ߞߊ߲ߞߊ߲߫: ߞߊ߬ߡߌߛߊ߬ ߓߘߊ߫ ߛߙߋߓߍ ߘߌ߫ ߡߐ߰ ߂߅߅ ߡߊ߬ߕߟߋ߬ߓߊ߰ߦߊ ߞߊߡߊ߲ ߞߣߐ߫

ߡߐ߰ ߛߌߦߊߡߊ߲߫ ߠߋ߬ ߣߐ߬ ߛߙߋߓߍ ߛߐ߬ߘߐ߲߬ ߠߊ߫߸ ߞߊ߬ߙߊ߲߬ߘߋ߲ ߠߎ߬ ߦߴߊ߬ ߘߐ߫߸ ߞߊ߬ߙߊ߲߬ߠߊ߬ߘߋ߲ ߠߎ߬߸ ߓߊ߯ߙߟߊ ߟߎ߬، ߞߊߙߏ߫ ߦߙߌߞߊ߫ ߟߊ߬ߞߐ߰ߟߌ ߞߐߝߍ߬߸ ߞߊ߬ߡߌߛߊ߬ ߛߍ߬ߙߑߝ߭ߌߛ ߣߐ߬ ߛߙߋߓߍ߫ ߟߕߊߡߌ߲ ߠߋ߬ ߞߍ߫ ߟߊ߫߸ ߞߵߊ߬ ߘߌ߫ ߊ߬ߟߎ߬ ߟߊ߫ ߞߊ߬ߙߌ ߟߏ߯ߟߎߣߊ߲ ߡߊ߬߸ ߞߵߊ߬ ߛߐ߬ߘߐ߲߬ ߊ߬ߟߎ߬ ߛߌߦߊߡߊ߲߫ ߠߊ߫ ߡߐ߱ ߟߎ߬ ߢߊ ߦߋ߫ ߜߍ ߘߐ߫߸ ߊ߬ ߣߌ߫ ߟߊ߬ߞߐ߰ߟߌ߬ ߘߌ߲ߞߌߙߊ ߖߍ߬ߘߍ ߞߏߟߊߕߍ߯ ߛߌߦߊߡߊ߲߫.

ߌߓߙߊߤߌߡߊ߫ ߛߏߙߌ߬ ߓߊߙߌ߫ ߡߍ߲ ߦߋ߫ ߞߊ߬ߡߌߛߊ߬ ߛߌߙߑߝ߭ߌߛ ߝߘߏ߬ߓߊ߬ ߗߋߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߛߙߋߓߍ߫ ߟߕߊߡߌ߲ ߢߌ߲߬ ߞߍߣߴߊ߬ߟߎ߫ ߡߊ߬ ߛߋ߲߬ߕߊ߬ ߞߎߘߊ߫ ߟߋ߬ ߘߌ߫߸ ߊ߬ߟߎ߬ ߟߊ߫ ߓߊ߯ߙߊ ߟߎ߬ ߘߐ߫.

<<ߞߊ߬ߙߊ߲߬ߘߋ߲߫ ߡߐ߰ ߂߅߅ ߖߊ߬ߕߋ߬߸ ߡߍ߲ ߠߎ߬ ߣߐ߬ ߟߊ߬ߞߐ߰ߟߌ ߞߍ߫ ߟߴߊ߲ ߝߍ߬ ߦߊ߲߬، ߏ߬ ߟߋ ߞߏߛߐ߲߬߸ ߊ߲ ߠߊߘߍ߬ߣߍ߲߫ ߓߌ߬߸ ߞߵߊ߬ߟߎ߬ ߟߊ߫ ߟߊ߬ߞߐ߰ߟߌ߬ ߛߙߋߓߍ ߘߏ߲߬ ߊ߬ߟߎ߬ ߓߟߏ߫ ߕߟߋ߬ߓߊ߰ߦߊ ߘߐ߫، ߓߌ߬ ߢߐ߲߰ ߟߏ߲߫߸ ߣߌ߲߬ ߦߴߊ߲ ߠߊ߫ ߡߐ߰ ߟߊߞߐ߯ߣߍ߲ ߠߎ߬ ߞߊ߬ߙߌ߬ߡߊ߬ߘߊ ߟߏ߯ߟߎߣߊ߲ ߠߋ߬ ߘߌ߫.>> ߊ߬ ߞߵߏ߬ ߢߊߝߐ߫.

ߞߊ߬ߡߌߛߊ߬ ߛߍߙߑߝ߭ߌߛ ߡߍ߲ ߦߋ߫ ߕߋ߬߸ ߊ߬ ߛߌ߱ ߛߋ߲߬ߠߊ߫߸ ߏ߬ ߛߊ߲߬ ߟߏ߯ߟߎ ߟߋ߬ ߣߌ߲߬، ߊ߬ߟߎ߬ ߦߋ߫ ߓߊ߯ߙߊ߫ ߛߌߦߊߡߊ߲߫ ߣߌ߫ ߟߊ߬ߞߐ߰ߟߌ ߛߎ߯ߦߊ߫ ߛߌߦߊߡߊ߲߫ ߠߋ߬ ߞߍ߫ ߟߊ߫ ߦߋ߲߬، ߏ߬ ߟߎ߬ ߘߐ߫߸ ߕߟߋ߬ߓߊ߰ߦߊ ߦߴߊ߬ ߘߐ߫߸ ߊ߲߬ߜ߭ߌߟߍ߸ ߞߐ߲߬ߛߏ߬ ߡߞߊߙߊ߲ߧߊ߸ ߞߍ߲ߘߍߦߊ ߣߌ߫ ߟߊ߬ߞߊ߲߬ߘߊ߬ߟߌ߸ ߡߐ߰ߦߊ߬ߞߏ ߟߎ߬ ߡߊߡߊ߬ߙߊ߸ ߊ߬ ߣߌ߫ ߖߊ߬ߕߋ߬ߟߌ، ߊ߬ߟߎ߬ ߟߊ߫ ߓߏ߬ߙߌ߬ߝߋ߲߬ ߠߊ߬ߓߏ߬ߙߌ߬ ߡߞߊߙߊ߲ߧߊ ߡߍ߲ ߏ߬ ߘߌ߫߸ ߡߌ߬ߛߍ߲߬ߡߊ߲߬ߣߍ߲ ߠߎ߬ ߦߴߏ߬ ߟߋ ߘߐ߫߸ ߊ߬ ߣߌ߫ ߘߏ߬ߣߌ߲߬ߓߕߊ߬ߟߊ ߟߎ߬ ߣߌ߫ ߞߊ߲ߓߋ߲ ߠߎ߬ ߣߌ߫ ߔߏߞߑߟߍ߲ ߠߎ߬ ߣߌ߫ ߕߙߏ߬ߞߏ߬ߘߓߊ ߟߎ߬.

ߝߘߏ߬ߓߊ߬ ߗߋߕߌ߮ ߟߊ߫ ߝߐߟߌ߫ ߘߐ߫߸ ߛߊ߲߭ ߺ ߊ ߺ ߛߊ߲߬߸ ߞߊ߬ߡߌߛߊ߬ ߦߋ߫ ߡߐ߰ ߂߀߀ ߤߊ߲߯ ߡߐ߰ ߃߀߀ ߟߋ߬ ߟߊߞߐ߯ ߟߊ߫ ߜߊߟߌߜߊߟߌ߫، ߕߟߋ߬ߓߊ߰ߦߊ ߘߐ߫߸ ߡߐ߰ ߛߌ߫ ߞߊ߬ ߛߊ߲߬ ߁߀ ߛߐ߬ߘߐ߲߬߸ ߏ߬ ߘߌ߫ ߛߋ߫ ߘߏ߲߬ ߠߴߏ߬ ߞߊ߬ߙߊ߲ ߠߊ߫߸ ߣߴߌ ߦߋ߫ ߛߋ߫ ߟߊ߫ ߞߊ߬ߙߊ ߣߌ߫ ߛߓߍߟߌ ߞߍ߫ ߟߊ߫ ߞߊ߬ߣߌ߲߬، ߞߐ߲߬ߛߏ߬ ߡߞߊߙߊ߲ߧߊ ߝߣߊ߫ ߘߊߞߎ߲ ߘߐ߫߸ ߡߐ߰ ߛߌ߫ ߞߊ߬ ߛߊ߲߬ ߁߈ ߛߐ߬ߘߐ߲߬߸ߏ߬ ߓߍ߯ ߘߌ߫ ߛߋ߫ ߡߊߞߊ߬ߙߊ߲߬ߧߊ߬ ߟߴߏ߬ ߟߊ߫.

ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߊ߲ ߧߊ߲ ߞߊ߲ߠߊߘߌ߫ ߟߊ߫ ߘߋ߲ߓߊߕߌ߮ ߟߎ߫ ߡߊ߬߸ ߊ߬ߟߎ߬ ߦߋ߫ ߣߵߊ߬ߟߎ߬ ߘߋ߲ ߠߎ߬ ߕߐ߮ ߛߓߍ߫߸ ߞߵߊ߬ߟߎ߬ ߟߊߞߐ߯، ߓߊߏ߬߸ ߡߐ߱ ߡߍ߲ ߠߎ߬ ߓߊ߯ ߟߊߞߐ߯ ߊ߬ ߢߌ߬ߡߊ ߟߊ߫߸ ߘߎߢߊ߫ ߦߴߏ߬ ߟߎ߫ ߟߋ߬ ߛߊ߬ߥߏ߬ ߘߐ߫.>> ߌߓߙߊߤߌߡߊ߫ ߛߏߙߌ߬ ߓߊߙߌ߫ ߞߵߏ߬ ߞߟߌߟߌ߫ ߞߊ߲ߠߊ ߟߊߛߋ߫ ߘߋ߲ߓߊߕߌ߮ ߟߎ߫ ߡߊ߬. ߊ߬ߟߋ ߟߊ߫ ߖߊ߬ߕߋ߬ ߘߐ߫߸ ߘߎߢߊ߫ ߕߋ߬ߟߋ ߣߌ߲߬ ߘߐ߫߸ ߓߍ߯ ߞߊ߫ ߞߊ߲߫ ߞߊ߬ <<ߊ߲߬ߜ߭ߌߟߍ ߟߐ߲߫߸ ߞߊ߬ ߕߟߋ߬ߓߊ߰ߦߊ ߟߐ߲߫߸ ߞߊ߬ ߛߋ߫ ߓߏ߬ߙߌ߬ߝߋ߲ ߓߏ߬ߙߌ߬ ߟߊ߫.>>

ߡߍ߲ ߠߎ߬ ߣߐ߬ ߛߙߋߓߍ ߛߐ߬ߘߐ߲߬ ߠߊ߫ ߛߋ߲߬ߢߊ ߣߌ߲߬ ߝߍ߬߸ ߏ߬ ߡߐ߱ ߘߏ߫ ߟߋ߬ ߔߌߦߙߍߕ ߎ߲ߞߊߙߌ߫ ߘߌ߫߸ ߏ߬ ߦߋ߫ ߞߊ߬ߙߊ߲߬ߘߋ߲ ߠߋ߬ ߛߌ߫ ߓߐ߬ߙߑߘߏ߬ ߛߍ߲ ߗ߭ߊ߲߭ ߠߊ߫߸ ߦߌߟߡߊ߫ ߁߀߲ ߠߊ߫، ߏ߬ ߡߴߊ߬ ߟߊ߫ ߛߍߥߊ ߘߏ߲߰ ߣߌ߲߬ ߞߏ ߘߐ߫ ߝߋߎ߫.

ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫: <<ߟߊ߬ߞߐ߰ߟߌ ߢߌ߲߬ ߠߋ߬ ߛߊߓߎ߫ ߟߊ߫߸ ߒ ߛߋ߫ ߘߊ߫ ߞߍ߫ ߟߊ߫ ߕߟߋ߬ߓߊ߮ ߘߐߞߏ ߟߎ߫ ߞߊ߬ߟߊߡߊ߬߸ ߞߊ߬ ߛߋ߫ ߛߌߣߌ߲߫ ߢߍߛߌ߯ ߢߌߡߊ߫ ߛߐ߬ߘߐ߲߬ ߠߊ߫ ߘߎߢߊ߫ ߘߐ߫، ߊ߲ ߘߌ߫ ߛߴߊ߲ ߛߋߞߏ ߝߣߊ߫ ߞߍ߫ ߟߴߊ߲ ߠߊ߫ ߖߡߊ߬ߣߊ ߟߊߥߙߎߞߌ ߘߐ߫ ߟߊ߬ߞߐ߰ߟߌ߬ ߞߋߟߋ߲ ߢߌ߲߬ ߠߎ߬ ߛߘߊ߫ ߘߐ߫.>> ߊ߬ ߞߵߏ߬ ߟߊߛߙߋߦߊ߫.

ߊ߬ߟߋ ߛߐ߬ߘߐ߲߬ ߝߊ ߝߣߊ߫ ߕߘߍ߬ ߞߣߍ ߞߊ߲߬ ߦߋ߲߬߸ ߏ߬ ߡߍ߲ ߕߐ߯ ߞߏ߫ ߏߖߌߛߕ ߎ߲ߞߊߙߌ߫߸ ߏ߬ ߝߣߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߛߍߥߊߣߍ߲߫ ߊ߬ ߘߋ߲ߡߛߏ߫ ߟߊ߫ ߛߙߋߓߍ߫ ߛߐߘߐ߲ ߢߌ߲߬ ߠߊ߫ ߞߏߛߓߍ߫.

<<ߊ߬ߟߎ߫ ߣߐ߬ ߡߍ߲ ߺ ߍ ߺ ߡߍ߲߫ ߞߍ߫ ߟߊ߫ ߒ ߘߋ߲ߡߛߏ߫ ߦߋ߫߸ ߊ߬ ߘߌߦߊ߫ ߘߊ߫ ߒ ߧߋ߫ ߞߏߛߓߍ߫، ߊߟߊ߫ ߟߊ߫߸ ߒ ߖߍ߬ߘߍ ߡߴߊ߬ ߟߐ߲߫ ߒ ߘߌ߫ ߡߍ߲ ߝߐ߫، ߒ ߕߴߛߋ߫ ߓߊ߲߫ ߠߴߊ߬ߟߎ߫ ߝߏ߬ ߟߊ߫.>> ߊ߬ ߞߵߏ߬ ߝߐ߫ ߞߣߊ߬ߕߏ߫ ߊ߬ ߟߊ߫ ߟߴߊ߬ ߞߊ߲߬ ߞߏ߫: <<ߒ ߡߊ߫ ߣߡߌߛߊ߫ ߒ ߘߋ߲ ߠߊߣߊ߭ ߘߐ߫߸ ߒ ߘߏ߲߬ ߕߍߣߊ߬ ߣߡߌߛߊ߫ ߟߊ߫߸ ߊߟߊ߫ ߟߊ߫ ߘߌ߬ߢߍ ߞߣߐߡߊ߬.>>