ߜߞߋߘߎ߯ ߡߙߊ߬ߘߊ߬ߙߋ߲ ߡߍ߲ ߕߐ߯ ߞߏ߫ ߞߎ߲߬ߘߎ߫ ߟߋ߲߬ߜ߭ߏ߬ߓߍ߲߬ߜ߭ߎ߫߸ ߛߌߟߊ ߡߍ߲ ߦߋ߫ ߓߌ߬ߟߊ߬ ߟߊ߫ ߦߋ߲߬ ߡߊ߬߸ ߣߴߊ߬ ߦߋ߫ ߕߊ߬ߡߌ߲߬ ߠߊ߫ ߡߐ߲ߜ߭ߏ߫ ߝߊ߲߭ ߝߍ߬، ߦߋ߲߬ ߛߌߟߊ ߓߏ߬ߙߌ ߓߘߊ߫ ߞߍ߫ ߓߊ߲߬ߓߊ߬ ߓߏ߬ ߟߊ߬ߦߟߍ ߘߌ߫، ߓߊߏ߬߸ ߞߐ߬ߓߊ߬ߟߏ߲ ߂߀߂߆ ߞߏ߲ߓߌߕߌ߮ ߕߟߋ߬ ߁߂ ߡߊ߬߸ ߛߌߟߊ ߓߏ߬ߙߌ߬ߓߊ߮ ߟߎ߫ ߕߍ߬ߘߍ߫ ߖߊ߬ߤߣߊߡߊ ߖߍ߬ߘߍߖߍ߬ߘߍ ߟߋ߬ ߘߐ߫ ߦߋ߲߬߸ ߖߌ ߓߘߊ߫ ߛߌߟߊ ߡߎ߰ߡߍ ߟߊߝߏ߬߸ ߞߊ߬ ߓߐߒߣߘߐ ߜߟߍ߬ߦߊ߬ ߞߏߛߓߍ߫.

ߊ߬ ߘߏ߲߬߸ ߛߌߟߊ ߣߌ߲߬ ߕߍ߱ ߖߌ ߓߟߏ߫߸ ߊ߬ ߡߊ߲߬ߕߙߐ ߦߋ߫ ߛߋ߫ ߟߊ߫ ߟߋ߬ ߞߊ߬ߙߊ߲߬ߘߋ߲ ߠߎ߫ ߡߊ߬߸ ߏ߬ ߟߎ߬ ߦߴߊ߬ߟߎ߬ ߟߊ߫ ߞߊ߬ߙߊ߲߬ ߦߙߐ ߡߊߛߐ߬ߘߐ߲߬ ߠߊ߫ ߜߟߍ߬ߦߊ ߘߝߊߣߍ߲ ߠߋ߬ ߘߐ߫߸ ߊ߬ ߕߌ߯ߕߌ߯ ߖߍ߬ߘߍ ߡߍ߲ ߠߎ߬ ߦߋ߫ ߥߊ߫ ߟߊ߫ ߞߊ߬ߙߊ߲߬ߕߊ ߟߊ߫ ߡߐ߲ߜ߭ߏ߫ ߞߊ߬ߙߊ߲߬ߘߊ ߟߊ߫.

ߊ߲ ߛߋ߫ ߘߊ߫ ߢߎ߬ߡߊ ߙߝߊߦߍߟ ߕߏ߲߬ߖߌ߬ߣߏ߫ ߢߌ߬ߣߌ߲߬ߞߊ߬ ߟߊ߫߸ ߏ߬ ߦߋ߫ ߥߊߟߌߥߊߟߌ߫ ߓߏߙߌߟߊ ߟߋ߬ ߘߌ߫߸ ߊ߬ ߦߋ߫ ߛߌ߱ ߘߐ߫ ߛߍ߲ߟߎߥߌ߫߸ ߏ߬ ߦߋ߫ ߘߎ߰ߣߍ߲߫ ߠߋ߬ ߘߌ߫߸ ߜߟߊ߬ߜߟߊ߫ ߅߀߀ ߘߐߙߐ߲߫ ߠߋ߬ ߦߋ߲߬ ߣߌ߫ ߛߌߟߊ ߦߙߐ߫ ߕߌߢߍߣߍ߲ ߕߍ߫، ߗߍ߭ ߣߌ߲߬ ߞߊ߬ ߘߏ߫ ߢߊߝߐ߫ ߊ߬ ߟߊ߫ ߜߟߍ߬ߦߊ߫ ߛߐ߬ߘߐ߲߬ߣߍ߲ ߠߎ߬ ߞߊ߲߬.

<<ߒߠߋ ߓߐߣߍ߲߫ ߜߞߋߘߎ߯ ߟߋ߬ ߛߐ߱ ߢߌ߲߬ ߡߊ߬߸ ߒ ߣߌ߫ ߡߐ߱ ߘߏ߫ ߟߎ߫߸ ߡߍ߲ ߠߎ߬ ߕߘߍ߬ ߒ ߞߐߝߍ߬ ߒ ߠߊ߫ ߔߏߔߏ ߞߊ߲߬، ߓߊߏ߬߸ ߊ߲ ߥߊߕߐ߫ ߞߎ߲߬ߘߎ߫ ߟߍ߲߬ߜ߭ߏ߬ߓߍ߲߬ߜ߭ߎ߫ ߟߐ߯ߝߍ ߟߋ߬ ߘߐ߫ ߟߐ߯ߟߐ߯ ߞߊ߲ߡߊ߬، ߒ ߣߊ ߘߴߊ߬ ߛߐ߬ߘߐ߲߬ ߖߌ ߓߘߊ߫ ߛߌߟߊ ߕߍ߰، ߏ߬ ߟߋ ߞߍߣߍ߲߫ ߒ ߠߊ߫ ߔߏߔߏ ߟߊߟߐ߬ ߢߊ ߘߌ߫߸ ߞߊ߬ ߟߊ߬ߡߊ߮ ߦߋ߫ ߛߍߣߍ߲߬.>>

ߊ߬ ߟߊ߫ ߟߊ߬ߛߙߋ߬ߦߊ߬ߟߌ߬ ߞߊ߲߫ ߘߐ߫߸ ߘߏ߫ ߟߎ߫ ߦߋ߫ ߖߌ ߟߊ߫ ߛߌߟߊ ߕߍ߰ ߦߙߐ ߏ߬ ߘߐ߫ ߦߋ߲߬߸ ߡߍ߲ ߠߎ߬ ߦߋ߫ ߔߏߔߏ ߛߌ߰ ߟߴߊ߬ߟߎ߫ ߞߎ߲߬ ߞߵߊ߬ ߟߊߕߊ߬ߡߌ߲߬ ߖߌ ߘߐ߫، ߏ߬ ߦߋ߫ ߞߍ߫ ߟߴߏ߬ ߟߎ߬ ߓߟߏ߫ ߖߕ ߅߀ ߀߀߀ ߟߋ߬ ߟߊ߫߸ ߔߏߔߏ߫ ߞߋߟߋ߲.

ߊ߬ ߞߵߊ߬ ߝߐ߫ ߦߋ߲߬ ߠߋ߬: <<ߦߙߐ ߣߌ߲߬ ߘߐ߫ ߦߊ߲߬߸ ߒ ߞߊ߬ ߡߐ߱ ߘߏ߫ ߟߎ߫ ߟߋ߬ ߛߐ߬ߘߐ߲߫ ߦߊ߲߬߸ ߡߍ߲ ߠߎ߬ ߦߋ߫ ߡߐ߱ ߟߎ߬ ߡߊߘߍ߬ߡߍ߲߬ ߠߊ߫ ߞߵߊ߬ߟߎ߬ ߟߊ߫ ߔߏߔߏ ߟߎ߬ ߟߊߕߊ߬ߡߌ߲߬، ߔߏߔߏ߫ ߞߋߟߋ߲ ߦߋ߫ ߟߊߕߊ߬ߡߌ߲߬ ߠߊ߫ ߖߕ ߅߀ ߀߀߀ ߟߋ߬ ߟߊ߫، ߒߠߋ ߖߍ߬ߘߍ ߣߊ߭ ߌߞߘߐ߫߸ ߒ ߝߣߊ߫ ߝߙߊ߬ ߘߊ߫ ߡߐ߰ ߟߕߊ߬ߡߌ߲߬ߠߊ ߟߎ߫ ߞߊ߲߬߸ ߓߊ߬ߙߌ߬ ߏ߬ ߢߊ߬ߞߏ߬ ߛߌ߬߫ ߡߊ߫ ߞߍ߫ ߊ߬ ߘߐ߫.>> ߓߊߞߋ߲ ߣߌ߲߬ ߞߵߏ߬ ߢߊߝߐ߫.

ߖߌߓߐ ߣߌ߲߬ ߓߘߊ߫ ߞߍ߫ ߡߊ߲߬ߕߙߐ߬ߓߊ߫ ߣߌ߫ ߜߟߍ߬ߦߊ߬ߓߊ߫ ߟߋ߬ ߘߌ߫ ߡߐ߱ ߟߎ߬ ߣߴߊ߬ߟߎ߬ ߓߟߏߝߋ߲ ߠߎ߬ ߟߊ߫ ߖߌ߰ߣߌ߬ߦߟߍ ߘߐ߫ ߛߌߟߊ ߣߌ߲߬ ߞߊ߲߬ ߕߋ߲߬߸ ߊ߬ ߕߌ߯ߕߌ߯ ߖߎ߬ߟߊ ߟߎ߬߸ ߟߊ߬ߓߏ߬ߙߟߌ߬ߟߊ ߟߎ߬߸ ߞߊ߬ߙߊ߲߬ߘߋ߲ ߠߎ߬߸ ߏ߬ ߟߎ߬ ߡߍ߲ ߠߎ߬ ߦߋ߫ ߛߌߟߊ ߣߌ߲߬ ߞߊ߲߬ ߟߏ߲ ߺ ߏ ߺ ߟߏ߲߫ ߞߊ߬ߣߌ߲߬.

ߞߊ߬ ߓߍ߲߬ ߜߟߍ߬ߦߊ ߢߌ߲߬ ߠߋ߬ ߡߊ߬߸ ߞߎ߲߬ߘߎ߫ ߟߋ߲߬ߜ߭ߏ߬ߓߍ߲߬ߜ߭ߎ߬ ߟߊߛߐ߬ߘߐ߲ ߓߘߊ߫ ߞߍ߫ ߓߊ߲߬ߓߊ߬ ߓߏ߬ ߟߊ߬ߦߟߍ ߘߌ߫߸ ߛߌߟߊ ߏ߬ ߓߏ߬ߙߌ ߓߊ߯ ߓߌ߬ߟߊ߬ ߡߍ߲ ߡߊ߬߸ ߏ߬ ߖߎ߬ߛߎ ߟߋ߬ ߓߐ߫ ߟߊ߫، ߏ߬ ߞߏߛߐ߲߬߸ ߊ߬ߟߎ߬ ߓߘߴߊ߬ߟߎ߬ ߞߊ߲ߠߊߘߌ߫߸ ߛߴߊ߬ߟߎ߬ ߘߌ߫ ߘߍ߬ߡߍ߲߬ ߢߊ ߡߍ߲ ߡߊ߬߸ ߞߊ߬ ߛߌߟߊ ߣߌ߲߬ ߓߐ߫ ߕߋ߲߬.