ߤߊߓߌ߫ ߛߋߞߎ߫ ߛߊ߬ߞߐ߬ ߦߋ߫ ߒߞߏ ߞߊߙߊ߲ߡߐ߯ ߗߋߘߊߕߌ߮ ߟߋ߬ ߘߌ߫߸ ߡߍ߲ ߦߋ߫ ߘߍ߬ߟߐ߲߬ߘߐ߬ߦߊ߬ߟߊ߫ ߣߌ߫ ߒߞߏ ߛߍ߬ߘߏ߲߬ߠߊ߫ ߘߌ߫߸ ߏ߬ ߟߋ ߣߐ߬ ߝߊ߬ߙߊ߲߬ߛߌ߬ ߞߊ߲ ߞߊ߬ߝߊ ߟߎ߬ ߡߊߞߊ߬ߝߏ߬ ߟߊ߫ ߌߞߐ߫߸ ߊ߬ ߟߊ߫ ߞߎ߬ߛߊ߲߬ߧߊ ߘߌ߲߬ߞߌߙߊ ߘߏ߫ ߓߌ߬ߟߊ ߘߐ ߖߊ߬ߡߊ ߛߊ߬ߥߏ߬ ߘߐ߫، ߞߊ߬ߕߎ߲߯߸ ߊ߬ ߣߐ߬ ߞߟߊ߬ ߞߟߊߒߞߋ߫ ߟߋ߬ ߛߓߍ߫ ߟߊ߫߸ ߡߍ߲ ߕߐ߯ ߞߏ߫: <<ߞߊ߬ ߡߊ߬ߞߎ߲ ߞߐ ߞߊߘߌ߫ ߞߎߡߊߓߘߎ ߟߊ߫: ߞߊ߬ ߛߋ߫ ߞߎߡߊ ߛߊ߲߬ߞߊߟߊ߲ ߠߊߦߟߍ߬ ߟߊ߫ ߡߟߋߞߎߡߟߋߞߎ ߘߌ߫.>> ߏ߬ ߡߍ߲ ߜߌ߬ߙߌ߲߬ߘߌ߬ߣߍ߲߫ ߤߊߙߑߡߊߕߊ߲߫ ߖߌߣߋ ߓߟߏ߫.

ߞߊ߬ߝߊ ߣߌ߲߬ ߓߎ߲ߓߎ߲ߣߍ߲߫ ߖߡߊ߬ ߘߐ߬ ߞߎߡߊ ߞߍߞߌߦߊ ߟߋ߬ ߡߊ߬߸ ߤߊߓߌ߫ ߛߋߞߎ ߦߋ߫ ߞߎߡߊ߫ ߟߊ߫ ߜߟߍ߬ߦߊ ߘߏ߫ ߟߎ߫ ߟߋ߬ ߞߊ߲߬ ߞߊ߬ߝߊ ߣߌ߲߬ ߘߐ߫߸ ߡߍ߲ ߦߋ߫ ߡߐ߰ ߛߌߦߊߡߊ߲߫ ߛߐ߬ߘߐ߲߬ ߠߊ߫: ߝߏ߫ ߊ߬ߟߎ߬ ߘߌ߫ ߘߛߍ߫ ߊ߬ߟߎ߬ ߡߙߌߦߊ ߝߐ߫ ߟߴߊ߬ߟߎ߫ ߛߊ߬ߥߏ ߟߊ߫ ߖߊ߬ߡߊ ߢߊߞߘߐ߫، ߞߎߡߊ ߟߋ߬ ߞߊ߲߫ ߞߊ߲߫ ߞߵߊ߬ߟߎ ߡߙߌߦߊ ߝߐ߫߸ ߓߊ߬ߙߵߊ߬ߟߎ ߘߌ߫ ߕߎ߲߰ ߞߎߡߊ ߖߍ߬ߘߍ ߞߐ߫.

ߊ߬ ߞߵߊ߬ ߝߐ߫ ߊ߬ ߟߊ߫ ߞߊ߬ߝߊ ߣߌ߲߬ ߞߐߝߘߊ ߝߘߎ߬ߝߍ߬ߕߊ ߘߐ߫ ߏ߬ ߟߋ ߘߐ߫ ߞߏ߫: <<ߞߏ ߘߏ߫ ߦߴߌ ߞߣߐ߫ ߞߵߊ߬ ߝߐ߫߸ ߞߏ߬ߣߌ߲ ߞߎߡߊ ߓߊ߯ ߛߴߌ ߓߟߏ߫ ߢߊ ߡߍ߲ ߌߞߘߐ߫߸ ߞߎߡߊߘߋ߲ ߠߎ߬ ߘߌ߫ ߓߐ ߘߊߡߌ߬ߣߊ߬ ߌ ߞߣߐ߫߸ ߞߵߊ߬ߟߎ߬ ߕߎߣߎ߲߫ ߌ ߡߊ߬.>>

ߒ߬ߓߊ߬߸ ߞߊ߬ߝߊ ߣߌ߲߬ ߦߋ߫ ߡߎ߬ߙߊ߲߬ ߞߟߏߡߊ߫ ߟߋ߬ ߘߌ߫߸ ߞߊ߬ ߖߛߎ߬ ߘߐ߬ ߡߊ߬ߞߕߌ߬ ߓߊ߲ߓߊߟߌ ߞߟߍ߬߸ ߏ߬ ߡߍ߲ ߦߋ߫ ߖߡߊ߬ ߘߐ߬ ߞߎߡߊ ߜߟߍ߬ߦߊ߬ ߦߙߐ ߘߌ߫߸ ߞߊ߬ ߟߊߒߖߘߍߟߊ ߓߊ߲ߓߊ߲߫߸ ߏ߬ ߦߴߊ߬ ߟߌߟߌ߲ ߘߌ߫߸ ߞߊ߬ ߡߟߋߞߎߡߟߋߞߎ ߟߊߛߐ߬ߘߐ߲߬߸ ߏ߬ ߡߍ߲ ߦߴߊ߬ ߝߙߋ ߣߴߊ߬ ߘߋ߲ ߘߌ߫߸ ߛߊ߫ ߖߊ߬ߡߊ ߘߌ߫ ߕߡߌߦߊ ߛߐ߬ߘߐ߲߬ ߌ ߟߊ߫ ߞߎߡߊ ߟߊ߫.

ߛߊ߬ߞߐ߬ߗߍ ߞߵߊ߬ ߝߐ߫ ߏ߬ ߟߋ ߘߐ߫ ߖߘߍ߬ ߡߊ߬ߢߌߣߌ߲ߞߊ ߘߐ߫߸ ߞߏ߫ : <<ߌ ߘߌ߫ ߛߋ߫ ߓߐ߫ ߟߊ߫ ߌ ߡߙߌߦߊ ߢߊߝߐ߫ ߢߊ ߓߊ߬ߟߌ ߘߐ߫ ߘߌ߬؟ ߌ ߘߌ߫ ߛߋ߫ ߓߐ ߟߊ߫ ߞߎߡߊ߫ ߟߊߡߎߣߎ߲ߡߎߣߎ߲ߣߍ߲߫ ߝߐ ߘߎ߲߭ ߘߐ߫ ߘߌ߬؟ ߞߵߌ ߡߙߌߦߊ ߝߐ߫ ߦߏ߫ ߌ ߖߍ߬ߘߍ ߦߴߊ߬ ߝߍ߬ ߢߊ ߡߍ߲ ߡߊ߬؟>> ߒ߬ߓߊ߬߸ ߤߊߓߌ߫ ߛߋߞߎ ߞߊ߲߫ ߞߏ߫ ߊ߬ ߟߊ߫ ߞߊ߬ߝߊ ߣߌ߲߬ ߦߴߏ߬ ߞߣߐ߬ߘߐ߬ߝߟߌ ߟߋ߬ ߓߊ߲߫ ߠߊ߫.

ߊߟߎ߫ ߦߴߊ߬ ߟߐ߲߫߸ ߒߞߏ ߘߋ߬ߙߌ߬ߘߊ߫ ߡߊ߲߬ߘߋ߲߬ ߡߍ߲ ߦߋ߫ ߒߞߏ ߘߋ߬ߙߌ߬ߘߊ߬ ߝߟߐߝߟߐ ߘߌ߫ ߟߐ߲ߠߌ߲ ߛߎ߯ߦߊ ߟߎ߬ ߟߊߦߌ߬ߙߌ߲߬ߘߌ ߘߐ߫ ߒߞߏ ߘߐ߫߸ ߣߴߊ߬ߟߎ߬ ߟߊ߫ ߖߐ߲ߓߐ߲ ߦߋ߫ ߡߐ߰ ߛߌߦߊߡߊ߲߫ ߓߟߏ߫ ߓߌ߬߸ ߏ߬ ߡߊߡߙߊ߬ߓߊ߮ ߟߋ߬ ߕߘߍ߬ ߤߊߓߌ߫ ߛߋߞߎ ߣߌ߲߬ ߘߌ߫߸ ߊ߬ ߟߊ߫ ߞߟߊ߬ߣߐ ߦߋ߫ ߖߐ߲ߓߐ߲߫ ߛߌߦߊߡߊ߲߫ ߞߊ߲߬، ߏ߬ ߘߐ߫߸ ߝߊ߬ߛߏ߬ ߞߊ߲ ߠߎ߬ ߞߐߡߊߓߌ߲ߓߌ߲ߠߊ ߟߋ߬߸ ߤߊߟߌ߬ ߣߴߊ߬ ߛߐ߬ߘߐ߲߬ ߘߊ߫ ߞߏ߫ ߊ߬ ߟߊ߫ ߞߊ߬ߝߊ ߣߌ߲߬ ߛߓߍߣߍ߲߫ ߝߊ߬ߙߊ߲߬ߛߌ߬ ߞߊ߲ ߠߋ߬ ߘߐ߫߸ ߞߊ߬ ߞߐ߲߰ ߊ߬ ߛߓߍ ߢߍ߫ ߒߞߏ ߘߐ߫ ߥߊ߯ߕߌ߫ ߣߊ߬ߕߐ ߟߎ߬ ߘߐ߫.

ߊ߬ ߟߊ߫ ߞߊ߬ߝߊ ߣߌ߲߬ ߢߍߛߓߍ ߞߍߣߍ߲߫ ߟߊߡߙߊߣߊ߫ ߜ߭ߏߞߌ߬ ߓߊߙߌ߫ ߟߋ߬ ߓߟߏ߫، ߞߊ߬ߝߊ ߣߌ߲߬ ߦߴߊ߬ ߞߊ߬ߙߊ߲߬ߓߊ߮ ߟߎ߬ ߞߟߌ߫ ߟߊ߫ ߞߎߡߊ ߘߏ߲߬ߖߟߎ߬ߡߊ߬ ߞߏ߬ߢߌߡߊ߬ ߟߋ߬ ߡߊ߬߸ ߞߎߡߊ߫ ߓߛߍ ߟߎ߬ ߟߊ߫߸ ߡߍ߲ ߦߴߌ ߞߣߐ߫ ߞߵߏ߬ ߝߐ߫߸ ߊ߬ ߘߏ߲߬ ߦߋ߫ ߓߍ߲߬ ߖߊ߬ߡߊ ߡߊ߬.

ߞߎߡߊ ߡߍ߲ ߦߋ߫ ߞߊ߬ߝߊ ߣߌ߲߬ ߟߊ߬ߢߌߣߌ߲ ߝߐ߫ ߟߊ߫: ߏ߬ ߟߋ ߞߎߡߊ ߞߊ߬ߙߊ߲ ߘߌ߫߸ ߞߊ߬ ߥߊ߬ߞߊߟߌ ߛߐ߬ߘߐ߲߬߸ ߓߍ߯ ߦߋ߫ ߛߴߊ߬ ߕߟߏߡߊߟߐ߬ ߟߴߌ ߟߊ߫.