ߊߟߎ߫ ߦߋ߫ ߖߌ߬ߣߍ߬ ߟߊ߫ ߒ ߕߍ߫ ߜߊߘߌߜߊߘߌ ߘߝߐ߬ߣߍ߲߬ ߠߊߡߍ߲߫ ߦߊ߲߬ ߓߊ߫
ߖߌ߬ߣߍ߫ ߟߋ߬ ߞߍ߫ ߘߊ߫ ߝߊ߬ߙߊ߲߬ߛߌ߬ ߟߊ߫ ߕߟߋ߬ߓߋ߬ ߊߝߙߌߞߌ߬ ߖߡߊ߬ߣߊ߬ ߝߟߐߝߟߐ ߘߌ߫߸ ߡߍ߲ ߞߵߊ߬ ߘߍ߲߫ ߊ߬ ߖߘߍ߬ ߟߊ߫߸ <<ߞߊ߯ߙߌ>> ߛߎߥߊ߲ߘߌߣߍ߲ ߞߐ߫ ߊ߬ߟߎ߬ ߓߟߏ߫ ߕߎߟߊߝߌ߲ ߕߋ߬ߟߋ߫ ߂߈ ߞߊ߲ߘߟߌ ߝߍ߬߸ ߏ߬ ߡߍ߲ ߞߏ ߟߎ߬ ߛߌ߰ ߘߊ߫ ߛߋ߲߬ߠߊ߫ ߞߟߍ߬ߕߌ߰ ߘߋߜ߭ߏߟ ߓߟߏ߫߸ ߞߵߊ߬ ߓߍ߲߬ ߝߊ߬ߙߊ߲߬ߛߌ߬ ߣߌ߫ ߊߝߙߌߞߌ߬ ߟߊ߫ ߓߊ߯ߙߊߢߐ߲߯ߦߊ ߡߊ߬. ߞߊ߬ ߞߐ߲߰ ߢߣߊߕߊߟߌ ߢߍ߫߸ ߘߋߜ߭ߏߟ ߞߊ߬ ߕߊ߯ߡߊ ߘߏ߫ ߟߎ߫ ߟߋ߬ ߞߍ߫ ߝߘߊ߬ߝߌ߲߬ߠߊ߫ ߞߣߐ߫ ߡߎߣߎ߲߬߸ ߡߐ߱ ߟߎ߬ ߟߊߛߐ߲߬ ߞߊ߲ߡߊ߬߸ ߞߵߊ߬ ߡߙߌߘߐ ߡߊߞߊ߲ߞߊ߲߫߸ ߛߊ߫ ߓߍ߯ ߘߌ߫ ߛߐ߲߬ ߝߊ߬ߙߊ߲߬ߛߌ߬ ߟߊ߫ ߕߋߙߌߦߊ ߡߊ߬.
ߊߟߌߖ߭ߋߙߌ߫ ߜߟߍ߬ߦߊ ߟߋ߬ ߝߍ߬߸ ߞߟߍ߬ߕߌ߯ ߘߋߜ߭ߏߟ ߣߊ߬ ߘߊ߫ ߞߊ߲ߕߌ߯ߦߊ ߟߊ߫ ߁߉߅߈ ߘߓߊ߬ߕߊ ߕߟߋ߬ ߁߃ ߡߊ߬، ߊ߬ߟߋ ߣߊ߬ߣߍ߲ ߖߡߊ߬ߣߊ ߞߎ߲߬ߠߊ߫߸ ߊ߬ ߞߊ߬ ߞߏߘߐߦߟߍߡߊ߲߫ ߛߌߦߊߡߊ߲߫ ߛߌ߰ ߛߋ߲߬ߠߊ߫߸ ߦߏ߫ ߞߊ߬ ߛߌ߰ߞߊ߲ ߡߊߦߟߍ߬ߡߊ߲߬߸ ߞߊ߬ ߝߘߊ߬ߝߌ߲߬ ߖߡߊߣߊ ߟߎ߬ ߞߊ߲ߠߊߓߌ߬ߟߊ߬ ߞߏ ߛߌ߰ ߛߋ߲߬ߠߊ߫ ߡߙߌߦߊ߫ ߝߛߐߞߐߙߌ ߘߏ߫ ߞߘߐ߫ ߕߋ߲߬߸ ߞߏ߫ ߛߴߊ߬ ߘߌ߫ ߝߘߊ߬ߝߌ߲߬ ߖߡߊߣߊ߫ ߖߘߍ߬ߕߌ߮ ߏ߬ ߟߎ߬ ߟߊߘߍ߬ ߞߵߏ߬ ߞߍ߫ ߞߙߎߓߊ߫ ߞߋߟߋ߲߫ ߘߌ߫ ߊ߬ߟߎ߬ ߡߙߌߦߊ ߟߎ߬ ߓߟߏߦߊ߫ ߞߊ߲ߡߊ߬، ߊ߬ ߡߙߌߦߊ ߏ߬ ߘߏ߲߬ ߞߊ߬ ߛߌߟߊ߫ ߛߐ߬ߘߐ߲߬ ߦߙߐ߫ ߛߌߦߊߡߊ߲߫ ߘߐ߫، ߏ߬ ߞߍߢߊ ߘߐ߫߸ ߊ߬ ߞߊ߬ ߞߊ߲ߘߟߌ ߟߋ߬ ߛߌ߲߬ߝߏ߲߬ߧߊ߫ ߁߉߅߈ ߕߎߟߊߝߌ߲ ߠߊ߫߸ ߝߊ߬ߙߊ߲߬ߛߌ߬ ߞߣߐ߫߸ ߊ߬ ߣߌ߫ ߖߐ߲߬ ߖߡߊߣߊ ߟߎ߬ ߝߣߊ߫ ߞߣߐ߫، ߞߵߊ߬ ߟߊߥߟߌ߬ ߊ߬ ߡߙߌߦߊ ߟߊ߫ ߛߎߘߊ߲ ߡߊ߬߸ ߊ߬ ߞߊ߬ ߕߊ߯ߡߊ߫ ߓߊ߲ߓߊߟߌ ߟߎ߫ ߛߌ߰ ߛߋ߲߬ߠߊ߫ ߝߘߊ߬ߝߌ߲߬ ߖߡߊߣߊ ߟߎ߬ ߞߣߐ߫߸ ߞߊ߬ ߓߐ߫ ߊߟߑߖ߭ߍߙ߸ ߞߊ߬ ߣߊ߬ ߘߊ߬ߞߊ߯ߙߎ߫߸ ߞߊ߬ ߣߊ߬ ߞߐߣߊߞߙߌ߫.
ߘߓߊ߬ߓߌߟߊ ߕߋ߬ߟߋ߫ ߂߄ ߠߋ߬ ߡߊ߬߸ ߊ߬ ߘߏ߲߬ ߘߊ߫ ߞߏ߲߬ߞߏ߫ ߓߙߊߖ߭ߊߝ߭ߌߟ߸ ߊ߬ ߞߵߊ߬ ߝߐ߫ ߦߋ߲߬ ߠߋ߬߸ ߞߏ߫ ߕߐ߲߫ ߞߎߘߊ ߞߍߕߐ߫ ߞߊ߬ߝߏ ߟߎ߬ ߟߊ߫ ߣߝߊ߬ߢߐ߲߰ߦߊ ߟߋ߬ ߘߌ߫، ߥߙߎߣߍ߫ ߖߡߊߣߊ ߓߍ߯ ߞߊ߲ߠߊߓߌ߬ߟߊ߬ߣߍ߲߫ ߢߣߊߕߊߟߌ ߘߐ߫߸ ߤߊ߯ߟߌ ߥߟߊ߫ ߞߊ߯ߙߌ ߟߊ߫، ߡߍ߲ ߓߊ߯ ߞߊ߯ߙߌ ߕߊ߬߸ ߏ߬ ߘߌ߫ ߞߍ߫ ߘߍߒߖߘߍߟߊ ߣߌ߫ ߖߘߍ߬ߕߌ߮ ߘߌ߫، ߓߊ߬ߙߌ߬߸ ߝߊ߬ߙߊ߲߬ߛߌ߫ ߣߍ߬ ߛߌ߫ ߕߴߏ߬ ߟߊ߫ ߞߏ߫ ߘߐ߫ ߡߎ߬ߕߎ߲߬، ߏ߬ ߟߊ߫ ߞߏ ߓߍ߯ ߘߌ߫ ߕߏ߫ ߊ߬ ߖߘߍ߬ ߓߟߏ߫߸ ߊ߬ ߟߊ߫ ߛߐ߬ߘߐ߲ ߞߏߢߊ ߟߎ߬ ߓߊ߬߸ ߓߘߍ߬ߓߘߍ߬ߟߌ ߞߏߢߊ ߟߎ߬ ߓߊ߬߸ ߊ߬ ߣߌ߫ ߕߋߟߋ߲ߓߊ߯ߦߊ ߣߌ߫ ߣߊ߲߬ߝߟߏ߬ߞߏ ߓߍ߯ ߟߊߘߍ߬ߣߍ߲ ߞߐߘߍ߫.
ߞߏ߫ ߣߌ߫ ߡߍ߲ ߘߏ߲߬ ߞߊ߬ ߤߊ߯ߟߌ ߕߊ߬߸ ߏ߬ ߞߘߐ ߟߋ߬ ߞߏ߫ ߊ߬ ߓߘߊ߫ ߛߐ߲߬ ߊ߬ ߣߌ߫ ߝߊ߬ߙߊ߲߬ߛߌ߬ ߟߊ߫ ߕߋߙߌߦߊ ߡߊ߬، ߏ߬ ߘߐ߫߸ ߏ߬ ߓߘߊ߫ ߞߊ߬ߣߌ߲߬ߢߐ߲߰ߦߊ ߣߌ߫ ߕߋߙߌߦߊ ߖߎ߬ߟߎ ߛߌ߬ߘߌ߫ ߝߊ߬ߙߊ߲߬ߛߌ߬ ߞߊ߲ߠߊ߫، ߖߡߊ߬ߣߊ ߏ߬ ߡߌ߬ߙߌ߲߬ߘߌ ߣߌ߫ ߝߊ߬ߙߊ߲߬ߛߌ߫ ߡߌ߬ߙߌ߲߬ߘߌ ߘߌ߫ ߘߏ߲߬ ߟߊ߬ߕߍ߮ ߞߎߟߎ߲߫ ߞߋߟߋ߲߫ ߞߣߐ߫ ߏ߬ ߘߐ߫ ߞߊ߬ ߛߌߣߌ߲߫ ߡߊߜߍ߲߫߸ ߥߙߎߞߌ ߘߌ߫ ߞߍ߫ ߢߐ߲߮ ߝߍ߬ ߓߍ߲߭ ߣߌ߫ ߞߋ߬ߟߋ߲߬ߧߊ ߘߐ߫ ߕߡߍߢߍ߫.
ߘߓߊ߬ߓߌߟߊ ߕߋ߬ߟߋ߫ ߂߈ ߡߊ߬߸ ߞߟߍ߬ߕߌ߰ ߘߋߜ߭ߏߟ ߘߏ߲߬ ߘߊ߫ ߞߐߣߊߞߙߌ߫߸ ߞߵߊ߬ ߛߐ߬ߘߐ߲߬ ߖߌ߬ߣߍ߬ ߞߏ߫ ߕߴߦߋ߲߬ ߡߎߣߎ߲߬، ߊ߬ ߟߊߓߍ߲߬ ߘߊ߫ ߞߊ߲ߕߌ߯ ߛߋߞߎ߫ ߕߎ߬ߙߋ߬ ߓߟߏ߫ ߓߏ߲߬ߧߊ ߣߌ߫ ߜߟߌߦߊ ߞߣߐ߫، ߞߵߊ߬ ߛߐ߬ߘߐ߲߬ ߊ߬ ߛߌ߭ ߦߋ߫ ߛߊ߲߬ ߃߆ ߘߐ߫߸ ߘߙߎ߬ߞߌ߬ߓߊ߬ ߜߍ ߦߴߊ߬ ߞߊ߲ߠߊ߫߸ ߝߘߊ߬ߝߌ߲߬ߧߊ ߞߊ߬ߣߌ߲ ߦߴߊ߬ ߢߊߘߎ߮ ߘߐ߫، ߞߵߊ߬ ߛߐ߬ߘߐ߲߬ ߊ߬ ߛߌ߬ߛߌ߬ߣߍ߲߫ ߞߟߍ߬ߕߌ߮ ߞߊ߲ߡߊ߬߸ ߏ߬ ߡߍ߲ ߛߌ߭ ߕߎ߲߬ ߦߋ߫ ߛߊ߲߬ ߆߇ ߘߐ߫، ߊ߬ ߞߵߊ߬ ߝߐ߫ ߞߟߍ߬ߕߌ߮ ߦߋ߫ ߏ߬ ߛߋ߲߬ߢߊ ߟߋ߬ ߝߍ߬߸ ߞߏ߫ <<ߊ߲ ߕߴߊ߲ ߖߘߍ߬ ߟߐ߲߫ ߤߙߐ߫ ߘߌ߫߸ ߝߊ߬ߣߌ߫ ߝߘߊ߬ߝߌ߲߬ ߖߡߊ߬ߣߊ߬ ߞߋߟߋ߲߫ ߦߋ߫ ߖߐ߲߬ߧߊ߬ ߖߟߎ ߘߐ߫.>> ߊ߬ ߞߵߊ߬ ߝߐ߫ ߦߋ߲߬ ߠߋ߬ ߝߣߊ߫߸ ߞߏ߫ <<ߊ߲ ߧߋ߫ ߞߊ߲ߠߊߓߌߟߊ ߝߍ߬ ߓߟߏߞߏߟߏ߲ߧߊ ߘߐ߫߸ ߞߊ߬ ߕߊ߬ߡߌ߲߬ ߝߋ߲ߕߌ߯ߦߊ ߞߊ߲߬ ߖߐ߲߬ߧߊ ߘߐ߫.>>
ߒ ߕߍ߫ ߜߊߘߌ ߝߐ߫ ߟߏ߲ ߛߋߞߎ߬ ߓߟߏ߫ ߘߓߊ߬ߓߌߟߊ ߕߋ߬ߟߋ߫ ߂߈ ߡߊ߬ ߞߐߣߊߞߙߌ߫ ߝߊ߬ߙߊ߲߬ߛߌ߬ ߟߊ߫ ߘߐ߬ߛߌ߬ߟߊ߲߬ߠߌ߲ ߣߴߊ߬ ߟߊ߫ ߡߊ߬ߓߊ߰ߓߊ߰ߟߌ ߡߊ߫ ߛߋߞߎ߬ ߣߴߊ߬ ߟߊ߫ ߡߐ߱ ߟߎ߬ ߢߊߛߌ ߟߋ߬ ߡߞߊߘߌ߫߸ ߞߎߡߊߕߍ߫ ߞߵߊ߬ߟߎ߫ ߖߎ߬ߛߎ ߓߐ߫، ߓߊߏ߬߸ ߛߋߞߎ߬ ߕߎ߬ߙߋ߫ ߢߐ߲߰ ߘߋ߲ߡߌߛߍ߲߫ ߥߣߍ߬ߡߊ߫ ߕߎ߲߬ ߕߴߦߋ߲߬ ߕߎ߬ߡߊ ߏ߬ ߟߊ߫߸ ߡߍ߲ ߟߊߣߴߊ߬ ߢߌߣߌ߲ߞߏ ߟߊ߫߸ ߡߍ߲ ߦߋ߫ ߝߘߊ߬ߝߌ߲߬ߠߊ߬ ߟߊ߫ ߞߊ߲ߠߊߓߌߟߊ ߣߌ߫ ߞߛߌ߬ߞߛߊ߬ߒ߬ߕߊ߲߬ߧߊ ߝߍ߬߸ ߊ߬ ߣߌ߫ ߥߙߎߣߍߦߊߟߌ ߞߍ߬ߟߍ ߝߍ߬߸ ߞߵߏ߬ ߟߊ߫ ߝߘߊ߬ߝߌ߲߬ߟߊ߲߬ߘߌ߬ߦߊ ߞߊ߲߬، ߊ߬ ߢߐ߲߰ ߕߎ߲߬ ߕߴߦߋ߲߬ ߝߋߎ߫، ߊ߬ ߞߵߊ߬ ߝߐ߫ ߘߋߜ߭ߏߟ ߦߋ߫ ߜߍ ߘߐ߫ ߥߛߊߞߙߊ߫߸ ߞߏ߫: <<ߊ߲ ߧߋ߫ ߞߊ߲ߠߊߓߌߟߊ ߝߍ߬ ߓߟߏߞߏߟߏ߲ߧߊ ߘߐ߫߸ ߞߊ߬ ߕߊ߬ߡߌ߲߬ ߝߋ߲ߕߌ߯ߦߊ ߞߊ߲߬ ߖߐ߲߬ߧߊ ߘߐ߫.>> ߊ߬ ߟߊ߫ ߞߎߡߊߣߍ߲߫ ߢߊ߬ߡߊ߲߬ߕߐ ߣߌ߲߬ ߕߍߣߊ߬ ߕߎߣߎ߲߫ ߠߊ߫ ߏ߬ ߞߐ߫ ߝߏ߫ ߞߊ߬ ߘߎߢߊ߫ ߓߊ߲߫، ߊ߬ ߞߎߡߊ ߟߎ߬ ߦߋ߫ ߝߌߙߌ߲ߝߌߙߌ߲߫ ߠߊ߫ ߡߐ߱ ߟߎ߬ ߓߟߏ߫ ߞߏߛߓߍ߫.
ߞߟߍ߬ߕߌ߮ ߞߵߊ߬ ߖߋ߬ߓߌ߫ ߟߋ߬߸ ߞߏ߫: <<ߒ ߓߘߊ߫ ߘߍߒߖߘߍߟߦߊ ߞߏߝߐ߫ ߞߊ߲ ߡߍ߲߫ ߞߎߡߊ ߘߐ߫߸ ߒ ߞߊ߲ ߡߊߦߟߍ߬ߣߍ߲ ߠߵߊ߬ ߝߐ߫ ߟߊ߫ ߦߊ߲߬ ߞߊ߬ ߕߊ߬ߡߌ߲߬ ߝߊ߲߭ ߓߍ߯ ߟߊ߫߸ ߘߍߒߖߘߍߟߦߊ ߟߊߓߌ߬ߟߊ߬ߣߍ߲߫ ߖߌ߬ߣߍ߬ ߦߋ߫ ߝߛߊߦߌ߫، ߊ߬ ߟߐ߬ߣߴߊ߬ ߢߣߊߕߊ߬ ߟߊ߫ ߡߍ߲ ߘߐ߫߸ ߊ߬ ߘߌ߫ ߛߋ߫ <<ߞߊ߯ߙߌ>> ߕߊ߬ ߟߴߏ߬ ߘߐ߫ ߝߋߝߋ߫، ߒ ߘߌ߫ ߒ ߞߎߡߊ߫ ߞߊ߲ ߘߌ߫ ߦߊ߲߬ ߞߵߊ߬ ߝߐ߫ ߞߏ߫ ߝߊ߬ߙߊ߲߬ߛߌ߬ ߕߍ߫ ߖߎ߯ߡߊ߲߫ ߛߌ߫ ߓߌ߬ߟߴߊߟߎ߫ ߛߋ߲߬ߞߘߐ߫߸ ߓߊ߬ߙߵߊߟߎ߫ ߘߴߊ߬ ߞߐߝߟߌ ߡߊߜߙߏ߬، ߊߟߎ߫ ߟߊ߫ ߖߡߊ߬ߣߊ߸ ߣߴߊ߬ ߞߵߊ߬ ߝߐ߫ ߞߏ߫ <<ߞߊ߯ߙߌ߫>> ߊ߬ ߟߊ߫ ߞߏ ߘߌ߫ ߕߏ߫ ߊ߬ ߖߘߍ߬ ߓߟߏ߫߸ ߛߌߟߊ ߡߍ߲ ߓߴߊ߬ ߘߌߦߊ߫߸ ߊ߬ ߦߴߊ߬ ߖߘߍ߬ ߓߟߴߏ߬ ߞߊ߲߬، ߞߍߢߊ ߡߍ߲ ߝߣߊ߫ ߓߴߊ߬ ߤߣߍ߫߸ ߊ߬ ߦߴߊ߬ ߖߘߍ߬ ߦߋ߫ ߏ߬ ߘߐ߫، ߝߊ߬ߙߊ߲߬ߛߌ߬ ߕߴߊ߬ ߟߢߊߙߊ߲߫ ߝߊ߲߭ ߺ ߊ ߺ ߝߊ߲߬߸ ߊ߬ ߞߏ߬ߣߌ߲ ߘߴߊ߬ ߞߐߝߟߌ ߡߊߜߏ߬ߙߏ߫ ߟߋ߬ ߘߍ߯>>
ߘߋߜ߭ߏߟ ߟߊߓߍ߲߬ ߟߏ߲ ߖߌ߬ߣߍ߬ ߞߣߐ߫ ߘߓߊ߬ߓߌߟߊ ߕߋ߬ߟߋ߫ ߂߇ ߡߊ߬
ߛߙߋ ߘߏ߫ ߟߎ߫ ߕߊ߫ ߝߐߟߌ߫ ߘߐ߫߸ ߞߏ߫ ߘߋߜ߭ߏߟ ߞߵߊ߬ ߝߐ߫ ߟߋ߬ ߝߣߊ߫ ߞߵߊ߬ ߟߊߕߍ߰߸ ߞߏ߫: <<ߝߊ߬ߙߊ߲߬ߛߌ߫ ߡߊ߬ߞߏ߬ ߛߌ߫ ߕߍ߫ ߖߌ߬ߣߍ߬ ߟߊ߫߸ ߊ߬ ߦߴߊ߬ ߘߍ߲߫ ߊ߬ ߖߘߍ߬ ߟߊ߫ ߝߛߊߦߌ߫، ߊ߲ ߕߍ߫ ߝߏߦߌ߬ ߢߌߣߌ߲߫ ߠߊ߫ ߦߊ߲߬ ߡߎ߬ߕߎ߲߬، ߕߎߟߊߝߌ߲ ߕߋ߬ߟߋ߫ ߂߉ ߡߊ߬߸ ߝߊ߬ߙߊ߲߬ߛߌ߬ ߘߴߊ߬ ߘߏ߬ߣߌ߲ ߠߊߛߘߌ߬.>> ߝߊ߬ߙߊ߲߬ߛߌ߬ ߞߊ߲ߕߌ߮ ߞߵߊ߬ ߓߊ߲߬ ߞߵߊ߬ ߞߣߐߘߐߜߏߦߊ߫ ߢߍߥߟߊ ߕߐ߭ ߓߍ߯ ߘߐ߫ ߞߐߘߍ߫، ߞߏ߫ ߊ߬ ߣߌ߫ ߛߋߞߎ߬ ߕߍ߫ ߘߊߥߎ߲ߠߌ߲߫ ߞߍ߫ ߏ߬ ߞߐ߫߸ ߦߏ߫ ߊ߬ ߕߎ߲߬ ߝߐ߫ ߘߊ߫ ߢߊ ߡߍ߲، ߘߋߜ߭ߏߟ ߓߐ߫ ߘߊ߫ ߛߊ߲ߖߌ߫ ߓߐߙߐ߲ߘߐ ߟߋ߬ ߞߘߐ߫ ߣߌ߲߬ ߟߏ߲ ߞߊ߬ ߕߊ߯.
ߞߊߙߏ߫ ߞߋߟߋ߲߫ ߏ߬ ߞߐߝߍ߬߸ ߕߎߟߊߝߌ߲ ߕߋ߬ߟߋ߫ ߂߈߸ ߛߌ߰ߞߊ߲ ߞߊ߲ߘߟߌ ߞߍ߫ ߘߊ߫ ߝߘߊ߬ߝߌ߲߬ߠߊ߫ ߝߊ߲߭ ߓߍ߯ ߘߐ߫ ߞߐߘߍ߫، ߊ߬ߟߎ߬ ߓߍ߯ ߞߊ߬ ߤߊ߯ߟߌ ߟߋ߬ ߕߊ߬߸ ߝߏ߫ ߖߌ߬ߣߍ߬ ߞߊ߲ߓߍ߲ ߞߋߟߋ߲߫، ߖߌ߬ߣߍ߬ߞߊ߫ %߉߅،߂ ߟߋ߬ ߞߊ߬ ߞߊ߯ߙߌ ߛߎߥߊ߲ߘߌ߫، ߞߵߊ߬ ߛߐ߬ߘߐ߲߬ ߖߡߊ߬ߣߊ߬ ߜߘߍ ߟߎ߬ ߞߣߐ߫߸ ߤߊ߯ߟߌ ߟߋ߬ ߛߎߘߊ߲߫ ߘߊ߫ ߦߋ߲߬ %߉߀ ߛߊ߲ߘߐ߫߸ ߝߏ߫ ߡߘߊߜ߭ߊߛߑߞߊߙ (%߇߇)߸ ߖߌߓߎߕߌ߫ (%߇߅)߸ ߖߋ߬ߟߌ߬ߓߊ߬ߘߎ߯ (%߇߈).
<<ߞߊ߯ߙߌ>> ߛߎߥߊ߲ߘߌ ߡߍ߲ ߞߍ߫ ߘߊ߫ ߖߌ߬ߣߍ߬ ߓߟߏ߫߸ ߊ߬ߟߎ߫ ߞߵߊ߬ߟߎ߬ ߟߊ߫ ߤߙߐߦߊ ߕߊ߬ ߁߉߅߈ ߞߏ߲ߓߌߕߌ߮ ߕߋ߬ߟߋ߫ ߂ ߡߊ߬، ߓߊ߬ߙߌ߬߸ ߞߐߝߟߌ ߟߎ߬ ߦߋ ߘߊߡߌ߬ߣߊ߬ ߘߊ߫ ߌߞߘߐ߫، ߓߊߏ߬߸ ߝߊ߬ߙߊ߲߬ߛߌ߫ ߞߵߊ߬ ߓߊ߲߬ ߖߌ߬ߣߍ߬ ߘߐ߫ ߌߞߘߐߞߘߐ߫، <<ߕߎߟߊߝߌ߲ ߕߋ߬ߟߋ߫ ߂߉ ߡߊ߬߸ ߝߊ߬ߙߊ߲߬ߛߌ߫ ߞߎ߲߬ߠߊ߬ߛߌ߰ߟߊ ߞߵߊ߬ ߝߐ߫ ߛߋߞߎ߬ ߕߎ߬ߙߋ߬ ߦߋ߫߸ ߞߏ߫ ߕߎߟߊߝߌ߲ ߕߟߋ߬ ߃߀ ߟߋ ߞߍߕߐ߫ ߝߊ߬ߙߊ߲߬ߛߌ߬ ߣߌ߫ ߖߌ߬ߣߍ߬ ߟߊ߫ ߘߍ߭ ߝߘߊ߫ ߟߏ߲ ߘߌ߫߸ ߝߊ߬ߙߊ߲߬ߛߌ߬ ߟߊ߫ ߘߍ߬ߡߍ߲߬ ߛߌ߫ ߕߍ߫ ߛߋ߫ ߖߌ߬ߣߍ߫ ߡߊ߬ ߏ߬ ߞߐ߫߸ ߞߊ߬ ߓߊ߲߫ ߞߵߊ߬ ߟߊ߫ ߡߐ߱ ߕߍ߬ ߞߐߍ߫ ߞߊ߬ ߥߴߊ߬ߟߎ߬ ߘߌ߫߸ ߤߊ߲߯ ߖߌ߬ߣߍ߬ ߦߋ߫ ߣߡߌߛߊ߫ ߕߎ߬ߡߊ ߡߍ߲ ߠߊ߫، ߞߏ߫ ߤߊߟߵߊ߬ߟߎ߬ ߟߊ߫ ߣߊ߲߬ߕߌ߰ ߝߊ߲ߞߊ߸ ߞߏ߫ ߊ߬ߟߎ߬ ߕߴߏ߬ ߕߏ߫ ߦߋ߲߬.>>
ߏ߬ ߟߋ ߘߐ߫߸ ߖߌ߬ߣߍ߬ ߝߣߊ߫ ߞߊ߬ ߘߍ߬ߡߍ߲ ߢߌߣߌ߲ ߘߊߡߌ߬ߣߊ߫ ߝߘߊ߬ߝߌ߲߬ߠߊ߫ ߞߣߐ߫߸ ߒߞߏߥߊߡߍ߫ ߞߎ߬ߙߎߡߊ߬ ߝߍ߬ (ߜ߭ߊ߯ߣߊ߬ ߖߡߊ߬ߣߊ ߞߣߐ߫)، ߖߌ߬ߣߍ߬ ߣߌ߫ ߛߏߝ߭ߌߦߋ߫ ߞߵߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬߸ ߏ߬ ߟߎ߫ ߕߍ߬ߘߍ߫ ߝߊ߬ߙߊ߲߬ߛߌ߬ ߥߊ ߟߋ߬ ߡߊߞߐ߬ߣߐ߲߬ ߠߊ߫ ߝߊߦߌߘߊ߫، ߖߌ߬ߣߍ߬ ߣߌ߫ ߝߊ߬ߙߊ߲߬ߛߌ߬ ߟߊ߫ ߘߍ߭ ߡߊ߫ ߘߌߦߊ߫ ߏ߬ ߞߐ߬߸ ߝߏ߫ ߆߀ ߞߣߐߟߊ ߘߐ߫، ߛߋߞߎ߬ ߕߎ߬ߙߋ߫ ߟߋ߬ ߝߣߊ߫ ߕߏ߫ ߘߊ߫ ߖߡߊ߬ߣߊ ߞߎ߲߬ߠߊ߫߸ ߤߊ߲߯ ߞߵߊ߬ ߛߌ߰ ߊ߬ ߟߊ߫ ߛߊ߬ߦߊ ߟߊ߫ ߁߉߈߄ ߠߊ߫، ߊ߬ ߟߊ߫ ߓߊ߯ߙߓߊ ߟߎ߬ ߞߏߛߐ߲߬߸ ߊ߬ ߟߊ߫ ߞߏ߫ ߢߊߦߋ ߞߏߛߐ߲߬߸ ߖߌ߬ߣߍ߬ߞߊ ߟߎ߬ ߣߡߌߛߊߣߴߊ߬ ߟߊ߫ ߛߊ߬ߦߊ ߘߐ߫ ߕߋ߲߬ ߞߏߛߓߍ߫، ߓߊ߬ߙߌ߬߸ ߊ߬ ߟߊ߫ ߞߏ ߟߎ߬ ߡߊ߫ ߢߊߦߋ߫ ߊ߬ ߕߟߋ߬ ߘߐ߬ ߡߐ߮ ߟߎ߬ ߓߟߏ߫ ߢߊ ߛߎ߯ ߺ ߎ ߺ ߛߎ߯ ߡߊ߬.
