߁߉߅߈ ߞߏ߲ߓߌߕߌ߮ ߕߋ߬ߟߋ߫ ߀߂ ߟߋ߬ ߡߊ߬߸ ߖߌ߬ߣߍ߫ ߞߵߊ߬ ߟߊ߫ ߖߘߍ߬ߕߌ߰ߦߊ ߕߊ߬، ߒ߬ߓߊ߬߸ ߏ߬ ߛߊ߲߬ ߈ ߠߋ߬ ߂߀߂߆ ߞߏ߲ߓߌߕߌ߮ ߕߋ߬ߟߋ߫ ߂ ߢߌ߲߬ ߘߌ߫، ߒ߬ߓߊ߬߸ ߦߏ߫ ߛߏ ߕߐ߭ ߟߎ߫ ߞߵߊ߬ ߞߍ߫ ߢߊ ߡߍ߲ ߡߊ߬߸ ߞߊ߲ߞߊ߲߫ ߝߣߊ߫ ߡߊ߫ ߕߏ߫ ߞߐ߫، ߓߊߏ߬߸ ߖߌ߬ߣߍ߬ ߟߊ߫ ߘߍߒߖߘߍߟߦߊ ߛߊ߲߬ ߆߈߲ ߢߊ߰ߢߊ߮ ߞߍ߫ ߘߊ߫ ߟߋ߬ ߥߎ߬ߘߊ߲ ߘߐ߫ ߝߛߊߦߌ߫ ߝߊ߰ߡߊ ߟߎ߬߸ ߘߎ߰ߘߋ߲ ߠߎ߬߸ ߞߵߏ߬ ߟߊ߫ ߡߐ߰ߘߐ߬ߜߍ߬ ߛߌߦߊߡߊ߲߫ ߠߎ߫ ߞߊ߲߬߸ ߏ߬ ߟߎ߬ ߓߍ߯ ߞߊ߬ ߢߐ߲߯ߓߍ߲߬ ߞߊ߲ߞߊ߲߫ ߛߋ߰ߘߎ߬ ߝߎ߬ߙߋ߬ ߜߍߞߣߍ ߟߋ߬ ߘߐ߫߸ ߞߊ߬ ߝߙߋߕߟߏ ߕߘߎ߫߸ ߞߊ߬ ߡߙߌ ߟߊߛߊ߬ߦߌ߲߫ ߖߡߊ߬ߣߊ ߟߊ߫ ߞߊ߲ߠߊߓߌߟߊ ߛߍ߬ߘߏ߲߬ߠߊ ߟߎ߫ ߡߊ߬.

ߎߡߎ߬ ߞߡߊ߬ߙߊ߬ ߟߊ߫ ߝߐߟߌ߫ ߘߐ߫߸ ߞߏ߲ߓߌߕߌ߮ ߕߋ߬ߟߋ߫ ߂ ߦߋ߫ ߟߏ߲߫ ߠߋ߬ ߘߌ߫߸ ߛߋߞߎ߫ ߕߎ߬ߙߋ߬ ߟߊ߫ ߛߍ߬ߘߏ߲ ߞߐߝߟߌ ߓߐ߫ ߘߊ߫ ߜߍ߫ ߟߊ߫ ߟߏ߲ ߡߍ߲߸ ߊ߬ߟߋ ߡߍ߲ ߞߍ߫ ߘߊ߫ ߖߡߊ߬ߣߊ ߞߊ߲ߕߌ߯ ߝߟߐߝߟߐ ߘߌ߫.

<<ߊ߲ ߞߊ߬ ߛߋߞߎ߫ ߕߎߙߋ߫ ߕߟߋ ߞߍ߫ ߟߋ߬، ߊ߬ ߞߊ߬ ߛߍ߬ߘߏ߲ ߡߍ߲ ߞߍ߫ ߛߊ߲߬ ߦߙߌߞߊ߫ ߞߘߐ߫߸ ߊ߲ ߧߴߏ߬ ߟߋ ߞߐߝߟߌ ߞߎ߲߬ߠߊ߫ ߣߌ߲߬ ߓߌ߬، ߝߏ߫ ߛߋߞߎ߫ ߕߎ߬ߙߋ߫ ߕߍ߬ߘߍ߫ ߊ߬ ߥߌ߬ߟߌ߫ ߟߋ߬ ߞߵߊ߬ ߘߛߌ ߓߍ߲߬ ߝߘߊ߬ߜߍ ߟߎ߫ ߡߊ߬߸ ߞߵߊ߬ ߝߐ߫ ߊ߬ߟߎ߬ ߦߋ߫ ߞߏ߫ ߊ߲ ߜߎ ߦߴߊ߬ ߝߍ߬ ߟߋ߬ ߛߍߣߍ߲߬ ߞߵߊ߲ ߠߊ߫ ߖߘߍ߬ߕߌ߰ߦߊ ߕߊ߬߸ ߊ߬ ߣߴߊ߲ ߠߊ߫ ߞߊ߲ߠߊߓߌߟߊ.>> ߊ߬ ߞߵߏ߬ ߟߊߛߙߋߦߊ߫.

ߛߊ߲ߕߟߊ߫ ߡߊ߯ߘߌ߫ ߞߎߦߊߕߍ߫ ߝߣߊ߫ ߕߘߍ߬ ߞߣߍ ߞߊ߲߬߸ ߏ߬ ߞߵߊ߬ ߦߌ߬ߘߊ߫ ߟߋ߬ ߞߏ߫ ߖߌ߬ߣߍ߬ ߟߊ߫ ߖߘߍ߬ߕߌ߰ߦߊ ߦߋ߫ ߖߊ߬ߡߊ ߟߊ߫ ߛߍ߬ߘߏ߲ ߞߐߝߟߌ ߟߋ߬ ߘߌ߫.

<<ߛߋߞߎ߫ ߕߎ߬ߙߋ߫ ߞߊ߬ ߤߙߐߦߊ ߡߍ߲ ߢߌߣߌ߲߫ ߞߵߊ߬ ߘߌ߫ ߟߊ߬ߖߌ߬ߣߍ߬ߞߊ ߟߎ߬ ߡߊ߬߸ ߊ߬ ߞߋߟߋ߲߫ ߡߴߊ߬ ߢߌߣߌ߲߫߸ ߕߌ߲߬ߞߎ߬ߘߎ߲߬ ߣߊ߯ߣߌ߲ ߓߍ߯ ߖߊ߬ߡߊ ߟߋ߬ ߞߊ߬ ߤߙߐߦߊ ߢߌߣߌ߲߫߸ ߊߘߡߊߘߋ߲߫ ߞߋߟߋ߲߫ ߕߴߛߋ߫ ߟߊ߫ ߞߏ߫ ߟߊ߫.>> ߊ߬ ߞߵߏ߬ ߦߌ߬ߘߊ߬.

ߊ߬ߟߋ ߟߊ߫ ߝߐߟߌ߫ ߘߐ߫߸ ߘߍߒߖߘߍߟߦߊ߫ ߢߊ߯ߢߊ߮ ߣߌ߲߬ ߞߊ߫ ߞߊ߲߫ ߞߊ߬ ߞߍ߫ ߛߊߓߎ߫ ߘߌ߫߸ ߊ߲ ߧߋ߫ ߞߘߐ߬ߡߊ߲ ߡߊߝߟߍ߫߸ ߞߵߊ߲ ߢߊ ߟߐ߬ ߊ߲ ߠߊ߫ ߛߌߣߌ߲ߢߍߛߌ߮ ߘߐ߫.

<< ߓߌ߬ ߛߋߞߎ߬ ߕߎ߬ߙߋ߬ ߕߴߦߋ߲߬߸ ߊ߲ ߧߋ߫ ߖߐ߲߫ ߠߊ߫ ߡߙߊ߬ ߞߣߐ߫ ߓߌ߬߸ ߏ߬ ߟߋ߬ ߡߊ߬ߡߊ߬ߘߌ߫ ߘߎ߲ߓߎߦߊ߫ ߘߌ߫߸ ߡߊ߬ߡߊ߬ߘߌ߫ ߘߎ߲ߓߎߦߊ߫ ߣߴߊ߬ ߟߊ߫ ߖߊ߬ߡߊ ߓߍ߯߸ ߊ߲ ߛߍߥߊߣߴߊ߬ߟߎ߬ ߟߊ߫߸ ߊ߲ ߢߊ߯ߟߋ߲ߣߴߊ߬ߟߎ߬ ߟߊ߫߸ ߖߘߍ߬ߕߌ߰ߦߊ߬ ߢߊ߯ߢߊ߮ ߓߘߊ߫ ߕߊ߬ߡߌ߲߫ ߞߏߢߌ߬ߡߊ߬߸ ߊ߲ ߧߋ߫ ߦߙߐ ߡߍ߲ ߘߐ߫ ߓߌ߬߸ ߊ߲ ߠߊ߫ ߡߐ߰ߓߊ ߟߎ߬ ߦߋ߫ ߓߏ߲ ߠߊ߫߸ ߏ߬ ߟߎ߬ ߦߋ߫ ߘߎ߬ߥߊ߬ߎ ߟߊ߫.>> ߛߊ߲ߕߟߊ߫ ߡߊ߯ߘߌ߫ ߞߵߏ߬ ߝߙߊ߬ ߞߎߡߊ ߞߊ߲߬.

ߒߝߊ߬ߡߏߙߌ߬ ߞߐߘߍ߫ ߢߌ߬ߣߌ߲߬ߞߊ߬ߣߍ߲ ߊ߲ ߓߟߏ߫߸ ߏ߬ ߞߵߊ߬ ߟߊ߫ ߛߍߥߊ ߟߋ߬ ߦߌ߬ߘߊ߬ ߊ߬ ߢߊ ߖߍ߬ߘߍߖߍ߬ߘߍ ߡߊ߬، <<ߊ߲ ߛߍߥߊߣߍ߲߫ ߠߋ߬ ߓߌ߬߸ ߞߊ߬ ߖߡߊ߬ߣߊ ߟߊ߫ ߖߘߍ߬ߡߊ߬ߛߐߘߐ߲ ߛߊ߲߬ ߆߈ ߢߊ߰ߢߊ߮ ߞߍ߫، ߟߏ߲ ߏ߬ ߦߴߊ߲ ߓߟߏ߫ ߞߎ߲߬ߠߊ߬ߦߋߙߋ߲ ߟߏ߲ ߠߋ߬ ߘߌ߫.>>

ߖߋ߰ߛߎ߬ ߞߋߕߊ߬ ߦߋ߫ ߞߐߣߐ߲ ߠߋ߬ ߝߙߋ߬ ߟߊ߫߸ ߊ߬ߟߋ ߦߋ߫ ߖߌ߬ߣߍ߬ߞߊ߫ ߟߋ߬ ߘߌ߫߸ ߡߍ߲ ߛߌ߰ߣߍ߲߫ ߡߊ߬ߟߌ ߟߊ߫، ߊ߬ ߓߐߣߍ߲߫ ߝߏ߯ ߦ߆ߋ߲߬ ߠߋ߬ ߞߊ߬ ߣߊ߬ ߖߘߍ߬ߕߌ߰ߦߊ ߢߊ߰ߢߊ߮ ߣߌ߲߬ ߞߍ߫ ߞߊ߲ߡߊ߬߸ ߊ߬ ߣߴߊ߬ ߟߊ߫ ߞߐߣߐ߲ߞߌߛߍ ߟߎ߬. <<ߖߡߊ߬ߣߊ ߟߊ߫ ߖߘߍ߬ߡߊ߬ߛߐߘߐ߲ ߛߊߟߌ ߟߋ߬߸ ߞߵߊ߲ ߞߍ߫ ߊ߲ ߖߘߍ߬ ߘߌ߫߸ ߞߵߊ߲ ߛߋ߫ ߊ߲ ߖߘߍ߬ ߞߘߐ߫߸ ߞߵߊ߬ ߛߐ߬ߘߐ߲߬ ߊ߲ ߘߍ߲ߣߍ߲߫ ߕߍ߫ ߡߐ߰ ߜߘߍ߫ ߟߊ߫.>>

ߓߍ߯ ߞߵߊ߬ ߟߐ߲߫ ߞߏ߫ ߞߏ߲ߓߌߕߌ߮ ߕߋ߬ߟߋ߫ ߂ ߦߋ߫ ߛߍߥߊ ߟߏ߲ ߣߌ߫ ߡߎ߯ߙߌ ߟߏ߲ ߠߋ߬ ߘߌ߫، ߏ߬ ߟߋ ߞߏߛߐ߲߬߸ ߖߊ߬ߡߊ ߦߋ߫ ߓߐ߫ ߟߊ߫ ߛߊ߲߭ ߺ ߊ ߺ ߛߊ߲߬߸ ߞߵߊ߬ ߢߊ߰ߢߊ߮ ߞߍ߫ ߢߐ߲߯ ߝߍ߬ ߛߌߦߊߦߊ ߞߐߟߌߞߐߟߌ ߘߐ߫، ߒ߬ߓߊ߬߸ ߢߌ߬ߣߊ߲߬ ߕߊ ߢߌ߲߬ ߠߋ߬ ߡߊ߫ ߞߍ߫ ߦߏ߫ ߛߊ߲߭ ߕߐ߭ ߟߎ߬، ߓߊߏ߬߸ߓߙߊߓߐ߫ ߡߊ߫ ߞߍ߫߸ ߡߐ߰ ߛߌߦߊߡߊ߲߫ ߦߴߊ߬ ߦߌ߬ߘߊ߬ ߟߊ߫ ߞߏ߫ ߓߙߊߓߐ ߞߍߓߊߟߌߦߊ ߏ߬ ߟߋ ߣߐ߬ ߕߐ߰ߘߐ߰ߝߊ߰ߓߊ߰ߕߐ ߛߌߦߊߦߊ߫ ߟߊ߫.

ߏ߬ ߟߋ ߞߏߛߐ߲߬߸ ߡߊ߬ߡߊ߬ߘߌ߫ ߞߡߊ߬ߙߊ߬ ߡߍ߲ ߦߋ߫ ߞߊ߲ߞߊ߲߫ ߘߎ߰ߘߋ߲߫ ߘߌ߫߸ ߏ߬ ߞߵߊ߬ ߤߊ߲ߞߟߌߣߊ߲ ߘߌ߫: <<ߖߊ߲߬ߖߏ߲߬ ߕߊ߬ߡߌ߲߬ߣߴߊ߬ ߢߌ߬ߡߊ ߟߊ߫ ߞߏߛߓߍ߫، ߝߏ߫ ߓߙߊߓߐ߫ ߡߍ߲ ߡߊ߫ ߞߍ߫ ߊ߬ ߞߏ ߘߐ߫ ߛߍߣߍ߲߬، ߊ߲ ߘߋ߲ߡߌߛߍ߲ߠߡߊ߸ ߓߍ߯ ߕߍ߬ߘߍ߫ ߊ߬ ߛߌ߰ ߟߊ߫ ߞߊ߬ ߟߏ߲ߓߊ ߢߌ߲߬ ߠߋ߬ ߡߊߞߐ߬ߣߐ߲߬، ߟߐ߲ߠߌ߲ߦߊ߫ ߟߊߖߊ߲ߞߏ ߟߎ߬ ߘߌ߫ ߞߍ߫߸ ߞߵߏ߬ ߟߊ߫ ߢߊ߰ߘߐ߬ߘߌ߬ߦߊ߬ ߛߌߦߊߡߊ߲߫ ߞߊ߲߬.>>

ߛߊ߲߬ߓߎ߬ߖߊ߲߬ ߞߐ߲ߘߍ߫ ߝߣߊ߫ ߡߙߌߦߊ ߦߴߏ߬ ߟߋ ߞߋߟߋ߲ ߘߌ߫߸ ߞߊ ߓߍ߲߬ ߓߙߊߞߐ߫ ߞߏ ߡߊ߬، <<ߞߊ߬ߦߌ߯ ߊ߲ߠߎ߬ ߘߐ߰ߡߊ߲߬ߣߍ߲߸ ߸ ߊ߲ ߕߘߍ߬ ߞߏ߲ߓߌߕߌ߮ ߕߋ߬ߟߋ߫ ߂ ߢߊ߰ߢߊ߮ ߣߌ߫ ߓߙߊߓߐ ߟߋ߬ ߞߍ߫ ߟߊ߫ ߢߐ߲߯ ߝߍ߬ ߞߋߟߋ߲ߘߌ߫، ߞߏ߫ ߛߌߦߊߡߊ߲߫ ߕߘߍ߬ ߞߍ߫ ߟߊ߫ ߏ߬ ߞߣߐ߫߸ ߟߊ߬ߡߊ߮ ߕߍ߬ߘߍ߫ ߏ߬ ߘߐ߫ ߝߋߎ߫.>>

ߘߍߒߖߘߍߟߦߊ ߢߊ߰ߢߊ߮ ߣߌ߲߬ ߝߍ߬߸ ߘߏ߫ ߟߎ ߞߵߊ߬ ߓߍ߲߬ߒ߬ߛߋ߲߬ߡߊ ߕߣߐ߬ߓߐ߫ ߞߊ߬ ߖߎ߬ߟߦߊ߬ ߡߌߛߍ߲ ߠߎ߬ ߞߍ߫߸ ߞߵߊ߬ߟߎ߫ ߛߌ߰ ߞߍ߬ߙߍ߲߬ߞߍߙߍ߲ ߝߍ߬.

ߊߦߌߛߊ߬ ߡߊ߬ߙߋߜ߭ߊ߬ ߕߘߍ߬ ߓߙߎ߫ ߖߎߟߊ ߟߋ߬ ߘߌ߫ ߦߋ߲߬߸ ߡߍ߲ ߝߣߊ߫ ߛߐ߲߬ ߘߊ߫ ߞߎߡߊ߫ ߟߴߊ߲ ߠߊ߫ ߓߘߎ ߟߊ߫، <<ߓߌ߬ ߢߐ߲߰ ߟߏ߲߫߸ ߛߊ߲߬ߠߌ߲ ߕߍ߫ ߢߊ ߏ߬ ߡߊ߬߸ ߖߊ߬ߡߊ ߡߊ߲߫ ߛߌߦߊߡߊ߲߫ ߦߏ߫ ߊ߬ ߕߘߍ߬ ߢߊ ߡߍ߲ ߛߊ߲߭ ߕߊ߬ߡߌ߲߬ߣߍ߲ ߠߎ߬ ߘߐ߫.>>

ߓߙߊߓߐ߫ ߡߊ߫ ߞߍ߫߸ ߖߊ߬ߡߊ ߘߏ߲߬ ߡߊ߫ ߥߙߊ߬ ߢߊ ߏ߬ ߡߊ߬، ߡߍ߲ ߠߎ߬ ߞߏ߬ߣߌ߲ ߕߘߍ߬ ߞߣߍ ߞߊ߲߬߸ ߡߙߌߦߊ߫ ߞߋߟߋ߲߫ ߠߋ߬ ߕߘߍ߬ ߓߍ߯ ߟߊ߫߸ ߖߡߊ߬ߣߊ ߟߊ߫ ߖߘߍ߬ߡߊ߬ߛߐߘߐ߲ ߟߏ߲ߓߊ ߦߋ߫ ߡߙߌ ߣߌ߫ ߛߌߡߊ ߟߏ߲ ߠߋ߬ ߘߌ߫.