ߊ߬ ߕߟߋ߬ ߦߙߌߞߊ ߟߋ߬ ߕߋ߲߬߸ ߞߊ߲ߞߊ߲߫ ߓߊ߬ߕߏ߲߬ߓߊ ߘߊߞߘߐߟߊ ߛߌߟߊ ߕߍ߰ߣߍ߲߫، ߊ߬ ߕߘߍ ߓߍ߯ ߢߣߊ߫ ߞߏ߫ ߊ߬ ߟߊߥߟߌ߬ߣߍ߲߬ ߦߙߐ ߘߐߓߍ߲߭ ߠߋ߬ ߡߊ߬߸ ߞߊ߬ ߖߡߊ߬ߣߊ ߟߊ߫ ߖߘߍ߬ߕߌ߰ߦߊ߬ ߛߊߟߌ ߢߍߛߌ߰، ߝߌ߬ߘߊ ߏ߬ ߟߋ ߕߊ߬ߡߌ߲ ߞߐߝߍ߬ ߣߌ߲߬ ߛߊ߫߸ ߊ߬ ߥߊ߫ ߦߋ߫ ߞߏ߫ ߞߏ߫ ߜߘߍ߫ ߦߴߏ߬ ߞߏ ߞߘߐ߫߸ ߡߍ߲ ߣߌ߫ ߦߙߐ߫ ߟߊߗߋ߲߯ߧߊ ߕߍ߫ ߞߋߟߋ߲߫ ߘߌ߫، ߓߊߏ߬߸ ߞߏ߲߫ ߕߎ߲߬ ߕߍ߫ ߦߙߐ ߡߍ߲ ߠߎ߬ ߟߊ߫߸ ߘߊ ߓߘߊ߫ ߓߌ߬ߟߊ߫ ߦߋ߲߬ ߠߎ߬ ߟߊ߫߸ ߞߊ߬ ߦߙߐ ߡߊߛߐ߬ߘߐ߲ ߞߍ߫ ߓߊ߲߬ߓߊ߬ ߓߏ߬ ߟߊ߬ߦߟߍ ߘߌ߫، ߏ߬ ߟߋ ߞߏ ߓߘߊ߫ ߞߍ߫ ߘߎ߰ߘߋ߲ ߠߎ߬ ߕߙߐ߫ ߞߏ ߘߌ߫، ߌߞߏߡߌ߲߬ ߊ߬ ߞߏ ߦߋ߫ ߡߙߊ߬ߘߊߓߊ ߟߋ߬ ߟߊ߫ ߞߎ߲߬ߠߊ߫߸ ߊ߲ ߞߊ߬ ߛߟߊߕߌ߯ ߡߙߊ߬ߓߊ߮ ߞߟߌ߫߸ ߊ߬ߟߋ ߡߍ߲ ߦߋ߫ ߗߋߦߊߟߌ ߘߐ߫ ߞߐߣߊߞߙߌ߫ ߕߋ߲߬.

ߡߍ߲ ߟߐ߬ߣߍ߲߫ ߥߛߊ߬ߓߊ߰ߦߊ߬ ߞߏ ߡߊ߬ ߜߍߞߣߍ ߘߐ߫ ߦߋ߲߬߸ߡߍ߲ ߠߎ߬ ߦߋ߫ ߥߊߘߌ ߡߌ߬ߣߊ߬ ߟߊ߫ ߡߤߐ߱ ߟߎ߬ ߟߊ߫߸ ߡߙߊ߬ߓߊ߮ ߞߊ߲߫ ߞߏ߫ ߊ߬ߟߋ ߡߊ߫ ߡߐ߰ ߟߐ߬ ߘߙߐߡߍ ߡߌ߬ߣߊ߬ ߟߊ߫ ߡߐ߰ ߟߊ߫ ߦߋ߲߬.

<<ߡߍ߲ ߠߎ߬ ߦߴߏ߬ ߞߍ߫ ߟߊ߫߸ ߒ ߘߴߏ߬ ߟߎ߬ ߟߊ߫ ߞߏ ߢߊߢߌߣߌ߲߫߸ ߡߍ߲ ߣߐ߬ ߓߊ߯ ߞߍ߫ ߊ߬ߟߎ߫ ߟߐ߬ ߟߴߊ߬ ߟߊ߫، ߒߠߋ ߡߊ߫ ߒ ߕߊ ߟߊߥߟߌ߬ ߥߊߘߌ߫ ߢߌߣߌ߲߫ ߡߊ߬߸ ߊ߲ ߕߍ߫ ߞߣߐ߬ߜߍ߲߬ߠߊ߫ ߛߙߊ߬ ߟߊ߫ ߦߋ߲߬.>> ߊ߬ ߞߵߏ߬ ߝߊ߬ߘߊ ߓߐ߫ ߊ߬ ߡߊ߬.

ߥߛߊ߬ߓߊ߰ߦߊ ߘߏ߫ ߟߋ߬ ߛߌ߰ߣߍ߲߫ ߜߍߞߣߍ ߘߐ߫ ߦߋ߲߬߸ ߞߏ߫ ߞߎ߲߬ߞߏ߬ ߡߊ߲ߞߊ߲ ߠߎ߬ ߟߊߕߐ߲ ߥߛߊ߬ߓߊ߰ߦߊ، ߏ߬ ߞߏ ߡߊߡߙߊ߬ߣߍ߲߫ ߡߐ߰ ߟߋ߬ ߓߟߏ߫߸ ߡߍ߲ ߦߋ߫ ߟߐ߬ߘߎ߮ ߘߏ߫ ߟߊ߫ ߞߊ߲ߞߊߊ߲߫ ߞߊ߬ߝߏ߬ߙߋ߲ ߛߘߍ߫ ߞߎߘߊ ߢߌ߲߬ ߘߐ߫، ߊ߬ߟߋ ߢߌ߬ߣߌ߲߬ߞߊ߬ ߘߴߊ߲ ߓߟߏ߫ ߞߎߡߊߓߘߎ ߞߐߝߍ߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߔߏߔߏ ߟߎ߫ ߕߊ߬ߣߍ߲ ߞߵߊ߬ ߟߊ߫ ߞߐ߬ߛߏ ߟߎ߫ ߞߊ߲߬߸ ߏ߬ ߟߎ߬ ߛߌ߫ ߕߍ߫ ߘߏ߲߬ ߠߊ߫ ߜߍߞߣߍ ߘߐ߫ ߡߎ߬ߕߎ߲߬߸ ߊ߬ߟߎ߬ ߓߍ߯ ߞߊ߫ ߞߊ߫ ߞߵߊ߬ߟߎ߫ ߟߐ߬ ߔߏߔߏ߫ ߟߊߟߐ߫ ߖߛߊ ߟߋ߬ ߞߣߐ߫߸ ߡߍ߲ ߦߋ߫ ߛߙߊ߬ ߟߊ߫.

ߊ߬ ߞߵߊ߬ ߦߌ߬ߘߊ߬ ߞߏ߫ ߓߊ߯ߙߊ߫ ߛߌߦߊߡߊ߲߫ ߠߋ߬ ߞߍ߫ ߟߐ߮ ߦߋ߫ ߞߊ߲ߞߊ߲߫ ߞߊ߬ߝߏ߬ߙߋ߲ ߠߊ߫ ߛߋ߰ߘߎ߬ ߝߎ߬ߙߋ߬ ߜߍߞߣߍ ߢߌ߲߬ ߘߐ߫߸ ߝߏ߫ ߞߊ߬ߝߏ߬ߙߋ߲ ߓߘߊ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߁߃߀ ߟߊߓߐ߫ ߊ߬ ߞߏ ߞߊ߲ߡߊ߬߸ ߡߍ߲ ߣߊ߬ߕߐ߫ ߦߙߐ ߟߊߗߋ߲߰ߧߊ߬ ߟߊ߫ ߓߘߍߞߍ߭ ߕߎ߬ߡߊ߫ ߣߊ߬ߕߐ ߟߎ߬ ߘߐ߫.

ߊ߬ߟߋ߬ ߡߐ߰ ߞߋߟߋ߲ ߞߵߊ߬ ߦߌ߬ߘߊ߬ ߞߏ߫ ߡߍ߲ ߠߎ߬ ߦߋ߫ ߥߊ߫ ߟߊ߫ ߞߢߐߞߏ ߘߐ߫ ߦߋ߲߬߸ ߞߢߐߞߎߘߊ ߣߴߊ߬ ߟߊ߫ ߖߊ߬ߡߊ ߦߋ߫ ߖߌ߬ߣߍ߬ ߕߊߡߊ߲ ߃߀ ߀߀߀ ߟߋ߬ ߛߙߊ߬ ߟߊ߫߸ ߊ߬ ߘߊߡߌߣߊ ߟߵߏ߬ ߘߌ߫ ߞߊ߬ ߦߟߍ߬߸ ߞߊ߬ ߓߍ߲߬ ߖߊ߬ߡߊ ߟߊ߫ ߛߌߦߊߦߊ ߡߊ، ߞߊ߬ߟߎ߫ ߞߏ߬ߣߌ߲ ߞߵߊ߬ ߦߌ߬ߘߊ߬ ߝߛߊߦߌ߫ ߞߏ߫ ߊ߬ߟߎ߬ ߦߋ߫ ߞߊ߬ߝߏ߬ߙߋ߲ ߠߊ߫ ߓߊ߯ߙߊ ߟߋ߬ ߟߊ߫ ߦߋ߲߬.

ߊ߲ ߠߊ߫ ߞߏߢߊߢߌߣߌ߲ ߠߎ߬ ߘߐ߫߸ ߊ߲ ߛߋ߫ ߘߴߊ߲ ߓߟߏ ߟߊ߫ ߟߊ߫ ߛߓߍߣߍ߲ ߘߏ߫ ߟߎ߫ ߘߐ߫߸ ߡߍ߲ ߦߋ߫ ߘߌ߫ ߟߊ߫ ߞߢߐߡߊߟߐߟߊ ߟߎ߫ ߡߊ߬߸ ߔߏߔߏ߫ ߕߌ߮ ߟߎ߬ ߣߌ߫ ߞߐ߲߬ߛߏ ߕߌ߮ ߟߎ߫ ߡߊ߬، ߛߓߍ ߏ߬ ߞߊ߲߬߸ ߞߊ߬ߝߏ߬ߙߋ߲ ߕߐ߮ ߟߋ߬ ߛߓߍߣߍ߲߫߸ ߞߟߊ߬ߣߐ ߣߌ߫ ߓߊ߬ߘߌ߬ߟߊ߲ ߡߍ߲ ߦߴߊ߬ ߞߐߝߍ߬߸ ߏ߬ ߦߋ߫ ߞߊ߬ߝߏ߬ߙߋ߲ ߠߋ߬ ߦߌ߬ߘߊ߬ ߟߊ߫.

ߒ߬ߓߊ߬߸ ߊ߲ ߠߊ߫ ߢߌ߬ߣߌ߲߬ߞߊ߬ߟߌ ߛߋ߫ ߢߊ ߟߋ߬ ߞߍ߫ ߘߴߏ߬ ߘߌ߫ ߡߌ߬ߛߍߟ ߔߌ߯ߝ߭ߌ߫ ߡߊ߬߸ ߏ߬ ߡߍ߲ ߦߋ߫ ߞߊ߬ߝߏ߬ߙߋ߲ ߓߌ߬ߟߊ߬ߢߐ߲߰ߡߊ ߖߋ߬ߓߌ߬ߦߊ߬ߟߊ ߣߴߊ߬ ߓߋߟߋ߲ߕߌ߮ ߘߌ߫.

ߏ߬ ߞߵߊ߬ ߦߌ߬ߘߊ߬ ߞߏ߫ ߞߎߡߊ ߣߌ߲߬ ߡߍ߲ߕߐߟߊ ߟߵߊ߬ߟߋ ߓߟߏ߫ ߣߌ߲߬߸ ߞߊ߬ ߝߐ߫ ߞߏ߫ ߥߊߘߌ߫ ߛߙߊ߫ ߞߏ ߓߘߊ߫ ߓߌ߬ߟߴߊ߬ ߘߐ߫.

ߊ߬ߟߋ ߟߊ߫ ߝߐߟߌ߫ ߘߐ߫߸ ߞߏ߫ ߛߋ߰ߘߎ߬ ߝߎߙߋ ߟߎ߬ ߟߊ߫ ߜߍߞߣߍ ߡߊ߬ߡߙߊ߬ߟߌ ߕߍ߫ ߞߊ߬ߝߏ߬ߙߋ߲ ߕߊ߫ ߓߟߏ߫ ߡߊ߬ ߝߋߎ߫، ߊ߬ ߞߊ߲߫ ߞߏ߫ ߊ߬ ߡߊ߬ߡߙߊ߬ߟߌ ߦߋ߫ ߡߙߊ߬ߘߊ߬ߓߊ ߟߋ߬ ߓߟߏ߫߸ ߘߋ߲ߡߌߛߍ߲߫ ߓߏ߲ߓߊ ߦߋ߫ ߘߋ߲ߡߌߛߍ߲ߧߊ߫ ߞߏߕߌ߯ߘߊ ߟߊ߫ ߓߌ߬ߟߊ ߟߋ߬ ߞߣߐ߫.

ߏ߬ ߘߐ߫߸ ߞߏ߫ ߊ߬ߟߋ ߕߴߛߋ߫ ߛߐ߲߬ ߠߴߊ߬ ߡߊ߬ ߓߌ߬߸ ߞߊ߬ ߝߐ߫ ߞߏ߫ ߦߙߐ ߏ߬ ߦߋ߫ ߞߊ߬ߝߏ߬ߙߋ߲ ߠߋ߬ ߕߊ߫ ߓߟߏ ߡߊ߬.

ߊ߬ ߢߌ߬ߣߌ߲߬ߞߊ߬ ߘߊ߫ ߞߊ߬ ߓߍ߲߬  ߥߊߘߌ߫ ߡߌߣߊ߫  ߞߏ ߡߊ߬߸ ߊ߬ ߝߐߣߍ߲߫ ߞߏ߫ ߏ߬ ߡߍ߲ ߟߊ߬ߘߍ ߞߍߣߍ߲߫ ߞߊ߬ߝߏ߬ߙߋ߲ ߞߣߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߡߊ߫ ߞߏߟߐ߲߫ ߟߊ߬ߘߍ߬ ߞߏ߫ ߘߐ߫߸ ߊ߬ ߘߏ߲߬ ߕߍ߫ ߥߊߘߌ߫ ߛߐߘߐ߲ߘߊ߫ ߟߊߘߊ߲߫ ߞߏ߫ ߞߊ߬ߟߊߡߊ߬.

ߓߊ߬ߕߏ߲߬ߓߊ ߟߊ߫ ߦߋ߲߬߸ ߦߎ߯ߛߎߝߊ߫ ߞߙߎ߬ߡߊ߫ ߕߘߍ߬ ߞߣߍ ߞߊ߲߬߸ ߊ߬ߟߋ ߦߋ߫ ߖߌ߬ߦߕߊ߬ߟߊ ߟߋ߬ ߘߌ߫، ߏ߬ ߞߵߊ߬ ߦߌ߬ߘߊ߬ ߞߏ߫ ߣߌ߲߬ ߞߏ ߓߘߊ߫ ߘߌ߯ ߊ߬ߟߎ ߟߊ߫ ߓߊ߯ߙߊ ߟߊ߫ ߞߏߛߓߍ߫.

<<ߘߏ߫ ߟߎ߫ ߦߋ߫ ߣߊ߬ ߟߴߊ߬ߟߎ߬ ߟߊ߫ ߖߌ߬ߦߊ߬ߓߍ ߟߋ߬ ߕߊ߬ ߞߊ߲ߡߊ߬ ߅ ߀߀߀ ߤߊ߲߯ ߁߀ ߀߀߀߸ ߣߴߊ߬ ߝߐ߫ ߘߊ߫ ߞߏ߫ ߝߏ߫ ߞߊ߬ ߔߏߔߏ ߟߊߟߐ߬ ߖߛߊ ߞߣߐ߫ ߞߵߏ߬ ߛߙߊ߬߸ ߊ߬ߟߎ߬ ߘߴߊ߬ߟߎ߬ ߞߐߛߊ߬ߦߌ߲߬.>> ߊ߬ ߞߵߏ߬ ߟߊߛߙߋߦߊ߫.

ߊ߬ ߟߊ߫ ߝߐߟߌ߫ ߘߐ߫߸ ߞߊ߬ߝߏ߬ߙߋ߲ ߞߵߊ߬ ߢߌߣߌ߲߫ ߊ߬ߟߎ ߖߌ߬ߦߕߊ߬ߟߊ ߟߎ߫ ߝߍ߬ ߟߊ߬ߘߍ ߘߏ߫ ߘߐ߫߸ ߞߏ߫ ߦߙߐ ߓߘߊ߫ ߘߐߓߍ߲߬، ߏ߬ ߘߐ߫߸ ߞߏ߫ ߊ߬ߟߎ߬ ߞߋߞߋߟߋ߲ ߓߍ߯ ߦߋ߫ ߖߕ ߁߀ ߀߀߀ ߛߊ߬ߙߊ߫ ߕߋ߬ߟߋ ߺ ߕߟߋ߬، ߞߏ߬ߣߌ߲߬߸ ߊ߬ߟߎ߬ ߟߊ߫ ߞߎߡߊ ߟߎ߬ ߞߐߝߍ߬߸ ߓߍ߲߬ ߞߍ߫ ߘߊ߫ ߖߕ߅ ߀߀߀ ߟߋ߬ ߡߊ߬ ߕߋ߬ߟߋ ߞߘߐ߫߸ ߡߐ߰ ߞߋߟߋ߲ ߠߊ߫ ߞߎ߲߬ߠߊ߫.

 ߡߍ߲ ߦߋ߫ ߞߊ߲ߞߊ߲߫ ߘߋ߲ߡߌߛߍ߲߫ ߓߏ߲ߓߊ ߢߊ߰ߘߐ߬ߘߌߦߊ ߥߛߊ߬ߓߊ߰ߦߊ ߛߌ߲߬ߝߏ߲ ߘߏ߫ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߓߏ߬ߙߌ߬ߝߋ߲ ߠߎ߬ ߟߊߟߐ߭ ߛߙߊ߬ ߞߏ ߣߌ߲߬ ߕߍ߫ ߓߍ߲߬، ߓߊߏ߬߸ <<ߌߟߋ ߓߊ߯ ߣߊ߬ ߌ ߟߊ߫ ߞߊߝߋ߫ ߕߊߛߌ߫ ߞߋߟߋ߲ ߡߌ߲߬ ߞߊ߲ߡߊ߬ ߅ ߀߀߀߸ ߊ߰ ߝߐ߫ ߌ ߦߋ߫ ߞߏ߫ ߌ ߦߋ߫ ߅ ߀߀߀ ߝߣߊ߫ ߛߙߊ߬ ߌ ߟߊ߫ ߔߏߔߏ ߝߍ߬߸ ߝߏ߫ ߣߴߌ ߞߵߌ ߞߐߛߊ߬ߦߌ߲߬.>> ߊ߬ ߞߵߏ߬ ߝߐ߫.

ߊ߬ߟߋ ߞߵߊ߬ ߦߌ߬ߘߊ߬ ߞߏ߫ ߛߋ߰ߘߎ߬ ߝߎߙߋ ߟߎ߬ ߟߊ߫ ߜߍߞߣߍ ߢߌ߲߬ ߠߋ߬ ߞߊ߲ߞߊ߲ߞߊ ߟߎ߬ ߝߣߊ߫ ߞߎ߲߬ߠߊ߬ߦߋ߬ߙߋ߲߬ ߦߙߐ ߘߌ߫، ߝߊߦߌߘߊ߫߸ ߞߊ߲ߞߊ߲߫ ߝߣߊ߫ ߟߊ߫ ߕߎߙ ߋߝߍߟ ߟߋ߬ ߕߋ߲߬߸ ߌ ߓߊ߯ ߖߌ߬ߦߊ ߕߊ߬ ߦߋ߲߬ ߌߞߘߐ߫߸ ߊ߬ ߘߌ߫ ߟߐ߲߫ ߞߏ߫ ߌ ߦߋ߫ ߞߊ߲ߞߊ߲߫.

ߞߊ߬ ߓߍ߲߬ ߟߌ߬ߤߟߊ߬ ߟߊ߬ߘߍ ߡߊ߬߸ ߊ߲ ߞߊ߬ ߡߎߛߊ߫ ߝ߭ߊߟߑߘߏ߫ ߛߊ߲ߜ߭ߊߙߋ߫ ߞߟߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߟߐ߲߫ ߞߏ߫ ߕߍ߫ ߣߌ߲߬ ߞߏ ߘߐ߫، ߡߙߊ߬ߘߊ߬ߓߊ ߘߋ߲ߡߌߛߍ߲߫ ߞߎ߲ߕߌ߮ ߝߣߊ߫߸ ߟߊ߬ߡߌߣ ߞߊ߬ߓߊ߸ ߏ߬ ߞߵߊ߬ ߦߌ߬ߘߊ߬ ߞߏ߫ ߞߊ߬ߝߏ߬ߙߋ߲߬ߕߌ߮ ߓߘߊ߫ ߞߎߡߊ߫ ߞߵߊ߬ ߦߌ߬ߘߊ߬ ߞߏ߫ ߥߊߘߌ߫ ߛߙߊ߫ ߞߏ ߕߍ߫ ߕߎ߬ߢߊ߬ ߘߌ߫، ߏ߬ ߘߐ߫߸ ߞߏ߫ ߊ߬ߟߋ ߕߴߛߋ߫ ߘߏ߫ ߜߘߍ߫ ߝߐ߫ ߟߊ߫ ߡߎ߬ߕߎ߲߬.

ߊ߲ ߞߏ߬ߣߌ߲ ߦߋ߫ ߦߙߐ ߡߍ߲ ߘߐ߫ ߕߋ߲߬߸ ߛߓߍߣߍ߲ ߡߍ߲ ߦߋ߫ ߘߌ߫ ߟߊ߫ ߥߊߘߥߌ߫ ߛߙߊߟߊ ߟߎ߫ ߡߊ߬߸ ߞߊ߬ߝߏ߬ߙߋ߲ ߕߐ߮ ߟߋ߬ ߛߓߍߣߍ߲߫ ߊ߬ ߞߊ߲߬، ߞߏ߬ߣߌ߲߬߸ ߞߊ߬ߝߏ߬ߙߋ߲ ߓߋߟߋ߲ߕߌ߮ ߞߊ߲߫ ߞߏ߫ ߊ߬ߟߋ ߟߐ߲߫ ߞߏ߫ ߕߴߊ߬ ߘߐ߫، ߏ߬ ߘߐ߫߸ ߦߙߐ߫ ߞߋߟߋ߲ ߡߍ߲ ߘߐߝߌ߲߬ߣߍ߲߫ ߣߌ߲߬ ߞߏ ߘߐ߫ ߡߎߣߎ߲߬߸ ߏ߬ ߟߋ ߝߟߍ߫ ߣߌ߲߬.