߢߊ ߦߋ߫ ߡߊߖߌ߰ ߊ߬ ߣߘߐ߬ߓߌߟߊ ߟߎ߬ ߟߊ߫ ߞߏ ߞߘߐ߫߸ ߊ߬ ߦߋ߫ ߛߋ߫ ߛߐ߬ߘߐ߲߬ ߠߊ߫ ߓߍ߯ ߓߟߏ߫߸ ߊ߬ ߘߊ ߦߋ߫ ߘߌߦߊ߫.
ߘߎ߰ߘߋ߲߬ ߜߘߍ߫ ߓߍ߫߸ ߏ߬ ߟߎ߬ ߞߊ߲߫ ߞߏ߫ ߝߏ߫ ߖߌ߫ ߡߣߊ߫ ߞߏ ߣߌ߲߬ ߜߎ ߕߘߍ߬ ߟߊߕߐ߲߫ ߠߋ߬، ߖߋ߬ߡߏߙߌ߫ ߞߐ߲ߘߍ߫ ߡߍ߲ ߡߊߖߌ߰ߣߍ߲߫ ߞߊ߲ߞߊ߲߫ ߛߋ߰ߘߎ߬ ߝߎߙߋ ߟߎ߬ ߟߊ߫ ߜߍߞߣߍ ߘߐ߫߸ ߏ߬ ߞߊ߬ ߟߊ߬ߕߐ߲߬ߠߌ߲߬ ߞߏ ߣߌ߲߬ ߞߐߞߘߐߘߌߦߊ߫ ߞߏߛߓߍ߫.
<<ߖߌ߫ ߡߣߊߣߍ߲ ߠߎ߬ ߣߐ߬ߘߐߓߌ߬ߟߊ ߡߣߊߘߎ߲ ߠߊ߫߸ ߏ߬ ߦߋ߫ ߡߙߌߦߊ߫ ߓߘߍ ߟߋ߬ ߘߌ߫߸ ߞߊ߬ ߟߊߡߌߣߌ߲ ߟߊߞߊ߲ߘߊ߫߸ ߞߊ߬ ߛߏ ߛߊߣߌ߲ߧߊ߫، [...] ߖߌ߫ ߡߣߊߣߍ߲ ߠߎ߬ ߟߊߝߟߌ߬ߣߍ߲߫ ߝߊ߲߭ ߓߍ߯߸ ߊ߬ߟߎ߫ ߘߏ߲߬ ߕߍ߫ ߕߏ߬ߟߌ߬ ߟߊ߫، ߣߴߌ ߞߵߊ߬ ߟߊߞߙߐ߬ߛߌ߫ ߊ߬ ߢߌ߬ߡߊ ߟߊ߫߸ ߛߏ ߢߊ߬ߡߊ ߝߊ߲߬ߓߊ ߦߋ߫ ߖߌ߫ ߡߣߊߣߍ߲ ߠߋ߬ ߘߌ߫߸ ߡߍ߲ ߠߎ߬ ߦߋ߫ ߝߏߟߏ߲ ߠߎ߬ ߜߋߘߋ߲߫ ߠߊ߫ ߛߐ߲߬.>> ߊ߬ߟߋ ߟߊ߫ ߖߊ߬ߕߋ ߟߵߏ߬ ߘߌ߫.
ߛߓߍ ߡߍ߲ ߘߏ߲߬ ߝߣߊ߫ ߟߊߓߐߣߍ߲߫߸ ߏ߬ ߦߋ߫ ߞߎߡߊ߫ ߟߊ߫ ߖߌ߫ ߡߣߊ ߟߎ߬ ߟߊߕߐ߲߫ ߞߏ ߞߊ߲߬ ߢߊ ߡߍ߲߸ ߊ߬ ߞߎߡߊߣߍ߲߫ ߡߣߊ ߟߎ߫ ߓߌ߬ߟߊ߬ ߞߏ ߞߊ߲߬ ߛߌߟߊ߫ ߞߊ߲ߠߊ ߟߎ߬ ߘߐ߫ ߕߋ߲߬ ߠߋ߬.
ߊ߲ ߛߋ߫ ߘߊ߫ ߞߊ߲ߞߊ߲߫ ߕߌ߲߬ߞߎߘߎ߲ ߥߋ߲߬ߛߋ߲߬ߡߊ ߟߎ߬ ߗߋߕߌ߯ߘߊ ߟߊ߫߸ ߕߌ߲߬ߞߎߘߎ߲ ߜߋ߬ߟߎ߲߬ߠߌ߲߬ߠߊ ߦߋ߫ ߟߊ߬ߡߌߣߌ߲߫ ߞߡߊ߬ߙߊ߬ ߡߍ߲ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߓߟߏߘߐߓߍ߲ ߠߎ߬ ߞߍ߫.
<<ߊ߲ ߧߋ߫ ߥߛߊ߬ߓߊ߰ߦߊ ߟߎ߫ ߟߋ߬ ߟߊߘߊ߲ ߞߊ߲߬ ߕߋ߲߬߸ ߡߍ߲ ߠߎ߬ ߖߌ߰ߕߐ߫ ߞߣߍ ߞߊ߲߬߸ ߞߊ߬ ߛߊ߬ߙߌ߬ߦߊ ߡߊߓߏ߲߬ߧߊ߬.>> ߊ߬ ߞߵߏ߬ ߦߌ߬ߘߊ߬.
ߊ߬ ߢߌ߬ߣߌ߲߬ߞߊ߬ߣߍ߲ ߊ߲ ߓߟߏ߫ ߞߊ߬ ߓߍ߲߬ ߓߟߏߏߘߐߓߍ߲߫ ߞߍߣߍ߲ ߠߎ߫ ߡߊ߬ ߖߌ߫ ߡߣߊ ߟߎ߫ ߣߐ߬ߘߐߓߌ߬ߟߊ߬ ߞߏ ߞߊ߲߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߝߏ߫ ߏ߬ ߖߋ߬ߓߌ ߦߋ߫ ߓߐ߫ ߛߊ߲ߝߍ߬ ߟߋ߬ ߞߐߣߊߞߙߌ߫߸ ߓߊ߬ߙߵߊ߬ߟߎ ߕߴߛߋ߫ ߏ߬ ߖߋ߬ߓߌ߬ ߟߊ߫.
ߞߵߊ߬ ߛߐ߬ߘߐ߲߬ ߜߎ߸ ߞߎߡߊ ߦߋ߫ ߦߙߐ ߏ߬ ߟߋ ߘߐ߫ ߖߐ߫، ߓߊߏ߬߸ ߊ߬ ߝߐߣߍ߲߫ ߛߓߍ ߞߣߐ߫ ߟߋ߬ ߞߏ߫ ߞߊ߬ ߡߣߊ ߟߎ߫ ߣߐ߬ߘߐߓߌ߬ߟߊ߬ ߝߋ߲߫ ߠߎ߫ ߟߊ߫߸ ߡߍ߲ ߠߎ߬ ߘߌ߫ ߕߏ߬ߟߌ߬ ߘߌߦߊ߫߸ ߊ߬ ߣߌ߫ ߞߊ߬ ߓߐ߫ ߛߌߟߊ߫ ߘߌ߫߸ ߡߣߊ߫ ߞߋߟߋ߲߬ߞߋߟߋ߲ ߡߍ߲ ߠߎ߬ ߝߣߊ߫ ߘߌ߫ ߟߊߓߊ߯ߙߊ߫߸ ߏ߬ ߟߎ߬ ߘߌ߫ ߛߋ߫ ߡߊߕߍ߬ ߟߊ߫ ߢߊ ߡߍ߲ ߡߊ߬.
ߞߏ߬ߣߌ߲߬߸ ߞߊ߲ߞߊ߲߫ ߛߏ߫ ߞߣߐߟߊ ߞߋߟߋ߲߫ ߔߋ߫ ߖߌ߫ ߟߊߘߊ߲߫ ߦߙߐ߫ ߁߂߃ ߕߊ߬ߣߍ߲ ߞߵߊ߬ ߟߴߊ߬ ߓߊ߯ߙߟߊ߫ ߥߊ߯ ߦߙߌߞߊ ߞߊ߲߬߸ ߏ߬ ߟߎ߫ ߟߋ߬ ߥߊߕߐ߫ ߓߊ߯ߙߓߊߟߌߦߊ ߘߐ߫ ߣߌ߲߬، ߕߙߏ߬ߞߏ ߡߍ߲ ߠߎ߬ ߦߴߊ߬ߟߎ߬ ߓߟߏ߫߸ ߏ߬ ߟߎ߬ ߦߋ߫ ߞߋ߲߬ߥߟߎ߬ ߓߌ߫ ߦߙߌߞߊ ߟߋ߬ ߘߌ߫߸ ߏ߬ ߟߎ߬ ߕߍ߫ ߓߊ߯ߙߊ߫ ߜߘߍ߫ ߞߍ߫ ߟߊ߫ ߖߌ߫ ߡߣߊ߫ ߟߊߘߊ߲ ߞߐ߫، ߒ߬ߓߊ߬߸ ߡߎ߲߬ ߞߋߟߋ߲߫ ߓߌ߬ߟߊ߬ߕߐ߫ ߖߌ߫ ߡߣߊ ߣߐ߭ ߘߐ߫؟ ߏ߬ ߛߐ߲߬ߞߐ ߞߍߕߐ߫ ߖߋ߬ߟߌ߬ ߘߌ߫؟
ߕߎߟߊߝߌ߲ ߕߋ߬ߟߋ߫ ߂߀ ߢߌ߲߬ ߠߋ߬ ߞߏ߬ߣߌ߲ ߡߊ߬߸ ߡߣߊߣߍ߲߫ ߞߏ ߟߊߕߐ߲ ߘߏ߲߬ ߘߊ߫ ߞߍߟߌ ߞߣߐ߫، ߜߟߍ߬ߦߊ ߦߋ߫ ߡߍ߲ ߘߌ߫ ߞߊ߲ߞߊ߲߫߸ ߖߌ߫ ߡߣߊ ߟߊ߫ ߕߎߣߎ߲ ߕߍ߫ ߘߋ߬߸ ߞߏ߬ߣߌ߲߬ ߦߊ߬ߣߌ߫ ߘߏ߫ ߜߘߍ߫ ߟߎ߫ ߛߐ߬ߘߐ߲߬ߕߐ߫߸ ߖߌ߫ ߡߌ߲ߠߊ ߟߎ߬ ߞߍߕߐ߫ ߡߎ߲߬ ߠߊߓߊ߯ߙߊ߫ ߟߊ߫ ߏ߬ ߕߎ߬ߡߊ؟
