ߌߞߏߡߌ߲߬ ߊ߬ ߡߊ߫ ߟߊ߬ߥߛߊ߫ ߛߐ߬ߘߐ߲߬ ߢߣߊߕߊߟߌ߫ ߖߛߊ ߞߣߐ߫ ߞߊ߬ ߛߎߘߊ߲߫߸ ߊ߬ ߝߣߊ߫ ߓߘߴߊ߬ ߟߊ߫ ߡߐ߱ ߟߎ߫ ߓߌ߬ߟߊ߫ ߘߌ߬ߓߌ ߘߐ߫ ߞߌߘߌ߲ߜߊ߲߫، ߣߌ߲߬ ߞߍߣߍ߲߫ ߓߎߦߊߦߊ߫ ߟߋ߬߸ ߡߊߥߑߞߏߕߊ߫ ߥߙߏ߬ߘߎ߮ ߘߐ߫، ߥߛߊ߬ߘߋ߲߬ ߢߣߊߕߊߟߌ ߟߋ߬ ߞߍߣߍ߲߫ ߎߜ߭ߊ߲ߘߊ߫ ߖߡߊ߬ߣߊ ߞߣߐ߫߸ ߥߛߊ߬ߘߋ߲߬ ߦߛߎߝ ߒߛߌߓߊ߲ߓߌ߫ ߗߌߙߏ߲ߣߍ߲߫ ߏ߬ ߟߋ ߘߐ߫، ߒ߬ߓߊ߬߸ ߡߐߣߍ ߡߊ߬ ߏ߬ ߘߐ߫߸ ߦߛߎߝ ߞߍߢߊ ߟߵߏ ߘߌ߫߸ ߊ߬ ߕߎ߲߬ ߓߘߊ߫ ߢߎߡߍ ߓߌ߬ߟߊ߬ ߦߙߐ ߡߍ߲ ߠߎ߬ ߘߐ߫߸ ߞߵߊ߬ ߟߊ߫ ߢߎߡߍ ߟߊߖߌ߰ ߘߏߦߌ߲߫߸ ߞߊ߬ ߦߋ߲߬ ߝߊ߲߬ ߞߋߟߋ߲ ߓߌ߬ߟߊ߫ ߘߌ߬ߓߌ ߘߐ߫، ߓߊߏ߬߸ ߞߏ߫ ߊ߬ ߟߊ߫ ߡߐ߱ ߟߎ߬ ߡߴߊ߬ ߥߊߟߢߌߡߊߟߐ߲߫߸ ߊ߬ ߘߏ߲߬ ߞߵߊ߬ ߞߎ߲߬ ߣߊ߲ߝߟߏ ߟߋ߬ ߘߏ߲߬ ߊ߬ ߘߐ߫.

ߊߟߎ߫ ߦߴߊ߬ ߟߐ߲߫߸ ߂߀߂߆ ߓߌ߲ߠߊߥߎߟߋ߲ ߕߟߋ߬ ߁߅ ߡߊ߬߸ ߥߛߊ߬ߘߋ߲߬ ߢߣߊߕߊߟߌ ߟߋ߬ ߞߍ߫ ߘߊ߫ ߎߜ߭ߊ߲ߘߊ߫߸ ߦߛߎߝ ߘߊ߬ߘߌ߬ ߘߊ߫ ߛߎߖ߭ߊ߲ ߣߞߊߥߎߞߌ߫ ߟߋ߬ ߓߟߏ߫߸ ߏ߬ ߦߋ߫ ߖߡߊ߬ߣߊ ߞߊ߲ߕߌ߮ ߟߊ߫ ߞߙߎߞߊ ߡߊ߬ߡߌ߬ߣߊ߬ߟߌ߬ߟߊ ߟߋ߬ ߘߌ߫، ߏ߬ ߟߋ ߞߊ߬ ߦߛߎߝ ߘߊ߬ߘߌ߬ ߢߣߊߕߊߟߌ ߘߐ߫߸ ߏ߬ ߟߋ ߡߊ߫ ߓߍ߲߬ ߗߍ߭ ߡߊ߬ ߢߊ߫ ߛߌ߫ ߡߊ߬.

ߣߌߟ ߔߐߛߕ ߝߐ߰ߓߍ߬ߘߊ ߟߊ߫ ߝߐߟߌ߫ ߘߐ߫߸ ߦߛߎߝ ߞߊ߬ ߢߎߡߍ ߏ߬ ߣߊ߲߬ߝߟߏ ߓߐ߫ ߊ߬ ߞߎ߲߬ ߥߊߘߌ ߟߋ߬ ߘߐ߫ ߞߊ߬ ߖߊ߬ߡߊ ߓߌ߬ߟߊ߬ ߦߋߟߋ߲ ߞߘߐ߫، ߢߣߊߕߊߟߌ ߓߊ߲ ߏ߬ ߘߐ߫߸ ߊ߬ ߝߣߊ߫ ߡߴߊ߬ ߞߎ߲߬ ߣߌ߫ ߢߌߡߌ߲߫ ߘߊ߲߫߸ ߊ߬ ߞߊ߬ ߢߎߡߍ ߕߍ߰ ߦߋ߲߬ ߡߐ߮ ߟߎ߫ ߡߊ߬، ߞߵߊ߬ ߝߐ߫ ߞߏ߫: <<ߡߐ߱ ߢߌ߲߬ ߠߎ߬ ߟߊ߫ ߘߌߦߊߜߏߦߊ߫ ߛߌ߫ ߕߍ߫ ߒߠߋ ߞߊ߲߬.>> ߞߊ߬ߕߎ߲߯߸ ߞߏ߫ ߊ߬ߟߎ߬ ߡߴߊ߬ ߞߏߢߌߡߊߟߐ߲߫ ߊ߬ ߟߊ߫ ߓߊ߯ߙߊ߫ ߞߍߣߍ߲ ߠߊ߫، ߓߊߏ߬߸ ߊ߬ߟߋ ߣߐ߬ ߓߊ߯ߙߓߊ ߡߍ߲ ߓߍ߯ ߞߍ߫ ߟߊ߫߸ ߏ߬ ߟߎ߬ ߡߴߏ߬ ߟߐ߲߫ ߊ߬ߟߋ ߦߋ߫ ߞߵߊ߬ ߛߎߥߊ߲ߘߌ߫، ߏ߬ ߘߐ߫߸ ߞߏ߫ ߊ߬ߟߎ߬ ߦߴߊ߬ ߝߐ߫ ߞߎ߲߬ߠߊ߬ߛߌ߮ ߦߋ߫ ߞߏ߫ ߏ߬ ߟߎ߬ ߦߋ߫ ߣߊ߬ ߢߎߡߍ ߘߴߊ߬ߟߎ߫ ߡߊ߬߸ ߊ߬ߟߋ ߞߏ߬ߣߌ߲ ߕߍ߫ ߝߋߎ߫.

ߢߎߡߍ ߟߊ߫ ߕߍ߰ߟߌ ߏ߬ ߟߋ ߡߊ߲߬ߕߙߐ ߛߋߣߍ߲߫ ߛߏ߫ ߡߐ߮ ߟߎ߫ ߡߊ߬߸ ߖߎߟߊ ߟߎ߬ ߓߊ߬߸ ߓߊ߯ߙߊߞߍߟߊ ߟߎ߫ ߓߊ߬߸ ߊ߬ ߣߌ߫ ߟߎ߫ ߛߌߦߊߡߊ߲߫߸ ߓߊ߯ߙߊ߫ ߛߌߦߊߡߊ߫ ߓߘߊ߫ ߟߊߟߐ߬ ߕߟߋ߬ ߘߊ߲ߘߐ ߣߌ߲߬ ߞߣߐ߫ ߡߎߣߎ߲߬߸ ߡߍ߲ ߠߎ߬ ߕߍ߫ ߢߊ߬ ߢߎߡߍ ߞߐ߫ ߞߊ߬ߣߌ߲߬.

ߞߏ߬ߣߌ߲߬߸ ߎߜ߭ߊ߲ߘߊ߫ ߞߏߟߊߘߍ ߡߍ߲ ߘߐ߱ߘߏ߲߬ߣߍ߲߫ ߢߎߡߍ߫ ߞߏ ߟߊ߫߸ ߏ߬ ߡߊ߫ ߓߍ߲߬ ߗߍ߭ ߟߊ߫ ߓߊ߯ߙߊ߫ ߞߍߣߍ߲ ߢߌ߲߬ ߡߊ߬، ߏ߬ ߟߎ߬ ߟߊ߫ ߓߋߟߋ߲ߕߌ߮ ߖߏߣߊ ߞߌ߯ߖ߭ߊ߫ ߞߊ߲߫ ߞߏ߫ ߢߎߡߍ ߓߊ߯ ߓߊ߯ ߘߌ߫ ߟߊ߫ ߖߊ߬ߡߊ ߡߊ߬߸ ߌ ߞߍ߫ ߘߊ߫ ߡߐ߰ ߺ ߐ ߺ ߡߐ߰ ߘߌ߫߸ ߌߟߋ ߞߵߊ߬ ߘߌ߫ ߥߟߊ߫ ߌ ߡߴߊ߬ ߘߌ߫߸ ߌ ߕߴߛߋ߫ ߥߊ߫ ߟߊ߫ ߏ߬ ߓߐ߫ ߟߊ߫ ߡߐ߱ ߟߎ߫ ߞߎ߲߬ߠߊ߫ ߏ߬ ߞߐ߫، ߏ߬ ߘߐ߫߸ ߛߊ߬ߙߌ߬ߦߊ߬ ߡߊ߫ ߛߐ߲߬ ߊ߬ ߡߊ߬߸ ߊ߬ ߘߏ߲߬ ߡߊ߫ ߓߍ߲߬.

ߒߛߌߓߊ߲ߓߌ߫ ߘߏ߲߬ ߡߊ߫ ߘߊ߲߬ ߢߎߡߍ ߘߐߙߐ߲߫ ߕߍ߱ ߡߊ߬ ߘߋ߬߸ ߊ߬ ߕߘߍ߬ ߦߙߐ ߡߍ߲ ߠߎ߬ ߛߐ߫ ߟߊ߫ ߖߌ ߟߊ߫߸ ߊ߬ ߕߘߍ߬ ߞߊ߬ߙߊ߲߬ߘߋ߲ ߡߍ߲ ߠߎ߬ ߟߊ߫ ߞߊ߬ߙߊ߲ ߣߊ߲߬ߝߟߏ߬ߦߊ߬ ߟߊ߫ ߞߵߊ߬ߟߎ߬ ߟߊߕߊ߯ ߞߐߞߊ߲߬߸ ߏ߬ ߓߍ߯ ߟߋ߬ ߟߊߟߐ߬ߣߴߊ߬ ߓߟߏ߫߸ ߊ߬ ߟߊ߫ ߗߌߙߏ߲ ߣߌ߲߬ ߞߏߛߐ߲߬߸ ߞߏ߫ ߊ߬ ߟߊ߫ ߡߐ߱ ߟߎ߬ ߡߴߊ߬ ߥߊߟߢߌߡߊߟߐ߲߫.

ߦߊ߯ߟߊ߫߸ ߣߌ߫ ߓߘߍ߬ߓߘߍ߬ߟߌ߬ߟߊ ߞߊ߬ ߓߊ߯ߙߊ ߞߍ߫ ߊ߬ ߞߎ߲߬ ߣߊ߲ߝߟߏ ߟߊ߫߸ ߌߞߏߡߌ߲߬ ߊ߬ ߛߊ߬ߥߏ ߡߊ߫ ߞߍ߫ ߊ߬ ߦߋ߫ ߢߣߊߕߊߟߌ ߘߐ߫߸ ߊ߬ ߞߊ߫ ߞߊ߲߫ ߞߵߊ߬ ߟߊ߫ ߓߊ߯ߙߊ߫ ߞߍߣߍ߲ ߏ߬ ߟߎ߬ ߘߐߕߌߢߍ߫ ߓߊ߬߸ ߦߏ߫ ߊ߬ ߣߐ߬ ߊ߬ ߞߍ߫ ߟߊ߫ ߖߍ߬ߘߍ ߟߋ߬ ߦߋ߫؟