ߞߊ߲ߞߊ߲߫ ߡߙߊ߬ߘߊ߬ߓߊ ߟߊ߬ߞߟߏ߬ߞߟߏ߬ߟߌ ߗߋߕߌ߯ߘߊ ߓߘߴߊ߬ ߦߌ߬ߘߊ߬ ߞߏ߫ ߜߟߍ߬ߦߊ ߦߴߊ߬ߟߎ߫ ߞߊ߲߬ ߟߞߊ߬ߙߊ߲߬ߠߌ߲߬ߠߊ߬ ߞߏ ߘߐ߫، ߓߊߏ߬߸ ߊ߬ߟߎ߫ ߡߊ߬ߞߏ ߦߋ߫ ߟߞߊ߬ߙߊ߲߬ߠߌ߲߬ߠߊ߫ ߡߐ߰ ߇߃߆ ߟߋ߬ ߟߊ߫ ߕߋ߲߬߸ ߆߃߀ ߞߊ߫ ߞߊߊ߲߫ ߞߊ߬ ߥߊ߫ ߓߊߖߎ߫ ߞߊߙߊ߲ߕߊ ߟߎ߫ ߟߋ߬ ߟߊ߫߸ ߁߀߆ ߘߌ߫ ߥߊ߫ ߛߊ߯ߘߊ߫ ߝߌߟߊߣߊ߲ ߠߊ߫، ߖߊ߬ߕߋ ߡߍ߲ ߏ߬ ߘߌ߫߸ ߏ߬ ߝߐ߫ ߘߴߊ߲ ߧߋ߫ ߞߊ߲ߞߊ߲߫ ߡߟߗ ߖߘߍ߬ߓߊ߬ߞߎ߲ ߠߋ߬ ߓߟߏ߫߸ ߛߎ߬ߟߋ߬ߡߊ߯ߣ ߘߊ߬ߝߋ߸ ߞߵߊ߬ ߦߌ߬ߘߊ߬ ߞߏ߫ߓߊߖߎ߫ ߞߊߙߊ߲ߕߊ ߟߎ߫ ߟߋ߬ ߟߊ߫ ߟߞߊ߬ߙߊ߲߬ߠߌ߲߬ ߞߏ ߛߐ߲߬ߖߊ ߦߴߊ߬ߟߎ߫ ߞߊ߲߬ ߕߋ߲߬ ߞߏߛߓߍ߫، ߣߴߏ߬ ߕߍ߫߸ ߡߐ߰ ߂ ߂߂߃ ߦߋ߫ ߓߊ߯ߙߊ߫ ߟߊ߫ ߓߊߖߎߟߞߊ ߟߎ߬ ߣߌ߫ ߛߊ߯ߘߊ߫ ߝߌߟߊߣߊ߲ ߞߣߐ߫ ߕߋ߲߬ ߝߛߊߦߌ߫߸ ߞߏ߬ߣߵߏ߬ ߕߍ߫ ߓߐߟߌ߫ ߞߍ߫ ߟߊ߫߸ ߞߊ߬ ߓߍ߲߬ ߞߊ߬ߙߊ߲߬ߕߊ ߟߊ߫ ߛߌߦߊߦߊ ߡߊ߬.

ߡߟߗ ߞߊ߲߫ ߞߏ߫ ߣߴߌ ߞߵߊ߬ ߡߊߝߟߍ߫߸ ߡߐ߰ ߂ ߂߂߃ ߏ߬ ߘߐ߫߸ ߁߃߆߁ ߦߋ߫ ߦߋ߲߬߸ ߏ߬ ߟߎ߬ ߦߋ߫ ߟߞߊ߬ߙߊ߲߬ߠߌ߲ ߞߍ߫ ߟߊ߫ ߓ\ߊߖߎ߫ ߞߊߙߊ߲ߕߊ ߟߎ߫ ߟߋ߬ ߟߊ߫߸ ߊ߬ ߕߐ߬ ߈߆߂߸ ߏ߬ ߟߎ߬ ߦߋ߫ ߛߊ߯ߘߊ߫ ߝߌߟߊߣߊ߲ ߠߋ߬ ߟߊ߫، ߡߐ߰ ߖߊ߬ߕߋ ߡߍ߲ ߏ߬ ߘߌ߫߸ ߊ߬ߟߎ߬ ߞߊ߲߫ ߞߏ߫ ߏ߬ ߟߎ߬ ߕߍ߫ ߛߴߊ߬ߟߎ߫ ߡߊ߬ߞߏߢߊ߬ ߟߊ߫ ߞߊ߬ߙߊ߲߬ߓߏ߲ ߠߎ߬ ߞߣߐ߫߸ ߝߏ߫ ߞߵߊ߬ߟߎ߬ ߡߊߞߊ߬ߝߏ߫ ߟߋ߬.

ߟߞߊ߬ߙߊ߲߬ߠߌ߲߬ ߞߏ ߡߴߊ߬ ߘߓߐ߫ ߘߋ߬، ߏ߬ ߟߋ ߕߎ߬ߢߊ ߘߌ߫.>> ߊ߬ ߞߵߏ߬ ߟߊߟߐ߬، ߊ߬ ߟߊ߫ ߟߊ߬ߞߙߐ߬ߛߌ߬ߟߌ ߛߋ߫ ߘߊ߫ ߓߊߖߎ߫ ߞߊߙߊ߲ߕߊ ߟߎ߫ ߟߋ߬ ߡߊ ߓߘߍߞߍ߭߸ ߞߏ߫ ߛߍ߱ ߦߴߏ߬ ߟߎ߫ ߟߋ߬ ߟߊ߫ ߞߏ ߘߐ߫ ߕߋ߲߬ ߝߋߝߋ߫، ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߢߊ ߞߊ߫ ߞߊ߲߫ ߞߊ߬ ߟߐ߬ ߓߍ߯ ߘߞߐ߫߸ ߒ߬ߞߊ߬ <<ߊ߬ ߜߋ߲ߜߋ߲߫ ߓߊߖߎ߫ ߞߊߙߊ߲ߕߊ ߟߎ߬߸ ߜߟߍ߬ߦߊ ߡߍ߲ ߏ߬ ߟߎ߬ ߟߊ߫ ߟߞߊ߬ߙߊ߲߬ߠߌ߲߬ ߞߏ ߘߐ߫ ߕߋ߲߬߸ ߘߊ ߕߍ߫ ߛߴߊ߬ ߓߍ߯ ߝߐ߫ ߟߊ߫.>>

ߘߎ߰ߣߍ߲ ߘߏ߫ ߟߎ߫ ߓߍ߫߸ ߞߊ߬ߙߊ߲߬ߡߐ߰ ߞߋߟߋ߲߫ ߠߋ߬ ߞߊ߬ߙߊ߲߬ߕߊ߬ ߞߎ߲ߕߎߙߎ߲ ߠߊߓߊ߯ߙߊ߫ ߟߊ߫߸ ߘߏ߫ ߟߎ߫ ߕߊ ߦߋ߫ ߝߌ߬ߟߊ߬، ߖߐ߲߰ߛߊ߫ ߞߊ߬ߙߊ߲ ߞߊߣߊ߬ ߟߊߟߐ߬ ߦߙߐ ߘߏ߫ ߟߎ߫ ߘߐ߫߸ ߡߟߗ ߞߊ߲߫ ߞߏ߫ ߊ߬ߟߎ߬ ߦߋ߫ ߛߐ߲߬ ߠߊ߫߸ ߞߊ߬ ߞߊ߬ߙߊ߲߬ߓߏ߲ ߘߏ߫ ߟߎ߫ ߞߍ ߢߐ߲߮ ߞߊ߲߬߸ ߟߞߊ߬ߙߊ߲߬ߠߌ߲߬ߠߊ߬ ߞߋߟߋ߲ ߦߋ߫ ߛߴߊ߬ ߖߊ߲߬ߕߏ߬ ߟߴߏ߬ ߟߎ߬ ߘߐ߫߸ ߛߊ߫ ߞߊ߬ߙߊ߲ ߘߌ߫ ߞߍ߫ ߢߊ ߡߍ߲ ߡߊ߬.

ߛߎ߬ߟߋ߬ߡߊ߯ߣ ߘߊ߬ߝߋ ߟߊ߫ ߝߐߟߌ߫ ߘߐ߫߸ ߟߞߊ߬ߙߊ߲߬ߠߌ߲߬ߠߊ߬ ߞߏ ߜߟߍ߬ߦߊ ߣߌ߲߬ ߞߎ߲߭ ߕߍ߫ ߘߏ ߜߘߍ߫ ߘߌ߫߸ ߛߊ߲߭ ߺ ߊ ߺ ߛߊ߲߬߸ ߟߞߊ߬ߙߊ߲߬ߠߌ߲߬ߠߊ ߟߎ߬ ߘߌ߫ ߟߊߣߡߐ߬߸ ߛߊ߬ߦߊ ߦߋ߫ ߞߍ߫ ߟߊ߫߸ ߞߊ߬ߙߊ߲߬ߘߋ߲ ߦߙߌߞߊ ߘߏ߲߬ ߦߋ߫ ߡߊߞߊ߬ߝߏ߬ ߟߊ߫ ߟߋ߬ ߛߊ߲߭ ߺ ߊ ߺ ߛߊ߲߬، ߊ߬ ߘߏ߲߬߸ ߞߏ߫ ߞߊ߬ߦߌ߯ ߕߊ߬ߟߌ ߡߍߠ߲ ߞߍ߫ ߘߊ߫ ߂߀߂߄ ߠߊ߫߸ ߡߟߗ ߞߊ߲߫ ߞߏ߫ ߕߊ߬ߟߌ߬ ߜߘߍ߫ ߡߊ߫ ߞߍ߫ ߏ߬ ߞߐ߫ ߡߎߣߎ߲߬. ߏ߬ ߘߐ߫߸ ߞߏ߫ ߞߊ߬ߙߊ߲߬ߘߋ߲ ߦߋ߫ ߛߌߦߊߦߊ߫ ߟߊ߫ ߢߊ ߡߍ߲߸ ߝߏ߫ ߕߊ߬ߟߌ ߦߋ߫ ߞߍ߫ ߕߋ߲߬ ߠߋ߬߸ ߣߴߏ ߕߍ߫߸ ߊ߬ ߜߟߍ߬ߦߊ ߕߍ߫ ߓߊ߲߫.

ߜߟߍ߬ߦߊ ߢߌ߲߬ ߘߊ߲ߘߊ ߘߐ߫ ߏ߬ ߘߐ߫߸ ߞߊ߬ߙߊ߲߬ߘߋ߲ ߡߏߦߌߓߊ߮ ߟߎ߬ ߟߊ߫ ߘߍ߬ߞߙߎ (ߞߡߘ=APAE) ߦߋ߫ ߟߞߊ߬ߙߊ߲߬ߠߌ߲߬ߠߊ ߘߏ߫ ߟߎ߫ ߕߊ߬ ߟߊ߫ ߛߊߛߋ ߟߊ߫߸ ߞߵߊ߬ߟߎ߫ ߟߐ߬ ߏ߬ ߟߎ߫ ߛߊ߬ߙߊ ߟߊ߫߸ ߞߊ߬ ߞߎ߲߬ߠߊ߬ߛߌ߮ ߟߊ߫ ߟߞߊ߬ߙߊ߲߬ߠߌ߲߬ߠߊ ߟߎ߬ ߓߟߏߡߊߘߍ߬ߡߍ߲߬، ߡߟߗ ߛߍߥߊߣߍ߲߫ ߘߋ߲ߓߊߕߌ߮ ߟߎ߬ ߟߊ߫ ߡߊ߬ߘߍ߬ߡߍ߲߬ߠߌ߲ ߏ߬ ߟߊ߫ ߞߏߛߓߍ߫߸ ߓߊߏ߬߸ ߞߏ߫ ߏ ߟߋ ߞߏߛߐ߲߬ ߓߌ߬߸ ߞߊ߬ߙߊ߲ ߦߋ߫ ߞߍ߫ ߟߊ߫ ߦߙߐ߫ ߛߌߦߊߡߊ߲߫ ߘߐ߫.

ߡߟߗ ߖߌ߱ ߟߊߣߍ߲߫ ߞߏ߫ ߞߋߟߋ߲ ߡߍ߲ ߞߊ߲߬ ߟߞߊ߬ߙߊ߲߬ߠߌ߲߬ߠߊ߬ ߞߏ߬ ߜߟߍߦߊ ߣߌ߲߬ ߘߊ߲ߘߊ ߘߐ߫ ߕߋ߲߬߸ ߏ߬ ߟߋ ߦߋ߫ ߕߊ߬ߟߌ߬ ߞߏ߬ ߞߎߡߊ ߢߌ߲߬ ߘߌ߫، ߓߊߏ߬߸ ߊ߬ ߝߐߣߍ߲߫ ߞߏ߫ ߕߊ߬ߟߌ ߞߍߕߐ߫ ߖߡߊ߬ߣߊ ߝߊ߲߭ ߓߍ߯ ߘߐ߫߸ ߞߊ߬ ߟߞߊ߬ߙߊ߲߬ߠߌ߲߬ߠߊ߫ ߡߐ߰ ߆ ߀߀߀ ߕߊ߬߸ ߏ߬ ߜߊ߬ߛߊ ߟߐ߯ߟߊߣߍ߲߫ ߞߵߊ߬ ߓߌ߬ߟߊ߬ ߞߏߓߌߕߌ߮ ߕߟߋ߬ ߁߇ ߟߋ߬ ߟߊ߫.

ߡߟߗ ߞߊ߲߫ ߕߏ߫ ߕߊ߬ߟߌ ߡߍ߲ ߞߍߕߐ߫ ߏ߬ ߘߌ߫߸ <<ߏ߬ ߕߍߣߊ߬ ߝߙߋߞߋ ߓߍ߯ ߝߎߟߋ߲߫ ߠߊ߫ ߛߊ߫߸ ߞߏ߬ߣߵߊ߬ ߘߌ߫ ߛߌߦߊߡߊ߲߫ ߓߐ߫ ߊ߬ ߟߊ߫، ߏ߬ ߟߋ ߞߏߛߐ߲߬߸ ߊ߲ ߛߌ߰ߣߍ߲߫ ߞߊ߬ ߕߊ߬ߟߌ߬ ߞߏ ߣߌ߲߬ ߡߊߞߐ߬ߣߐ߲߫ ߠߋ߬ ߕߋ߲߬ ߊ߬ ߢߊ ߖߍ߬ߘߍߖߍ߬ߘߍ ߡߊ߬.>> ߊ߬ ߞߵߏ߬ ߦߌ߬ߘߊ߬.

ߊ߬ ߞߏ߬ߣߌ߲ ߡߊ߫ ߝߐ߫߸ ߣߌ߫ ߕߊ߬ߟ ߞߍ߫ ߘߊ߫߸ ߞߊ߲ߞߊ߲߫ ߞߍߕߐ߫ ߖߊ߬ߕߋ ߢߌ߲߬ ߠߋ߬ ߛߐ߬ߘߐ߲߬ ߠߊ߫، ߛߎ߬ߟߋ߬ߡߊ߯ߣ ߘߊ߬ߝߋ ߞߵߊ߬ ߦߌ߬ߘߊ߬ ߞߏ߫ ߣߕߌ߫ ߕߊ߬ߟߌ ߓߊ߲߫ ߘߊ߫߸ ߝߏ߫ ߞߵߊ߬ ߞߏ ߟߞߊߟߌߦߊ߫ ߟߋ߬، ߓߊߏ߬߸ <<ߣߌ߫ ߕߊ߬ߟߌ ߡߍ߲߫ ߘߊ߫ ߞߊ߬ ߞߊߙߏ ߓߐ߫߸ ߤߊ߲߯ ߞߊߙߏ߫ ߝߌ߬ߟߊ߬߸ ߝߏ߫ ߣߴߊ ߞߏ ߕߐ߭ ߕߊ߬ߡߌ߲߬ ߘߊ߫ ߜߟߍ߬ߦߊ߬ ߟߊ߫ ߞߊ߬ߙߊ߲߬ ߦߙߐ ߟߎ߬ ߘߐ߫.>>