ߞߊ߲ߞߊ߲߫: ߖߓߊ߬ ߓߘߐ ߛߐ߲߬ߞߐ ߓߘߊ߫ ߓߐ߫ ߂߀߀ ߀߀߀ ߘߐ߫ ߞߊ߬ ߛߋ߫ ߃߈߀ ߀߀߀ ߕߍߟߊ ߟߋ߬ ߘߐ߫ ߕߋ߲߬߸ ߖߎ߬ߟߊ ߟߎ߬ ߣߌ߫ ߕߓߌߟߌߟߊ ߟߎ߫ ߛߍ߰ߣߍ߲߫ ߊ߬ ߞߏ ߘߐ߫ ߕߋ߲߬ ߞߏߛߓߍ߫

ߖߊ߬ߓߊ ߛߐ߲߬ߞߐ ߓߘߊ߫ ߦߟߍ߬ ߞߊ߲ߞߊ߲߫ ߘߓߌߘߊ ߟߊ߫ ߕߋ߲߬ ߞߏߛߓߍ߫، ߞߊ߬ߕߎ߲߯߸ ߞߌߘߊ߫ ߂߅ ߓߘߐ ߡߍ߲ ߕߍ߬ߘߍ߫ ߝߙߋ߬ ߟߊ߫ ߖߕ ߂߀߀ ߀߀߀ ߣߌ߫ ߂߂߀ ߀߀߀  ߠߊ߫ ߛߊ߲߭ ߕߊ߬ߡߌ߲߬ߣߍ߲߸ ߏ߬ ߓߘߊ߫ ߦߍ߬ߟߍ߫ ߕߋ߲߬ ߞߊ߬ ߛߋ߫ ߃߆߀ ߀߀߀ ߘߐ߫߸ ߤߊ߲߯ ߃߈߀ ߀߀߀، ߛߐ߲߬ߞߐ߬ ߦߟߍ ߏ߬ ߓߘߊ߫ ߘߌ߯ ߖߎ߬ߟߊ ߟߎ߬ ߟߊ߫ ߖߎ߬ߟߦߊ߬ ߘߊߞߎ߲ ߘߐ߫߸ ߊ߬ ߣߌ߫ ߞߊ߬ ߖߊ߬ߓߊ ߛߊ߲߭ ߜߟߍ߬ߦߊ߬ ߕߓߌߟߌߟߊ ߟߎ߬ ߝߣߊ߫ ߡߊ߬.

ߒ߬ߓߊ߬߸ ߞߊ߯ߙߌ ߢߌ߲߬ ߡߊ߬ ߂߀߂߆ ߞߏ߲ߓߌߕߌ߮ ߕߟߋ߬ ߁߁߸ ߊ߲ ߛߋ߫ ߘߊ߫ ߞߊ߲ߞߊ߲߫ ߘߓߌߘߊ ߟߊ߫߸ ߝߊ߲ߕߊ߫ ߡߊ߯ߘߌ߫ ߞߊ߬ߓߊ ߞߎߡߊ߫ ߘߴߊ߲ ߝߍ߬߸ ߊ߬ߟߋ ߡߍ߲ ߦߋ߫ ߖߓߊ߬ ߖߎߟߊ ߟߎ߬ ߟߊ߫ ߞߊ߲ߕߌ߮ ߘߌ߫ ߖߓߊ߬ ߡߜ߭ߊߖ߭ߍ߲ ߠߊ߫، ߏ߬ ߞߵߊ߬ ߦߌ߬ߘߊ߬ ߞߏ߫ ߖߊ߬ߓߊ ߛߐ߬ߘߐ߲߬ߓߊߟߌߦߊ ߟߋ߬ ߣߊ߬ߣߍ߲߫ ߛߐ߲߬ߞߐ߬ ߦߟߍ ߢߌ߲߬ ߘߌ߫، ߞߊ߬ߕߎ߲߯߸ ߊ߬ ߦߋ߫ ߕߊ߬ ߟߊ߫ ߦߙߐ ߡߍ߲ ߘߐ߫߸ ߘߏ߫ ߓߘߊ߫ ߟߴߊ߬ ߛߐ߲߬ߞߐ ߞߊ߲߬ ߦߋ߲߬߸ ߊ߬ ߡߊߘߏ߬ߣߌ߲߬ ߛߙߊ ߝߣߊ߫ ߜߟߍ߬ߦߊ ߟߊߣߍ߲߫ ߏ߬ ߟߋ ߘߟߊ߫.

<<ߖߊ߬ߓߊ ߛߐ߬ߘߐ߲߬ ߜߏߡߊ߲߫ ߊ߲ ߓߟߏ߫ ߞߐߣߊߞߙߌ߫ ߕߟߋ߬ߝߌ߬ߟߊ߬ߣߍ߲ ߢߌ߲߬ ߘߐ߫߸ ߏ߬ ߟߋ ߓߘߊ߫ ߖߊ߬ߓߊ ߘߊ ߟߊߜߟߍ߬ߦߊ߫ ߞߣߐߟߊ ߘߐ߫، ߖߊ߬ߓߊ ߡߍ߲ ߘߏ߲߬ ߝߣߊ߫ ߦߋ߫ ߝߙߋ߬ ߟߊ߫ ߕߋ߲߬߸ ߊ߬ ߓߍ߯ ߦߋ߫ ߓߐ߫ ߟߊ߫ ߕߎ߬ߓߊ߬ߓߎ߬ߟߊ߫ ߟߋ߬، ߒ ߘߏ߲߬ ߞߵߊ߬ ߡߍ߲߫ ߞߏ߫ ߖߊ߬ߓߊ ߘߊ ߓߘߊ߫ ߜߟߍ߬ߦߊ߫ ߦߋ߲߬، ߊ߬ ߣߌ߫ ߝߣߊ߫߸ ߞߏ߫ ߖߊ߬ߓߊ ߟߊߓߐ ߘߊ߲ߞߊ߲ ߠߊ߫߸ ߏ߬ ߜߍ߬ߟߍ߲߬ߡߊ߲߬ ߘߏߣߍ߲߫.>> ߊ߬ ߞߵߏ߬ ߢߊߝߐ߫.

ߊ߬ߟߋ ߟߊ߫ ߝߐߟߌ߫ ߘߐ߫߸ ߖߊ߬ߓߊ ߟߊߘߏ߲߭ ߞߊ߲ߞߊ߲߫ ߞߣߐ߫߸ ߏ߬ ߞߊ߫ ߜߍ߬ߟߍ߲߬ ߞߏߛߓߍ߫، ߓߊߏ߬߸ ߖߊ߬ߓߊ ߡߍ߲ ߠߎ߬ ߦߋ߫ ߝߙߋ߬ ߟߊ߫ ߜߍߞߊ߲ߠߊ ߘߐ߫ ߦߊ߲߬߸ ߊ߬ ߛߌߦߊߡߊ߲ ߦߋ߫ ߓߐ߫ ߟߊ߫ ߛߣߍ߬ߜ߭ߊߟߌ߫ ߟߋ߬ ߝߍ߬߸ ߞߊ߬ ߣߊ߬ ߘߏ߲߬ ߟߊߓߋ߬߸ ߤߊ߲߯ ߞߊ߬ ߣߊ߬ ߛߋ߫ ߞߊ߲ߞߊ߲߫، ߒ߬ߓߊ߬߸ ߛߌߟߊ߫ ߖߊ߲߫ ߓߐ ߡߍ߲ ߏ߬ ߘߌ߫߸ ߏ߬ ߟߋ ߖߊ߬ߓߊ ߛߐ߲߬ߞߐ ߟߊߦߟߍ߬ ߟߊ߫ ߟߐ߯ߝߍ ߘߐ߫.

ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߊ߲ ߕߍ߬ߘߍ߫ ߖߊ߬ߓߊ ߖߓߊ߬ ߓߘߐ ߞߌߘߊ߫ ߂߅ ߝߙߋ߬ ߟߊ߫ ߞߵߊ߬ ߕߊ߬ ߁߉߅ ߀߀߀ ߡߊ߬ ߤߊ߲߯ ߞߵߊ߬ ߛߌ߰ ߂߂߅ ߀߀߀߸ ߏ߬ ߕߍ߬ߘߍ߫ ߦߋ߲߬ ߛߊߙߏ߲߬، ߢߌ߬ߣߊ߲߫ ߞߏ߬ߣߌ߲߸ ߊ߲ ߧߋ߫ ߥߊ߯ߕߌ ߡߍ߲ ߘߐ߫ ߕߋ߲߬߸ ߖߊ߬ߓߊ ߘߊߡߌ߬ߣߊ߬ߣߍ߲߫ ߊ߲ ߓߟߏ߫ ߃߄߀ ߀߀߀ ߠߋ߬ ߟߊ߫߸ ߊ߲ߠߎ߬ ߡߍ߲ ߠߎ߬ ߦߋ߫ ߣߊ߬ ߟߴߊ߬ ߥߊߝߎ ߘߌ߫߸ ߊ߲ ߧߴߊ߬ ߝߙߋ߬ ߟߴߏ߬ ߟߋ ߟߊ߫، ߡߍ߲ ߠߎ߬ ߦߴߊ߬ ߕߊ߬ ߟߴߊ߲ ߓߟߏ߫ ߞߵߊ߬ ߕߐ߬ߝߍ߬ߦߊ߬߸ ߏ߬ ߟߎ߬ ߘߴߊ߬ ߝߙߋ߬ ߃߅߀ ߀߀߀ ߞߵߊ߬ ߛߌ߰ ߃߆߀ ߀߀߀ ߟߊ߫.>> ߝߊ߲ߕߊ߫ ߡߊ߯ߘߌ߫ ߞߊ߬ߓߊ߫ ߞߵߏ߬ ߕߐ߬ߝߍ߬ߦߊ߬ߟߌ ߞߍ߫.

ߡߊߙߌߦߊߡ ߕߙߊߥߟߋ߫ ߦߋ߫ ߖߓߊ߬ ߖߎߟߊ ߟߋ߬ ߘߌ߫ ߖߓߊ߬ ߞߎ߯ߙ ߘߏ߲߬ߘߊ ߟߊ߫ ߘߓߌߘߊ ߟߐ߯ߝߍ ߘߐ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߕߎ߬ߢߊ ߟߋ߬ ߖߊ߬ߓߊ ߛߐ߲߬ߞߐ߬ ߦߟߍ߬ ߞߏ ߢߌ߲߬ ߘߌ߫، ߞߊ߬ߕߎ߲߯߸ ߊ߬ ߞߊ߲߫ ߞߏ߫ ߖߊ߬ߓߊ ߞߌߘߊ߫ ߂߅ ߓߘߐ ߦߋ߫ ߝߙߋ߬ ߟߴߊ߬ߟߎ߬߬ ߓߟߏ߫ ߃߆߀ ߀߀߀ ߤߊ߲߯ ߃߈߀ ߀߀߀ ߠߋ߬ ߟߊ߫ ߕߋ߲߬، ߞߵߊ߬ ߛߐ߬ߘߐ߲߬߸ ߛߊߙߏ߲߬߸ ߊ߬ ߕߍ߬ߘߍ߫ ߝߙߋ߬ ߟߊ߫ ߂߀߀ ߀߀߀ ߤߊ߲߯ ߂߂߀ ߀߀߀ ߠߋ߬ ߟߊ߫.

ߊߦߌߛ߭ߊ߬ ߓߙߋߕߋ߫ ߝߣߊ߫ ߦߋ߫ ߖߎ߬ߟߊ߬ ߞߋߟߋ߲ ߏ߬ ߟߋ ߘߏ߫ ߘߌ߫ ߘߓߌߘߊ ߕߍߡߊ߬߸ ߏ߬ ߞߵߊ߬ ߦߌ߬ߘߊ߬ ߞߏ߫ ߖߊ߬ߓߊ ߛߐ߲߬ߞߐ ߟߊ߫ ߦߍ߬ߟߍ ߣߌ߲߬ ߓߘߊ߫ ߘߌ߯ ߊ߬ߟߎ߬ ߟߊ߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬.

<<ߊ߲ ߕߍ߬ߘߍ߫ ߓߐ߬ߘߐ ߕߊ߬ ߟߊ߫ ߂߀߀ ߀߀߀ ߤߊ߲߯ ߂߂߀ ߀߀߀ ߠߊ߫ ߕߎ߬ߡߊ ߡߍ߲߸ ߊ߲ ߕߘߍ߬ ߛߋ߫ ߟߊ߫ ߓߘߐ߬ ߛߋߦߌ߲߫ ߣߌ߫ ߞߐ߫ ߝߙߋ߬ ߟߊ߫ ߕߋ߬ߟߋ ߞߘߐ߫، ߞߏ߬ߣߌ߲߬ ߕߋ߲߭ߕߋ߲߭ ߣߌ߲߬ ߘߐ߫߸ ߛߐ߲߬ߞߐ ߟߊ߫ ߜߟߍ߬ߦߊ ߞߏߛߐ߲߬߸ ߊ߲ ߘߌ߫ ߛߋ߫ ߕߋ߬ߟߋ߫ ߝߌ߬ߟߊ ߞߍ߫ ߟߊ߫ ߓߘߐ߬ ߞߋߟߋ߲ ߤߊߡߊ߲߫ ߓߐ߬ߘߐ߫ ߝߌ߬ߟߊ ߞߎ߲߬ߠߊ߫.>> ߊ߬ ߞߵߏ߬ ߟߊߛߙߋߦߊ߫.

ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߛߐ߲߬ߞߐ߬ ߜߟߍߦߊ ߣߌ߲߬ ߓߘߊ߫ ߛߋ߫ ߕߓߌߟߌߟߊ߫ ߣߊ߫ ߛߊ߲ߠߊ ߟߎ߬ ߝߣߊ߫ ߡߊ߬.

ߊߦߌߛ߭ߊ߬ ߓߙߋߕߋ߫ ߞߵߊ߬ ߦߌ߬ߘߊ߫ ߏ߬ ߘߊߞߎ߲ ߘߐ߫ ߞߏ߫: <<ߖߊ߬ߓߊ ߞߌߘߊ߸ ߡߏ߬ߛߏ ߟߎ߫ ߘߋ߬ߙߌ߬ߣߴߊ߬ ߛߊ߲߬ ߠߊ߫ ߖߕ ߁߀ ߀߀߀ ߠߋ߬ ߟߊ߫߸ ߏ߬ ߦߋ߫ ߝߙߋ߬ ߟߊ߫ ߓߌ߭ߓߌ߭ ߣߌ߲߬ ߘߐ߫ ߖߕ ߁߈ ߀߀߀ ߠߋ߬ ߟߊ߫، ߐ߲߬ߤߐ߲߫߸ ߌߟߋ ߓߊ߯ ߣߊ߬ ߟߐ߮ ߘߐ߫߸ ߖߓߊ߬ ߛߐ߲ߞߐ ߓߊ߯ ߓߐ߫ ߌ ߟߊ߫ ߣߊ߫ ߛߐ߲ߞߐ ߘߐ߫߸ ߡߎ߲߬ ߕߏߕߐ߫؟>> ߊ߬ ߞߵߊ߬ ߖߍ߬ߘߍ߫ ߢߌ߲߬ߣߌ߲߬ߞߊ߫ ߏ߬ ߡߊ߬.

ߊ߲ ߞߊ߬ ߝߊߕߎߡߊߣߊ߬ ߞߋߕߊ߬ ߦߋ߫߸ ߏ߬ ߣߊ߬ߣߍ߲߫ ߣߊ߫ ߛߊ߲߫ ߞߊ߲ߡߊ߬ ߘߓߌߘߊ ߟߊ߫، ߊ߬ߟߋ ߝߣߊ߫ ߞߊ߬ ߖߓߊ߬ ߞߏ߬ ߞߎߡߊ ߢߌ߲߬ ߠߋ߬ ߝߐ߫߸ ߞߏ߫ ߤߊߟߵߊ߬ ߕߴߛߋ߫ ߟߊ߫ ߖߊ߬߬ߓߊ ߛߊ߲߬ ߠߊ߫ ߕߋ߲߬ ߖߍ߬ߘߍ.

<<ߒߠߋ ߣߊ߬ߣߍ߲߫ ߣߊ߫ ߛߊ߲߫ ߞߊ߲ ߠߋ߬ ߡߊ߬߸ ߞߏ߬ߣߌ߲߬ ߒ ߞߵߊ߬ ߛߐ߬ߘߐ߲߬ ߖߊ߬ߓߊ ߛߐ߲߬ߞߐ ߓߘߊ߫ ߦߟߍ߬ ߞߏߖߎ߯ߦߊ߫، ߞߵߊ߬ ߛߐ߬ߘߐ߲߬߸ ߣߌ߫ ߖߊ߬ߓߊ ߕߍ߫߸ ߣߊ ߕߴߛߋ߫ ߟߊߘߊ߲߫ ߠߊ߫، ߊ߬ ߞߏ ߓߘߊ߫ ߞߍ߫ ߛߍ߱ ߘߴߊ߲ ߞߊ߲߬ ߞߏߛߓߍ߫.>> ߊ߬ߟߋ߫ ߞߵߏ߬ ߦߌ߬ߘߊ߬.

ߖߊ߬ߓߊ ߛߐ߲߬ߞߐ ߟߊ߫ ߦߍ߬ߟߍ ߣߌ߲߬ ߞߏߛߐ߲߬߸ ߡߏ߬ߛߏ ߘߏ߫ ߟߎ߫ ߓߘߊ߫ ߡߊ߲߬ߝߋ߲߬ߖߌ߬ ߞߏ ߓߐ߫ ߊ߬ߟߎ߬ ߟߊ߫ ߕߓߌߟߌ ߢߍߥߟߊ ߘߐ߫ ߡߎߣߎ߲߬߸ ߞߵߊ߬ ߕߏ߫ ߝߌߘߊ ߣߌ߫ ߡߊ߲߬ߝߋ߲߬ ߜߘߍ߫ ߟߎ߫ ߡߊ߬߸ ߡߍ߲ ߠߎ߬ ߘߌ߫ ߛߋ߫ ߢߊ߬ ߟߊ߫ ߖߊ߬ߓߊ ߞߐ߫، ߏ߬ ߘߏ߲߬ ߝߣߊ߫ ߡߊ߲߬ߕߙߐ ߦߋ߫ ߖߍ߯ ߖߎߟߊ ߟߎ߬ ߝߣߊ߫ ߛߐ߬ߘߐ߲߬ ߠߊ߫ ߟߋ߬، ߒ߬ߓߊ߬߸ ߡߙߊߡߊ߫ ߖߊߟߏ߫ ߡߍ߲ ߦߋ߫ ߖߍ߯ ߖߎߟߊ߫ ߘߌ߫ ߘߓߌߘߊ ߟߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߣߌ߫ ߖߊ߬ߓߊ ߡߊ߫ ߛߊ߲߬߸ ߖߍ߮ ߝߣߊ߫ ߦߋ߫ ߡߊߛߌ߬ ߟߊ߫ ߟߋ߬، ߊ߬ߟߋ ߟߊ߫ ߝߐߟߌ߫ ߘߐ߫߸ ߖߊ߬ߓߊ ߛߐ߲߬ߞߐ ߓߊ߯ ߜߟߍ߬ߦߊ߬߸ ߡߐ߰ ߛߌߦߊߡߊ߲߫ ߘߴߊ߬ ߓߊ߲߬ ߊ߬ ߛߊ߲߬ ߠߊ߫߸ ߏ߬ ߓߊ߯ ߞߍ߫߸ ߖߍ߯ ߛߊ߲ ߘߌ߫ ߘߐ߯ߦߊ߫߸ ߓߊߏ߬ ߖߍ߯ߖߌ ߕߍ߫ ߥߊ߫ ߖߊ߬ߓߊ ߞߐ߫.

<<ߣߌ߫ ߖߊ߬ߓߊ ߛߐ߲߬ߞߐ ߜߟߍ߬ߦߊ߬ ߘߊ߫߸ ߡߊ߲߬ߝߋ߲߬ߖߌ ߕߴߛߋ߫ ߕߓߌ߫ ߟߊ߫߸ ߝߏ߫ ߖߊ߬ߓߊ ߟߋ߬ ߦߋ߫ ߊ߬ ߘߐ߫، ߖߍ߮ ߞߛߊߣߍ߲߫߸ ߖߊ߬ߓߊ ߟߋ߬ ߦߴߏ߬ ߞߛߊ ߕߍ߰ ߟߊ߫، ߤߊߟߌ߬ ߞߌߣߌ߲߫ ߕߓߌߟߊ ߡߍ߲ ߠߎ߬ ߦߋ߫ ߖߍ߮ ߛߊ߲߬ ߠߊ߫߸ ߣߌ߫ ߖߓߊ߬ ߕߴߦߋ߲߬߸ ߊ߬ߟߎ߬ ߕߍ߫ ߛߴߊ߬ ߛߊ߲߬ ߠߊ߫.>> ߊ߬ ߞߵߏ߬ ߟߊߛߋ߫.

ߖߎ߬ߟߊ ߟߎ߫ ߓߊ߬߸ ߖߓߊ߬ ߛߊ߲߬ߠߊ ߟߎ߫ ߓߊ߬߸ ߊ߲ ߛߋ߫ ߘߊ߫ ߡߍ߲ ߠߎ߬ ߡߊߛߐ߬ߘߐ߲߬ ߠߊ߫ ߘߓߌߘߊ ߟߐ߯ߝߍ ߘߐ߫߸ ߏ߬ ߟߎ߬ ߓߍ߯ ߞߵߊ߬ߟߎ߬ ߞߊ߲ߠߊߘߌ߫ ߝߊ߰ߡߊ ߟߎ߫ ߡߊ߬ ߛߐ߲߬ߞߐ߬ ߟߊ߬ߖߌ߰ ߞߏ ߟߋ߬ ߘߐ߫، ߐ߲߸ ߞߊ߬ ߞߐ߲߰ ߖߊ߬ߓߊ ߛߐ߲߬ߞߐ ߖߌ߱ ߢߍ߫߸ ߘߊ ߞߏ߬ߣߌ߲ ߟߐ߬ߣߍ߲߫ ߡߎ߲߬ ߡߊ߬߸ ߏ߬ ߟߋ ߖߊ߬ߓߊ ߛߐ߬ߘߐ߲߬ ߜߏߦߊ ߘߌ߫، ߒ߬ߓߊ߬߸ ߦߊ߬ߣߴߊ߬ ߛߐ߬ߘߐ߲ ߣߐ߰ߦߊ߬ߕߐ߫߸ ߊ߬ ߛߐ߲߬ߞߐ ߓߘߊ߫ ߞߍ߫ ߛߏ߬ ߛߐ߲ߞߐ ߘߌ߫߸ ߓߊߏ߬߸ ߞߌߘߊ ߦߋ߫ ߁߈ ߀߀߀ ߠߋ߬ ߘߌ߫ ߦߙߐ ߘߏ߫ ߟߎ߫ ߘߐ߫߸ ߟߐ߯ߝߍ ߡߍ߲ ߠߎ߬ ߡߊߕߊ߯ߣߍ߲߫ ߛߏ߫ ߞߣߐߟߊ ߟߊ߫߸ ߏ߬ ߦߋ߫ ߛߋ߫ ߟߊ߫ ߟߋ߬ ߂߀ ߀߀߀ ߘߐ߫ ߝߛߊߦߌ߫. ߏ߬ ߓߘߊ߫ ߞߍ߫ ߜߟߍ߬ߦߊ ߘߌ߫ ߕߓߌߟߌߟߊ ߟߎ߬ ߡߊ߬ ߞߊ߲ߞߊ߲߫ ߞߣߐ߫ ߕߋ߲߬ ߞߏߛߓߍ߫.