ߡߊ߬ߛߎ߬ߓߊ߬ ߞߏ߫ ߟߋ߬ ߕߍ߰ߣߍ߲߫ ߞߐ߬ߓߊ ߺ ߝߍ߬ ߞߍ߲ߘߍߟߏ߲߸ ߂߀߂߆ ߞߏ߲ߓߌߕߌ߮ ߕߋ߬ߟߋ߫ ߃ ߡߊ߬، ߞߐ߬ߓߊ ߺ ߝߍ߬ ߣߌ߲߬ ߦߋ߫ ߕߐ߲߬ߓߊ ߞߊ߲ߛߊ߫ ߡߙߊ߬ߘߊ߬ߙߋ߲ ߠߋ߬ ߘߐ߫߸ ߛߌ߯ߙߌߣߌ߲߫ ߡߙߊ߬ߘߊ߬ߓߊ ߘߐ߫،  ߊ߲ ߣߐ߬ ߟߌ߬ߤߟߊ߫ ߟߋ߬ ߛߐ߬ߘߐ߲߬ ߠߊ߫߸ ߞߏ߫ ߗߍ߭ ߘߏ߫ ߟߋ߬ ߣߐ߬ ߡߏ߬ߙߌ߬ߝߊ ߕߋ߬ ߟߴߊ߬ ߡߏ߬ߛߏ ߟߊ߫߸ ߞߣߊ߬ߕߏ߫ ߊ߬ ߖߘߍ߬ ߓߏ߲߫ ߠߊ߫ ߡߏ߬ߙߌ߬ߝߊ߬ ߞߋߟߋ߲߫ ߏ߬ ߟߊ߫، ߊ߬ ߝߐߣߍ߲߫ ߞߏ߫ ߊ߬ ߣߐ߬ ߊ߬ ߡߏ߬ߛߏ ߡߍ߲ ߓߏ߲߫ ߠߊ߫߸ ߏ߬ ߟߊߟߊߣߍ߲߫ ߘߊ߲ߘߊߛߏ ߟߊ߫߸ ߓߊ߬ߙߵߊ߬ߟߋ߫ ߖߍ߬ߘߍ ߡߊ߫ ߛߋ߫ ߓߐ߫ ߟߴߊ߬ ߘߐ߫ ߊ߬ ߟߊ߫ ߓߏ߲ߠߌ߲ ߞߐߝߍ߬، ߊ߬ ߞߊ߬ ߓߏ߲ߠߌ߲ ߞߍ߫ ߕߎ߬ߓߊ߬ߓߎ ߟߎ߬ ߟߊ߫ ߕߟߏߞߘߐ߫ ߡߊߘߓߊ߬ߙߌ߬ߣߍ߲ ߠߋ߬ ߟߊ߫. ߊ߬ ߞߏ߬ߣߌ߲ ߞߎ߲߬ ߟߐ߲ߣߍ߲߫ ߕߍ߫ ߡߐ߰ ߛߌ߫ ߓߟߏ߫ ߡߎߣߎ߲߬.

ߊ߬ ߝߐߣߍ߲߫ ߞߏ߫ ߊ߬ ߣߐ߬ ߊ߬ ߡߏ߬ߛߏ ߡߍ߲ ߓߏ߲߫ ߠߊ߫ ߣߌ߲߬߸ ߏ߬ ߦߋ߫ ߡߏ߬ߛߏ߫ ߛߊ߲߭ ߂߁ ߠߋ߬ ߘߌ߫߸ ߓߌ߬ߡߊ߫ ߡߍ߲ ߛߌ߰ ߗߍ߭ ߞߎ߲߬ ߝߘߎ߫ ߟߊ߫، ߓߊߏ߬߸ ߓߊߞߊ߬ߙߌ߬ ߝߏߝߣߊ߫ ߡߍ߲ ߦߋ߫ ߗߍ߭ ߣߌ߲߬ ߞߘߐ߬ߗߍ߬ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߒ ߕߴߛߋ߫ ߝߋ߲߫ ߝߐ߫ ߟߴߊ߬ ߞߊ߲߬، ߓߊߏ߬߸ ߛߊ߬ߦߊ ߡߊ߫ ߞߍ߫ ߞߊ߬ ߒ ߛߐ߬ߘߐ߲߬ ߛߏ ߞߣߐ߫، ߒ ߘߌ߫ ߛߋ߫ ߞߎߡߊ߫ ߞߋߟߋ߲ ߡߍ߲ ߝߐ߫ ߟߴߊ߬ ߞߊ߲߬߸ ߒ ߡߊ߫ ߞߟߍ߬ ߟߊߞߏߟߐ߲߫ ߊ߬ߟߎ߬ ߣߌ߫ ߢߐ߲߯ ߕߍ߫. ߝߘߎ߫ ߞߍ߫ ߛߊ߲߫ ߞߎߘߊ߫ ߘߏ߲߬ ߝߣߊ߫ ߕߍ߫، ߓߊߏ߬߸ ߊ߬ ߓߘߊ߫ ߘߋ߲߫ ߡߐ߰ ߣߊ߯ߣߌ߲߫ ߛߐ߬ߘߐ߲߬߸ ߛߓߊ߬ ߓߘߊ߫ ߛߊ߬߸ ߞߋߟߋ߲߫ ߠߋ߬ ߓߊߟߏߣߍ߲߫>> ߊ߬ ߞߵߏ߬ ߟߋ߬ ߝߐ߫.

ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߓߏ߲ߠߌ߲ ߞߐ ߟߋ߬ ߘߐ߫߸ ߘߋ߲ߡߛߏ ߕߊ߬ ߘߊ߫ ߞߊ ߥߴߊ߬ ߘߌ߫ ߟߍ ߺ ߘߐ߫ ߘߊ߲ߘߊߛߏ ߟߊ߫߸ ߏ߬ ߘߊ߲ߘߊߟߌߟߊ ߟߎ߬ ߟߊ߫ ߓߊ߯ߙߊ ߟߎ߬ ߞߐߝߍ߬߸ ߊ߬ߟߎ߫ ߞߊ߬ ߞߌ߬ߛߍ߬ ߟߏ߯ߟߎ߫ ߟߊߓߐ߫ ߘߋ߲ߡߛߏ ߘߐ߫߸ ߊ߬ ߘߌ߯ ߘߴߊ߬ ߞߎ߲߭ ߠߋ߬ ߟߊ߫ ߓߊߞߍ߬، ߏ߬ ߟߋ ߞߐߝߍ߬ ߊ߬ߟߎ߫ ߞߵߊ߬ ߕߊ߬ ߞߊ߬ ߥߴߊ߬ ߘߌ߫ ߛߌ߯ߙߌ߲߫ ߘߊ߲ߘߊߛߏߓߊ ߟߊ߫߸ ߊ߬ ߦߋ߫ ߘߊ߲ߘߊߟߌ ߘߊߞߘߐ߫ ߦߋ߲߬، ߘߊ߲ߘߊߟߌߟߊ ߟߎ߫ ߞߏ߬ߣߌ߲ ߞߵߊ߬ ߦߌ߬ߘߊ߬ ߞߏ߫ ߊ߬ ߓߘߊ߫ ߞߎߡߊ ߘߊߡߌߣߊ߫ ߡߐ߱ ߟߎ߫ ߝߍ߬߸ ߖߘߐ߬ ߛߎ߮ ߏ߬ ߕߴߊ߬ ߟߊ߫ ߞߏ ߘߐ߫ ߡߎ߬ߕߎ߲߬.

ߗߍ߭ ߓߊ߲߫ ߘߴߊ߬ ߡߏ߬ߛߏ ߓߏ߲߫ ߠߊ߫ ߟߋ߬߸ ߞߊ߬ ߡߊ߬ߙߌ߬ߝߊ ߢߊߛߌ߲߫ ߊ߬ߟߋ߫ ߖߍ߬ߘߍ ߟߊ߫߸ ߞߵߊ߬ ߖߘߍ߬ ߓߏ߲߫، ߊ߬ߟߋ߫ ߛߊ߬ ߘߴߊ߬ ߣߐ߭ ߘߐ߫ ߦߋ߲߬ ߠߋ߬ ߌߞߘߐ߫.

ߗߍ߭ ߣߌ߲߬ ߕߐ߯ ߟߋ߬ ߞߏ߫ ߡߏߙߌ߬ ߝߏߝߣߊ߫߸ ߊ߬ ߛߌ߬ߞߛߊߓߌ ߦߋ߫ ߛߊ߲߭ ߂߇ ߖߊ߬ߕߋ߬ ߘߐ߫߸ ߊ߬ ߞߘߐ߬ߞߍ߬ ߟߊ߫ ߝߐߟߌ، ߊ߬ߟߋ߬ ߓߐߛߎ߲߫ ߞߋߟߋ߲ ߞߵߊ߬ ߦߌ߬ߘߊ߬ ߞߏ߫ ߘߋ߲ߡߛߏ ߝߣߊ߫ ߕߐ߯ ߟߋ߬ ߞߏ߫ ߝߊ߲ߕߊ߬ ߝߏߝߣߊ߫߸ ߏ߬ ߝߣߊ߫ ߛߌ߬ߞߛߊߓߌ ߦߋ߫ ߛߊ߲߭ ߂߁ ߖߊ߬ߕߋ߬ ߘߐ߫.

ߊ߬ ߦߌ߬ߘߊ߬ ߘߴߊ߲ ߠߊ߫ ߛߙߋ ߘߏ߫ ߟߎ߫ ߓߟߏ߫߸ ߞߏ߫ ߖߊ߲߬ߞߊ߬ߙߏ߬ ߕߍ߫ ߗߍ߭ ߟߊ߫ ߤߊ߲ߞߟߌ߫ ߞߏ ߕߊ߫ ߝߊ߲߭ ߝߍ߬߸ ߡߐ߰ ߘߏ߲߬ ߡߊ߫ ߞߟߍ߬ ߞߏ߫ ߟߐ߲߫ ߊ߬ ߣߴߊ߬ ߡߏ߬ߛߏ ߕߍ߫ ߞߘߐ߬ߡߊ߲߬، ߊ߬ ߖߍ߬ߘߍ߸ ߞߏ߫ ߘߍߒߖߘߍߟߦߊ߫ ߛߊߟߌ ߡߍ߲ ߕߊ߬ߡߌ߲߬ ߛߊ߲ ߦߋ߫ ߣߌ߲߬߸ ߊ߬ߟߎ߬ ߓߍ߯ ߟߋ߬ ߞߵߏ߬ ߛߓߏ߬ ߖߋߣߌ߲ ߢߊ߰ߢߊ߮ ߞߍ߫ ߢߢߐ߲߯ ߝߍ߬.

ߊ߬ ߞߎߡߊ ߞߏ߬ߣߌ߲ ߓߘߊ߫ ߛߋ߫ ߝߊ߰ߡߊ ߟߎ߫ ߝߍ߬߸ ߏ߬ ߟߎ߫ ߛߐ߰ ߘߊ߫ ߢߊߢߌߣߌ߲ߠߌ߲߫ ߞߎ߲߬ߝߟߐ ߟߎ߬ ߞߍ ߡߊ߬߸ ߞߊ߬ ߓߊ߲߫ ߞߊ߬ ߛߎ߭ ߘߌ߫ ߞߐߙߍ ߡߊ߬߸ ߛߎ߬ߘߏ߲ ߞߍ߫ ߘߊ߫ ߞߎߣߎ߲߬ ߞߍ߲ߘߍߟߏ߲ ߡߎ߰ߡߍ ߟߋ߬ ߡߊ߬߸ ߞߐ߬ߓߊ ߺ ߝߍ߬ ߛߏ ߞߣߐ߫. ߊ߬ ߕߐ߭ ߕߏߣߍ߲߫ ߝߊ߰ߡߊ ߟߎ߬ ߟߊ߫ ߞߏߢߊߢߌߣߌ߲ ߠߋ߬ ߡߊ߬ ߛߍߣߍ߲߬߸ ߖߐ߲߰ߛߊ߫ ߣߌ߲߬ ߞߎ߲߬ ߖߐ߲ߖߐ߲ ߘߌ߫ ߟߐ߲߫ ߢߊ ߡߍ߲ ߡߊ߬.