ߞߊ߲ߞߊ߲߫: ߡߣߊߣߍ߲߫ ߞߏ ߟߊߕߐ߲ ߓߘߴߊ߬ ߓߊ߯ߙߟߊ ߟߎ߬ ߣߴߊ߬ ߝߙߋ߬ߟߊ ߟߎ߬ ߣߴߊ߬ ߛߊ߲߬ߠߊ ߓߌ߬ߟߊ߫ ߞߣߐ߬ߘߐ߬ߝߟߌ ߘߐ߫

ߞߵߊ߬ ߘߊߡߌ߬ߣߊ߫ ߓߌ߬ ߡߊ߬߸ ߂߀߂߆ ߕߎߟߊߝߌ߲ ߕߋ߬ߟߋ߫ ߂߀߸ ߖߌ߬ߣߍ߫ ߖߡߊ߬ߣߊ ߓߘߊ߫ ߘߏ߲߬ ߛߊ߬ߙߌ߬ߦߊ߬ ߞߎߘߊ߫ ߟߋ߬ ߞߣߐ߫ ߏ߬ ߘߌ߫߸ ߡߍ߲ ߦߋ߫ ߡߣߊߣߍ߲ ߠߎ߬ ߞߍ߬ߟߍ ߘߌ߫ ߞߵߊ߬ߟߎ߬ ߓߐ߫ ߟߐ߮ ߘߐ߫، ߡߣߊ ߡߍ߲ ߠߎ߬ ߦߋ߫ ߟߊ߬ߓߊ߰ߙߊ߬ ߞߏ߬ ߞߋߟߋ߲ ߠߎ߬ ߘߌ߫߸ ߢߊ ߟߐ߬ߣߍ߲߫ ߏ߬ ߟߎ߫ ߟߋ߬ ߘߐ߫ ߣߌ߲߬ ߞߏ߫ ߞߵߊ߬ߟߎ߬ ߟߊߕߐ߲߫، ߞߵߊ߬ ߛߐ߬ߘߐ߲߬߸ ߡߐ߰ ߛߌߦߊߡߊ߲߫ ߠߋ߬ ߘߍ߲ߣߍ߲߫ ߊ߬ ߟߊ߫߸ ߞߵߊ߬ߟߎ߬ ߟߊ߫ ߝߋ߲ ߠߎ߬ ߟߊߘߊ߲߫ ߞߵߊ߬ ߓߌ߬ߟߴߊ߬ ߞߣߐ߫߸ ߖߌ ߦߋ߫ ߝߙߋ߬ ߟߴߊ߬ ߘߐ߫߸ ߊ߬ ߣߌ߫ ߝߋ߲߫ ߛߌߦߊߡߊ߲߫ ߜߘߍ߫ ߟߎ߫.

ߒ߬ߓߊ߬ ߞߊ߲ߞߊ߲߫ ߞߣߐ߫ ߏ߬ ߘߐ߫߸ ߡߣߊ߫ ߞߏ ߟߊߕߐ߲ ߥߟߴߊ߬ ߟߊߘߐ߯ߦߊ ߡߊ߫ ߜߏߦߊ߫ ߡߐ߱ ߟߎ߬ ߦߋ߫ ߝߋߎ߫، ߓߊ߬ߙߌ߬߸ ߢߌ߬ߣߌ߲߬ߞߊ߬ߟߌ߬ ߞߋߟߋ߲߫ ߠߠߋ߬ ߓߍ߯ ߘߊ߫: ߡߍ߲ ߠߎ߬ ߓߊߟߏ ߘߍ߲ߣߴߊ߬ ߟߊ߫߸ ߏ߬ ߟߎ߬ ߟߊ߫ ߞߏ ߞߍߕߐ߫ ߘߌ߬، ߡߎ߲߬ ߝߣߊ߫ ߓߌ߬ߟߊ߬ߕߐ߫ ߡߣߊ ߣߐ߭ ߘߐ߫߸ ߖߊ߬ߡߊ ߝߊ߲߬ߓߊ ߦߴߏ߬ ߡߍ߲ ߠߊߓߊ߯ߙߊ߫ ߟߊ߫؟

ߛߏ߬ߙߌ߫ ߞߊ߬ߓߊ߫ ߛߊ߰ߣߐ߬ ߟߋ߬ ߦߋ߫ ߞߊ߲ߞߊ߲߫ ߘߎ߰ߘߐ߬ ߖߌ߬ ߟߊ߬ߥߟߏ߬ߟߊ ߟߎ߬ ߘߍ߭ ߞߊ߲ߕߌ߮ ߘߌ߫، ߏ߬ ߞߊ߲߫ ߞߏ߫ ߖߌ߫ ߟߊߥߟߏ߫ ߝߊ߲ߓߏ߲߫ ߁߂߃ ߟߋ߬ ߞߊ߲ߞߊ߲߫ ߞߣߐ߫߸ ߊ߬ ߘߐ߯ߦߊ߫ ߘߊ߫ ߢߊ߫ ߛߌ߫ ߡߊ߬߸ ߡߐ߰ ߟߏ߯ߟߎ߫ ߦߋ߫ ߓߊ߯ߙߊ߫ ߟߴߊ߬ ߞߋ߬ߟߋ߲߬ߞߋ߬ߟߋ߲߬ߠߊ ߞߣߐ߫.

<<ߊ߬ߟߎ߫ ߞߵߊ߲ ߠߊ߫ ߛߓߍߘߊ߫ ߝߊ߬ߛߏ߬ߟߊ߬ߞߊ ߟߊߛߏ߬ߓߌ߫ ߟߊ߬ߕߍ߰ߦߊ߬ ߞߏ ߟߊ߫߸ ߞߵߊ߬ ߦߌ߬ߘߊ߬ ߞߏ߫ ߞߵߊ߬ ߕߊ߬ ߕߎߟߊߝߌ߲ ߕߋ߬ߟߋ߫ ߂߀ ߡߊ߬߸ ߞߏ߫ ߡߣߊ߫ ߟߊ߬ߓߊ߰ߙߊ߬ ߞߏ߬ ߞߋߟߋ߲ ߓߍ߯ ߞߊ߫ ߞߊ߲߫ ߞߊ߬ ߟߊߟߐ߬߸ ߤߊߟߌ߬ ߡߍ߲ ߣߴߊ߲ ߠߊ߫ ߡߣߊ ߕߍ߫ ߞߋߟߋ߲߫ ߘߌ߫، [...] ߤߊߟߌ߬ߛߊ߫߸ ߊ߲ߠߎ߬ ߞߏ߬ߣߌ߲ ߦߋ߫ ߘߊߟߌߟߌ ߟߋ߬ ߞߍ߫ ߟߊ߫߸ ߊ߬ߟߎ߬ ߓߊ߯ ߓߊ߯ߙߊ ߞߍߢߊ ߡߍ߲ ߝߐ߫ ߊ߲ ߢߣߊ߫߸ ߊ߲ ߓߌߣߴߏ߬ ߟߊ߫ ߛߎ ߣߌ߫ ߕߋ߬ߟߋ، ߞߏ߬ߣߌ߲߬ ߡߍ߲ ߘߌߣߊ߬ ߟߐ߬ ߞߵߊ߬ ߝߐ߫ ߞߏ߫ ߞߵߊ߲ ߠߊ߫ ߓߊ߯ߙߊ ߟߊߟߐ߬ %߁߀߀ ߟߊ߫߸ ߏ߬ ߞߏ߬ߣߌ߲ ߕߍߣߊ߬ ߓߍ߲߬ ߠߴߊ߲ ߡߊ߬، ߓߊߏ߬߸ ߡߐ߱ ߟߎ߬ ߦߴߊ߲ ߓߟߏ߫ ߓߊ߯ߙߊ ߟߊ߫߸ ߡߐ߰ ߜߘߍ߫ ߟߎ߫ ߝߣߊ߫ ߛߌ߰ߣߍ߲߫ ߊ߲ ߠߊ߫ ߓߊ߯ߙߊ ߕߐ߬ߣߐ ߟߋ߬ ߡߊ߬.>>> ߊ߬ ߞߵߏ߬ ߦߌ߬ߘߊ߬.

ߓߊ߯ߙߊ߫ ߞߏ ߘߏ߲߬ ߣߌ߫ ߖߌ߫ ߟߊߘߊ߲߫ ߞߏ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߓߊ߯ߙߊ߫ ߡߎߙߊ߲ ߡߍ߲ ߠߎ߬ ߦߴߊ߬ߟߎ߬ ߓߟߏ߫߸ ߏ߬ ߟߎ߫ ߛߐ߲߬ߞߐ ߞߊ߫ ߜߍ߬ߟߍ߲߬ ߓߊߟߋ߬، ߓߊߏ߬߸ ߊ߬ߟߎ߬ ߟߊ߫ ߕߙߏ߬ߞߏ ߟߎ߫ ߛߐ߲߬ߞߐ ߦߋ߫ ߞߵߊ߬ ߕߊ߬ ߖߕ ߞߋ߲߬ߥߟߎ߫ ߂߈ ߤߊ߲߯ ߞߋ߲߬ߥߟߎ߬ ߃߅ ߖߊ߬߬ߕߋ߬.

ߛߏ߬ߙߌ߫ ߞߊ߬ߓߊ߫ ߛߊ߰ߣߐ߫ ߞߊ߬ ߞߎߡߘߊ ߘߏ߫ ߝߐ߫߸ ߡߍ߲ ߓߍ߲߬ߣߍ߲߫ ߞߊ߲ߞߊ߲߫ ߖߌ߫ ߞߏ ߡߊ߬، ߓߊߏ߬߸ ߖߌ߫ ߓߊ߯ߙߊ߫ ߦߙߐ߫ ߁߂߃ ߡߍ߲ ߦߋ߫ ߦߊ߲߬߸ ߏ߬ ߕߍ߫ ߛߏ ߓߐ߫ ߟߊ߫ ߕߎ߬ߡߊ ߘߏ߫ ߟߎ߫ ߟߊ߫.

<<ߞߊ߲ߞߊ߲߫ ߓߌ߭ߓߌ߭ ߣߌ߲߬ ߘߐ߫߸ ߖߌ߫ ߓߊ߯ߙߊ߫ ߦߙߐ߫ ߁߂߃ ߟߋ߬ ߓߊ߯ߙߊ߫ ߟߊ߫ ߕߋ߲߬، ߊ߲ ߧߋ߫ ߛߊ߬ߡߊ ߟߋ߬ ߘߐ߫ ߕߋ߲߬߸ ߣߌ߫ ߕߟߋ߬ߡߊ ߟߋ߬߸ ߓߊ߯ߙߊ߫ ߦߙߐ߫ ߁߂߃ ߏ߬ ߕߴߛߋ߫ ߟߊ߫ ߡߐ߱ ߟߎ߬ ߓߐ߫ ߟߊ߫߸ ߝߏ߫ ߖߌ߫ ߞߏߖߊ ߘߌ߫ ߘߏ߲߬، ߖߌ߫ ߡߣߊߘߎ߲߫ ߝߊ߲ߓߏ߲ ߡߍ߲ ߘߏ߲߬ ߦߋ߫ ߞߊ߲ߞߊ߲߫ ߦߊ߲߬ ߕߋ߲߬߸ ߊ߬ ߝߐߣߍ߲߫ ߞߏ߫ ߊ߲ ߧߴߏ߬ ߡߍ߲ ߓߊ߯ߙߊ߫߸ ߤߊߟߵߊ߬ ߡߊ߫ ߟߏ߯ߟߎ ߓߐ߫، ߏ߬ ߘߐ߫߸ ߁߂߃ ߞߢߊ߬ ߘߊ߫ ߞߏ ߡߍ߲ ߠߊ߫߸ ߌ ߕߍ߫ ߛߴߊ߬ ߝߐ߫ ߟߊ߫ ߞߏ߫ ߅ ߘߌ߫ ߛߴߏ߬ ߞߍ߫ ߟߊ߫.>> ߊ߬ ߞߵߏ߬ ߦߌ߬ߘߊ߬.

ߛߏ߬ߙߌ߫ ߞߊ߬ߓߊ߫ ߛߊ߰ߣߐ߫ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫߸ ߞߏ߫ ߝߏ߫ ߞߵߊ߬ߟߎ߬ ߡߊߘߍ߬ߡߍ߲߫ ߠߋ߬߸ ߖߐ߲߰ߛߴߊ߬ߟߎ߬ ߘߌ߫ ߕߊ߲߬ߞߊ߬ ߓߊ߯ߙߊ߫ ߕߌߢߍ ߡߊ߬ ߢߊ ߡߍ߲ ߡߊ߬، ߓߊߏ߬߸ ߊ߬ ߦߌ߬ߘߊ߬ ߘߴߊ߬ ߓߟߏ߫ ߞߏ߫ ߡߣߊߘߎ߲߫ ߘߛߍ ߦߋ߫ ߘߏ߲߬ ߠߊ߫ ߛߐ߲߬߸ ߢߎߡߍ ߘߏ߲߬ ߝߣߊ߫ ߡߴߊ߬ ߘߓߐ߫ ߓߊߞߍ߫.

<<ߏ߬ ߘߐ߫߸ ߞߵߊ߲ ߡߊߘߍ߬ߡߍ߲߬ ߘߊ߫߸ ߞߵߊ߲ ߛߊߞߍ߫߸ ߞߵߊ߲ ߠߊ߫ ߓߊ߯ߙߊ߫ ߢߊ ߝߐ߫ ߊ߲ ߧߋ߫߸ ߏ߬ ߟߋ ߘߌߡߊ߲߫ ߊ߲ ߧߋ߫ ߊ߲ ߠߊ߫ ߓߊ߯ߙߊ ߟߊߟߐ߭ ߘߌ߫.>>

ߖߌ߫ ߞߏ߫ ߞߎߡߊ ߣߌ߲߬ ߘߐ߫߸ ߜߟߍ߬ߦߊ ߟߎ߬ ߦߴߊ߬ ߘߐ߫ ߞߏߛߓߍ߫، ߓߊߏ߬߸ ߕߙߏ߬ߞߏ ߡߍ߲ ߠߎ߬ ߦߋ߫ ߛߊ߲߬ ߠߊ߫ ߞߋ߲߬ߥߟߎ߬ ߦߙߌߞߊ ߟߊ߫ ߣߌ߲߬ ߞߊ߬ ߡߣߊ ߟߊߘߊ߲߫߸ ߏ߬ ߕߍ߫ ߓߊ߯ߙߊ߫ ߜߘߍ߫ ߞߍ߫ ߟߊ߫ ߖߌ߫ ߟߊߘߊ߲ ߞߐ߫، ߣߴߏ߬ ߟߊߟߐ߬ ߘߊ߫߸ ߝߏ߫ ߣߴߊ߬ ߕߏ߫ ߘߴߊ߬ߟߎ߬ ߓߟߏ߫ ߢߡߊ߬ߦߊ ߟߊ߫.

ߌ ߓߊ߯ ߛߋ߫ ߞߊ߲ߞߊ߲߫ ߛߌߟߓߊ ߟߎ߫ ߞߊ߲߬߬߸ ߞߣߐ߬ߘߐ߬ߝߟߌ ߟߎ߬ ߕߍ߫ ߞߋߟߋ߲߫ ߘߌ߫، ߓߍ߯ ߟߋ߬ ߣߌ߲߬ ߞߏ ߞߎߡߊ ߟߊ߫.

ߖߌ߫ ߡߣߊߣߍ߲߫ ߞߋߟߋ߲ ߦߋ߫ ߝߙߋ߬ ߟߊ߫ ߖߕ ߅߀߀ ߟߋ߬ ߟߊ߫߸ ߊ߬ ߘߏ߲߬ ߛߐ߬ߘߐ߲߬ ߘߌߡߊ߲߫ ߓߍ߯ ߓߟߏ߫߸ ߤߊߟߌ߬ ߛߋ߫ ߕߍ߫ ߡߍ߲ ߠߎ߬ ߦߋ߫.

ߖ߭ߊߞߊ߬ߙߌ߬ߦߊ߬ ߓߊߙߌ߫ ߡߍ߲ ߦߋ߫ ߟߞߊ߬ߙߊ߲߬ߠߌ߲߬ߠߊ߫ ߘߌ߫߸ ߏ߬ ߣߐ߬ ߊ߬ ߘߊߣߐ ߕߏ߫ ߟߴߊ߬ ߡߊ߬ ߏ߬ ߟߋ ߘߐ߫߸ ߞߊ߬ ߓߍ߲߬ ߡߣߊߘߎ߲ ߛߐ߲߬ߞߐ߬ ߞߏ ߡߊ߬ ߖߌ߫ ߡߣߊߣߍ߲ ߠߎ߫ ߣߐ߭ ߘߐ߫.

<<ߣߌ߫ ߖߌ߫ ߡߣߊ߫ ߞߏ ߟߊߟߐ߬ ߘߊ߫߸ ߊ߬ ߘߌߣߊ߬ ߘߌ߯ ߡߐ߱ ߟߎ߬ ߟߊ߫، ߓߊߏ߬߸ ߞߏ ߟߎ߫ ߜߍ߬ߟߍ߲߬ߡߊ߲߬߸ ߖߡߊ߬ߣߊ ߖߊ߬ߣߍ߲߬، ߒߠߋ ߘߌ߫ ߛߋ߫ ߖߌ߫ ߡߣߊߣߍ߲߫ ߟߏ߯ߟߎ߫ ߡߌ߲߬ ߠߊ߫ ߕߋ߬ߟߋ ߞߘߐ߫، ߖߌ߫ ߡߣߊ߫ ߞߏ ߟߋ߬ ߘߌߡߊ߲߫ ߖߡߊ߬ߣߊ߬ߘߋ߲ ߠߊ߫ ߞߊ߬ ߕߊ߬ߡߌ߲߬ ߡߣߊߘߎ߲߫ ߞߏ ߞߊ߲߬، ߖߌ߫ ߡߣߊ ߟߊ߬ߛߘߌ߬ ߞߋߟߋ߲ ߦߋ߫ ߅ ߀߀߀ ߟߋ߬ ߘߌ߫߸ ߘߋ߲߫ ߞߋߟߋ߲ ߦߋ߫ ߅߀߀߸ ߡߣߊߘߎ߲߫ ߞߋߟߋ߲ ߘߏ߲߬ ߛߐ߲߬ߞߐ ߦߋ߫ ߅ ߀߀߀ ߟߋ߬ ߘߌ߫، ߣߴߊ߬ ߕߏ߫ ߘߊ߫ ߡߣߊߘߎ߲߫ ߞߏ ߡߊ߬߸ ߊ߲ߠߎ߬ ߕߍߣߊ߬ ߛߋ߫ ߟߴߊ߬ ߛߊ߲߬ ߠߊ߫، ߊ߬ ߘߌ߫ ߡߐ߱ ߟߎ߫ ߛߍ߰.>>

ߟߊ߲߱ߛߌ߬ߣߍ߫ ߞߊ߬ߓߊ ߡߍ߲ ߝߣߊ߫ ߞߵߊ߬ ߡߙߌߦߊ ߘߌ߫ ߞߵߊ߬ ߦߌ߬ߘߊ߬ ߞߏ߫ ߣߌ߲߬ ߤߊߡߌ߲ ߦߴߊ߬ ߟߊ߫، ߊ߬ ߛߐ߲߬ ߘߴߊ߬ ߡߊ߬ ߝߛߊߦߌ߫߸ ߞߏ߫ ߖߌ߫ ߡߣߊ߫ ߞߏ ߡߊ߲߬ߕߙߐ ߦߋ߫ ߟߊ߬ߡߌߣߌ߲ ߞߊ߲߬߸ ߓߊ߬ߙߌ߬ ߝߏ߫ ߊ߬ ߦߋ߫ ߣߐ߬ߘߐߓߌ߬ߟߊ߬ ߝߋ߲߫ ߠߋ߬ ߟߊ߫߸ ߡߍ߲ ߝߣߊ߫ ߘߌ߫ ߓߍ߲߬ ߡߐ߱ ߟߎ߬ ߓߟߏߞߏ ߡߊ߬.

<<ߡߣߊ߫ ߞߏ ߘߌ߫ ߛߋ߫ ߟߊߕߐ߲߫ ߠߊ߫߸ ߓߊߏ߬ ߊ߬ ߦߋ߫ ߓߐ߰ߝߍ ߡߊߣߐ߯ ߟߊ߫،ߓߊ߬ߙߌ߬ ߖߌ߫ ߡߣߊ ߟߋ߬ ߟߊߕߐ߲ ߛߍߣߍ߲߬߸ ߏ߬ ߟߋ ߜߍ߬ߟߍ߲߬ߡߊ߲߬، ߓߊߏ߬߸ ߊ߬ ߛߋ߫ ߕߍ߫ ߓߍ߯ ߦߋ߫ ߞߊ߬ ߡߣߊߘߎ߲ ߛߊ߲߬.>>

ߊ߬ߟߋ ߟߊ߫ ߝߐߟߌ߫ ߘߐ߫߸ ߖߌ߫ ߡߣߊߣߍ߲ ߦߋ߫ ߅߀߀ ߟߋ߬ ߘߌ߫߸ ߡߣߊߘߎ߲ ߦߋ߫ ߁߀߀߀، ߏ߬ ߘߐ߫߸ ߝߏ߫ ߞߊ߬ ߡߣߊߘߎ߲ ߝߣߊ߫ ߞߍ߫ ߅߀߀ ߟߋ߬ ߘߌ߫߸ ߏ߬ ߟߋ ߘߴߊ߬ ߣߐ߰ߦߊ߫ ߡߐ߱ ߟߎ߫ ߡߊ߬.

ߖߌ߫ ߡߣߊ߫ ߞߏ ߢߌ߲߬ ߠߊߟߐ߭ ߘߌ߯ߕߐ߫ ߟߋ߬ ߖߎ߬ߟߊ ߘߏ߫ ߟߎ߫ ߝߣߊ߫ ߟߊ߫߸ ߖߌ߫ ߓߊ߯ߙߊ߫ ߦߙߐ߫ ߕߌ߮ ߟߎ߬ ߞߋߟߋ߲߫ ߕߍ߫ ߘߋ߬، ߞߊ߬ߕߎ߲߲߯߸ ߡߍ߲ ߠߎ߬ ߦߋ߫ ߓߊ߯ߙߊ߫ ߟߊ߫ ߖߌ߫ ߟߊߘߊ߲߫ ߦߙߐ ߟߎ߬ ߘߐ߫߸ ߟߊ߬ߓߏ߬ߙߟߌ߬ߟߊ ߟߎ߫ ߓߊ߬߸ ߝߙߋ߬ߞߍ߬ߟߊ ߟߎ߫ ߓߊ߬߸ ߤߊߟߌ߬ ߡߍ߲ ߠߎ߬ ߦߴߊ߬ ߛߌ߰ ߟߴߊ߬ߟߎ߫ ߞߎ߲߬߸ ߏ߬ ߟߎ߬ ߓߍ߯ ߟߋ߬ ߣߌ߲߬ ߡߊ߲߬ߕߙߐ ߘߐ߫.

© ߛߌߕߊ߲߬ ߞߊ߬ߓߊߗߍ߬ߡߐ߮ ߞߐ߲ߘߍ߫ ߛߊ߲߬ ߦߙߌߞߊ ߟߋ߬ ߕߋ߲߬߸ ߊ߬ ߦߋ߫ ߓߊ߯ߙߊ߫ ߟߊ߫ ߖߌ߫ ߟߊߘߊ߲߫ ߦߙߐ ߘߏ߫ ߘߐ߫߸ ߊ߬ߟߋ ߗߋ ߦߋ߫ ߡߊ߬ߘߏ߬ߣߌ߲߬ߠߌ߲ ߠߋ߬ ߘߌ߫ ߞߐ߲߬ߛߏ ߟߊ߫.

<<ߒߠߋ ߦߋ߫ ߟߊ߬ߓߏ߬ߙߟߌ߬ߟߊ ߟߋ߬ ߘߌ߫߸ ߞߊ߬ ߖߌ ߟߊߓߐ߫ ߞߵߊ߬ ߘߌ߫ ߡߐ߱ ߟߎ߫ ߡߊ߬، ߒߠߋ ߟߊ߫ ߓߊ߯ߙߊ ߟߋ߬ ߕߋ߲߬߸ ߊ߲ ߠߊ߫ ߡߐ߱ ߟߎ߬ ߓߍ߯ ߛߌ߰ߣߍ߲߫ ߊ߲ߠߎ߬ ߟߋ߬ ߡߊ߬، ߏ߬ ߘߐ߫߸ ߣߌ߫ ߖߌ߫ ߡߣߊ߫ ߞߏ ߢߌ߲߬ ߓߟߏߞߊ߬ ߘߊ߫߸ ߏ߬ ߘߌ߫ ߜߟߍ߬ߦߴߊ߲ ߡߊ߬ ߞߏߛߓߍ߫.>>

ߊ߲ߠߎ߬ ߘߌ߫ ߛߋ߫ ߖߌ ߡߊߟߐ߬ ߟߊ߫ ߦߙߐ߫ ߆߀ ߘߐ߫ ߕߟߋ߬ ߞߋߟߋ߲ ߞߘߐ߫߸ ߞߊ߬ ߥߊ߫ ߖߌ ߡߊߟߐ߬ ߦߋ߲߬ ߠߎ߬ ߘߐ߫.

ߤߊߡߌ߲߫ ߞߋߟߋ߲ ߢߌ߲߬ ߠߋ߬ ߘߏ߲߬ ߝߣߊ߫ ߦߋ߫ ߣߍ߬ߣߍ߬ߓߊ߫ ߟߊ߫߸ ߊ߬ߟߋ ߦߋ߫ ߖߌ߫ ߝߙߋߟߊ ߟߋ߬ ߘߴߊ߬ ߛߋ߲߬ߘߐ߫، ߞߊ߬ ߓߍ߲߬ ߊ߬ ߛߋߞߏ ߡߊ߬߸ ߊ߬ߟߋ߫ ߣߐ߬ ߖߌ߫ ߝߙߋ ߟߋ߬ ߛߎߥߊ߲ߘߌ߫ ߟߊ߫ ߞߵߊ߬ ߡߎ߬ߛߊ߬ߞߊ ߟߎ߫ ߛߐ߬ߘߐ߲߫ ߏ߬ ߘߐ߫.

<<ߒߠߋ ߦߋ߫ ߖߌ߫ ߡߣߊߣߍ߲ ߠߋ߬ ߝߙߋ߬ ߟߊ߫߸ ߓߊߏ߬ ߖߌ߫ ߡߣߊߘߎ߲ ߕߊ߭ ߛߋ߫ ߕߍ߫ ߒ ߧߋ߫، ߡߐ߰ ߛߌߦߊߡߊ߲ ߥߞߊ߬ߟߌ߬ߣߍ߲߫ ߞߊ߬ ߖߌ߫ ߡߣߊߣߍ߲ ߠߋ߬ ߛߊ߲߬، ߣߌ߫ ߕߋ߬ߟߋ ߓߐ߫ ߘߊ߫ ߟߏ߲ ߡߍ߲ ߊ߬ ߢߌ߬ߡߊ ߟߊ߫߸ ߒ ߘߌ߫ ߛߋ߫ ߖߌ߫ ߟߊߛߌ߫ ߃߀ ߝߙߋ߬ ߟߊ߫.>>

ߏ߬ ߘߐ߫߸ ߖߌ߫ ߢߣߊߣߍ߲ ߠߊ߫ ߕߎߣߎ߲߸ ߥߟߴߊ߬ ߣߐ߬ߘߐߓߌ߬ߟߊ߬ ߝߋ߲߫ ߘߊߜߍߟߍ߲߫ ߜߘߍ߫ ߟߊ߫߸ ߏ߬ ߟߋ ߞߍߕߐ߫ ߖߎ߬ߟߊ߬ ߡߌ߬ߛߍ߲߬ߣߍ߲ ߢߌ߲߬ ߠߎ߬ ߛߌߦߊߡߊ߲߫ ߓߌ߬ߟߊ߬ ߟߊ߫ ߞߣߐ߬ߘߐ߬ߝߟߌ ߘߐ߫߸ ߞߵߊ߬ߟߎ߬ ߟߊ߫ ߕߣߐ߬ ߞߏ ߘߐ߯ߦߊ߫.

ߌ ߓߊ߯ ߛߋ߫ ߘߓߌߘߊ ߟߊ߫߸ ߖߌ߫ ߡߌ߲߫ ߞߏ߫ ߞߎߡߊ ߘߐ߯ߡߊ߲߫ ߊ߬ ߘߐ߫، ߓߊߏ߬߸ ߊ߬ߟߋ߬ ߡߣߊߣߍ߲ ߠߎ߬ ߦߋ߫ ߞߍ߫ ߟߊ߫ ߝߋ߲߫ ߜߘߍ߫ ߟߎ߫ ߘߌ߫ ߦߋ߲߬߸ ߞߊ߬ ߡߏ߬ߛߏ ߟߎ߬ ߟߊ߫ ߣߊ߫ ߡߌߛߍ߲ ߠߎ߬߸ ߝߋ߲߫ ߛߊ߲߬ߣߍ߲ ߠߎ߬ ߓߌ߬ߟߴߊ߬ ߞߣߐ߫.

ߡߙߊߡߊߜߍ߫ ߛߋ߬ߙߌߝ ߦߋ߫ ߖߎ߬ߟߊ ߟߋ߬ ߘߌ߫ ߘߓߌߘߊ ߟߊ߫߸ ߡߍ߲ ߖߍ߬ߘߍ ߕߎ߲߬ ߕߍ߫ ߟߌ߬ߤߟߊ߬ ߞߎߘߊ ߢߌ߲߬ ߞߊ߬ߟߊߡߊ߬.

<<ߣߌ߫ ߡߣߊ ߟߊߕߎߣߎ߲߫ ߘߐ߫߸ ߊ߲ ߧߋ߫ ߝߋ߲ ߡߍ߲ ߠߎ߬ ߝߙߋ߬ ߟߊ߫ ߕߋ߲߬߸ ߊ߬ ߓߌ߬ߟߊ߬ߕߐ߫ ߡߎ߲߬ ߞߣߐ߫ ߞߵߊ߬ ߘߌ߫ ߛߊ߲߬ߠߌ߲߬ߠߊ ߟߎ߫ ߡߊ߬، ߝߏ߫ ߊ߬ ߦߋ߫ ߓߌ߬ߟߊ߬ ߡߣߊ ߟߋ߬ ߞߣߐ߫ ߞߵߊ߬ ߘߴߊ߬ ߕߌ߱ ߡߊ߬، ߣߴߊ߬ߟߎ߫ ߞߵߊ߬ ߝߐ߫ ߞߏ߫ ߞߊ߬ ߡߣߊ ߟߊߕߎߣߎ߲߫߸ ߝߋ߲߫ ߜߘߍ ߡߍ߲ ߘߌ߫ ߛߋ߫ ߓߌ߬ߟߊ߬ ߟߊ߫ ߡߣߊ ߣߐ߭ ߘߐ߫߸ ߝߏ߫ ߞߊ߬ ߣߊ߬ ߏ߬ ߟߋ ߘߌ߫. [...] ߡߍ߲ ߣߌ߫ ߡߣߊ ߘߌ߫ ߛߋ߫ ߞߍ߫ ߟߊ߫ ߛߐ߲߬ߞߐ߬ ߞߋߟߋ߲߫ ߘߌ߫، ߓߊߏ߬߸ ߣߌ߫ ߡߣߊ ߝߣߊ߫ ߘߊ ߜߟߍ߬ߦߊ߬ ߘߊ߫ ߞߙߊ߬ߖߊߥߏ ߛߐ߲߬ߞߐ ߘߌ߫߸ ߏ߬ ߘߌ߫ ߜߟߍ߬ߦߊ߬.>>

ߏ߬ ߝߣߊ߫ ߞߍ߬ߙߍߝߍ߬ ߞߏߢߊ߬߸ ߡߊߙߌߦߡ ߕߙߊߥߟߋ߫ ߝߣߊ߫ ߞߵߊ߬ ߡߙߌߦߊ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊߕߐ߲ ߕߴߊ߬ߟߋ ߕߙߐ߫ ߟߊ߫߸ ߓߊ߬ߙߌ߬ ߝߏ߫ ߓߐߘߊ߫ ߟߋ߬ ߢߌߣߌ߲߫ ߊ߬ ߞߏ ߟߊ߫.

<<ߊ߬ߟߎ߬ ߦߋ߫ ߛߋ߫ ߝߋ߲߫ ߜߘߍ߫ ߟߊߓߐ߫ ߟߊ߫߸ ߡߍ߲ ߘߌ߫ ߞߍ߫ ߡߣߊ ߣߘߐ߬ߓߌߟߊ ߘߌ߫، ߣߴߏ߬߬ ߛߐ߲߬ߞߐ ߘߏ߲߬ ߛߌߦߊߦߊ߫ ߘߊ߫ ߡߣߊ ߘߌ߫߸ ߊ߲ ߝߣߊ߫ ߘߌ߫ ߞߣߐ߬ߘߐߝߟߌ߬، ߣߴߏ߬ ߕߍ߫ ߛߌߛߍ߲߬ ߖߎ߬ߟߊߦߊ߸ ߕߣߐ߬ ߕߍ߫ ߞߙߊ߬ߖߊߥߏ ߟߎ߬ ߟߊ߫.>>

ߊ߲ ߠߊ߫ ߢߌ߬ߣߌ߲߬ߞߊ߬ߟߌ ߛߋߣߍ߲߫ ߖߎ߬ߟߊ ߡߍ߲ ߠߎ߬ ߡߊ߬߸ ߝߙߋߞߋ߫ ߕߍ߫ ߡߣߊ ߟߊߕߎߣߎ߲߫ ߞߏ ߘߐ߫، ߞߏ߬ߣߌ߲߬߸ ߊ߬ߟߎ߬ ߡߴߊ߬ ߟߐ߲߫ ߠߋ߬߸ ߊ߬ ߣߐ߬ߘߐߓߌ߬ߟߊ߬ߕߐ߫ ߡߍ߲ ߠߊ߫߸ ߊ߬ ߣߴߏ߬ ߝߣߊ߫ ߛߐ߲߬ߞߐ ߘߌ߫ ߛߋ߫ ߞߍ߫ ߟߊ߫ ߖߋ߬ߟߌ߬ ߘߌ߫.

ߡߊߙߌߦߊߡ ߓߋߓߋ ߘߎ߲ߓߎߦߊ߫ ߦߋ߫ ߖߎ߬ߟߊ ߟߋ߬ ߘߌ߫ ߘߓߌߘߊ ߟߐ߯ߝߍ ߘߐ߫߸ ߏ߬ ߞߊ߲߫ ߞߏ߫ ߝߏ߫ ߞߊ߬ ߝߊ߲߬ߞߊ߬ ߘߌ߫ ߡߣߊ߫ ߡߊߕߐߡߐ߲ ߠߋ߬ ߡߊ߬߸ ߞߵߏ߬ ߟߎ߫ ߕߣߐ߬ߓߐ߫.

ߊ߬ ߞߊ߲߫ ߞߏ߫ ߊ߬ߟߋ ߥߊ߫ ߘߊ߫ ߖߡߊ߬ߣߊ ߘߏ߫ ߟߎ߫ ߞߣߐ߫߸ ߡߐ߱ ߟߎ߬ ߦߋ߫ ߡߣߊ ߟߎ߬ ߡߊߕߐ߬ߡߐ߲߬ ߠߊ߫ ߦߋ߲߬ ߠߎ߬ ߘߐ߫߸ ߞߊ߬ ߕߐ߬ߣߐ ߛߐ߬ߘߐ߲߫ ߊ߬ ߟߊ߫ ߝߣߊ߫.

<<ߖߌ߫ ߡߣߊߣߍ߲ ߦߋ߫ ߛߏ ߣߐ߯ ߟߊ߫߸ ߏ߬ ߦߋ߫ ߕߎ߬ߢߊ߬ ߘߌ߫، ߡߍ߲ ߓߴߊ߬ ߡߌ߲߬߸ ߌ ߓߴߊ߬ ߓߌ߬ߟߊ߬ ߦߙߐ ߡߍ߲ ߘߐ߫߸ ߝߏ߫ ߣߌ߫ ߛߋ߲߭ ߕߊ߬ߡߌ߲߬ ߘߴߊ߬ ߘߍ߲ߜߍߘߍ߲ߜߍ߫ ߟߊ߫، ߛߊ߲ ߓߊ߯ ߣߊ߬߸ ߊ߬ ߘߌ߫ ߣߊ߬ ߝߏߟߏ߲ ߓߍ߯ ߟߊߝߊ߰߸ ߞߊ߬ ߖߌ߫ ߛߌߟߊ ߕߍ߰، ߣߴߏ߬ ߘߏ߲߬ ߞߍ߫ ߘߊ߫߸ ߡߐ߱ ߡߍ߲ ߠߎ߬ ߦߋ߫ ߝߊ߬ߙߊ ߘߐ߫߸ ߖߌ ߘߌ߫ ߘߏ߲߬ ߏ߬ ߟߎ߫ ߞߊ߲߬߸ ߊ߬ ߘߌ߫ ߞߍ߫ ߝߙߋߞߋ ߘߌ߫.>>

ߊ߬ߟߋ ߞߵߊ߬ ߡߊߞߊ߬ߛߌ߬ ߡߍ߲ ߠߊ߫߸ ߏ߬ ߟߋ ߊ߬ ߢߌߣߌ߲ ߘߌ߫ ߞߎ߲߬ߠߊ߬ߛߌ߮ ߟߎ߫ ߝߍ߬߸ ߞߊ߬ ߡߣߊ߫ ߡߊߕߐߡߐ߲ ߞߍ߫ ߊ߬ߟߎ߫ ߛߍ߬ߓߍ ߘߌ߫߸ ߏ߬ ߘߌ߫ ߛߊߣߌ߲ߧߊ ߟߊߘߏ߲߬߸ ߞߊ߬ ߣߐ߮ ߞߟߍ߬߸ ߞߵߏ߬ ߞߍ߫ ߕߣߐ߬ ߛߐ߬ߘߐ߲߬ߘߊ ߘߏ߫ ߝߣߊ߫، ߡߣߊ߫ ߡߊߕߐ߬ߡߐ߲߬ߣߍ߲ ߏ߬ ߟߎ߬ ߝߣߊ߫ ߦߋ߫ ߛߋ߫ ߞߍ߫ ߟߊ߫ ߢߊ߫ ߜߘߍ߫ ߡߊ߬߸ ߡߍ߲ ߕߐ߬ߣߐ ߘߌ߫ ߛߋ߫ ߖߊ߬ߡߊ ߡߊ߬.

ߛߋ߫ ߞߍ߫ ߘߊ߫ ߝߊ߰ߡߊ ߡߍ߲ ߠߎ߬ ߡߊ߬߸ ߊ߬ ߓߍ߯ ߞߊ߬ ߟߊ߬ߕߐ߲߬ߠߌ߲߬ ߞߏ ߝߐ߫߸ ߓߊ߬ߙߵߊ߬ߟߎ߬ ߛߌ߫ ߡߊ߫ ߛߐ߲߬ ߘߟߊߛߎ߲ߓߎߟߌ߫ ߡߊ߬߸ ߞߊ߬ ߓߍ߲߬ ߖߌ߫ ߡߣߊ ߣߘߐ߬ߓߌ߬ߟߊ߬ ߞߏ ߡߊ߬߸ ߥߟߊ߫ ߝߋ߲߫ ߜߘߍ ߡߍ߲ ߡߙߌߘߐ ߕߊ߬ߣߍ߲߫ ߞߵߊ߬ߟߎ߫ ߓߌ߬ߟߊ߬ ߡߣߊ ߟߎ߫ ߣߐ߭ ߘߐ߫، ߊ߲ ߛߋ߫ ߘߊ߫ ߟߊ߬ߡߌߣߌ߲ ߜߋ߬ߟߎ߲߬ߠߌ߲߬ߘߊ ߟߊ߫߸ ߊ߬ ߣߌ߫ ߥߋ߲߬ߛߋ߲߬ߡߊ ߟߎ߬ ߗߋߕߌ߯ߘߊ ߟߊ߫߸ ߊ߬ߟߎ߬ ߛߌ߫ ߡߊ߫ ߛߋ߫ ߖߋ߬ߓߌ߬ ߖߐ߲ߖߐ߲߫ ߘߌ߫ ߟߴߊ߲ ߡߊ߬.

ߏ߬ ߘߐ߫߸ ߡߍ߲ ߠߎ߬ ߦߋ߫ ߖߌ߫ ߟߊߘߊ߲ ߞߍ߫ ߟߊ߫߸ ߏ߬ ߟߎ߬ ߦߋ߫ ߞߣߐ߬ߘߐ߬ߝߟߌ ߘߐ߫߸ ߊ߬ߟߎ߬ ߟߊ߫ ߓߊ߯ߙߊ ߕߌߢߍ߫ ߞߏ ߘߐ߫، ߡߣߊ߫ ߛߊ߲ߠߊ ߟߎ߬ ߤߊߡߌ߲ߣߍ߲߫߸ ߞߊ߬ ߓߍ߲߬ ߛߐ߲߬ߞߐ߬ ߞߏ ߡߊ߬߸ ߡߍ߲ ߣߊ߬ߕߐ߫ ߡߣߊ ߣߐ߭ ߘߐ߫، ߖߎߎ߬ߟߊ ߟߎ߬ ߤߊߡߌ߲ߣߍ߲߫ ߊ߬ߟߎ߬ ߟߊ߫ ߝߋ߲ ߠߎ߬ ߓߌ߬ߟߊ߬ ߝߋ߲߬ ߞߏ ߘߐ߫.

ߦߊ߯ߟߊ߫߸ ߖߌ߫ ߡߣߊ ߟߎ߬ ߦߋ߫ ߛߏ ߟߊ߫ ߢߊ ߡߍ߲߸ ߣߴߊ߬ ߕߏ߫ ߘߊ߫ ߡߣߊߘߎ߲ ߞߋߟߋ߲߫ ߡߊ߬ ߕߋ߲߬߸ ߣߴߏ߬ ߟߎ߬ ߝߣߊ߫ ߡߊߕߍ߬ߟߊ߫ ߡߊ߫ ߛߐ߬ߘߐ߲߬߸ ߊ߬ߝߐ߫ ߊ߬ߟߋ߬ ߞߏ߫ ߞߋߟߋ߲ ߕߍ߫ ߓߊ߬؟ ߏ߬ ߓߍ߯ ߢߌ߬ߣߌ߲߬ߞߊ߬ߟߌ ߞߍ߫ ߘߊ߫ ߘߴߊ߲ ߠߊ߫ ߡߐ߰ ߞߎ߲ߝߊ߲ߓߐ߲ߣߍ߲ ߠߎ߬ ߓߟߏ߫، ߏ߬ ߘߐ߫߸ ߊ߲ ߛߌ߰ߣߍ߲߫ ߞߊ߬ ߡߙߌߘߐ ߕߊ߭ ߞߐ ߣߌ߲߬ ߡߊߞߐ߬ߣߐ߲߬ ߥߍ߫.