ߞߊ߲ߞߊ߲߫: ߡߐ߰ ߃߉ ߓߘߊ߫ ߓߌ߬ߟߊ߬ ߞߕߌ߫ ߡߊߞߐߣߐ߲߫ ߥߛߎ ߟߊ߫߸ ߞߕߌߞߊ߲ߘߊ ߓߘߴߊ߬ ߦߌ߬ߘߊ߬ ߞߏ߫ ߊ߬ ߕߴߊ߬ ߕߏ߫ ߡߐ߰ ߞߏߙߏ߲ ߠߎ߬ ߘߐ߫ ߡߎ߰ߡߍ߫

ߞߊ߲ߞߊ߲߫ ߞߕߌߘߊ ߓߘߊ߫ ߗߏ ߟߊߥߌ߬ߟߌ߫ ߡߐ߰ ߞߏߙߏ߲ ߠߎ߬ ߞߐ߫߸ ߓߌ߲߬ߘߌߓߊ߲߬ߘߊ ߣߌ߫ ߝߋ߲߫ ߞߎ߲ߒߕߊ߲ ߠߎ߬ ߦߋ߫ ߡߌ߲߬ ߠߊ߫ ߡߍ߲ ߠߎ߬ ߓߟߏ߫ ߞߊ߲ߞߊ߲߫ ߛߏ߫ ߞߣߐߟߊ ߣߴߊ߬ ߟߊߡߌߣߌ߲ ߘߐ߫، ߒ߬ߓߊ߬߸ ߂߀߂߆ ߕߎߟߊߝߌ߲ ߕߟߋ ߃߀ ߡߊ߬߸ ߞߊ߲ߓߍ߲ ߞߕߌߞߊ߲ߘߊ߸ ߌߓߙߊߤߌߡߊ߬ ߝߟߐߡߊ ߞߡߊ߬ߙߊ߫ ߞߵߊ߬ ߦߌ߬ߘߊ߬ ߞߏ߫ ߕߍ߮ ߓߘߊ߫ ߞߍ߫ ߡߐ߰ ߃߉ ߘߐ߫߸ ߏ߬ ߟߎ߬ ߓߘߊ߫ ߛߋ߫ ߞߊ߲ߞߊ߲߫ ߥߛߎߖߌ߲ߓߊ ߟߊ߫ ߕߋ߲߬߸ ߕߍ߮ ߞߍߣߍ߲߫ ߡߍ߲ ߠߎ߬ ߘߐ߫ ߊ߬ߟߋ߬ ߡߐ߰ ߞߏߙߏ߲ ߠߎ߬ ߢߌߣߌ߲߫ ߥߊ ߟߊ߫.

ߛߊ߬ߙߌ߬ߦߊ߬ߓߊ߰ߙߊ߬ߟߊ ߞߊ߲߫ ߞߏ߫ ߊ߬ߟߎ߬ ߡߊ߫ ߥߊ߫ ߡߌ߬ߣߊ߬ߟߌ ߞߍ߫ ߦߋ߲߬ ߕߋ߲߬ ߘߋ߬، ߞߏ߫ ߛߐ߰ ߞߍ߫ ߘߴߊ߬ߟߎ߫ ߛߏ߬ߓߌ߬ߟߊ߬ߞߎߣߎ߲ ߠߋ߬ ߡߊ߬ ߡߎߣߎ߲߬߸ ߞߊ߬ ߞߎߡߴߊ߬ߟߎ߬ ߦߋ߫ ߞߵߊ߬ߟߎ߬ ߟߊߟߌ߫، ߥߟߌ߬ ߞߍ߫ ߘߊ߫ ߞߊ߬ ߥߴߊ߬ߟߎ߫ ߛߐ߬ߘߐ߲߬ ߡߌߟߏ ߛߍ߲ߓߊ ߞߘߐ߫߸ ߊ߬ߟߋ߬ ߘߋ߲ߡߌߛߍ߲߫ ߛߙߊߓߊ߫ ߡߌ߲ߠߊ ߞߊ߫ ߛߌߦߊ߫ ߦߋ߲߬ ߡߍ߲ ߘߐ߫.

ߞߕߌߞߊ߲ߘߊ ߞߵߊ߬ ߢߊߝߐ߫ ߞߏ߫: <<ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߏ߬ ߓߍ߯ ߣߴߊ߬ ߕߊ߫߸ ߊ߲ ߞߵߊ߬ ߦߋ߫ ߞߏ߫ ߊ߬ߟߋ߬ ߡߐ߱ ߟߎ߬ ߡߊ߫ ߞߎߡߊ ߏ߬ ߡߍ߲߫߸ ߊ߬ߟߎ߬ ߡߴߊ߬ ߘߊߓߌ߬ߟߊ߬، ߊ߬ߟߎ߬ ߦߋ߫ ߥߊ߫ ߟߊ߫ ߦߋ߲߬ ߡߎߣߎ߲߬߸ ߞߊ߬ ߥߊ߫ ߓߌ߲߬ߘߌߓߊ߲߬ߘߊ ߡߌ߲߬.>>

ߒ߬ߓߊ߬߸ ߞߕߌߞߊ߲ߘߊ ߢߌ߲߬ ߣߊ߭ ߞߊ߲ߞߊ߲߫ ߞߊ߬ ߓߊ߯ߙߊ ߘߊߡߌ߬ߣߊ߬߸ ߊ߬ ߣߌ߫ ߞߊ߲ߞߊ߲߫ ߕߐ߲߫ ߓߟߏߡߊ ߟߎ߫ ߟߋ߬ ߛߐ߰ ߘߊ߫ ߞߎߡߊߢߐ߲߯ߦߊ ߡߊ߬ ߡߎߣߎ߲߬، ߊ߬ ߣߌ߫ ߞߊ߲ߞߊ߲߫ ߕߌ߲߬ߞߎߘߎ߲ ߞߟߍ߬ߡߐ߰ߘߊ ߡߙߊ߬ߓߊ߮߸ ߊ߬ ߣߌ߫ ߕߌ߲߬ߞߎߘߎ߲ ߕߐ߲ߓߟߏߡߟߊ߫ ߝߘߏ߬ߓߊ߬ ߗߋߕߌ߮، ߛߴߊ߬ߟߎ߬ ߘߌ߫ ߓߍ߲߬ ߝߊ߲߬ߝߘߊ߫ ߡߊ߬߸ ߕߍ߮ ߘߌ߫ ߞߍ߫ ߡߐ߰ ߞߏߙߏ߲ ߠߎ߬ ߘߐ߫ ߛߌߟߊ ߡߍ߲ ߝߍ߬.

<<ߒ ߧߋ߫ ߞߎߡߊ߫ ߟߴߊߟߎ߫ ߦߋ߫ ߦߙߐ ߡߍ߲ ߘߐ߫ ߕߋ߲߬߸ ߊ߬ߟߋ߬ ߡߌ߬ߣߊ߬ߟߌ ߛߌߟߊ߫ ߞߋߟߋ߲ ߝߍ߬߸ ߡߐ߰ ߃߉ ߓߘߊ߫ ߡߌ߬ߣߊ߬߸ ߊ߬ߟߎ߬ ߓߘߊ߫ ߓߌ߬ߟߊ߬ ߞߕߌ߫ ߡߊߞߐߣߐ߲߫ ߥߛߎ ߟߊ߫߸ ߞߕߌ߫ ߓߊ߯ߙߊ ߝߣߊ߫ ߓߘߊ߫ ߛߌ߰ ߛߋ߲߬ߠߊ߫.>> ߞߕߌߞߊ߲ߘߊ ߞߵߏ߬ ߟߊߛߋ߫.

ߌߓߙߊߤߌߡߊ߬ ߁߭ ߞߡߊ߬ߙߊ߬ ߟߊ߫ ߝߐߟߌ߫ ߘߐ߫߸ ߊ߬ߟߎ߬ ߟߊ߫ ߝߊ߲߬ߝߘߊ ߏ߬ ߟߋ ߞߍߕߐ߫ ߊ߬ ߞߍ߫ ߟߊ߫߸ ߡߍ߲ ߠߎ߬ ߦߋ߫ ߓߌ߲߬ߘߌߓߊ߲߬ߘߊ ߡߌ߲߬ ߠߊ߫ ߓߊ߬߸ ߡߍ߲ ߠߎ߬ ߦߴߊ߬ ߡߊߘߏ߬ߣߌ߲߬ ߠߊ߫ ߓߊ߬߸ ߡߍ߲ ߠߎ߬ ߦߴߊ߬ ߝߙߋ߬ ߟߊ߫߸ ߏ߬ ߟߎ߬ ߘߌ߫ ߟߐ߲߫ ߞߵߊ߬ߟߎ߫ ߡߌ߬ߣߊ߬.

<<ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߊ߬ߟߎ߬ ߓߘߊ߫ ߢߊߢߌߣߌ߲ߠߌ߲߫ ߛߌ߰ ߛߋ߲߬ߠߊ߫߸ ߓߌ߲߬ߘߌߓߊ߲߬ߘߊ ߦߋ߫ ߡߌ߲߬ ߠߊ߫ ߦߙߐ ߡߍ߲ ߠߎ߬ ߘߐ߫ ߞߊ߲ߞߊ߲߫ ߛߏ ߞߣߐ߫ ߓߊ߬߸ ߊ߬ ߣߴߊ߬ ߟߊ߫ ߡߙߊ߬ߘߊ߬ߙߋ߲ ߠߎ߬߸ ߞߵߏ߬ ߟߎ߬ ߓߍ߯ ߟߐ߲߫.

ߞߕߌߞߊ߲ߘߊ ߞߵߊ߬ ߞߊ߲ߠߊߘߌ߫ ߛߏ߫ ߞߣߐ߫ ߡߐ߮ ߟߎ߫ ߡߊ߬߸ ߞߏ߫ ߊ߬ߟߎ߬ ߦߴߊ߬ߟߎ߫ ߟߐ߬ ߊ߬ߟߎ߫ ߟߐ߬ ߦߌߟߊ، <<ߣߌ߫ ߡߍ߲ ߞߵߊ߬ ߟߐ߲߫ ߞߏ߫ ߊ߬ ߘߋ߲ ߦߋ߫ ߓߌ߲߬ߘߌߓߊ߲߬ߘߊ ߡߌ߲߬ ߠߊ߫߸ ߊ߬ ߘߋ߲ ߦߋ߫ ߛߐ߬ߘߐ߲߬ ߠߊ߫ ߡߙߊ߬ߒ߬ߡߊ߬ߟߌ ߘߐ߫ ߡߙߊ߬ߒ߬ߡߊ߬ߝߋ߲ ߠߊ߫߸ ߊ߬ ߥߊ߯ߕߌ߫ ߘߎߡߊ߲ ߠߋ߬ ߕߋ߲߬߸ ߞߵߏ߬ ߟߎ߬ ߟߊߟߌ߫ ߊ߬ߟߎ߬ ߦߴߊ߬ ߟߊߟߐ߬.>>

ߛߊ߬ߙߌ߬ߦߊ߬ߓߊ߰ߙߊ߬ߟߊ ߟߊ߫ ߝߐߟߌ߫ ߘߐ߫߸ ߊ߬ߟߎ߬ ߦߋ߫ ߡߐ߰ ߞߏߙߏ߲ ߢߌ߲߬ ߠߎ߫ ߞߍ߬ߟߍ ߟߊߥߟߌ߬ ߟߊ߫ ߡߐ߱ ߟߎ߬ ߣߴߊ߬ߟߎ߬ ߓߟߏߝߋ߲ ߠߎ߬ ߟߊߞߊ߲ߘߊ ߟߋ߬ ߡߊ߬߸ ߏ߬ ߡߍ߲ ߤߊߡߌ߲ ߦߴߊ߬ߟߎ߬ ߟߊ߫ ߞߏ ߓߍ߯ ߘߌ߫ ߕߋ߲߬.

ߊ߬ ߞߵߊ߬ ߦߌ߬ߘߊ߬ ߞߏ߫ <<ߊ߲ ߣߊ߬ߣߍ߲߫ ߏ߬ ߟߋ ߞߊ߲ߡߊ߬ ߞߊ߲ߞߊ߲߫߸ ߞߏ߫ ߛߎ߮ ߡߍ߲ ߠߎ߬ ߦߋ߫ ߣߌ߲߬߸ ߊ߲ ߘߏ߲߬ ߘߴߊ߲ ߛߋߞߏ ߞߍ߫.>> ߊ߬ ߞߵߏ߬ ߕߡߊ߬ߖߌ ߓߐ߫ ߖߊ߬ߡߊ ߘߐ߫.