ߕߎߟߊߝߌ߲ ߕߋ߬ߟߋ߫ ߂߀ ߡߊ߬߸ ߒߞߏ ߛߓߍߛߎ߲ ߠߊߥߊ߲߬ߞߊ߲ ߠߋ߬ ߕߘߍ߬ ߌߘߐ߫ ߞߊ߯ߙߌߟߏ߲ ߡߊ߬߸ ߡߍ߲ ߛߌ߲߬ߝߏ߲߬ߧߊ߬ ߘߊ߫ ߞߎ߬ߡߊ߬ߛߌ߫߸ ߜߋ߲ߞߐ߰ߖߌ߬ߘߊ ߖߡߊ߬ߣߊ ߞߊ߲߬، ߡߐ߰ ߗߡߍ߬ ߣߊ߯ߣߌ߲߫ ߣߌ߫ ߞߐ߫߸ ߡߍ߲ ߠߎ߬ ߓߐ߫ ߘߊ߫ ߘߌ߲߬ߞߌ߬ߙߊ߬ ߓߐߣߍ߲߫ ߢߐ߲߰ ߡߊ ߟߎ߬ ߘߐ߫߸ ߞߊ߬ ߛߐ߬ߘߐ߲߫ ߖߊ߲߬ߖߏ߲߬ ߓߟߋߓߟߋ ߣߌ߲߬ ߘߐ߫߸ ߞߊ߬ ߣߊ߬ ߛߐ߬ߘߐ߲߫ ߞߏ߲߬ߓߏ ߊߘߡߊ߫ ߖߓߊ߬ߕߍ߬ ߟߊ߫ ߞߝߊ߬ ߃߇ ߞߎ߲߬ߠߊ߬ߓߐ ߘߐ߫߸ ߏ߬ ߡߍ߲ ߦߋ߫ ߘߝߐ߬ߦߊ߬ߟߊ߫ ߣߌ߫ ߞߟߊ߬ߘߏ߲߬ߛߏ߬ ߓߟߋߓߟߋ߫ ߘߌ߫߸ ߡߍ߲ ߓߘߊ߫ ߞߝߊ߬ ߦߙߌߞߊ߫ ߛߓߍ߫ ߒߞߏ ߘߐ߫.

ߞߝߊ߬ ߞߎ߲߬ߠߊ߬ߓߐ߬ ߓߟߋߓߟߋ ߣߌ߲߬ ߛߌ߲߬ߝߏ߲߬ߧߊ߬ ߘߊ߫ ߒ.ߝ.ߡ ߘߍ߬ߞߙߎ ߟߋ߬ ߓߟߏ߫߸ ߏ߬ ߡߍ߲ ߞߘߐ ߦߋ߫ ߒߞߏ ߣߌ߫ ߝߊ߬ߛߏ߬ ߞߊ߲ ߡߐ߬ߟߐ߲߬ߡߦߊ߬ ߕߐ߲ ߘߌ߫، ߘߌ߯ߣߊ߫ ߢߍߡߐ߮ ߟߎ߬ ߕߘߍ߬ ߞߣߍ ߞߊ߲߬߸ ߟߊ߲߬ߘߊ ߢߍߡߐ߮ ߟߎ߬߸ ߕߍߓߊ߯ߦߟߊ، ߡߐ߱ ߟߎ߬ ߓߐ߫ ߘߊ߫ ߡߊ߬ߟߌ ߟߊ߫߸ ߓߙߎߞߌߣߊ߫ ߝߊ߬ߛߏ߬߸ ߖߌ߬ߣߍ߫ ߖߡߊ߬ߣߊ߸ ߏ߬ ߟߎ߬ ߓߍ߯ ߞߐߦߌ߬ߘߊ߬ ߘߊ߫ ߞߣߍ ߣߌ߲߬ ߞߊ߲߬. ߏ߬ ߓߍ߯ ߟߊߣߍ߲߫ ߡߍ߲ ߞߊ߲߬߸ ߟߐ߲ߞߏߕߌ߯ ߛߟߏߡߣߊ߬ ߞߊ߲ߕߍ߫ ߞߐߙߍ ߛߣߍߡߊ߫ ߘߊ߫ ߞߣߍ ߞߊ߲߬߸ ߞߊ߬ ߓߐ߫ ߓߎ߬ߥߊ߬ߞߍ߫.

ߜߋ߲ߞߐ߰ߖߌ߬ߘߊ ߞߎ߲߬ߘߐ߲ߞߟߌ ߞߊ߬ߙߊ߲߬ ߘߊ߫ ߒߞߏ ߟߋ߬ ߘߐ߫ ߊ߬ߟߎ߬ ߓߟߏ߫، ߏ߬ ߟߋ ߞߐߝߍ߬߸ ߒ.ߝ.ߡ ߞߊ߲ߕߌ߮ ߦߋ߫ ߦߊ߬ߞߎߓߊ߬ ߕߙߊߥߟߋ߫ ߡߍ߲ ߘߌ߫߸ ߏ߬ ߟߋ ߞߊ߬ ߞߊ߬ ߖߊ߬ߡߊ ߛߌ߰ ߞߎ߲ߧߊ ߝߐ߫ ߊ߬ߟߎ߬ ߦߋ߫ ߟߊ߬ߛߣߍ߬ߟߌ߬ ߓߋߟߋ߲ߠߊ ߘߐ߫߸ ߞߊ߬ ߒߞߏ ߣߌ߫ ߝߊ߬ߛߏ߬ ߞߊ߲ ߠߎ߬ ߡߐ߬ߟߐ߲߬ߡߦߊ߬ ߕߐ߲ ߛߌ߲ߘߌ߫ ߞߎ߲ ߣߴߊ߬ ߘߐ߬ߝߐ ߢߊߝߐ߫߸ ߵߊ߬ ߢߌߣߌ߲ߞߏ ߟߎ߬ ߣߴߊ߬ ߟߊ߫ ߞߍߕߊ ߟߎ߬ ߦߌ߬ߘߊ߬ ߢߣߊߓߊ߮ ߟߎ߬ ߟߊ߫.

ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬  ߘߐ߫ ߞߊ߬ ߝߘߊ߫ ߓߎ߬ߣߊߝߎ߬ ߒߞߏ ߞߊ߬ߓߊ ߟߊ߫߸ ߡߊ߬ߡߘߎ ߛߎߣߊ ߝߏߝߣߊ߫ ߡߍ߲ ߦߋ߫ ߞߎ߬ߡߊ߬ߛߌ߫ ߒߝߡ ߛߓߍߘߊ ߞߊ߲ߕߌ߮ ߘߌ߫߸ ߏ߬ ߞߊ߬ ߞߎ߬ߡߊ߬ߛߌ߫ ߞߌ߲߬ߘߊ ߒߞߏ ߞߏ ߘߐ߬ߝߐ ߘߐߞߊ߬ߙߊ߲߬، ߞߵߊ߬ ߦߌ߬ߘߊ߬ ߞߏ߫ ߡߐ߰ ߝߟߐ ߡߍ߲ ߞߊ߬ ߒߞߏ ߟߊߘߏ߲߬ ߞߎ߬ߡߊ߬ߛߌ߫߸ ߏ߬ ߟߋ߬ ߡߊ߬ߟߌ߬ߞߊ߫ ߛߏ߬ߙߌ߬ߓߊ ߞߐ߲ߘߍ߫، ߡߐ߰ ߝߟߐ ߡߍ߲ ߝߣߊ߫ ߞߊ߬ ߒߞߏ ߞߊߙߊ߲ߕߊ߫ ߝߟߐ ߟߐ߬߸ ߏ߬ ߟߋ ߡߊ߬ߡߎߘߎ߬ ߞߐ߲ߘߍ߫ ߘߌ߫.

ߜߊ߬ߙߊ ߘߐߘߌߦߊ߫ ߘߊ߫ ߛߞߎ߬ ߘߌߡߊ߲ ߠߎ߬ ߟߊ߫ ߞߎ߬ߡߊ߬ߛߌ߬ ߒߞߏ ߞߊߙߊ߲ߘߋ߲ ߠߎ߬ ߓߟߏ߫߸ ߞߵߏ߬ ߟߊ߫ ߘߊ߲߬ߕߍ߰ߟߌ ߟߎ߫ ߞߊ߲߬.

ߖߊ߲߬ߖߏ߲ ߕߏ߬ ߕߍ߬ߡߊ߬ ߕߏ ߣߌ߫ ߖߊ߬ߡߊ ߞߟߌ߫ ߞߎ߲ ߛߊ߫߸ ߏ߬ ߟߋ ߞߍ߫ ߘߊ߫ ߞߝߊ߬ ߃߇ ߡߎ߰ߡߍ ߢߣߊߓߊ߯ߦߊ ߣߴߊ߬ߟߎ߫ ߘߊ߲߭ߕߍ߱ ߘߌ߫ ߖߊ߬ߡߊ ߦߋ߫ ߞߏ߲߬ߓߏ ߊߘߡߊ߫ ߖߓߊ߬ߕߍ߬ ߓߟߏ߫߸ ߞߵߊ߬ ߟߊ߫ ߛߓߍߟߌ߫ ߞߍߣߍ߲ ߣߴߊ߬ ߟߊ߫ ߕߌߙߌ߲ߠߌ߲߫ ߞߍߣߍ߲ ߠߎ߬ ߟߊ߫ ߞߣߍ ߞߊ߲߬. ߢߣߊߓߊ߯ߦߊߟߌ ߏ߬ ߞߍ߫ ߞߊ߲߫ ߌ߬ߟߊ߫ ߟߋ߬ ߘߐ߫ ߊ߬ ߓߟߏ߫߸ ߒߞߏ ߣߌ߫ ߝߊ߬ߙߊ߲߬ߛߌ ߘߐ߫.

ߜߋ߲ߞߐ߰ߖߌ߬ߘߊ ߝߊ߬ߛߏ߬ ߞߊ߲ ߠߎ߬ ߘߎ߲ߓߎ ߞߊ߲ߕߌ߮ ߦߋ߫  ߊߘߎߥߊ߫  ߞߎ߬ߥߊ߬ߛߌ ߡߍ߲ ߘߌ߫߸ ߏ߬ ߞߊ߬ ߒߞߏ ߛߋߞߏߦߊ ߟߋ߬ ߡߊߞߓߊ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ߬ ߡߊ߫ ߛߓߍߟߌ߫ ߦߋ߫߸ ߡߍ߲ ߓߍ߲߬ߣߍ߲߫ ߝߘߊ߬ߝߌ߲߬ ߞߊ߲ ߠߎ߬ ߛߓߍ ߘߐ߫ ߞߊ߬ ߛߋ߫ ߒߞߏ ߘߐ߫، ߝߏ߫ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ߫ ߖߍ߬ߘߍ ߦߋ߫ ߒߞߏ ߞߊߙߊ߲ߘߋ߲ ߠߋ߬ ߘߌ߫߸ ߤߊߟߵߊ߬ ߞߵߊ߬ ߟߊ߫ ߥߟߊ߬ߘߊ ߕߊ߬ ߟߋ߬ ߞߊ߬ ߞߐ߲߰ ߊ߬ ߥߊ ߢߍ߫ ߜߊ߬ߙߊ ߘߐ߫، ߊ߬ ߓߊ߲߫ ߘߊ߫ ߞߊ߬ ߟߊ߬ߤߘߌ ߕߊ߬߸ ߞߏ߫ ߣߴߊ߬ߟߎ߫ ߞߊ߬ ߜߊ߬ߙߊ ߛߊ߲߬ߠߞߊ߬ ߜߘߍ ߡߍ߲ ߞߍ߫߸ ߞߏ߫ ߊ߬ߟߎ߬ ߘߴߏ߬ ߕߐ߮ ߘߍ߬ߡߍ߲߬ߘߌ߫ ߞߏ߲߬ߓߏ ߊߘߡߊ߫ ߖߓߊ߬ߕߍ߬ ߟߊ߫.

ߛߙߋߓߍ߫ ߟߕߊߡߌ߲ ߠߋ߬ ߞߍ߫ ߘߊ߫ ߖߊ߲߬ߖߏ߲ ߢߌ߲߬ ߞߎ߲߬ߝߊ߮ ߘߌ߫߸ ߡߍ߲ ߘߌ߫ ߘߊ߫ ߡߐ߰ ߛߌߦߊߡߊ߲߫ ߡߊ߬، ߓߊߏ߬߸ ߞߏ߲߬ߓߏ ߊߘߡߊ߫ ߖߓߊ߬ߕߍ߫ ߞߊ߬ ߛߌ߬ߢߣߊ߬ ߞߐ߲ߘߐ߲ ߛߐ߬ߘߐ߲߬، ߡߐ߱ ߞߋ߲߬ߥߟߎ ߘߐ߫ ߞߋߟߋ߲߫ ߛߌߣߌ߲ߦߋߟߊ ߡߐ߬ߟߐ߲ ߞߍ߫ ߘߊ߫ ߛߙߋߓߍ߫ ߘߌ߫߸ ߡߍ߲ ߘߌ߫ ߘߊ߫ ߛߏ߬ߙߌ߬ߓߊ ߞߐ߲ߘߍ߫ ߣߌ߫ ߡߊ߬ߡߘߎ ߞߐ߲ߘߍ߫ ߡߊ߬، ߞߵߏ߬ ߟߊ߫ ߝߛߊ߬ߒ߬ߞߏ߬ߡߊ߬ߦߊ ߣߌ߫ ߝߊ߬ߓߘߍ߬ߦߊ ߣߌ߫ ߕߘߍ߬ߒ߬ߘߐ߬ߓߊ߰ߦߊ ߛߙߋߓߍ ߟߎ߫ ߞߊ߲߬߸ ߡߍ߲ ߠߎ߬ ߘߌ߫ ߘߊ߫ ߡߐ߰ ߛߌߦߊߡߊ߲߫ ߠߎ߫ ߡߊ߬.

ߖߊ߲߬ߖߏ߲ ߘߊ߰ߣߍ߲߫ ߥߋ߬ߘߋߥߋ߬ߘߋ ߞߍ߫ ߘߊ߫ ߖߋ߲ߖߋ߲߫ ߕߎߡߊ ߟߋ߬ ߟߊ߫߸ ߞߵߏ߬ ߞߍ߫ ߞߎߟߎ߲ߖߋߟߌ ߣߌ߫ ߛߌߟߊ߫ ߟߊߓߌߟߊ ߘߌ߫.

ߓߐߛߎ߲: ߓߎ߬ߣߊߝߎ߬ ߞߊ߬ߓߊ߸ ߊߓߌߖߊ߲߬